𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴏𐴞 𐴏𐴞 𐴄𐴞 𐴁𐴞 𐴑𐴠𐴔𐴌𐴝 𐴓𐴝𐴒𐴝𐴘 𐴁𐴤𐴝𐴌 𐴊𐴝𐴁𐴞 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴃 𐴄𐴠𐴑𐴕𐴝𐴉𐴢-𐴀𐴟𐴑𐴤𐴞𐴘𐴝 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 , 𐴊𐴞𐴕 𐴊𐴞𐴕 𐴀𐴡𐴉𐴥𐴡𐴌𐴝𐴊 𐴀𐴥𐴡𐴑𐴧𐴡𐴓 𐴁𐴝𐴌𐴥𐴠𐴌 , 𐴇𐴥𐴝𐴘𐴎𐴤𐴝𐴑 𐴒𐴡𐴌𐴥𐴝 , 𐴑𐴤𐴟𐴕 𐴒𐴡𐴌𐴥𐴝 , 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞 , 𐴀𐴠𐴕𐴋𐴞𐴓𐴧𐴝 𐴀𐴡𐴉𐴥𐴡𐴌𐴝𐴊 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴁𐴝𐴌𐴥𐴠𐴌 𐴈𐴥𐴡𐴁𐴡𐴌 𐴌𐴝𐴑𐴤𐴠𐴊𐴠 𐴇𐴥𐴝𐴓𐴑𐴝 𐴀𐴥𐴡𐴑𐴧𐴡𐴓𐴠 , 𐴀𐴡𐴉𐴥𐴡𐴌𐴝𐴊𐴡𐴌 𐴁𐴝𐴌𐴥𐴝 𐴈𐴡𐴔𐴝𐴘 𐴁𐴤𐴡𐴓𐴧𐴝 , 𐴀𐴡𐴉𐴥𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴏𐴞𐴕𐴧𐴡 𐴒𐴡𐴌𐴥𐴞 𐴁𐴤𐴡𐴓𐴧𐴝 , 𐴁𐴡𐴓𐴡𐴑 𐴀𐴥𐴡𐴑𐴧𐴡𐴓𐴡𐴃 𐴏𐴞 𐴏𐴞 𐴄𐴞 𐴁𐴞 𐴑𐴠𐴔𐴌𐴝 𐴓𐴝𐴒𐴝𐴘 𐴁𐴤𐴡𐴓𐴧𐴝 𐴊𐴝𐴁𐴞 𐴒𐴡𐴙𐴅𐴧𐴤𐴙𐴠 𐴱𐴱

𐴊𐴞𐴕𐴡𐴌 𐴈𐴝𐴓𐴠 𐴑𐴠𐴀𐴠𐴔𐴡𐴌𐴠 𐴐𐴤𐴝𐴐𐴡𐴕 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴏𐴝𐴀𐴝 𐴏𐴞𐴃𐴝 𐴒𐴡𐴌𐴥𐴝 𐴎𐴝𐴀𐴝 , 𐴔𐴡𐴕𐴃𐴡𐴌 𐴌𐴝𐴙𐴃𐴡𐴌 𐴀𐴝𐴁𐴡𐴏𐴃𐴝 𐴑𐴤𐴟𐴂𐴢 𐴈𐴥𐴡𐴌𐴝𐴂𐴢 ,𐴌𐴝𐴃𐴞𐴘𐴝 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴁𐴠𐴐𐴤𐴞 𐴁𐴝𐴌𐴥𐴞 𐴎𐴝𐴀𐴝 𐴒𐴤𐴡𐴘 , 𐴀𐴥𐴠𐴃𐴡𐴓𐴧𐴝 𐴌𐴝𐴙𐴃𐴡𐴌 𐴈𐴝𐴓𐴠 𐴐𐴤𐴝𐴊𐴡𐴌𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴋𐴡𐴌𐴡𐴃𐴱𐴱

𐴈𐴥𐴝𐴏𐴢 𐴒𐴡𐴌𐴞 𐴔𐴟𐴇𐴞𐴁𐴧𐴟𐴓𐴧𐴝𐴌 𐴑𐴤𐴟𐴕𐴡𐴌 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴀𐴝𐴃𐴡𐴚𐴁𐴝𐴊𐴞 𐴋𐴦𐴝𐴘 𐴀𐴥𐴡𐴑𐴧𐴡𐴓𐴡𐴌 𐴕𐴝𐴔 𐴔𐴟𐴀𐴟𐴕𐴃𐴟 𐴀𐴝𐴙𐴐𐴧𐴤𐴙𐴠 , 𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴵 𐴱 – 𐴰 𐴲 𐴉𐴟𐴕𐴊𐴤𐴡𐴌𐴡𐴌 𐴃𐴟 𐴑𐴟𐴌𐴞 𐴉𐴡𐴙𐴅𐴧𐴡𐴕𐴃𐴡 𐴀𐴝𐴃𐴡𐴚𐴁𐴝𐴊𐴞𐴌 𐴒𐴟𐴌𐴥𐴟𐴂𐴢 𐴀𐴝𐴏𐴥𐴠 𐴱𐴱

𐴉𐴟𐴓𐴞𐴐𐴡𐴌 𐴈𐴟𐴖𐴝 𐴔𐴝𐴀𐴝𐴙𐴑 𐴶 𐴱 𐴰 𐴲 𐴐𐴤𐴡𐴕𐴡𐴃 𐴀𐴟𐴑𐴤𐴞𐴘𐴝 𐴀𐴝𐴌 𐴄𐴠𐴑𐴕𐴝𐴉𐴢 𐴃𐴤𐴝𐴕𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴳 𐴱 𐴖𐴥𐴝𐴕 𐴀𐴥𐴝𐴣𐴃𐴞𐴘𐴝𐴌𐴡𐴌 𐴔𐴝𐴀𐴝𐴔𐴠𐴓𐴝 𐴉𐴥𐴝𐴙𐴓 𐴒𐴡𐴙𐴅𐴧𐴤𐴙𐴝 𐴀𐴝𐴏𐴥𐴠 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴃𐴞𐴕𐴧𐴥𐴝𐴕 𐴁𐴝𐴌𐴥𐴞 𐴶 𐴱 𐴖𐴥𐴝𐴕 𐴀𐴥𐴡𐴘𐴧𐴠 , 𐴰 𐴲 𐴰 𐴲 𐴐𐴤𐴡𐴕𐴡𐴃 𐴁𐴝𐴌𐴥𐴞𐴘𐴡𐴌𐴠 𐴶 𐴲 𐴐𐴤𐴝𐴕 𐴀𐴥𐴡𐴘𐴧𐴠 , 𐴀𐴠 𐴁𐴡𐴏𐴥𐴡𐴌 𐴀𐴝𐴒𐴤𐴡𐴌 𐴒𐴤𐴞𐴕 𐴁𐴦𐴝𐴊𐴠 𐴀𐴥𐴝𐴣𐴃𐴞𐴘𐴝𐴌𐴡𐴌 𐴔𐴝𐴀𐴝𐴔𐴠𐴓𐴝 𐴵 𐴱 𐴖𐴥𐴝𐴕 𐴔𐴟𐴀𐴟𐴕𐴃𐴟 𐴀𐴝𐴙𐴐𐴧𐴤𐴙𐴠 𐴱𐴱

𐴔𐴝𐴀𐴝𐴔𐴠𐴓𐴝 𐴀𐴥𐴞𐴀𐴞𐴕𐴡𐴃 𐴉𐴝𐴀𐴝 𐴒𐴞𐴘𐴠𐴊𐴝 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴙𐴓𐴊𐴠 , 𐴴 𐴱 𐴖𐴝 𐴊𐴠𐴐𐴤𐴞 𐴉𐴞𐴏𐴃𐴡𐴓 𐴴 𐴴 𐴐𐴤𐴗𐴝 𐴀𐴠𐴓 𐴅𐴞 , 𐴃𐴞𐴕𐴧𐴥𐴗𐴝 𐴁𐴞𐴊𐴠𐴐𐴤𐴞 𐴉𐴞𐴏𐴃𐴡𐴓 , 𐴰 𐴳 𐴐𐴤𐴗𐴝 𐴏𐴥𐴞𐴚 𐴒𐴠𐴓 𐴁𐴠𐴌𐴠𐴓 𐴁𐴡𐴕𐴋𐴟𐴑 , 𐴵 𐴲 𐴐𐴤𐴗𐴝𐴌𐴃𐴟 𐴁𐴤𐴝𐴌𐴥𐴡 𐴁𐴠𐴐𐴤𐴞 𐴀𐴦𐴡𐴙𐴕𐴞 𐴀𐴥𐴝𐴣𐴃𐴞𐴘𐴝𐴌 , 𐴀𐴝𐴌 𐴏𐴝𐴙𐴌 𐴒𐴤𐴗𐴝 𐴉𐴥𐴝𐴙𐴉𐴢 𐴒𐴦𐴝𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴔𐴟𐴄 𐴳 𐴲 𐴱 𐴐𐴤𐴗𐴝 𐴀𐴥𐴝𐴣𐴃𐴞𐴘𐴝𐴌 𐴉𐴝𐴀𐴝 𐴒𐴞𐴘𐴠 𐴱𐴱

𐴄𐴠𐴑𐴕𐴝𐴉𐴡𐴌 𐴕𐴥𐴞𐴓𐴝 𐴘𐴟𐴕𐴞𐴘𐴡𐴕𐴡𐴌 𐴏𐴞𐴘𐴝𐴌𐴔𐴠𐴕 / 𐴌𐴝𐴐𐴠𐴊 𐴔𐴝𐴇𐴔𐴟𐴊𐴠 𐴈𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝𐴌 𐴉𐴥𐴟𐴣𐴖𐴝𐴣𐴃𐴞 𐴏𐴞 𐴏𐴞 𐴄𐴞 𐴁𐴞 𐴑𐴠𐴔𐴌𐴝 𐴓𐴝𐴒𐴝𐴀𐴡𐴕 𐴀𐴥𐴡 𐴁𐴠𐴐𐴤𐴞 𐴎𐴡𐴌𐴟𐴌𐴞 , 𐴉𐴥𐴝𐴓𐴡𐴚 𐴈𐴥𐴝𐴓𐴞𐴌 𐴏𐴞𐴘𐴝𐴌𐴔𐴠𐴕𐴠 𐴘𐴥𐴡 𐴀𐴡𐴉𐴥𐴡𐴌𐴝𐴊 𐴀𐴝𐴌 𐴑𐴟𐴈𐴝𐴔 𐴈𐴡𐴔𐴝𐴘 𐴁𐴤𐴡𐴓𐴧𐴝 𐴏𐴞 𐴏𐴞 𐴄𐴞 𐴁𐴞 𐴑𐴠𐴔𐴌𐴝 𐴓𐴝𐴒𐴝𐴀𐴡𐴕 𐴎𐴡𐴌𐴟𐴌𐴞 𐴁𐴡𐴓𐴞 𐴈𐴡𐴘𐴧𐴠 , 𐴴 𐴱 𐴀𐴠 𐴂𐴞 𐴁𐴞 𐴀𐴠𐴕𐴡𐴌 𐴀𐴠𐴏𐴢 𐴂𐴞 / 𐴕𐴡𐴀𐴞𐴔𐴟𐴓 𐴇𐴥𐴡𐴑𐴠 𐴘𐴥𐴡 𐴑𐴠𐴔𐴌𐴝 𐴓𐴝𐴒𐴝𐴀𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : ukhiyvnews.com