𐴎𐴝𐴝𐴒𐴝 𐴓𐴝𐴌𐴞 𐴌𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴒𐴤𐴡𐴌𐴒𐴟𐴐𐴧𐴤𐴞𐴌 𐴀𐴥𐴠𐴍𐴠 𐴎𐴝𐴘𐴁𐴝𐴌 𐴀𐴠𐴅𐴝𐴎𐴡𐴃 𐴊𐴞𐴘𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴑𐴟𐴃𐴝 𐴑𐴟𐴙𐴃𐴧𐴝 𐴑𐴠𐴀𐴠𐴔𐴡𐴃 𐴎𐴝𐴔 𐴈𐴡𐴔𐴝𐴘𐴁𐴤𐴡𐴓𐴧𐴝 , 𐴓𐴡𐴒𐴁𐴤𐴡𐴒𐴢 𐴰 𐴰 𐴰 𐴰 𐴰 𐴱 𐴀𐴠𐴑 𐴓𐴥𐴝𐴑 𐴓𐴡𐴃𐴞 𐴌𐴞𐴉𐴟𐴎𐴞 𐴓𐴝𐴌𐴞 𐴉𐴥𐴠𐴓𐴡𐴀𐴡𐴕 𐴋𐴤𐴝𐴑𐴝𐴌 𐴔𐴡𐴑𐴏𐴥𐴡𐴊 , 𐴊𐴟𐴘 𐴁𐴡𐴏𐴥𐴡𐴌 𐴀𐴝𐴒𐴠 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴝 𐴐𐴤𐴟𐴌𐴟 𐴒𐴡𐴌𐴥𐴝 𐴒𐴞𐴘𐴠 𐴱𐴱

𐴘𐴥𐴝𐴀𐴝 𐴓𐴡𐴃𐴞 𐴀𐴠𐴈𐴥𐴡𐴕 𐴀𐴠𐴑𐴡𐴔 𐴁𐴝𐴌 𐴀𐴥𐴞𐴃𐴝𐴌𐴝𐴌𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴠 𐴁𐴠𐴌𐴝𐴘𐴃𐴤𐴡 𐴎𐴝𐴘𐴁𐴝𐴌 𐴀𐴡𐴕𐴟𐴔𐴡𐴃𐴞 𐴊𐴞𐴘𐴠 , 𐴊𐴠𐴐𐴢 𐴏𐴥𐴝𐴌𐴝 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 , 𐴎𐴞𐴃𐴝𐴌𐴝 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 ,𐴀𐴥𐴠𐴃𐴧𐴟 𐴓𐴡𐴒𐴁𐴤𐴡𐴒𐴢 𐴰 𐴰 𐴰 𐴰 𐴲 𐴑𐴟𐴌𐴞 𐴇𐴥𐴝𐴎𐴝𐴌 𐴌𐴞𐴉𐴟𐴎𐴞 𐴀𐴝𐴒𐴠 𐴓𐴡𐴃𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘𐴧𐴝 𐴀𐴝𐴏𐴥𐴠 𐴱𐴱

𐴕𐴞𐴌𐴡𐴐𐴢 𐴁𐴤𐴝𐴎𐴝 𐴋𐴞𐴘𐴝𐴃 𐴕𐴞𐴎𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴃𐴟 𐴸 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 , 𐴀𐴥𐴞𐴃𐴝𐴌𐴝𐴌 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴡𐴌𐴠 𐴏𐴝𐴘𐴃𐴤𐴡 𐴎𐴝𐴘𐴁𐴡𐴓𐴧𐴥𐴝 𐴇𐴥𐴡𐴑𐴟𐴔𐴡𐴃𐴠 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴠𐴅𐴝𐴎𐴡𐴃 𐴊𐴞𐴘𐴠,𐴀𐴠𐴑𐴧𐴤𐴝𐴕 𐴕𐴠𐴁𐴤𐴞𐴌 𐴎𐴦𐴝𐴣𐴏𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴤𐴟 𐴀𐴥𐴞𐴃𐴝𐴌𐴝𐴌𐴠 𐴆𐴞𐴄𐴝𐴚 𐴀𐴝𐴙𐴕𐴧𐴙𐴠 , 𐴘𐴥𐴝𐴀𐴝𐴕𐴃𐴟 𐴊𐴟𐴘𐴧𐴝𐴕 𐴁𐴦𐴝𐴏𐴢 𐴒𐴝𐴌𐴞 𐴓𐴡𐴘 𐴑𐴠𐴀𐴠𐴔𐴡𐴃 𐴓𐴡𐴘 𐴒𐴞𐴘𐴠 𐴁𐴡𐴓𐴞 , 𐴉𐴝𐴕𐴥𐴞𐴌 𐴉𐴥𐴡𐴗𐴏𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 𐴘𐴠 ( 𐴀𐴠 𐴀𐴠𐴉𐴢 𐴂𐴞 ) 𐴌𐴥𐴠 𐴁𐴟𐴙𐴃 𐴁𐴝𐴌𐴠 𐴈𐴡𐴘𐴧𐴠 𐴱𐴱

𐴁𐴤𐴝𐴐𐴡𐴕 𐴏𐴡𐴌 𐴋𐴞𐴘𐴝𐴃 𐴃𐴤𐴝𐴑𐴤𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞𐴌𐴠 𐴏𐴝𐴘𐴃𐴤𐴡 𐴎𐴝𐴘𐴁𐴡𐴓𐴧𐴥𐴝 𐴀𐴠𐴑𐴀𐴡𐴔 𐴁𐴝𐴌 𐴀𐴠𐴅𐴝𐴎𐴡𐴃 𐴊𐴞𐴘𐴠𐴊𐴠 , 𐴑𐴟𐴊𐴟𐴌𐴟𐴃𐴞 𐴀𐴝𐴉𐴡𐴃𐴡𐴌 𐴈𐴥𐴡𐴁𐴡𐴌 𐴊𐴤𐴡𐴌𐴡𐴙𐴕𐴧𐴝 𐴋𐴞𐴂𐴝𐴌𐴔𐴠𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴕𐴝𐴔 𐴕𐴡 𐴈𐴡𐴀𐴡𐴕𐴡𐴌 𐴐𐴡𐴌𐴥𐴡𐴃 𐴓𐴡𐴘 𐴈𐴡𐴘𐴧𐴠𐴊𐴠 , 𐴇𐴥𐴡𐴑𐴟𐴔𐴡𐴃𐴠 𐴉𐴡𐴙𐴃𐴧𐴡 𐴔𐴥𐴝𐴐𐴤𐴡𐴃 𐴈𐴡𐴔𐴡𐴃 𐴊𐴟𐴘 𐴄𐴦𐴞𐴂𐴢 𐴎𐴝𐴘𐴁𐴝𐴌 𐴀𐴠𐴅𐴝𐴎𐴡𐴃 𐴊𐴞𐴀𐴞𐴁𐴝𐴌 𐴉𐴥𐴠𐴘𐴏𐴠𐴓𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠𐴑𐴀𐴡𐴔 𐴒𐴟𐴌𐴟𐴂𐴢 𐴔𐴡𐴚𐴒𐴡𐴓 𐴁𐴝𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴌𐴃𐴟 𐴑𐴠𐴀𐴠𐴔𐴡𐴃 𐴉𐴡𐴣𐴀𐴡𐴙𐴏𐴧𐴙𐴠 , 𐴁𐴡𐴀𐴡𐴃 𐴔𐴥𐴝𐴐𐴢 𐴏𐴥𐴞𐴌𐴝 𐴃𐴤𐴝𐴑𐴤𐴞 𐴁𐴦𐴝𐴊𐴠 𐴁𐴠𐴐𐴤𐴞 𐴅𐴡𐴎𐴁𐴝𐴌 𐴏𐴥𐴝𐴣𐴀𐴝𐴃𐴠 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴕𐴞𐴎𐴝𐴘 𐴁𐴤𐴡𐴊𐴠 𐴓𐴞𐴏𐴄𐴤𐴞𐴃 𐴀𐴝𐴣𐴀𐴝𐴌 𐴕𐴝𐴔 𐴉𐴝𐴘 𐴁𐴦𐴝𐴊𐴠 𐴀𐴝𐴣𐴀𐴝𐴌 𐴏𐴟𐴒𐴤𐴡𐴌 𐴉𐴝𐴕𐴥𐴞 𐴌𐴝𐴑𐴤𐴞 𐴕𐴡𐴀𐴡 𐴉𐴝𐴌𐴞 𐴁𐴡𐴓𐴞 𐴔𐴟𐴇𐴝𐴔𐴧𐴡𐴊 𐴇𐴥𐴟𐴏𐴝𐴙𐴕𐴠 𐴈𐴡𐴘𐴧𐴠 , 𐴀𐴝𐴣𐴀𐴝𐴌 𐴁𐴡𐴌𐴡 𐴁𐴤𐴝𐴘 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠 , 𐴎𐴞𐴕𐴊𐴞𐴒𐴞𐴃 𐴀𐴝𐴁𐴧𐴝𐴌 𐴕𐴡 𐴊𐴠𐴙𐴑𐴧𐴤𐴟𐴔 𐴁𐴡𐴓𐴞 𐴁𐴟𐴎𐴧𐴤𐴞𐴓𐴝𐴀𐴝𐴔 𐴱𐴱

Sources : Dhakatribune