𐴀𐴝𐴌𐴅𐴠𐴕𐴄𐴤𐴞𐴕𐴥𐴝𐴌 𐴀𐴝𐴊𐴝𐴓𐴡𐴃𐴠 𐴁𐴡𐴌𐴔𐴥𐴝𐴌 𐴁𐴠𐴌𐴟𐴊𐴧𐴤𐴠 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴡 𐴱𐴱

𐴒𐴝𐴔𐴁𐴞𐴘𐴝 𐴘𐴠 𐴹 𐴱 𐴰 𐴲 𐴐𐴤𐴡𐴕𐴡𐴃 , 𐴁𐴡𐴌𐴔𐴥𐴝 𐴘𐴠 𐴅𐴠𐴕𐴟𐴏𐴥𐴝𐴙𐴋 𐴏𐴟𐴑𐴃𐴞 𐴕𐴝𐴔𐴝𐴌 𐴀𐴟𐴓𐴋𐴝 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴃𐴡𐴓𐴧𐴝 𐴁𐴡𐴌𐴔𐴥𐴝𐴌 𐴁𐴠𐴌𐴟𐴊𐴧𐴤𐴠 , 𐴀𐴝𐴘 𐴏𐴞 𐴅𐴠 𐴑𐴦𐴟𐴍𐴡𐴃 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴧𐴞𐴀𐴞𐴓 , 𐴌𐴟𐴇𐴝𐴙𐴚𐴒𐴙𐴝𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠 𐴊𐴠 𐴘𐴥𐴝𐴀𐴝𐴕𐴡𐴌𐴓𐴝 , 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴐𐴤𐴡𐴣𐴀𐴡 𐴔𐴠𐴓𐴠𐴄𐴠𐴌𐴞𐴌 𐴋𐴡𐴣𐴀𐴡𐴌 𐴐𐴤𐴝𐴀𐴝𐴉𐴢 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴱𐴱

𐴀𐴝𐴌𐴅𐴠𐴕𐴄𐴤𐴞𐴕𐴥𐴝𐴌 𐴀𐴝𐴊𐴝𐴓𐴡𐴃𐴠 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴤𐴡𐴓𐴧𐴝 𐴈𐴝𐴛 𐴁𐴝𐴌𐴥𐴝𐴘𐴧𐴠 𐴁𐴡𐴓𐴞 ( 𐴁𐴡𐴌𐴥𐴡𐴑 ) 𐴃𐴡𐴕𐴎𐴞𐴔𐴠 𐴈𐴡𐴘𐴧𐴠 , 𐴀𐴝𐴌𐴅𐴠𐴕𐴄𐴤𐴞𐴕𐴥𐴝𐴌 𐴁𐴠𐴕𐴝𐴏𐴢 𐴀𐴝𐴘𐴌𐴠𐴏𐴢 𐴐𐴤𐴡𐴀𐴡𐴌𐴡𐴃 𐴀𐴝𐴏𐴥𐴠𐴊𐴠 𐴊𐴟𐴘𐴀𐴡𐴔 𐴉𐴥𐴡𐴗𐴏𐴊𐴝𐴌𐴞 𐴀𐴝𐴊𐴝𐴓𐴡𐴃𐴠 , 𐴊𐴠𐴐𐴁𐴞𐴊𐴠𐴐𐴤𐴞 𐴀𐴠𐴑𐴃𐴞𐴘𐴝𐴌𐴡𐴌 𐴀𐴝𐴕𐴋𐴤𐴝𐴌𐴠, 𐴁𐴡𐴌𐴔𐴥𐴝𐴌 𐴋𐴡𐴣𐴀𐴡𐴌 𐴀𐴡𐴉𐴥𐴞𐴏𐴝𐴌 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 ,𐴕𐴡𐴖𐴡𐴔𐴁𐴡𐴌𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴀𐴡𐴊𐴧𐴞𐴔𐴝

𐴑𐴤𐴟𐴙𐴓𐴧𐴙𐴠𐴊𐴠 𐴘𐴥𐴝𐴀𐴝𐴕 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 , 𐴀𐴠𐴕𐴋𐴞𐴓𐴧𐴝 𐴁𐴡𐴌𐴝𐴁𐴡𐴌 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴡𐴓𐴧𐴝 , 𐴁𐴡𐴌𐴥𐴡𐴑 𐴃𐴡𐴕𐴎𐴞𐴔𐴠 𐴹 𐴱 𐴰 𐴲 𐴐𐴤𐴡𐴕 𐴕𐴡𐴖𐴡𐴔𐴁𐴡𐴌 𐴔𐴥𐴝𐴐𐴡𐴃 𐴀𐴝𐴌𐴅𐴠𐴕𐴄𐴤𐴞𐴕𐴥𐴝𐴌 𐴀𐴝𐴊𐴝𐴓𐴡𐴃𐴡𐴃 𐴀𐴠𐴑𐴀𐴡𐴔 𐴊𐴡𐴌𐴈𐴥𐴝𐴏𐴢 𐴊𐴝𐴈𐴥𐴞𐴓 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

𐴘𐴝𐴀𐴝𐴕 𐴀𐴠𐴑𐴧𐴤𐴝𐴕 𐴀𐴝𐴐𐴤𐴝𐴌 𐴊𐴞𐴕 , 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴡𐴓𐴞 𐴕𐴡𐴀𐴡 , 𐴁𐴇𐴡𐴓𐴑𐴤𐴞 𐴎𐴠𐴀𐴠 𐴈𐴡𐴕𐴥𐴡 𐴎𐴝𐴒𐴝𐴃 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴐𐴤𐴞𐴑𐴝𐴌 𐴀𐴥𐴡𐴀𐴡𐴊𐴧𐴠 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴡𐴌𐴓𐴝 , 𐴀𐴝𐴌𐴅𐴠𐴕𐴄𐴤𐴞𐴕𐴥𐴝𐴌 𐴉𐴥𐴝𐴘𐴏𐴠𐴓𐴝 𐴘𐴠 𐴀𐴠 𐴈𐴡𐴃𐴤𐴝 𐴱𐴱

𐴁𐴟𐴎𐴤𐴝𐴌𐴊𐴠 , 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴡𐴕𐴥𐴡 𐴏𐴞𐴏𐴢 𐴓𐴟𐴖𐴝𐴘𐴧𐴝 𐴕𐴡 𐴃𐴤𐴝𐴑𐴤𐴞𐴁𐴡 , 𐴎𐴡𐴒𐴤𐴡𐴙𐴕𐴧𐴡 𐴀𐴡𐴉𐴥𐴡𐴌𐴝𐴊 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 , 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴀𐴠𐴃𐴧𐴠𐴉𐴝𐴑 𐴀𐴥𐴡𐴘 𐴑𐴤𐴟𐴂𐴢 𐴔𐴡𐴎𐴁𐴟𐴃 𐴒𐴡𐴌𐴥𐴞 𐴃𐴤𐴞𐴘𐴝𐴘𐴧𐴠 𐴁𐴡𐴓𐴞 , 𐴁𐴡𐴌𐴥𐴡𐴑 𐴃𐴡𐴕𐴎𐴞𐴔𐴡𐴌 𐴕𐴠𐴃𐴝 / 𐴄𐴤𐴟𐴚 𐴑𐴞𐴕𐴠 𐴈𐴡𐴘𐴧𐴠 𐴱𐴱

𐴔𐴡𐴀𐴡𐴊𐴧𐴞𐴔𐴝 𐴘𐴝𐴀𐴝𐴕 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴁𐴝𐴁𐴡𐴃𐴠 𐴊𐴤𐴡𐴌𐴝 𐴊𐴤𐴡𐴌𐴞 𐴀𐴥𐴡𐴘𐴁𐴡𐴊𐴠 𐴕𐴡𐴀𐴡 , 𐴎𐴝𐴓𐴠𐴔 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞𐴌 𐴇𐴥𐴡𐴑𐴟𐴔𐴡𐴃𐴡𐴃 𐴎𐴟𐴓𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴡𐴌𐴓𐴝 , 𐴑𐴠𐴙𐴏𐴢 𐴘𐴝𐴀𐴝𐴕 𐴀𐴝𐴌𐴑𐴝𐴕𐴡𐴃 𐴁𐴡𐴀𐴡𐴃 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 , 𐴁𐴡𐴌𐴔𐴥𐴝𐴌 𐴇𐴥𐴡𐴑𐴟𐴔𐴡𐴃𐴡𐴌 𐴇𐴥𐴝𐴃𐴡𐴃 𐴎𐴟𐴓𐴟𐴔 𐴈𐴥𐴝𐴀𐴝𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴟𐴃𐴦𐴝𐴓𐴧𐴠𐴑 𐴐𐴤𐴟𐴌𐴟 𐴀𐴥𐴡𐴘𐴁𐴡𐴊𐴠 𐴱𐴱

Sources : Dhakatribune