𐴂𐴡𐴗𐴚𐴎𐴝𐴌 , 𐴀𐴝𐴘 𐴀𐴠𐴕 𐴅𐴞 𐴀𐴡𐴌 𐴀𐴞𐴕𐴏𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴔𐴝𐴌𐴞 𐴊𐴞𐴘𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴂𐴡𐴗𐴚𐴎𐴝 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌𐴓𐴝 𐴊𐴞𐴘𐴠𐴊𐴠 , 𐴀𐴝𐴘 𐴀𐴠𐴕 𐴅𐴞 𐴀𐴡𐴌 𐴀𐴞𐴕𐴏𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 , 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴥𐴡𐴌𐴠 𐴁𐴡𐴌𐴝𐴃 𐴒𐴡𐴌𐴥𐴞 𐴕𐴡 𐴊𐴞𐴀𐴞 , 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴈𐴥𐴝𐴘 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴳 / 𐴃𐴝𐴌𐴥𐴞𐴑 𐴕𐴡𐴖𐴡𐴔𐴁𐴡𐴌 𐴱 𐴲 𐴰 𐴲 𐴐𐴤𐴡𐴕𐴡𐴃 ( 𐴀𐴠𐴕 𐴀𐴝𐴌 𐴏𐴞 ) 𐴁𐴠𐴐𐴤𐴡𐴌𐴑𐴝𐴌𐴞 𐴃𐴡𐴕𐴎𐴞𐴔𐴡𐴌 𐴑𐴠𐴙𐴏𐴧𐴥𐴟 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴠𐴏𐴄𐴝𐴉𐴢 𐴀𐴥𐴡𐴑𐴧𐴡𐴓 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴝𐴐𐴤𐴞𐴑𐴧𐴙𐴝 ( 𐴂𐴡𐴗𐴚𐴎𐴝 ) 𐴉𐴝𐴌𐴝𐴃 𐴎𐴝𐴘 , 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌𐴠 𐴁𐴡𐴌𐴝𐴃 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴥𐴝 , 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴌𐴥𐴠 𐴁𐴠𐴐𐴤𐴞 𐴒𐴡𐴌𐴥𐴞 𐴈𐴡𐴊𐴦𐴟𐴕 𐴄𐴞𐴛𐴝 𐴊𐴞𐴘𐴠 𐴱𐴱

𐴁𐴦𐴝𐴊𐴠 𐴈𐴥𐴝𐴕𐴝 𐴃𐴤𐴝𐴑𐴤𐴝 𐴓𐴡𐴘 𐴊𐴟𐴑 𐴉𐴝𐴀𐴝𐴌 𐴊𐴠 𐴶 𐴱 𐴲 𐴖𐴥𐴝 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴞 𐴌𐴠 𐴒𐴤𐴡𐴌 𐴉𐴞𐴏𐴠” 𐴰 𐴰 𐴰 𐴲 𐴶 𐴱 ” 𐴀𐴠𐴑 𐴓𐴥𐴝𐴑 𐴁𐴝𐴌𐴏𐴥𐴝𐴙𐴄𐴧𐴡 𐴇𐴥𐴝𐴎𐴝𐴌 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴊𐴞𐴀𐴞𐴁𐴡𐴓𐴧𐴥𐴝 𐴈𐴡𐴘𐴧𐴠 , 𐴎𐴦𐴝𐴣 𐴇𐴥𐴡𐴑 ! 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴀𐴥𐴞𐴃𐴝𐴌 𐴔𐴞𐴔𐴁𐴤𐴡𐴌 𐴏𐴝𐴙𐴌 𐴎𐴡𐴕 𐴓𐴡𐴘 𐴔𐴞𐴓𐴞 , ( 𐴀𐴠𐴕 𐴀𐴝𐴌 𐴏𐴞 ) 𐴃𐴡𐴕𐴎𐴞𐴔𐴡𐴌 𐴔𐴝𐴙𐴕𐴐𐴤𐴠 𐴊𐴞𐴘𐴠𐴊𐴠 𐴇𐴥𐴠𐴊𐴝𐴘𐴡𐴃 𐴔𐴡𐴎𐴞𐴕 𐴱𐴱

𐴀𐴞𐴕𐴏𐴝𐴕𐴞𐴘𐴡𐴃𐴞 𐴔𐴡𐴊𐴡𐴊 𐴀𐴥𐴞𐴀𐴞𐴕 𐴸 𐴷 𐴱 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴊𐴞𐴘𐴠 , 𐴁𐴝𐴑𐴞 𐴸 𐴳 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴕𐴡 𐴊𐴞𐴀𐴞 𐴀𐴥𐴟𐴑 𐴆𐴤𐴟𐴑 𐴌𐴥𐴠𐴔𐴥𐴟 𐴐𐴤𐴡𐴣𐴀𐴡 𐴏𐴝𐴙𐴌𐴀𐴥𐴡 𐴎𐴡𐴕𐴠 𐴎𐴠𐴂𐴢 𐴁𐴤𐴡𐴌𐴞 𐴉𐴥𐴠𐴓𐴧𐴝𐴘𐴧𐴠 , 𐴎𐴝𐴕𐴞 𐴉𐴥𐴟𐴕𐴞 ( 𐴀𐴠𐴕 𐴀𐴝𐴌 𐴏𐴞 )𐴌 𐴔𐴡𐴊𐴡𐴊𐴡𐴌𐴃𐴟 𐴔𐴦𐴝𐴌𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴊𐴞𐴕 𐴔𐴡𐴎𐴟𐴌𐴞 𐴈𐴝𐴔 𐴒𐴡𐴌𐴥𐴞 𐴈𐴥𐴝𐴀𐴝 𐴊𐴠 𐴔𐴝𐴕𐴥𐴟𐴙𐴐𐴢 𐴱𐴱

𐴀𐴥𐴠𐴍𐴠 𐴖𐴡𐴌𐴠 𐴀𐴥𐴞𐴃𐴝𐴌𐴝 𐴀𐴝𐴌𐴀𐴥𐴡 𐴀𐴝𐴈𐴥𐴠𐴌𐴞 𐴒𐴡𐴌𐴞𐴁 𐴔𐴝𐴕𐴥𐴟𐴙𐴐𐴢 , 𐴃𐴟𐴖𐴝𐴚𐴒𐴡𐴌 𐴔𐴝𐴙𐴕𐴐𐴤𐴡𐴌 𐴀𐴥𐴠𐴍𐴠 𐴈𐴝𐴔 𐴕𐴡 𐴃𐴤𐴝𐴑𐴡𐴕𐴡𐴌 𐴏𐴥𐴡𐴁𐴡𐴁𐴠 , 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴖𐴝𐴀𐴝𐴙𐴐𐴧𐴤𐴝 𐴃𐴤𐴝𐴑𐴤𐴝 𐴉𐴡𐴌𐴠 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴠 , 𐴎𐴡𐴍𐴞𐴃𐴡 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴠 , 𐴒𐴡𐴌𐴞𐴁 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊𐴡𐴌 𐴄𐴞𐴛𐴝 𐴔𐴝𐴌𐴞 𐴊𐴞𐴘𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴐𐴤𐴡𐴣𐴀𐴡 𐴔𐴞𐴔𐴁𐴤𐴡𐴌 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴃𐴟𐴌𐴥𐴡𐴣𐴃 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴂𐴞𐴓 𐴒𐴡𐴙𐴅𐴧𐴤𐴙𐴠 𐴱𐴱

Sources : Rvision