𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴇𐴥𐴡𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴓𐴠𐴆𐴤𐴙𐴝 𐴀𐴝𐴌 𐴀𐴞𐴕𐴋𐴟𐴕𐴥𐴞𐴆𐴤𐴙𐴝 𐴘𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴠 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴃𐴧𐴟 𐴕𐴠𐴀𐴠𐴓𐴞 𐴊𐴤𐴝𐴘𐴧𐴡𐴌𐴠 𐴔𐴡𐴓𐴠𐴆𐴤𐴙𐴝𐴃 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴔𐴝𐴀𐴝𐴔𐴠𐴓𐴝 𐴘𐴥𐴝𐴀𐴝𐴕 𐴀𐴝𐴌 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴡𐴌 𐴏𐴥𐴡𐴚𐴑𐴡𐴄 𐴀𐴥𐴡𐴑𐴧𐴡𐴓𐴡𐴌𐴠 𐴇𐴥𐴡𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴔𐴡𐴓𐴠𐴆𐴤𐴙𐴝 𐴀𐴝𐴌 𐴀𐴞𐴕𐴋𐴟𐴕𐴥𐴞𐴆𐴤𐴙𐴝 𐴊𐴟𐴕𐴥𐴞 𐴊𐴠𐴐𐴤𐴡𐴌 𐴕𐴠𐴃𐴝 𐴔𐴞𐴓𐴞 , 𐴒𐴡𐴃𐴡 𐴈𐴝𐴙𐴓𐴧𐴝 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴌𐴥𐴠 𐴈𐴡𐴘𐴧𐴠 𐴁𐴡𐴓𐴞 ( 𐴀𐴠 𐴂𐴞 ) 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴈𐴝𐴌𐴥𐴞 𐴓𐴡𐴘 𐴁𐴦𐴝𐴊𐴠 𐴓𐴡𐴃𐴞 , 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴓𐴟𐴄𐴔𐴝𐴌 𐴒𐴡𐴌𐴥𐴠𐴌𐴊𐴠 𐴀𐴥𐴞𐴀𐴞𐴕𐴠 , 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 , 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴒𐴡𐴌𐴥𐴞 𐴁𐴡𐴌𐴔𐴥𐴝𐴌𐴃𐴟 𐴕𐴠𐴀𐴠𐴓𐴞 𐴊𐴤𐴝𐴘 𐴎𐴡𐴀𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴏𐴥𐴡𐴚𐴑𐴡𐴄 𐴈𐴝𐴓𐴡𐴌 𐴖𐴡𐴌𐴠 , 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃 𐴑𐴝𐴕𐴟𐴕𐴞 𐴃𐴡𐴗𐴌𐴠 𐴀𐴝𐴙𐴐𐴧𐴤𐴙𐴠𐴊𐴠 , 𐴔𐴡𐴓𐴠𐴆𐴤𐴙𐴝𐴌 𐴁𐴡𐴌 𐴀𐴟𐴎𐴞𐴌 / 𐴀𐴞𐴏𐴔𐴝𐴀𐴞𐴓 𐴏𐴥𐴝𐴁𐴌𐴞 𐴘𐴝𐴑𐴟𐴁𐴠 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕𐴞 𐴀𐴝𐴌 𐴀𐴝𐴉𐴏𐴥𐴟𐴏𐴢 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 , 𐴀𐴠 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴠 𐴊𐴟𐴘 𐴓𐴥𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴥𐴝𐴃𐴧𐴟 𐴊𐴤𐴝𐴘 𐴔𐴡𐴓𐴠𐴆𐴤𐴙𐴃 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴌𐴝𐴎𐴝𐴌 𐴓𐴡𐴘 𐴔𐴞𐴄𐴤𐴞𐴚 𐴔𐴡𐴐𐴖𐴝𐴌𐴝 𐴉𐴥𐴟𐴌𐴝𐴘 𐴁𐴦𐴝𐴊𐴠 , 𐴔𐴡𐴓𐴠𐴆𐴤𐴙𐴝𐴌 𐴁𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 , 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴐𐴤𐴝𐴕𐴃𐴞 𐴕𐴞𐴌𐴝𐴉𐴡𐴃𐴧𐴝𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴉𐴝𐴌𐴠𐴌 𐴁𐴡𐴓𐴞 𐴈𐴡𐴘𐴓𐴥𐴠 , 𐴒𐴝𐴙𐴌 𐴑𐴝𐴕𐴟𐴕𐴞 𐴃𐴡𐴗𐴌𐴠 𐴔𐴡𐴓𐴠𐴆𐴤𐴙𐴝𐴃 𐴀𐴝𐴘𐴧𐴡𐴙𐴕𐴧𐴝 𐴃𐴤𐴝𐴑𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴈𐴥𐴝𐴔𐴝𐴈𐴥𐴝 𐴁𐴠𐴐𐴤𐴞 𐴈𐴡𐴔𐴞 𐴎𐴝𐴘𐴁𐴡 𐴒𐴤𐴡𐴘 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴔𐴡𐴓𐴠𐴆𐴤𐴙𐴝 𐴀𐴝𐴌 𐴀𐴞𐴕𐴋𐴟𐴕𐴥𐴞𐴆𐴤𐴙𐴝 𐴊𐴟𐴕𐴥𐴞 𐴊𐴠𐴐𐴢 , 𐴁𐴦𐴠𐴐𐴢 𐴐𐴤𐴡𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴡𐴓𐴝 𐴊𐴠𐴐𐴢 𐴀𐴥𐴡𐴘 𐴁𐴦𐴝𐴊𐴠 ,𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴈𐴝𐴌𐴥𐴞 𐴓𐴡𐴘 𐴁𐴦𐴝𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴁𐴠𐴐𐴤𐴞 𐴏𐴞𐴕𐴃𐴝 𐴀𐴝𐴌 𐴀𐴡𐴐𐴤𐴝𐴕𐴃𐴞𐴃 𐴁𐴡𐴓𐴞 , 𐴊𐴟𐴕𐴥𐴞 𐴊𐴠𐴐𐴤𐴠 𐴈𐴡𐴘𐴧𐴠 𐴱𐴱

Sources : RFA