𐴘𐴥𐴝𐴚𐴔𐴝 𐴂𐴝𐴚𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 ( 𐴂𐴞 𐴋𐴞 𐴀𐴠𐴉𐴢 ) 𐴓𐴡𐴘 𐴊𐴞𐴕 𐴁𐴤𐴡𐴌 𐴓𐴝𐴌𐴥𐴝𐴘 𐴱𐴱

𐴏𐴥𐴝𐴘 𐴒𐴤𐴝𐴙𐴚 𐴋𐴞𐴐𐴄𐴤𐴞𐴑 𐴘𐴥𐴝𐴚𐴔𐴝 𐴂𐴝𐴚 𐴐𐴤𐴡𐴀𐴡𐴌𐴡𐴌 𐴉𐴝𐴙𐴓 𐴖𐴝𐴚 𐴃𐴡𐴗𐴚 𐴓𐴥𐴠𐴚 𐴑𐴤𐴗𐴥𐴠𐴌 𐴈𐴝𐴣𐴏𐴝𐴃 , 𐴕𐴡𐴖𐴡𐴔𐴁𐴡𐴌 𐴔𐴥𐴝𐴐𐴡𐴌 𐴹 𐴃𐴝𐴌𐴥𐴞𐴑𐴡𐴃 , 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴔𐴞𐴓𐴝𐴘𐴧𐴝 ( 𐴂𐴞 𐴋𐴞 𐴀𐴠𐴉𐴡𐴌 ) 𐴔𐴝𐴎𐴤𐴠 𐴊𐴞𐴕 𐴁𐴤𐴡𐴌 𐴓𐴝𐴌𐴥𐴝𐴘 𐴏𐴡𐴙𐴓𐴧𐴙𐴠 𐴊𐴠 𐴀𐴥𐴠𐴍𐴠 , 𐴂𐴞 𐴋𐴞 𐴀𐴠𐴉𐴡𐴌 𐴃𐴡𐴌𐴉𐴥𐴡𐴃𐴧𐴟 𐴉𐴝𐴣𐴏𐴢 𐴎𐴡𐴕 𐴔𐴡𐴙𐴅𐴧𐴤𐴙𐴠 , 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴘𐴥𐴡 𐴔𐴡𐴙𐴅𐴧𐴤𐴙𐴠𐴊𐴠 𐴀𐴝𐴏𐴥𐴠 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴂𐴞 𐴋𐴞 𐴀𐴠𐴉𐴢 𐴋𐴦𐴝𐴘𐴧𐴠 𐴈𐴡𐴘𐴧𐴠 𐴱𐴱

𐴏𐴥𐴦𐴝 𐴓𐴥𐴝𐴚 𐴒𐴞𐴌𐴥𐴞𐴌 𐴂𐴞 𐴋𐴞 𐴀𐴠𐴉𐴢 𐴋𐴦𐴝𐴘𐴧𐴠 𐴔𐴡𐴌𐴝 𐴉𐴝𐴣𐴏𐴢 𐴎𐴡𐴕 𐴉𐴝𐴘𐴧𐴠 𐴁𐴡𐴓𐴞 , 𐴘𐴥𐴝𐴚𐴔𐴝 𐴂𐴝𐴚 𐴐𐴤𐴡𐴀𐴡𐴌𐴡𐴌 𐴂𐴞 𐴋𐴞 𐴀𐴠𐴉𐴢 𐴉𐴥𐴡𐴗𐴏𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴒𐴡𐴃𐴡 𐴈𐴝𐴙𐴓𐴧𐴝 𐴊𐴞𐴕𐴁𐴤𐴡𐴌 𐴓𐴝𐴌𐴥𐴝𐴘 𐴏𐴡𐴙𐴓𐴧𐴥𐴙𐴠 , 𐴀𐴥𐴞𐴃𐴝𐴌𐴝 𐴘𐴥𐴡 𐴔𐴝𐴙𐴅𐴧𐴤𐴙𐴠 𐴀𐴠 𐴋𐴤𐴝𐴑𐴡𐴌𐴃𐴟 𐴘𐴥𐴡 𐴔𐴦𐴝𐴙𐴕 𐴓𐴡𐴘 𐴇𐴥𐴝𐴔𐴓𐴝 𐴏𐴡𐴙𐴓𐴧𐴙𐴠 𐴱𐴱

𐴉𐴝𐴙𐴓 𐴖𐴝𐴚 𐴃𐴡𐴗𐴚 𐴀𐴝𐴌 𐴀𐴝𐴚 𐴑𐴠𐴌𐴥𐴝𐴚 𐴃𐴡𐴗𐴚𐴡𐴌 𐴀𐴝𐴃𐴠 𐴈𐴝𐴣𐴏𐴠 𐴀𐴥𐴡𐴘𐴧𐴠𐴊𐴠 𐴓𐴝𐴌𐴥𐴝𐴘𐴃 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴥𐴡𐴗𐴑 𐴏𐴡𐴌𐴥𐴝 𐴉𐴝𐴌𐴝𐴌 𐴀𐴥𐴠 𐴋𐴤𐴝𐴑𐴤𐴡𐴌𐴃𐴟 𐴉𐴝𐴑𐴧𐴤𐴝𐴘 𐴎𐴝𐴀𐴝𐴘 𐴊𐴟𐴘 𐴋𐴤𐴝𐴑𐴡𐴌𐴃𐴟 𐴇𐴥𐴝𐴔𐴓𐴝 𐴒𐴡𐴙𐴅𐴧𐴤𐴙𐴠 , 𐴀𐴥𐴠𐴃𐴡𐴓𐴧𐴝 𐴂𐴞 𐴋𐴞 𐴀𐴠𐴉𐴢 𐴉𐴥𐴡𐴗𐴏𐴢 𐴑𐴠𐴙𐴏𐴧𐴥𐴟 𐴉𐴞𐴏𐴧𐴥𐴝 𐴀𐴝𐴘𐴁𐴤𐴝𐴌 𐴐𐴤𐴡𐴔𐴡 𐴕𐴥𐴡 𐴉𐴝𐴀𐴝 𐴱𐴱

𐴏𐴥𐴦𐴝 𐴓𐴥𐴝𐴚 𐴒𐴞𐴌𐴥𐴞𐴌 𐴂𐴞 𐴋𐴞 𐴀𐴠𐴉𐴢 𐴉𐴥𐴡𐴗𐴏𐴡𐴌𐴃𐴟 𐴏𐴝𐴙𐴌 𐴎𐴡𐴕 𐴀𐴥𐴝𐴣𐴎𐴞 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴀𐴥𐴠𐴃𐴧𐴟 𐴀𐴝𐴙𐴅𐴧𐴙𐴝 𐴃𐴞𐴕 𐴎𐴡𐴕𐴡𐴌 𐴓𐴝𐴐𐴢 𐴉𐴝𐴘𐴧𐴠 , 𐴁𐴝𐴑𐴞 𐴀𐴠𐴑 𐴎𐴡𐴕𐴡𐴌 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴕𐴥𐴡 𐴎𐴝𐴀𐴝 , 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴥𐴡𐴌𐴃𐴟 𐴘𐴥𐴡 𐴔𐴡𐴙𐴅𐴧𐴤𐴙𐴠𐴊𐴠 𐴃𐴤𐴝𐴑𐴞𐴁𐴤𐴡 𐴔𐴡𐴕𐴃𐴡𐴌 𐴈𐴥𐴝𐴄𐴞 𐴒𐴡𐴕𐴝 𐴕𐴡 𐴎𐴝𐴕𐴥𐴞𐴱𐴱

𐴀𐴠𐴑 𐴐𐴤𐴡𐴃 𐴉𐴡𐴙𐴅𐴧𐴡𐴕𐴃𐴡 𐴔𐴠𐴓𐴠𐴄𐴠𐴌𐴞 𐴀𐴥𐴝𐴣𐴍𐴝𐴌 𐴓𐴝𐴘𐴕𐴠 𐴀𐴝𐴘𐴧𐴠𐴌 , 𐴎𐴠𐴈𐴥𐴡𐴕 𐴉𐴝𐴙𐴓 𐴖𐴝𐴚 𐴃𐴡𐴗𐴚 𐴓𐴥𐴠𐴚 𐴑𐴤𐴗𐴥𐴠𐴌 𐴈𐴝𐴣𐴏𐴠 𐴈𐴝𐴣𐴏𐴠 𐴉𐴡𐴣𐴀𐴡𐴙𐴏𐴧𐴥𐴙𐴠 , 𐴃𐴡𐴀𐴡𐴘 𐴘𐴥𐴝𐴚𐴔𐴝 𐴂𐴝𐴚 , 𐴏𐴥𐴦𐴝 𐴓𐴥𐴝𐴚 𐴒𐴞𐴌𐴥𐴞 𐴀𐴝𐴌 𐴑𐴡𐴕𐴞𐴌 𐴊𐴠𐴐𐴤𐴡𐴙𐴃𐴧𐴝 𐴂𐴞 𐴋𐴞 𐴀𐴠𐴉𐴢 𐴉𐴥𐴡𐴗𐴏𐴢 𐴔𐴞𐴓𐴞 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠𐴱𐴱

𐴎𐴠 𐴎𐴞𐴘𐴥𐴝𐴕 𐴉𐴝𐴘𐴧𐴠 𐴘𐴥𐴝𐴀𐴝𐴕 𐴓𐴡𐴘 𐴑𐴤𐴟𐴂𐴢 𐴏𐴥𐴡𐴑𐴃𐴞𐴌 𐴏𐴥𐴝𐴣𐴀𐴝𐴃𐴠 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴠𐴌𐴊𐴠 , 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴡𐴌 𐴎𐴝𐴒𐴝 , 𐴑𐴡𐴕𐴞 , 𐴘𐴥𐴝𐴚𐴔𐴝 𐴂𐴝𐴚 𐴀𐴝𐴌 𐴂𐴟𐴓𐴥𐴠 𐴐𐴤𐴡𐴀𐴡𐴌 , 𐴀𐴞𐴀𐴞𐴕𐴡𐴃 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴐𐴞 𐴘𐴠 𐴊𐴟𐴘 𐴔𐴥𐴝𐴐𐴢 𐴀𐴥𐴡𐴘𐴃𐴠 𐴀𐴞𐴕𐴄𐴝𐴌𐴕𐴥𐴠𐴄 𐴓𐴝𐴙𐴕 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴠 𐴱𐴱

Sources : RFA