𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴉𐴝𐴀𐴝𐴌𐴡𐴃 𐴀𐴥𐴝𐴣𐴃𐴞𐴘𐴝𐴌𐴡𐴌 𐴈𐴝𐴌𐴈𐴥𐴝𐴕𐴝 𐴉𐴝𐴀𐴝 𐴒𐴞𐴘𐴠 , 𐴳 𐴎𐴡𐴕 𐴁𐴡𐴕 𐴱𐴱

𐴀𐴝𐴣𐴐𐴄𐴡 𐴃𐴝𐴌𐴥𐴞𐴑 𐴕𐴡𐴖𐴡𐴔𐴁𐴡𐴌 𐴐𐴤𐴡𐴔 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴏𐴥𐴦𐴡𐴌𐴠 , 𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴀𐴥𐴠𐴑𐴏𐴢 𐴴 𐴏𐴝𐴙𐴌𐴡𐴌 𐴒𐴡𐴀𐴡𐴙𐴕 𐴉𐴝𐴀𐴝𐴌𐴡𐴌 𐴁𐴤𐴟𐴃𐴡𐴌𐴠 ( 𐴀𐴠 𐴁𐴞 𐴀𐴠𐴕 ) 𐴁𐴠𐴄𐴤𐴠𐴓𐴞𐴘𐴠𐴕𐴠 𐴑𐴝𐴌𐴖𐴝𐴘 𐴏𐴝𐴓𐴝𐴘𐴧𐴥𐴠 , 𐴎𐴞𐴘𐴥𐴝𐴕𐴡𐴌𐴥𐴠 𐴵 𐴱 𐴓𐴡𐴔𐴁𐴤𐴡𐴌 𐴌𐴦𐴠𐴁𐴤𐴡𐴌 𐴑𐴠𐴂𐴄𐴞𐴕 𐴑𐴝𐴌𐴕𐴠𐴓 / 𐴈𐴝𐴘𐴌𐴟𐴓 𐴀𐴞𐴏𐴓𐴝𐴔𐴠 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 (𐴱 ) 𐴑𐴟𐴃𐴤𐴟𐴉𐴝𐴓𐴡𐴚 𐴑𐴠𐴀𐴠𐴔 𐴏𐴞-𐴱 𐴅𐴞 𐴁𐴡𐴓𐴡𐴑𐴡𐴃 𐴃𐴤𐴝𐴑𐴠𐴊𐴠 𐴁𐴝𐴘𐴃𐴟𐴓𐴧𐴝𐴇 𐴁𐴝𐴉𐴢 𐴀𐴝𐴎𐴞𐴎𐴟𐴌 𐴌𐴝𐴇𐴔𐴝𐴕 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 ( 𐴲 ) 𐴀𐴥𐴞𐴃𐴝𐴌 𐴁𐴤𐴝𐴘 𐴇𐴥𐴝𐴁𐴞𐴁𐴟𐴓𐴧𐴝𐴇 𐴁𐴡𐴐𐴢 𐴲 𐴳 𐴁𐴡𐴏𐴥𐴡𐴌 (𐴳 ) 𐴀𐴠𐴑𐴧𐴟𐴘 𐴑𐴠𐴀𐴠𐴔𐴡𐴃 𐴅𐴞 𐴁𐴡𐴓𐴡𐴑𐴡𐴃 𐴃𐴤𐴝𐴑𐴠𐴊𐴠 𐴔𐴟𐴇𐴝𐴔𐴧𐴡𐴊 𐴇𐴥𐴝𐴏𐴡𐴕 𐴁𐴝𐴉𐴢 𐴎𐴝𐴇𐴞𐴊 𐴇𐴥𐴟𐴏𐴝𐴙𐴕 𐴁𐴡𐴐𐴢 𐴴 𐴲 𐴁𐴡𐴏𐴥𐴡𐴌 , 𐴑𐴠𐴂𐴄𐴞𐴕 𐴑𐴝𐴌𐴕𐴠𐴓 𐴈𐴝𐴘𐴌𐴟𐴓 𐴀𐴞𐴏𐴓𐴝𐴔𐴠 𐴈𐴡𐴘𐴧𐴠𐴊𐴠 𐴱𐴱

𐴁𐴡𐴀𐴡𐴃 𐴊𐴞𐴕 𐴀𐴥𐴡𐴘𐴃𐴠 𐴀𐴠𐴑 𐴋𐴦𐴝𐴘𐴧𐴠 𐴀𐴠 𐴈𐴝𐴌𐴈𐴥𐴝𐴕𐴝𐴃 𐴀𐴥𐴝𐴣𐴃𐴞𐴘𐴝𐴌 𐴁𐴝𐴕𐴝𐴃 𐴃𐴤𐴝𐴙𐴑𐴧𐴙𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴀𐴠 𐴈𐴝𐴌𐴈𐴥𐴝𐴕𐴝 𐴀𐴞𐴁𐴤𐴝𐴃𐴧𐴟 𐴀𐴥𐴝𐴣𐴃𐴞𐴘𐴝𐴌 𐴊𐴞𐴘𐴝 𐴎𐴝𐴘𐴃𐴡 , 𐴀𐴠𐴈𐴥𐴡𐴕 𐴒𐴟𐴌𐴞𐴕𐴊𐴝 𐴀𐴥𐴡𐴑𐴧𐴡𐴓𐴡𐴌 𐴕𐴡𐴎𐴡𐴌𐴊𐴝𐴌𐴞 𐴁𐴝𐴌𐴥𐴝𐴘 𐴊𐴡𐴀𐴡𐴕𐴡𐴌 𐴁𐴦𐴝𐴊𐴠 , 𐴈𐴝𐴌𐴈𐴥𐴝𐴕𐴝 𐴀𐴞𐴁𐴤𐴝 𐴉𐴡𐴌𐴞𐴏𐴡 𐴒𐴡𐴌𐴥𐴞 𐴓𐴟𐴖𐴝 𐴒𐴞𐴘𐴠 𐴱𐴱

𐴃𐴡𐴀𐴡𐴘 𐴀𐴝𐴎𐴞𐴘𐴝 𐴐𐴤𐴡𐴔 𐴁𐴝𐴌𐴠 𐴑𐴤𐴟𐴂𐴢 𐴏𐴥𐴦𐴡𐴌𐴠 𐴏𐴝𐴙𐴌 𐴒𐴤𐴡𐴕𐴄𐴝𐴌 𐴃𐴤𐴟𐴁𐴤𐴝𐴌𐴥𐴡 𐴁𐴠𐴐𐴤𐴞 𐴒𐴟𐴓𐴞 𐴏𐴝𐴓𐴝𐴏𐴝𐴓𐴞 𐴀𐴥𐴡𐴀𐴡𐴕𐴡𐴌 𐴁𐴦𐴝𐴊𐴠 , 𐴈𐴝𐴌𐴈𐴥𐴝𐴕𐴝 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴝𐴌𐴝 𐴒𐴞𐴘𐴠 , 𐴁𐴦𐴝𐴊𐴠 𐴵 𐴏𐴥𐴗𐴝 𐴉𐴞𐴏𐴃𐴡𐴓 𐴵 𐴏𐴥𐴗𐴝 𐴒𐴦𐴝𐴕 𐴀𐴝𐴌 𐴁𐴠𐴐𐴤𐴞 𐴒𐴡𐴌𐴥𐴞 𐴀𐴥𐴝𐴣𐴃𐴞𐴘𐴝𐴌 𐴁𐴝𐴕𐴝𐴊𐴠 𐴏𐴥𐴝𐴔𐴝𐴕 𐴉𐴝𐴀𐴝 𐴒𐴞𐴘𐴠 𐴱𐴱

𐴑𐴠𐴀𐴠𐴔𐴡𐴃 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴈𐴝𐴔 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴌𐴦𐴠𐴁𐴠 𐴁𐴠𐴐𐴤𐴞 𐴈𐴝𐴔 𐴀𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴀𐴝𐴌 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴟𐴑𐴤𐴞𐴘𐴝 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴞𐴘𐴠 𐴁𐴡𐴓𐴞 𐴈𐴝𐴘𐴌𐴟𐴓 𐴀𐴞𐴏𐴓𐴝𐴔𐴠 𐴈𐴡𐴘𐴧𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴀𐴟𐴑𐴤𐴞𐴘𐴝𐴃 , 𐴌𐴦𐴠𐴁𐴠 𐴀𐴥𐴝𐴣𐴃𐴞𐴘𐴝𐴌 𐴁𐴝𐴕𐴝𐴊𐴠 𐴈𐴝𐴌𐴈𐴥𐴝𐴕𐴝 𐴀𐴟𐴒𐴧𐴤𐴗𐴝𐴌 𐴈𐴥𐴡𐴁𐴡𐴌 𐴉𐴝𐴀𐴝𐴘 , 𐴃𐴞𐴕 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴐𐴤𐴡𐴣𐴀𐴡 𐴈𐴝𐴌𐴈𐴥𐴝𐴕𐴝 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠𐴱𐴱

Sources : Ukhiyanews.com