𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴥𐴠 𐴏𐴞𐴕𐴧𐴡 𐴒𐴡𐴌𐴥𐴞 , 𐴁𐴞𐴏𐴝𐴌𐴡𐴌 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴡𐴕𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴘𐴥𐴝𐴙𐴕 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴓𐴝𐴒𐴝𐴃𐴝𐴌 𐴁𐴡𐴓𐴡𐴃𐴑𐴝𐴌𐴞𐴌 𐴐𐴤𐴞𐴑𐴝𐴌 𐴱𐴱

𐴇𐴥𐴝𐴑𐴞𐴑𐴞 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴇𐴥𐴡𐴑𐴟𐴔𐴡𐴃𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴑𐴝𐴌𐴖𐴝𐴘 𐴕𐴡 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴌 𐴈𐴡𐴊𐴦𐴞𐴕 𐴐𐴤𐴡𐴀𐴡𐴌𐴡𐴃𐴧𐴟 , 𐴁𐴠𐴍𐴞𐴘𐴥𐴝𐴙𐴕 𐴀𐴝𐴌 𐴁𐴠𐴍𐴝𐴀𐴝𐴙𐴕 𐴀𐴝𐴊𐴡𐴔 𐴁𐴞𐴘𐴝𐴌𐴞 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴃𐴡𐴃 𐴁𐴠𐴏𐴝 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴀𐴝𐴌 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴁𐴠𐴍𐴞𐴘𐴥𐴝𐴙𐴕𐴊𐴤𐴡𐴌𐴠 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴝 𐴎𐴝𐴀𐴝𐴌 , 𐴀𐴠𐴈𐴥𐴡𐴕𐴡𐴌 𐴇𐴥𐴝𐴓𐴡𐴃𐴡𐴃 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴌 𐴇𐴥𐴡𐴑𐴟𐴔𐴡𐴃𐴠 𐴕𐴠𐴀𐴠𐴓𐴝𐴘𐴧𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴈𐴡𐴘𐴧𐴠𐴊𐴠 𐴔𐴡𐴎𐴞𐴕 , 𐴀𐴡𐴑𐴄𐴟𐴁𐴡𐴌 𐴔𐴥𐴝𐴐𐴡𐴌 𐴸 𐴀𐴝𐴌 𐴶 𐴲 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 , 𐴀𐴝𐴌𐴑𐴝𐴕𐴡𐴌 𐴈𐴡𐴀𐴠𐴑 𐴎𐴝𐴒𐴝𐴃𐴧𐴤𐴟 , 𐴀𐴝𐴊𐴡𐴔 𐴁𐴞𐴘𐴝𐴌𐴞𐴌 𐴇𐴥𐴝𐴃𐴡𐴌 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴶 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴡𐴑𐴄𐴟𐴁𐴡𐴌 𐴔𐴥𐴝𐴐𐴡𐴃 𐴑𐴤𐴞𐴘𐴝𐴌𐴞 𐴉𐴝𐴌𐴝𐴚𐴡𐴌 𐴁𐴠𐴍𐴞 𐴳 𐴎𐴡𐴕 , 𐴀𐴥𐴟 𐴐𐴞𐴕 𐴑𐴤𐴙𐴝 𐴉𐴝𐴌𐴝𐴌 𐴁𐴠𐴍𐴞 𐴳 𐴎𐴡𐴕 , 𐴀𐴝𐴌 𐴔𐴥𐴟𐴌𐴥𐴟𐴔𐴥𐴝 𐴑𐴠𐴀𐴞𐴚𐴋𐴤𐴡𐴚 𐴌𐴥𐴠𐴑𐴧𐴤𐴗𐴝𐴌 𐴁𐴠𐴍𐴞 𐴀𐴠𐴑 𐴎𐴡𐴕 𐴐𐴤𐴡𐴣𐴀𐴡 𐴳 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 , 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃𐴧𐴤𐴟 𐴀𐴝𐴣𐴍𐴥𐴝𐴌𐴡 𐴁𐴡𐴏𐴥𐴡𐴌𐴡𐴌 𐴕𐴞𐴏𐴡𐴌 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 , 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴁𐴤𐴝𐴉𐴡𐴕𐴝 𐴎𐴟𐴓𐴟𐴔𐴡𐴌𐴃𐴟 𐴁𐴝𐴏𐴞𐴁𐴤𐴡𐴓𐴧𐴝 , 𐴀𐴥𐴠𐴕𐴋𐴞𐴓𐴧𐴝 𐴌𐴟𐴎𐴞 𐴌𐴟𐴎𐴒𐴝𐴌 𐴃𐴟𐴖𐴝𐴘 𐴁𐴤𐴡𐴓𐴧𐴝 𐴊𐴠𐴐𐴤𐴡𐴃𐴧𐴟 𐴕𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘 , 𐴀𐴝𐴌 𐴀𐴝𐴁𐴞𐴘𐴥𐴝𐴃𐴝 𐴔𐴝𐴘𐴧𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴁𐴝𐴉𐴢 𐴔𐴝𐴣 𐴏𐴥𐴝𐴌𐴞 𐴔𐴡𐴓𐴠𐴆𐴤𐴙𐴝 𐴎𐴝𐴘 𐴌𐴟𐴇𐴝𐴙𐴚𐴒𐴙𐴝 𐴁𐴞𐴘𐴥𐴝 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴂𐴧𐴡𐴕𐴠 𐴱𐴱

𐴉𐴡𐴣𐴃𐴤𐴠 𐴒𐴤𐴝𐴣𐴍𐴠 𐴀𐴠𐴊𐴧𐴤𐴟𐴌 𐴓𐴝𐴔𐴁𐴝 𐴏𐴥𐴡𐴉𐴡𐴌𐴡𐴃 𐴕𐴞𐴎𐴡𐴌 𐴀𐴞𐴎𐴧𐴡𐴃 𐴀𐴡𐴑𐴝𐴌 𐴕𐴡𐴐𐴃𐴡 𐴀𐴥𐴡𐴘𐴁𐴡𐴊𐴠 , 𐴀𐴥𐴞𐴀𐴞𐴕 𐴀𐴥𐴟𐴊𐴧𐴝 𐴕𐴡 𐴁𐴤𐴝𐴉𐴡𐴕𐴡𐴃 𐴔𐴡𐴅𐴁𐴟𐴌 𐴀𐴥𐴡𐴘 𐴒𐴞𐴘𐴥𐴡𐴘 , 𐴎𐴞𐴕𐴊𐴞𐴒𐴞𐴌 𐴈𐴡𐴕𐴥𐴡 𐴏𐴞𐴑𐴙𐴟𐴌𐴞𐴄𐴞 𐴕𐴡 𐴏𐴝𐴀𐴝𐴘 , 𐴎𐴠𐴈𐴡𐴕𐴥𐴡 𐴏𐴦𐴟𐴌𐴡𐴃𐴠 𐴔𐴡𐴓𐴠𐴆𐴤𐴙𐴝 𐴉𐴡𐴣𐴏𐴡𐴀𐴡𐴕𐴧𐴝𐴕 𐴀𐴥𐴡𐴙𐴓𐴊𐴠 𐴀𐴥𐴞𐴃𐴝𐴌𐴝𐴌 𐴔𐴡𐴑𐴏𐴡𐴊 , 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴘𐴥𐴝𐴀𐴝𐴕 𐴁𐴟𐴎𐴤𐴞 𐴔𐴡𐴖𐴑𐴝𐴌𐴃𐴟 𐴉𐴥𐴝𐴘𐴊𐴝 𐴃𐴟𐴓𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

, 𐴀𐴠𐴈𐴥𐴡𐴕 𐴇𐴥𐴡𐴑𐴟𐴔𐴡𐴃𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴔𐴡𐴚𐴋𐴤𐴟 , 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴌𐴝𐴏𐴥𐴞𐴊𐴡𐴚𐴡𐴌 𐴔𐴝𐴕𐴥𐴟𐴙𐴐𐴢 , 𐴀𐴥𐴠𐴍𐴠 𐴁𐴤𐴟𐴃𐴡𐴌𐴠 𐴶 𐴹 % 𐴐𐴤𐴡𐴃𐴑𐴝𐴌𐴝 𐴶 𐴹 𐴎𐴡𐴕 𐴀𐴝𐴁𐴞𐴘𐴝𐴃𐴤𐴝 𐴔𐴝𐴘𐴧𐴝 𐴉𐴟𐴖𐴝𐴙𐴕 𐴁𐴝𐴑𐴞 𐴴 𐴏𐴝𐴙𐴌 𐴎𐴡𐴕 𐴒𐴟𐴌𐴝 𐴔𐴡𐴌𐴡𐴃 𐴉𐴟𐴖𐴝𐴙𐴕 𐴱𐴱

𐴋𐴝𐴓𐴝𐴓𐴡𐴌 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴟𐴑 𐴎𐴟𐴁𐴝𐴕𐴞 𐴔𐴡𐴎𐴞𐴕 , 𐴀𐴥𐴞𐴃𐴝𐴌𐴝 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴞𐴃𐴤𐴡 , 𐴁𐴡𐴌𐴔𐴥𐴝𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴎𐴡𐴕 𐴉𐴞𐴏𐴥𐴠 𐴏𐴥𐴡 𐴔𐴡𐴓𐴞𐴘𐴟𐴕 𐴁𐴡𐴌𐴔𐴥𐴝 𐴄𐴞𐴛𐴝 𐴋𐴝𐴓𐴝𐴓𐴡𐴌𐴥𐴠 𐴊𐴞𐴘𐴠 , 𐴑𐴡𐴗𐴔𐴞 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 ( 𐴀𐴠𐴑𐴄𐴞𐴁𐴤𐴞𐴏𐴄 ) 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠𐴊𐴠𐴱𐴱

𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴀𐴝𐴘 𐴀𐴥𐴞𐴃𐴝𐴌𐴝𐴌𐴥𐴠 𐴁𐴤𐴞𐴌𐴝𐴘𐴧𐴠 , 𐴀𐴝𐴌𐴑𐴝𐴕 𐴀𐴝𐴌𐴔𐴞 𐴘𐴠 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 𐴓𐴦𐴡𐴃 𐴓𐴡𐴘𐴎𐴝𐴘 𐴊𐴠𐴀𐴠 , 𐴘𐴥𐴝𐴀𐴝𐴕𐴃𐴟 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴥𐴝𐴣𐴍𐴝𐴌 𐴓𐴝𐴙𐴕𐴠 𐴎𐴕𐴡𐴣𐴓𐴠 𐴎𐴦𐴡𐴣𐴓𐴠 𐴄𐴤𐴝𐴘𐴓𐴠𐴕 𐴕𐴞𐴎𐴝𐴘 𐴊𐴠𐴀𐴠 𐴱𐴱

Sources : Rvision