𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴏𐴥𐴠𐴒𐴠𐴄𐴠𐴌𐴞𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴕𐴟𐴖𐴝 𐴄𐴤𐴞𐴑 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴏𐴥𐴠𐴒𐴠𐴄𐴠𐴌𐴞 / 𐴀𐴠𐴕 𐴄𐴟𐴕𐴞𐴘𐴟 𐴒𐴟𐴄𐴠𐴌𐴥𐴠𐴏𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝𐴌 𐴎𐴝𐴒𐴝𐴃 , 𐴏𐴥𐴞𐴚𐴒𐴝𐴉𐴟𐴌𐴡𐴌 𐴊𐴠𐴐𐴤𐴡𐴙𐴃𐴧𐴝 / 𐴔𐴥𐴞𐴏𐴢 𐴕𐴟𐴓𐴞𐴕 𐴇𐴠𐴎𐴝 𐴌𐴥𐴠 𐴄𐴤𐴞𐴑 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴵 𐴲 / 𐴀𐴡𐴑𐴄𐴟𐴁𐴡𐴌 𐴱 𐴲 𐴰 𐴲 𐴐𐴤𐴡𐴔 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 , 𐴏𐴥𐴠𐴒𐴠𐴄𐴠𐴌𐴞𐴌 𐴀𐴡𐴉𐴥𐴞𐴏𐴥𐴡𐴌𐴃𐴟 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠 𐴇𐴥𐴝𐴉𐴃𐴤𐴝𐴃 𐴈𐴝𐴔𐴡𐴌 𐴔𐴞𐴘𐴝𐴊 𐴉𐴥𐴟𐴌𐴝𐴘 𐴎𐴝𐴘𐴁𐴡 𐴒𐴤𐴡𐴘𐴊𐴠 , 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴔𐴥𐴞𐴏𐴢 𐴑𐴠𐴌𐴞𐴏𐴄𐴞𐴕 𐴁𐴝𐴌𐴒𐴞𐴕𐴝𐴌 𐴎𐴝𐴒𐴝𐴃 / 𐴔𐴥𐴞𐴏𐴢 𐴕𐴟𐴓𐴞𐴕 𐴇𐴠𐴎𐴝 𐴌𐴥𐴠 𐴄𐴤𐴞𐴑 𐴒𐴡𐴙𐴅𐴧𐴤𐴙𐴠 , 𐴳 𐴷 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 / 𐴔𐴥𐴞𐴏𐴢 𐴕𐴟𐴓𐴞𐴕 𐴇𐴠𐴎𐴝 𐴀𐴞𐴁𐴤𐴝 𐴀𐴟𐴒𐴧𐴤𐴗𐴝 𐴐𐴤𐴡𐴔𐴝𐴎 𐴁𐴞𐴒𐴧𐴙𐴝𐴕𐴞 , 𐴀𐴝𐴌 𐴀𐴝𐴒𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴃 𐴈𐴝𐴔 𐴒𐴡𐴙𐴅𐴧𐴤𐴞𐴀𐴞𐴓𐴊𐴠 𐴔𐴞𐴔𐴁𐴤𐴡𐴌 𐴀𐴥𐴡 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴐𐴤𐴞𐴘𐴝 , 𐴂𐴠𐴏𐴞𐴂𐴥𐴞𐴑 𐴎𐴝𐴒𐴝𐴌 𐴔𐴟𐴃𐴦𐴝𐴓𐴧𐴠𐴑 𐴃𐴡𐴌𐴑𐴞 𐴀𐴝𐴌 𐴐𐴤𐴡𐴔𐴝𐴎𐴞 𐴑𐴡𐴔𐴞𐴐𐴠𐴕𐴡𐴌 𐴁𐴡𐴌𐴡 𐴀𐴥𐴞𐴏𐴝𐴉𐴠 , 𐴷 𐴰 𐴰 𐴲 𐴐𐴤𐴡𐴕𐴡𐴌𐴃𐴟 𐴓𐴡𐴃𐴞 𐴴 𐴱 𐴰 𐴲 𐴐𐴤𐴡𐴕 𐴉𐴡𐴙𐴅𐴧𐴡𐴕𐴃𐴡 𐴎𐴞𐴔𐴧𐴝𐴊𐴝𐴌𐴞 𐴓𐴡𐴘 𐴈𐴝𐴔 𐴒𐴡𐴙𐴅𐴧𐴤𐴞𐴀𐴞𐴓 , 𐴀𐴝𐴌 𐴳 𐴱 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴵 𐴱 𐴰 𐴲 𐴐𐴤𐴡𐴕 𐴉𐴡𐴙𐴅𐴧𐴡𐴕𐴃𐴡 𐴄𐴞𐴔𐴟 𐴊𐴠𐴐𐴤𐴡𐴌 𐴔𐴟𐴃𐴦𐴝𐴓𐴧𐴠𐴑 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴏𐴥𐴠𐴒𐴠𐴄𐴠𐴌𐴞𐴌 𐴈𐴥𐴝𐴏𐴢 𐴏𐴡𐴓𐴝𐴇𐴑𐴝𐴌 ( 𐴁𐴟𐴊𐴧𐴤𐴞 𐴊𐴝𐴃𐴝 ) 𐴀𐴥𐴞𐴏𐴝𐴉𐴠 𐴘𐴥𐴡 𐴈𐴝𐴔 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

𐴀𐴝𐴌 𐴄𐴞𐴔𐴟 𐴊𐴠𐴐𐴤𐴡𐴌𐴠 𐴃𐴡𐴌𐴑𐴞 𐴒𐴡𐴌𐴥𐴡𐴕𐴡𐴃 , 𐴊𐴠𐴐𐴢 𐴁𐴝𐴕𐴝𐴘 𐴃𐴟𐴓𐴥𐴡𐴕𐴡𐴃 𐴀𐴝𐴌 𐴐𐴤𐴝𐴕𐴃𐴞 𐴀𐴝𐴕𐴥𐴡𐴕𐴡𐴌 𐴈𐴝𐴔 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 , 𐴀𐴞𐴐𐴤𐴞𐴘𐴝𐴃 𐴂𐴠𐴏𐴞𐴂𐴥𐴞𐴑 𐴃𐴡𐴌𐴑𐴞 𐴀𐴝𐴌 𐴐𐴤𐴡𐴔𐴝𐴎𐴞 𐴈𐴝𐴔𐴡𐴌 𐴁𐴡𐴌𐴡 𐴀𐴥𐴞𐴏𐴝𐴉𐴠 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴥𐴠𐴌𐴊𐴠 𐴀𐴡𐴑𐴃𐴤𐴡𐴃 , 𐴀𐴝𐴏𐴞𐴘𐴠𐴕 𐴓𐴡𐴘 𐴁𐴠𐴐𐴤𐴞 𐴈𐴝𐴣𐴏𐴥𐴠 𐴀𐴥𐴡𐴘 𐴈𐴝𐴔 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝,𐴁𐴡𐴌𐴔𐴥𐴝 𐴊𐴠𐴐𐴤𐴡𐴌𐴥𐴠 𐴃𐴡𐴌𐴑𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌 𐴀𐴡𐴁𐴤𐴝𐴁 𐴈𐴡𐴔𐴝𐴘 𐴁𐴤𐴡𐴓𐴧𐴝 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴉𐴥𐴟𐴣𐴖𐴝𐴣𐴃𐴞 𐴘𐴥𐴡 𐴈𐴝𐴔 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

Sources : RFA