𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌 𐴑𐴤𐴟𐴂𐴢 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕 𐴱𐴱

𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴈𐴥𐴝𐴌𐴝𐴃𐴧𐴟 𐴈𐴥𐴝𐴌𐴝 𐴅𐴡𐴓𐴊𐴞 𐴀𐴡𐴉𐴡𐴌𐴝𐴊𐴞 𐴊𐴟𐴐𐴤𐴞 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴐𐴤𐴝𐴎𐴝 𐴊𐴞𐴀𐴞 𐴁𐴡𐴓𐴧𐴝 𐴋𐴝𐴑 𐴊𐴞𐴘𐴠 , 𐴑𐴡𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴒𐴡𐴙𐴅𐴧𐴤𐴙𐴠𐴊𐴠 , 𐴃𐴡𐴃𐴧𐴝𐴎𐴝 𐴑𐴤𐴟𐴂𐴢 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴇𐴥𐴝𐴔𐴓𐴝𐴌 𐴁𐴝𐴁𐴡𐴃𐴠 , 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴁𐴠𐴐𐴤𐴞 𐴒𐴡𐴌𐴥𐴞 𐴉𐴠𐴌𐴠𐴐𐴝𐴕𐴞 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴎𐴠 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴀𐴠𐴁𐴧𐴠𐴌𐴠 𐴈𐴡𐴔𐴡𐴃 𐴏𐴥𐴡 𐴎𐴡𐴕 𐴌𐴞𐴉𐴟𐴎𐴞 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴁𐴡𐴀𐴡𐴃 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴘𐴦𐴝𐴌 𐴀𐴝𐴒𐴠 𐴘𐴥𐴡 𐴑𐴤𐴟𐴂𐴢 𐴈𐴥𐴡𐴌𐴝𐴁 𐴇𐴥𐴝𐴔𐴓𐴝 𐴀𐴥𐴡𐴘𐴧𐴠𐴊𐴠 𐴀𐴥𐴞𐴀𐴞𐴕𐴡𐴌 𐴁𐴝𐴁𐴡𐴃𐴠 𐴘𐴥𐴡 , 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕 𐴀𐴥𐴡𐴘𐴧𐴠 𐴁𐴡𐴓𐴞 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴕𐴠𐴀𐴠𐴓𐴝𐴘𐴧𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴈𐴡𐴘𐴧𐴠 𐴱𐴱

𐴀𐴝𐴣𐴀𐴝𐴌𐴝 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌𐴠 𐴉𐴥𐴞𐴃𐴞𐴕 𐴀𐴝𐴁𐴧𐴝𐴌𐴀𐴥𐴡 𐴁𐴠𐴐𐴤𐴞 𐴒𐴡𐴌𐴥𐴞 𐴈𐴡𐴀𐴡𐴘𐴌 𐴊𐴠 , 𐴅𐴡𐴓𐴊𐴞𐴌𐴃𐴟 𐴅𐴡𐴓𐴊𐴞 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴇𐴥𐴠𐴉𐴝𐴎𐴡𐴃𐴞 𐴒𐴦𐴝𐴋 𐴁𐴦𐴠𐴐𐴢 𐴒𐴡𐴌𐴥𐴞 𐴁𐴝𐴌𐴥𐴝𐴘 𐴁𐴤𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴡 , 𐴊𐴟𐴐𐴤𐴞 𐴀𐴡𐴉𐴡𐴌𐴝𐴊𐴞 𐴀𐴥𐴡𐴑𐴧𐴡𐴓 𐴀𐴝𐴌 𐴀𐴠𐴕𐴋𐴞𐴓𐴧𐴝 𐴀𐴡𐴉𐴡𐴌𐴝𐴊 𐴀𐴝𐴌 𐴊𐴟𐴐𐴢 𐴒𐴡𐴌𐴥𐴝𐴘𐴧𐴠𐴊𐴠 𐴎𐴞𐴔𐴧𐴝𐴊𐴝𐴌 𐴀𐴥𐴑𐴧𐴡𐴓𐴡𐴌𐴠 𐴊𐴤𐴡𐴌𐴞 𐴁𐴡𐴕 𐴒𐴡𐴌𐴥𐴞 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴀𐴠 𐴇𐴥𐴝𐴔𐴓𐴝 𐴀𐴞𐴁𐴤𐴝 𐴀𐴥𐴡𐴘𐴧𐴠𐴊𐴠 𐴓𐴡𐴒𐴁𐴤𐴡𐴒𐴢 𐴌𐴝𐴙𐴃𐴡𐴌 𐴏𐴝𐴙𐴌 ( 𐴴 ) 𐴁𐴝𐴎𐴠 , 𐴀𐴟𐴑𐴤𐴞𐴘𐴝 𐴁𐴝𐴓𐴟𐴈𐴥𐴝𐴓𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴸 𐴱 𐴁𐴡𐴓𐴡𐴑 𐴓𐴡𐴔𐴁𐴤𐴡𐴌 𐴀𐴠𐴙𐴆 𐴲 𐴵 , 𐴘𐴡𐴃 𐴀𐴝𐴏𐴥𐴠𐴊𐴠 𐴊𐴝𐴌𐴟𐴓 𐴀𐴟𐴓𐴟𐴔 𐴕𐴡𐴊𐴖𐴡𐴃𐴟𐴓 𐴀𐴟𐴓𐴡𐴔𐴝 𐴀𐴝𐴓 𐴀𐴞𐴏𐴓𐴝𐴔𐴞𐴘𐴝𐴇𐴢 𐴔𐴡𐴊𐴡𐴌𐴡𐴏𐴥𐴝𐴃 , 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴀𐴥𐴡𐴊𐴡𐴃 𐴏𐴝𐴙𐴌 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴝𐴌 𐴊𐴟𐴘 𐴎𐴡𐴕 𐴒𐴤𐴝𐴙𐴓 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴔𐴡𐴌𐴞 𐴒𐴞𐴘𐴥𐴡𐴘 , 𐴁𐴡𐴓𐴞 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴐𐴞𐴇𐴝𐴁 𐴑𐴝𐴘𐴏𐴡𐴌𐴠 𐴈𐴡𐴘𐴧𐴠 𐴱𐴱

𐴐𐴤𐴟𐴌𐴟𐴃 𐴇𐴥𐴡𐴑𐴟𐴔𐴡𐴃𐴠 𐴁𐴟𐴎𐴧𐴤𐴞𐴀𐴞𐴓 𐴊𐴠 ! 𐴊𐴟𐴘 𐴋𐴦𐴝𐴘𐴌 𐴔𐴝𐴎𐴤𐴠 𐴉𐴥𐴝𐴙𐴄 𐴀𐴥𐴡𐴘𐴧𐴡𐴌𐴠 𐴔𐴝𐴕𐴥𐴟𐴙𐴐𐴢 𐴔𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 , 𐴔𐴡𐴕𐴃𐴡𐴌 𐴀𐴥𐴠𐴏𐴃𐴝𐴕𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴀𐴝𐴃𐴡𐴚𐴁𐴝𐴊𐴞 𐴋𐴦𐴝𐴘 𐴀𐴟𐴒𐴧𐴤𐴗𐴝 𐴘𐴠 𐴔𐴡𐴊𐴡𐴌𐴡𐴏𐴥𐴝 𐴘𐴦𐴝𐴕 𐴈𐴝𐴌𐴥𐴞 𐴓𐴡𐴘 𐴄𐴠𐴕𐴧𐴞𐴕 𐴒𐴤𐴡𐴌 𐴁𐴝𐴕𐴝𐴘 𐴁𐴤𐴡𐴓𐴧𐴝 𐴏𐴝𐴀𐴝𐴌 𐴊𐴠 𐴀𐴥𐴞𐴃𐴝𐴌𐴝 𐴔𐴝𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : Dhakatribune