𐴁𐴞 𐴅𐴞 𐴂𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴑𐴞𐴋𐴕𐴥𐴝𐴂𐴢 𐴒𐴡𐴌𐴥𐴞 , 𐴌𐴠𐴇𐴥𐴝𐴘𐴊𐴤𐴡𐴕 𐴓𐴡𐴀𐴡𐴘 𐴀𐴠𐴌𐴞 𐴊𐴞𐴘𐴠 𐴱𐴱

𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 ( 𐴁𐴞 𐴅𐴞 𐴂𐴞 ) 𐴘𐴠 𐴀𐴡𐴑𐴄𐴟𐴁𐴡𐴌 𐴔𐴥𐴝𐴐𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 ,𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴥𐴟 𐴐𐴞𐴚 𐴑𐴙𐴝 𐴉𐴝𐴌𐴝𐴌 , 𐴃𐴠𐴌𐴥𐴡 𐴀𐴝𐴌 𐴀𐴟𐴕𐴧𐴥𐴟𐴙𐴐𐴢 𐴁𐴡𐴏𐴥𐴡𐴌𐴡𐴌 𐴔𐴝𐴎𐴤𐴡𐴌 𐴁𐴡𐴐𐴢 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴠 𐴑𐴠𐴋𐴕𐴥𐴝𐴂𐴢 𐴒𐴡𐴌𐴥𐴞 𐴌𐴠𐴇𐴥𐴝𐴘𐴊𐴤𐴡𐴕 𐴓𐴡𐴘 𐴌𐴝𐴙𐴃𐴧𐴝 𐴀𐴠𐴌𐴞 𐴊𐴞𐴘𐴠 𐴱𐴱

𐴀𐴡𐴑𐴄𐴟𐴁𐴡𐴌 𐴔𐴥𐴝𐴐𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 , 𐴘𐴠𐴔𐴥𐴠𐴙𐴄 𐴃𐴡𐴚 𐴉𐴝𐴌𐴝𐴌 𐴁𐴞 𐴅𐴞 𐴂𐴞 𐴑𐴠𐴀𐴠𐴔𐴡𐴃𐴧𐴟 , 𐴉𐴟𐴓𐴞𐴐𐴢 𐴈𐴡𐴊𐴦𐴟𐴕 𐴀𐴥𐴝𐴣𐴎𐴡𐴙𐴕𐴧𐴝 𐴵 𐴁𐴝𐴎𐴠 𐴀𐴥𐴟 𐴐𐴞𐴚 𐴑𐴙𐴝 ( 𐴁𐴟𐴌𐴥𐴝𐴐𐴤𐴞𐴊𐴧𐴤𐴝 ) 𐴉𐴝𐴌𐴝𐴃 , 𐴋𐴝𐴓𐴝𐴓 𐴊𐴤𐴡𐴌𐴞𐴁𐴤𐴡𐴓𐴧𐴝 𐴈𐴡𐴀𐴡𐴘 𐴒𐴤𐴡𐴙𐴓𐴧𐴙𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴉𐴝𐴌𐴝𐴃 𐴈𐴡𐴕𐴥𐴡 𐴀𐴡𐴉𐴡𐴌𐴝𐴊𐴞 𐴕𐴡 𐴉𐴡𐴀𐴡𐴕𐴠 𐴱𐴱

𐴄𐴞𐴛𐴝 𐴈𐴝𐴔𐴝𐴘 𐴁𐴤𐴝𐴌 𐴆𐴦𐴝𐴣𐴏𐴢 𐴀𐴥𐴝𐴌𐴝𐴘 , 𐴁𐴞𐴘𐴥𐴟𐴓𐴝 𐴔𐴞𐴑𐴧𐴤𐴙𐴝 𐴀𐴥𐴡𐴘 , 𐴀𐴞𐴑𐴧𐴤𐴙𐴝 𐴀𐴟𐴙𐴑𐴧𐴤𐴙𐴝 𐴒𐴤𐴟𐴌𐴠𐴌𐴊𐴠 𐴀𐴡𐴑𐴃𐴤𐴡𐴃 , 𐴀𐴥𐴠 𐴉𐴝𐴌𐴝𐴌 𐴊𐴟𐴘𐴀𐴡𐴔 𐴌𐴥𐴠𐴑𐴧𐴤𐴗𐴝𐴃 𐴃𐴤𐴝𐴑𐴠𐴊𐴠 / 𐴐𐴤𐴡𐴔𐴏𐴟𐴓 𐴇𐴥𐴡𐴑𐴡𐴌 𐴷 𐴱 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴉𐴟𐴖𐴝 𐴀𐴟𐴒𐴧𐴤𐴗𐴝 𐴌𐴠 𐴀𐴥𐴝𐴃𐴤𐴡𐴃 𐴈𐴡𐴌𐴝 𐴔𐴝𐴌𐴞 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴃 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴟𐴖𐴝 𐴀𐴥𐴞𐴁𐴤𐴝 𐴓𐴡𐴘 𐴋𐴝𐴓𐴝𐴓 𐴓𐴡𐴘 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴃𐴦𐴝𐴓𐴧𐴟𐴑 𐴕𐴥𐴝𐴘𐴊𐴠 𐴘𐴥𐴝𐴕 , 𐴁𐴞 𐴅𐴞 𐴂𐴞 𐴀𐴥𐴡𐴑𐴧𐴡𐴓𐴠 𐴁𐴤𐴝𐴓𐴝 𐴒𐴡𐴌𐴥𐴞 𐴎𐴝𐴕𐴠 , 𐴰 𐴰 𐴰 𐴰 𐴰 𐴶 𐴏𐴥𐴡 𐴓𐴝𐴑 𐴄𐴞𐴛𐴝 𐴌𐴠𐴇𐴥𐴝𐴘𐴊𐴤𐴡𐴕 𐴓𐴡𐴘 𐴌𐴝𐴙𐴃𐴡𐴌 𐴸 𐴁𐴝𐴎𐴠 𐴀𐴠𐴌𐴞 𐴊𐴞𐴘𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴠 , 𐴀𐴠𐴑 𐴎𐴡𐴕 𐴀𐴠𐴑𐴄𐴞𐴁𐴤𐴞𐴏𐴠 𐴈𐴡𐴘𐴧𐴠𐴊𐴠 ! 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝 𐴉𐴝𐴌𐴝 𐴊𐴦𐴟𐴣𐴌𐴠𐴊𐴠 𐴀𐴥𐴠𐴍𐴠 𐴱𐴱

𐴄𐴞𐴛𐴝 𐴈𐴝𐴔𐴝𐴘𐴁𐴤𐴝𐴌 𐴐𐴤𐴟𐴎𐴟𐴑 𐴀𐴥𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴡𐴕𐴥𐴡 𐴀𐴡𐴉𐴡𐴌𐴝𐴊𐴞 𐴕𐴡 𐴉𐴝𐴘𐴓𐴥𐴠 , 𐴎𐴝𐴕𐴞 𐴉𐴥𐴟𐴕𐴞 𐴕𐴞𐴊𐴟𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝 𐴒𐴤𐴡𐴘 , 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴎𐴝𐴕𐴞 𐴉𐴥𐴟𐴕𐴞 𐴁𐴡𐴕 𐴒𐴡𐴌𐴥𐴠𐴌𐴊𐴠 𐴀𐴝𐴌 𐴄𐴞𐴛𐴝 𐴓𐴟𐴄 𐴒𐴡𐴌𐴥𐴠𐴌𐴊𐴠 𐴀𐴥𐴞𐴀𐴞𐴕 𐴱𐴱

𐴐𐴤𐴟𐴊𐴠 𐴊𐴤𐴡𐴌𐴔𐴡 𐴉𐴡𐴌𐴡𐴑 𐴒𐴡𐴌𐴥𐴝 𐴎𐴟𐴓𐴟𐴔 𐴕𐴡𐴀𐴡 𐴎𐴝𐴃 𐴉𐴡𐴌𐴥𐴡𐴑 𐴒𐴡𐴌𐴥𐴝 𐴎𐴟𐴓𐴟𐴔 𐴕𐴡𐴀𐴡 , 𐴀𐴝𐴌 𐴀𐴡𐴙𐴕𐴧𐴡 𐴋𐴦𐴡𐴙𐴓𐴧𐴝 𐴎𐴟𐴓𐴟𐴔 𐴒𐴡𐴌𐴥𐴝 𐴘𐴥𐴡 𐴕𐴡𐴀𐴡 , 𐴁𐴤𐴡𐴓𐴑𐴤𐴞 𐴎𐴟𐴓𐴟𐴔 𐴀𐴥𐴞𐴀𐴞𐴕𐴡𐴌 𐴖𐴡𐴌𐴠 𐴎𐴟𐴓𐴟𐴔, 𐴑𐴞𐴋𐴕𐴝𐴂𐴢 𐴒𐴡𐴌𐴥𐴞 𐴒𐴡𐴌𐴥𐴞 𐴌𐴠𐴇𐴥𐴝𐴘𐴊𐴤𐴡𐴕 𐴓𐴡𐴘 𐴀𐴠𐴌𐴞 𐴊𐴠𐴀𐴠𐴌𐴊𐴠 𐴀𐴥𐴞𐴀𐴞𐴕 𐴌𐴟𐴇𐴝𐴙𐴚𐴒𐴙𐴝𐴌 𐴐𐴤𐴡𐴔𐴁𐴡𐴃𐴧𐴞 𐴉𐴥𐴟𐴌𐴝𐴘 𐴉𐴥𐴠𐴓𐴡𐴀𐴡𐴕 𐴱𐴱

Sources : Rvision