𐴌𐴟𐴇𐴝𐴙𐴚𐴒𐴙𐴝𐴌𐴠 𐴀𐴠𐴕 𐴁𐴞 𐴏𐴞 𐴊𐴠𐴀𐴠𐴌 𐴊𐴠 𐴀𐴥𐴞𐴀𐴞𐴕 𐴀𐴡𐴙𐴕𐴧𐴝𐴘 , 𐴀𐴥𐴠𐴏𐴃𐴝𐴕𐴞𐴘𐴡 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴞 𐴀𐴥𐴡𐴑𐴧𐴡𐴓𐴠 𐴀𐴥𐴞𐴀𐴞𐴕 𐴕𐴡 𐴔𐴝𐴕𐴠 , 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴉𐴡𐴑𐴧𐴡𐴁𐴝𐴎𐴞 𐴒𐴡𐴌𐴥𐴞 𐴏𐴥𐴞𐴌𐴝 𐴒𐴡𐴌𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 ( 𐴀𐴠𐴕 𐴁𐴞 𐴏𐴞 ) 𐴑𐴦𐴝𐴋 𐴊𐴠𐴀𐴠𐴌 𐴊𐴠 𐴀𐴥𐴞𐴀𐴞𐴕 𐴀𐴡𐴙𐴕𐴧𐴝𐴘 , 𐴅𐴤𐴡𐴁𐴑𐴤𐴞 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴞 𐴀𐴥𐴡𐴑𐴧𐴡𐴓𐴠 , 𐴌𐴝𐴙𐴃𐴡𐴌 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴓𐴡𐴘𐴁𐴝𐴌 𐴐𐴤𐴡𐴣𐴀𐴡𐴃 𐴀𐴥𐴞𐴀𐴞𐴕 𐴕𐴡 𐴔𐴝𐴕𐴠 𐴁𐴡𐴓𐴞 , 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴌𐴠𐴂𐴟𐴄𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴡𐴑𐴄𐴟𐴁𐴡𐴌 𐴔𐴥𐴝𐴐𐴡𐴌 𐴐𐴤𐴟𐴌𐴟𐴃 𐴓𐴡𐴃𐴞 , 𐴉𐴟𐴓𐴞𐴐𐴢 𐴀𐴝𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴐𐴤𐴦𐴝𐴁 𐴀𐴥𐴡𐴑𐴧𐴡𐴓 𐴔𐴞𐴓𐴞 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴌𐴥𐴠𐴑𐴧𐴤𐴗𐴥𐴝 𐴀𐴥𐴡𐴑𐴧𐴡𐴓𐴡𐴃 , 𐴌𐴝𐴃𐴞𐴘𐴝 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴏𐴠𐴑 𐴒𐴡𐴌𐴥𐴠𐴌 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴠 𐴈𐴡𐴕𐴥𐴡 𐴈𐴝𐴔𐴠 , 𐴕𐴞𐴎𐴡𐴌 𐴉𐴝𐴌𐴝𐴌 𐴃𐴟 𐴀𐴡𐴙𐴕𐴧𐴡 𐴉𐴝𐴌𐴝𐴃 𐴒𐴞𐴓𐴥𐴠 ,𐴀𐴥𐴠 𐴉𐴝𐴌𐴝𐴌 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴓𐴡𐴀𐴡𐴙𐴕𐴧𐴝 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴞𐴌𐴥𐴠 𐴏𐴠𐴌𐴥𐴝𐴚 𐴊𐴞𐴘𐴝 𐴉𐴡𐴌𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴥𐴥𐴟𐴌𐴥𐴟 𐴔𐴥𐴝 𐴃𐴡𐴚 𐴌𐴥𐴠𐴑𐴧𐴤𐴗𐴥𐴝𐴌 𐴀𐴥𐴟𐴑 𐴆𐴤𐴙𐴑 𐴌𐴥𐴠 𐴔𐴥𐴟 / 𐴀𐴥𐴟 𐴓𐴥𐴝 𐴏𐴞𐴚𐴡𐴌 𐴕𐴞𐴏𐴡𐴌 𐴎𐴞𐴔𐴧𐴝𐴊𐴝𐴌 / 𐴀𐴥𐴟 𐴔𐴟𐴔𐴧𐴡𐴃 𐴈𐴝𐴣𐴌 𐴎𐴞𐴔𐴧𐴝𐴊𐴝𐴌𐴞 𐴀𐴥𐴡𐴙𐴓𐴊𐴠 , 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴀𐴟𐴏𐴥𐴟𐴓 𐴒𐴡𐴌𐴥𐴡𐴕 , 𐴀𐴥𐴞𐴁𐴝 𐴘𐴠 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴓𐴡𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴉𐴝𐴌𐴝𐴌 𐴀𐴥𐴟𐴑𐴆𐴤𐴙𐴑 𐴌𐴥𐴠𐴔𐴥𐴟𐴌 𐴄𐴤𐴡𐴑 𐴑𐴠𐴕𐴎𐴝 𐴏𐴥𐴝𐴌𐴝 𐴑𐴠𐴙𐴏𐴧𐴥𐴟 𐴕𐴡 𐴔𐴝𐴕𐴠 , ( 𐴀𐴠𐴕 𐴁𐴞 𐴏𐴞 ) 𐴀𐴝𐴌 ( 𐴀𐴠𐴕 𐴀𐴝𐴌 𐴏𐴞 ) 𐴊𐴠𐴈𐴥𐴝𐴘𐴓𐴥𐴠 𐴈𐴡𐴀𐴡𐴊𐴠 𐴏𐴞𐴏𐴢 𐴀𐴞𐴀𐴞𐴕𐴡𐴌 𐴈𐴡𐴕𐴥𐴡 𐴊𐴝𐴔 𐴕𐴥𐴝𐴘 𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴌 𐴏𐴥𐴡𐴚𐴑𐴡𐴄 𐴁𐴦𐴝𐴊𐴠 𐴒𐴤𐴡𐴌 𐴁𐴝𐴌𐴞 𐴉𐴥𐴠𐴓𐴝𐴘 , 𐴔𐴥𐴟𐴌𐴥𐴟 𐴔𐴥𐴝 𐴃𐴡𐴚 𐴌𐴥𐴠𐴑𐴧𐴗𐴥𐴝𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴇𐴥𐴡𐴑𐴟𐴔𐴡𐴃𐴠 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴀𐴞𐴚𐴑𐴗𐴝𐴌𐴞 𐴀𐴝𐴌 𐴀𐴝𐴊𐴡𐴔 𐴐𐴤𐴟𐴔𐴝𐴌𐴞 𐴒𐴡𐴌𐴥𐴠 , 𐴁𐴝𐴀𐴝𐴌 𐴃𐴟 𐴀𐴝𐴀𐴝𐴘 𐴌𐴥𐴠𐴑𐴧𐴗𐴧𐴝 𐴀𐴥𐴞𐴁𐴝𐴃 𐴃𐴤𐴝𐴑𐴠𐴌𐴊𐴠 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓 , 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴊𐴞𐴀𐴞𐴃𐴡 𐴒𐴞𐴓𐴥𐴠 , 𐴔𐴟𐴇𐴝𐴔𐴧𐴡𐴊 𐴈𐴝𐴣𐴕𐴠 𐴀𐴝𐴏𐴡𐴓𐴥𐴞 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴄𐴤𐴡𐴑 𐴑𐴠𐴕𐴎𐴝 𐴔𐴝𐴒𐴠 𐴱𐴱

𐴃𐴡𐴀𐴡𐴘 𐴀𐴥𐴞𐴃𐴝𐴌𐴝 𐴁𐴠𐴐𐴤𐴞 𐴕𐴡𐴌𐴡𐴔 𐴀𐴥𐴡𐴘 𐴈𐴡𐴀𐴡𐴊𐴠 , 𐴀𐴝𐴣𐴀𐴝𐴌𐴝𐴌 𐴉𐴝𐴌𐴝 𐴎𐴝𐴓𐴞 𐴉𐴟𐴌𐴞 𐴏𐴥𐴝𐴘 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴀𐴥𐴠𐴍𐴠 𐴈𐴡𐴕𐴥𐴡 𐴀𐴥𐴟𐴑 𐴆𐴤𐴙𐴑 𐴌𐴥𐴠𐴔𐴥𐴟 𐴕𐴥𐴝𐴘 , 𐴀𐴝𐴣𐴀𐴝𐴌𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴄𐴤𐴡𐴑 𐴑𐴠𐴕𐴎𐴝 𐴈𐴡𐴍𐴥𐴠 𐴉𐴝𐴘𐴧𐴟𐴔 , 𐴃𐴡𐴀𐴡𐴘 𐴔𐴟𐴇𐴝𐴔𐴧𐴡𐴊 𐴈𐴝𐴣𐴕𐴠 𐴏𐴡𐴃𐴟𐴌𐴝𐴘 𐴒𐴡𐴌𐴥𐴞 𐴅𐴟𐴖𐴝𐴁 𐴊𐴠𐴀𐴠𐴊𐴠 , 𐴀𐴥𐴞𐴀𐴞𐴕 𐴀𐴦𐴝𐴛 𐴕𐴡 𐴁𐴟𐴎𐴤𐴞 ! 𐴃𐴟𐴣𐴖𐴥𐴝𐴌𐴝 𐴀𐴠 𐴉𐴝𐴌𐴝𐴌 𐴕𐴡𐴀𐴡 , 𐴀𐴥𐴠𐴃𐴡𐴓𐴧𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴄𐴤𐴡𐴑 𐴑𐴠𐴕𐴎𐴝 𐴉𐴝𐴘𐴓𐴠 , 𐴀𐴦𐴝𐴛 𐴃𐴟𐴣𐴖𐴥𐴝𐴣𐴌𐴝𐴌 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴑𐴡𐴁𐴟𐴓 𐴒𐴡𐴌𐴥𐴞 𐴉𐴝𐴙𐴅𐴧𐴟𐴔𐴊𐴠 𐴱𐴱

𐴈𐴦𐴝𐴕 𐴀𐴝𐴒𐴠 𐴄𐴡𐴀𐴡𐴕𐴡𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴀𐴡𐴉𐴞𐴏𐴥𐴡𐴌 𐴋𐴝𐴓𐴝𐴓 𐴀𐴝𐴐𐴧𐴤𐴞𐴓 , 𐴁𐴠𐴐𐴤𐴞 𐴏𐴝𐴓𐴝𐴑𐴞𐴌 𐴏𐴥𐴝𐴣𐴀𐴝𐴃𐴠 𐴒𐴡𐴌𐴞𐴁 𐴌𐴟𐴇𐴝𐴙𐴚𐴒𐴙𐴝𐴃𐴧𐴟 𐴄𐴞𐴛𐴝 𐴓𐴟𐴄 𐴒𐴡𐴌𐴥𐴞 𐴎𐴝𐴕𐴠 , 𐴀𐴥𐴞𐴃𐴝𐴌 𐴑𐴞𐴃𐴝𐴁𐴡𐴃 𐴌𐴝𐴇𐴝𐴔 𐴀𐴝𐴌 𐴀𐴝𐴊𐴡𐴌 𐴕𐴥𐴝𐴘 , 𐴀𐴝𐴌 𐴁𐴠𐴐𐴤𐴞 𐴕𐴞𐴊𐴡𐴘𐴧𐴝 𐴔𐴝𐴕𐴥𐴟𐴙𐴐𐴢 𐴁𐴡𐴓𐴞 , 𐴀𐴥𐴞𐴃𐴝𐴌 𐴁𐴠𐴐𐴤𐴞 𐴈𐴝𐴣𐴏𐴥𐴡𐴌 𐴔𐴝𐴙𐴕𐴐𐴤𐴠 𐴈𐴡𐴘𐴧𐴠 , 𐴁𐴦𐴝𐴊𐴠 𐴒𐴤𐴡𐴌𐴒𐴟𐴐𐴧𐴞 𐴁𐴠𐴒𐴧𐴤𐴟𐴕𐴡𐴌𐴃𐴟 𐴔𐴝𐴃𐴤𐴝 𐴒𐴡𐴕𐴝 𐴰 𐴰 𐴰 𐴵 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴓𐴡𐴘 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴑𐴡𐴁𐴟𐴓 𐴒𐴡𐴌𐴥𐴠 𐴱𐴱

Sources : Rvision