𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝𐴌 𐴓𐴡𐴘 𐴐𐴤𐴡𐴎𐴟𐴒𐴞𐴃𐴝 𐴕𐴡 𐴒𐴡𐴌𐴥𐴞𐴓𐴥 𐴠 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚𐴡𐴃 𐴁𐴡𐴌𐴔𐴥𐴝 𐴐𐴦𐴝𐴔𐴠𐴓 𐴀𐴥𐴡𐴘 𐴕𐴡 𐴉𐴝𐴌𐴥𐴞𐴁𐴤𐴡 𐴱𐴱

𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴏𐴥𐴡𐴚𐴑𐴡𐴄 𐴀𐴝𐴌 𐴀𐴡𐴐𐴤𐴝𐴕𐴃𐴤𐴞𐴃 𐴉𐴡𐴌𐴞 𐴒𐴞𐴘𐴠 𐴒𐴤𐴡𐴘𐴊𐴠 , 𐴀𐴡𐴑𐴃𐴤𐴡𐴃 𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴥𐴞 , 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌𐴊𐴠 𐴱𐴱

𐴀𐴞𐴐𐴤𐴞𐴘𐴝𐴌 𐴊𐴡𐴀𐴡𐴙𐴕 𐴉𐴟𐴑 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴃𐴡𐴕𐴎𐴞𐴔 𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝𐴌 𐴓𐴡𐴘 , 𐴁𐴡𐴌𐴔𐴥𐴝 𐴘𐴠 𐴐𐴤𐴡𐴎𐴟𐴒𐴞𐴃𐴝 𐴕𐴡 𐴒𐴡𐴌𐴥𐴞𐴓𐴥𐴠 ,𐴀𐴠 𐴔𐴥𐴝𐴐𐴡𐴃 𐴀𐴥𐴡𐴘𐴁𐴝𐴌 𐴀𐴝𐴏𐴥𐴠𐴊𐴠 𐴀𐴝𐴏𐴞𐴘𐴠𐴕𐴡𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚𐴡𐴃 , 𐴁𐴡𐴌𐴔𐴥𐴝 𐴐𐴦𐴝𐴔𐴠𐴓 𐴀𐴥𐴡𐴘 𐴕𐴡 𐴉𐴝𐴌𐴥𐴠 𐴉𐴝𐴀𐴝𐴕 𐴀𐴝𐴓𐴡𐴑 𐴒𐴡𐴌𐴥𐴞 𐴉𐴥𐴠𐴓𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 , 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴀𐴝𐴙𐴅𐴧𐴙𐴝 𐴀𐴥𐴟𐴣𐴐𐴞𐴘𐴝𐴌𐴞 𐴊𐴞𐴘𐴠 𐴁𐴡𐴓𐴞 (𐴀𐴠 𐴂𐴞) 𐴈𐴥𐴡𐴁𐴡𐴌𐴡𐴃 𐴉𐴝𐴀𐴝 𐴒𐴞𐴘𐴠 𐴱𐴱

𐴁𐴡𐴌𐴟 𐴕𐴥𐴝𐴘𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴞𐴌𐴠𐴖𐴝𐴕 𐴘𐴟𐴏𐴥𐴟𐴉𐴡𐴌𐴥𐴠 , 𐴀𐴝𐴏𐴞𐴘𐴠𐴕𐴡𐴌 𐴃𐴡𐴌𐴉𐴥𐴡𐴌𐴃𐴟 𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴐𐴤𐴡𐴣𐴀𐴡 𐴀𐴝𐴏𐴞𐴘𐴠𐴕𐴡𐴌 𐴊𐴠𐴐𐴢 𐴁𐴠𐴒𐴧𐴤𐴞𐴕𐴠 , 𐴁𐴡𐴌𐴔𐴥𐴝𐴌 𐴁𐴝𐴁𐴡𐴃𐴠 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴃 𐴁𐴝𐴏𐴥𐴞 𐴄𐴤𐴞𐴑 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠𐴕𐴋𐴞𐴓𐴧𐴝 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 , 𐴔𐴝𐴐𐴄𐴡𐴌 𐴘𐴟𐴏𐴥𐴟𐴉𐴢 𐴓𐴡𐴘 𐴐𐴤𐴡𐴎𐴟𐴒𐴞𐴃𐴝 𐴕𐴡 𐴒𐴡𐴌𐴥𐴠𐴌𐴊𐴠 𐴘𐴥𐴝𐴀𐴝𐴕𐴡𐴓𐴧𐴝 𐴔𐴡𐴕 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠 𐴁𐴡𐴓𐴞 , 𐴀𐴝𐴏𐴞𐴘𐴠𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴡𐴐𐴖𐴝𐴌𐴝 𐴁𐴡𐴘𐴍𐴥𐴡𐴑𐴡𐴃 , 𐴀𐴝𐴙𐴅𐴧𐴙𐴝 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴏𐴝𐴘𐴉𐴟𐴊𐴧𐴞𐴕 𐴀𐴝𐴁𐴊𐴟𐴓𐴧𐴝𐴇 𐴘𐴠 𐴈𐴡𐴘𐴧𐴠 𐴱𐴱

𐴐𐴤𐴡𐴎𐴟𐴒𐴞𐴃𐴝 𐴕𐴡 𐴒𐴡𐴌𐴥𐴠𐴌𐴊𐴠 𐴀𐴥𐴡𐴘𐴓𐴠 , 𐴀𐴠 𐴔𐴥𐴝𐴐𐴡𐴌 𐴀𐴝𐴈𐴥𐴠𐴌𐴥𐴞𐴃 𐴀𐴥𐴡𐴘𐴁𐴡𐴊𐴠 𐴀𐴝𐴏𐴞𐴘𐴠𐴕𐴡𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴡𐴐𐴖𐴝𐴌𐴝 𐴁𐴡𐴘𐴍𐴥𐴡𐴑𐴡𐴃 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 / 𐴁𐴟 𐴆𐴤𐴙𐴟𐴑 𐴔𐴥𐴟 𐴅𐴤𐴞 𐴔𐴥𐴞𐴚 𐴀𐴡𐴚 𐴓𐴝𐴙𐴚 , 𐴁𐴡𐴘𐴍𐴥𐴡𐴑𐴡𐴃 𐴐𐴦𐴝𐴔𐴠𐴓 𐴀𐴥𐴡𐴘 𐴉𐴝𐴌𐴡𐴕 𐴔𐴡𐴐𐴑𐴞𐴓 𐴀𐴝𐴏𐴥𐴠 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴄𐴗𐴠𐴄𐴝𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴸 𐴲 / 𐴷 ( 𐴀𐴝𐴐𐴤𐴞𐴕 𐴔𐴥𐴝𐴐𐴢 ) 𐴳 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝

Sources : RFA