𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴑𐴤𐴟𐴕𐴞 𐴀𐴝𐴌𐴀𐴥𐴡 𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴙𐴅𐴧𐴤𐴙𐴠 𐴱𐴱

𐴰 𐴲 / 𐴷 ( 𐴀𐴝𐴐𐴤𐴞𐴕 𐴔𐴥𐴝𐴐𐴢 ) 𐴳 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴢 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴠𐴑𐴧𐴤𐴝𐴕𐴥𐴡𐴃 , 𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴑𐴤𐴟𐴕𐴞 𐴑𐴠𐴙𐴏𐴡𐴌 𐴁𐴝𐴁𐴡𐴃𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴉𐴟𐴓𐴞𐴐𐴠 𐴒𐴡𐴃𐴡 𐴈𐴝𐴙𐴓𐴧𐴝 , 𐴌𐴟𐴇𐴝𐴙𐴚𐴒𐴙𐴝 𐴉𐴝𐴣𐴏𐴢 𐴎𐴡𐴕 𐴊𐴤𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴝𐴌 𐴀𐴠𐴉𐴢 𐴀𐴠𐴌 𐴈𐴥𐴡𐴁𐴡𐴌𐴡𐴃 𐴈𐴡𐴘𐴧𐴠 𐴱𐴱

𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴟 𐴊𐴟𐴘 𐴎𐴡𐴕 𐴀𐴝𐴐𐴤𐴝𐴔𐴞 𐴌𐴠 𐴀𐴝𐴊𐴝𐴓𐴡𐴃𐴡𐴃 𐴃𐴟𐴙𐴓𐴧𐴙𐴠 , 𐴃𐴡𐴀𐴡𐴘 𐴀𐴝𐴊𐴝𐴓𐴡𐴃𐴡𐴌 𐴉𐴥𐴝𐴘𐴏𐴠𐴓𐴝 𐴓𐴡𐴘 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴃𐴞𐴕 𐴊𐴞𐴕 𐴌𐴞𐴔𐴦𐴝𐴕𐴋𐴡𐴃 𐴊𐴞𐴘𐴠 𐴁𐴡𐴓𐴞 , 𐴀𐴥𐴠 𐴔𐴟𐴃𐴝𐴓𐴧𐴠𐴑 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴥𐴠𐴃𐴡𐴓𐴧𐴝 𐴁𐴝𐴑𐴞 𐴃𐴞𐴕 𐴎𐴡𐴕𐴡𐴌𐴥𐴠 𐴀𐴝𐴊𐴝𐴓𐴡𐴃𐴡𐴃 𐴕𐴥𐴡 𐴃𐴟𐴓𐴥𐴠𐴊𐴠 ,𐴒𐴡𐴃𐴡 𐴇𐴥𐴝𐴉𐴃𐴝𐴃 𐴈𐴥𐴡𐴁𐴡𐴌𐴡𐴌 𐴔𐴝𐴙𐴊𐴧𐴤𐴡𐴔𐴠 𐴸 𐴲 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 , 𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴑𐴤𐴟𐴕𐴞 𐴑𐴠𐴙𐴏𐴡𐴌 𐴁𐴝𐴁𐴡𐴃𐴠 𐴊𐴤𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴞𐴃𐴠 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴁𐴠𐴒𐴧𐴤𐴟𐴕𐴥𐴠 𐴀𐴝𐴐𐴤𐴝𐴔𐴞 𐴏𐴥𐴡 𐴎𐴡𐴕 𐴀𐴥𐴡𐴘𐴧𐴠 𐴱𐴱

𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕𐴥𐴡𐴌𐴥𐴠 𐴀𐴝𐴌𐴏𐴥𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴟𐴂𐴢 𐴓𐴡𐴘 𐴃𐴝𐴓𐴧𐴟𐴑 𐴀𐴝𐴏𐴥𐴠𐴕𐴥𐴠 𐴕𐴥𐴝𐴑𐴞 𐴕𐴥𐴝𐴘 , 𐴉𐴟𐴏𐴥𐴝𐴌 𐴀𐴥𐴝𐴏𐴥𐴝𐴌 𐴀𐴝𐴌 𐴃𐴡𐴊𐴝𐴌𐴟𐴑 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴠 , 𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴑𐴤𐴟𐴕𐴞 𐴀𐴝𐴐𐴤𐴝𐴔𐴞 𐴀𐴥𐴞𐴏𐴝𐴉𐴠 𐴊𐴤𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴞𐴃𐴝𐴌𐴥𐴝𐴌 𐴁𐴤𐴟𐴃𐴡𐴌𐴃𐴟 𐴀𐴠𐴑 𐴎𐴡𐴕 / 𐴔𐴟𐴇𐴝𐴔𐴧𐴡𐴊 𐴀𐴞𐴓𐴞𐴘𐴝𐴏𐴢 𐴁𐴡𐴐𐴢 𐴵 𐴳 𐴁𐴡𐴏𐴥𐴡𐴌 , 𐴀𐴝𐴌𐴏𐴥𐴝𐴌 𐴔𐴞𐴔𐴁𐴤𐴡𐴌 𐴎𐴞𐴁𐴤𐴝 𐴘𐴠 𐴒𐴡𐴃𐴡 𐴅𐴟𐴕 𐴔𐴥𐴝𐴐𐴡𐴃 𐴔𐴟𐴇𐴞𐴁𐴧𐴟𐴓𐴧𐴝𐴇 𐴌𐴠 𐴊𐴤𐴡𐴔𐴑𐴞 𐴊𐴞𐴘𐴠 𐴁𐴡𐴓𐴥𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴑𐴠𐴀𐴠𐴔𐴡𐴃 𐴇𐴥𐴡𐴑𐴟𐴔𐴡𐴃𐴠 𐴇𐴥𐴠𐴉𐴝𐴎𐴡𐴃𐴞 𐴒𐴦𐴝𐴋 𐴊𐴞𐴀𐴞 𐴁𐴦𐴝𐴊𐴠 𐴘𐴥𐴡 , 𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴒𐴤𐴡𐴌𐴒𐴟𐴐𐴧𐴤𐴞 𐴁𐴝𐴀𐴝𐴌𐴠 𐴕𐴠𐴀𐴠𐴓𐴞 𐴕𐴡 𐴉𐴝𐴌𐴥𐴠𐴌 , 𐴔𐴟𐴇𐴞𐴁𐴧𐴟𐴓𐴧𐴝𐴇𐴌 𐴉𐴝𐴄𐴞𐴌 𐴀𐴝𐴌𐴀𐴥𐴡 𐴰 𐴱 𐴎𐴡𐴕 𐴕𐴠𐴃𐴝 𐴎𐴞𐴁𐴡𐴕 𐴇𐴥𐴟𐴚𐴑𐴞𐴌 𐴋𐴡𐴌𐴠 𐴓𐴟𐴖𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴠 𐴱𐴱

Sources : RFA