𐴀𐴠 𐴀𐴠 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴌𐴃𐴟 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴹 𐴱 / 𐴷 ( 𐴀𐴝𐴐𐴤𐴞𐴕 𐴔𐴥𐴝𐴐𐴢 ) 𐴳 𐴳 𐴲 𐴱 𐴌𐴟𐴇𐴝𐴙𐴒𐴙𐴝

𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴀𐴝𐴌 ( 𐴀𐴠 𐴀𐴠 ) 𐴔𐴡𐴒𐴁𐴝𐴒𐴞𐴌 𐴀𐴡𐴉𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌 𐴖𐴡𐴅𐴟𐴊 𐴉𐴥𐴟𐴌𐴥𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴉𐴝𐴖𐴝 𐴆𐴤𐴙𐴡𐴚 𐴀𐴝𐴌 𐴘𐴥𐴠 𐴔𐴞𐴘𐴥𐴠𐴄 𐴄𐴡𐴚 𐴉𐴝𐴌𐴝𐴃 𐴃𐴤𐴝𐴑𐴤𐴠𐴊𐴠 , 𐴀𐴠 𐴀𐴠 𐴔𐴡𐴒𐴁𐴝𐴒𐴞𐴌 𐴀𐴡𐴉𐴡𐴌𐴝𐴊𐴞 𐴈𐴥𐴡𐴌𐴝𐴁 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓 , 𐴇𐴥𐴝𐴔𐴞𐴐𐴤𐴝 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌𐴠 𐴕𐴡 𐴎𐴝𐴕𐴝𐴘 , 𐴈𐴡𐴀𐴡𐴘 𐴕𐴡 𐴉𐴝𐴌𐴥𐴠 𐴉𐴝𐴀𐴝𐴕 𐴒𐴡𐴌𐴥𐴞 𐴒𐴡𐴀𐴡𐴙𐴕 𐴌𐴝𐴃𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴕𐴥𐴝𐴙𐴚 𐴆𐴤𐴙𐴡𐴚 𐴀𐴝𐴌 𐴑𐴤𐴞𐴘𐴝𐴌𐴞 𐴉𐴝𐴌𐴝𐴚𐴡𐴃 , 𐴁𐴠𐴚 𐴃𐴟𐴖𐴥𐴝𐴘𐴁𐴤𐴝𐴌 𐴁𐴤𐴝𐴀𐴝𐴕𐴝 𐴓𐴡𐴘 𐴒𐴤𐴞𐴌𐴝 𐴁𐴤𐴝𐴚𐴞 𐴁𐴡𐴓𐴝𐴎𐴟𐴌𐴞 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴓𐴟𐴄 𐴉𐴝𐴄 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴠𐴌 𐴱𐴱

𐴊𐴠𐴐𐴤𐴞 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴞 𐴀𐴥𐴡𐴑𐴧𐴡𐴓𐴠 , 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴟𐴓𐴟𐴔 𐴀𐴝𐴌 𐴎𐴝𐴓𐴝𐴘𐴁𐴤𐴡𐴓𐴧𐴝 , 𐴀𐴥𐴠 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌𐴠 𐴀𐴠𐴌𐴞 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴏𐴥𐴠𐴃𐴡𐴔𐴁𐴡𐴌𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴌𐴝𐴙𐴃𐴡𐴌 𐴰 𐴱 𐴁𐴝𐴎𐴠 𐴕𐴥𐴝𐴙𐴚 𐴆𐴤𐴙𐴡𐴚𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴀𐴥𐴟 𐴖𐴠𐴕 𐴄𐴤𐴠𐴌 𐴒𐴤𐴡𐴌𐴡𐴌 𐴒𐴤𐴞𐴌𐴝 𐴁𐴤𐴝𐴚𐴞 𐴑𐴡𐴗𐴔 𐴂𐴦𐴡𐴕𐴡𐴃 𐴒𐴤𐴡𐴓𐴞 𐴁𐴦𐴝𐴊𐴠 , 𐴒𐴤𐴡𐴌𐴡𐴌 𐴊𐴡𐴌𐴡𐴎𐴝 𐴁𐴤𐴝𐴚𐴞 𐴸 𐴎𐴡𐴕 𐴈𐴥𐴡𐴌𐴝𐴁 𐴀𐴡𐴉𐴡𐴌𐴝𐴊𐴞 𐴔𐴡𐴒𐴢 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴙𐴓𐴧𐴙𐴠 , 𐴔𐴡𐴕𐴃𐴡𐴌 𐴒𐴤𐴡𐴌𐴒𐴟𐴐𐴧𐴞 𐴁𐴠𐴒𐴧𐴤𐴟𐴕𐴠 𐴔𐴞𐴓𐴞 𐴋𐴡𐴣𐴀𐴡𐴌 𐴋𐴡𐴣𐴀𐴡𐴌 𐴒𐴡𐴌𐴥𐴞 𐴔𐴡𐴊𐴡𐴊𐴡𐴌𐴓𐴝 𐴑𐴞𐴏𐴑𐴞𐴏𐴝𐴘𐴧𐴠 𐴁𐴝𐴌 𐴔𐴡𐴒𐴢 𐴁𐴠𐴒𐴧𐴤𐴟𐴕 𐴊𐴤𐴝𐴘𐴧𐴠 𐴒𐴤𐴡𐴘 𐴱𐴱

𐴑𐴠𐴙𐴏𐴧𐴥𐴟 𐴓𐴟𐴏𐴧𐴝𐴕 𐴒𐴡𐴌𐴥𐴞 𐴕𐴥𐴡 𐴉𐴝𐴌𐴠 , 𐴇𐴥𐴟𐴁𐴡𐴇𐴥𐴟 𐴀𐴥𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴀𐴥𐴠 𐴉𐴝𐴌𐴝𐴌 𐴀𐴝𐴒𐴡𐴌 𐴑𐴠𐴌𐴝𐴕𐴞 / 𐴕𐴠𐴎𐴝𐴔𐴟𐴓 𐴇𐴥𐴡𐴑𐴡𐴌 𐴒𐴤𐴡𐴌𐴡𐴃 𐴀𐴥𐴡 𐴒𐴤𐴡𐴙𐴓𐴧𐴥𐴞𐴀𐴞𐴓 , 𐴀𐴠𐴕𐴋𐴞𐴓𐴧𐴝 𐴈𐴥𐴡𐴌𐴝𐴁 𐴔𐴡𐴒𐴢 𐴀𐴥𐴡𐴑𐴧𐴡𐴓𐴡𐴌 𐴓𐴡𐴌𐴝 𐴏𐴡𐴌𐴝 𐴊𐴞𐴕𐴡𐴌𐴃𐴟 𐴊𐴞𐴕 𐴁𐴝𐴌𐴥𐴠𐴌 ,𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴋𐴡𐴌 𐴓𐴡𐴘 𐴃𐴤𐴝𐴑𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴥𐴞𐴓 , 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴟𐴔 𐴔𐴝𐴌𐴝 𐴊𐴤𐴡𐴌𐴝 , 𐴀𐴥𐴠𐴍𐴠 𐴖𐴡𐴌𐴠 / 𐴀𐴝𐴁𐴊𐴟𐴓 𐴇𐴝𐴑𐴞𐴔 𐴋𐴝𐴣𐴇𐴝𐴛𐴃𐴡𐴌 𐴓𐴟𐴄 𐴉𐴝𐴄 , 𐴀𐴞𐴀𐴞𐴕 𐴁𐴠𐴒𐴧𐴤𐴞𐴕𐴡𐴌 𐴎𐴡𐴌𐴞𐴘𐴝 𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴅𐴟𐴊 𐴉𐴥𐴟𐴌𐴥𐴝𐴘 𐴎𐴝𐴘𐴁𐴝𐴌 𐴉𐴡𐴣𐴃𐴤𐴡𐴃𐴱𐴱

𐴀𐴝𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴟𐴘 𐴈𐴝𐴍𐴝𐴃 𐴉𐴡𐴙𐴅𐴧𐴤𐴙𐴠 , 𐴏𐴡𐴓𐴠𐴌𐴊𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴁𐴝𐴁𐴡𐴃𐴠 ( 𐴀𐴠 𐴀𐴠 ) 𐴔𐴡𐴒𐴁𐴝𐴒𐴞 𐴌𐴥𐴠 𐴁𐴞𐴏𐴝𐴌 𐴊𐴞𐴀𐴞𐴓𐴥𐴠 , 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴝𐴍𐴠 𐴀𐴝𐴌 𐴔𐴝𐴌𐴠 ,𐴔𐴠𐴓𐴠𐴄𐴠𐴌𐴞 𐴌𐴥𐴠 𐴁𐴞𐴏𐴝𐴌 𐴊𐴞𐴀𐴞𐴓𐴥𐴠 𐴔𐴡𐴒𐴁𐴝𐴒𐴞 𐴘𐴠 𐴈𐴝𐴍𐴠 𐴔𐴝𐴌𐴠 𐴱𐴱

𐴊𐴟𐴕𐴥𐴞 𐴋𐴦𐴝𐴘𐴧𐴠 𐴔𐴞𐴓𐴞 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 𐴀𐴞𐴀𐴞𐴕 𐴒𐴡𐴌𐴥𐴠𐴌𐴊𐴠 , 𐴎𐴠𐴀𐴠𐴕𐴠 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴕𐴡 𐴃𐴤𐴝𐴑𐴤𐴡𐴑 𐴱𐴱

Sources : Rvision