𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴁𐴡𐴌𐴔𐴥𐴝𐴌 𐴀𐴥𐴠 𐴋𐴤𐴝𐴑𐴡𐴃𐴧𐴟 𐴐𐴤𐴝𐴔𐴝𐴊𐴝𐴕 , 𐴀𐴥𐴡𐴘𐴓𐴠 𐴇𐴥𐴡𐴓 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘 𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴘𐴧𐴡𐴕𐴡𐴌 𐴏𐴥𐴡𐴚𐴑𐴡𐴄 𐴁𐴡𐴌𐴔𐴥𐴝 𐴘𐴠 𐴁𐴝𐴕𐴝𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴏𐴥𐴡𐴚𐴑𐴡𐴄 𐴘𐴥𐴝𐴕𐴡𐴌 𐴐𐴤𐴝𐴔𐴝𐴊𐴝𐴕 𐴀𐴥𐴡 𐴁𐴡𐴌𐴔𐴥𐴝𐴌 𐴀𐴥𐴠 𐴋𐴤𐴝𐴑𐴡𐴃𐴧𐴟 𐴒𐴡𐴌𐴥𐴞 𐴊𐴞𐴀𐴞𐴓𐴠 , 𐴇𐴥𐴡𐴓 𐴀𐴥𐴡𐴘 𐴉𐴝𐴌𐴞𐴁𐴤𐴡𐴊𐴠 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴈𐴡𐴘𐴧𐴠 𐴱𐴱

𐴒𐴡𐴃𐴡 𐴈𐴝𐴙𐴓𐴧𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴅𐴡𐴕𐴡𐴌𐴡𐴓 𐴀𐴠𐴏𐴠𐴔𐴁𐴞𐴓𐴞𐴌 𐴔𐴞𐴄𐴤𐴞𐴚𐴡𐴃 𐴃𐴡𐴑𐴌𐴞𐴌𐴡𐴃 𐴔𐴝𐴎𐴤𐴠 𐴈𐴡𐴘𐴧𐴠𐴊𐴠 , 𐴁𐴝𐴚𐴓𐴝𐴊𐴠𐴐𐴤𐴠 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄 𐴀𐴝𐴌 𐴊𐴟𐴕𐴞𐴘𐴝𐴘𐴌 𐴊𐴠𐴐𐴢 𐴁𐴠𐴒𐴧𐴤𐴞𐴕 𐴁𐴡𐴌𐴝𐴁𐴡𐴌 𐴌𐴟𐴑 𐴀𐴦𐴡𐴣𐴏𐴥𐴝 𐴊𐴝𐴁𐴝𐴘 𐴉𐴡𐴀𐴡𐴕𐴡𐴌 𐴋𐴦𐴡𐴙𐴓𐴧𐴝 𐴈𐴝𐴔 𐴀𐴥𐴡𐴑𐴧𐴡𐴓 𐴐𐴤𐴡𐴣𐴀𐴡 , 𐴊𐴟𐴕𐴞𐴘𐴝𐴘𐴌 𐴉𐴥𐴝𐴘𐴊𐴝 𐴀𐴝𐴌 𐴁𐴤𐴝𐴓𐴝𐴘𐴌𐴓𐴝 𐴐𐴤𐴞𐴊𐴧𐴤𐴝𐴕𐴃𐴡 𐴓𐴡𐴘𐴁𐴡𐴓𐴧𐴥𐴝 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄 𐴀𐴥𐴡𐴘𐴧𐴠𐴊𐴠 𐴉𐴝𐴣𐴏𐴢𐴀𐴡𐴔 𐴁𐴡𐴏𐴥𐴡𐴌𐴡𐴃 𐴒𐴤𐴡𐴙𐴓𐴧𐴙𐴠𐴊𐴠 𐴀𐴥𐴡𐴘𐴓𐴠 𐴘𐴥𐴡 , 𐴕𐴞𐴎𐴡𐴌 𐴎𐴡𐴌𐴔𐴡𐴏𐴃𐴤𐴝𐴕 𐴃𐴞𐴘𐴝𐴑 𐴒𐴡𐴌𐴥𐴞 , 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴌𐴔𐴥𐴝𐴌 𐴊𐴠𐴐𐴤𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴃𐴟 , 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴝 𐴀𐴥𐴞𐴃𐴝𐴌𐴝𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘 𐴕𐴥𐴡 𐴉𐴝𐴌𐴠 𐴁𐴡𐴓𐴞 / 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴠 𐴑𐴟𐴁𐴤𐴞𐴋 𐴹 𐴱 𐴁𐴞𐴘𐴝𐴌𐴝𐴔 𐴉𐴝𐴌𐴥𐴝 𐴀𐴦𐴡𐴣𐴏𐴥𐴞𐴁𐴤𐴡𐴌𐴓𐴝 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴎𐴝𐴃𐴞𐴘𐴡 𐴀𐴦𐴡𐴣𐴏𐴥𐴝 𐴊𐴝𐴁𐴝𐴘 𐴔𐴝𐴌𐴡𐴕𐴡𐴌 𐴂𐴡𐴌𐴟𐴒𐴠𐴌𐴝𐴔𐴡𐴃 𐴒𐴤𐴡𐴓𐴞 𐴇𐴥𐴞𐴏𐴧𐴝 𐴓𐴡𐴘𐴁𐴡𐴓𐴧𐴝 𐴀𐴠𐴅𐴝𐴎𐴡𐴃 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴘𐴥𐴡 / 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴇𐴥𐴝𐴓𐴡𐴃 𐴒𐴝𐴙𐴌 𐴀𐴠𐴑𐴞𐴕𐴞 𐴊𐴦𐴠𐴀𐴞 , 𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄𐴡𐴌𐴠 𐴊𐴠𐴐𐴁𐴞𐴊𐴠𐴐𐴤𐴡𐴌 𐴔𐴡𐴊𐴡𐴊 𐴓𐴡𐴘 𐴇𐴥𐴡𐴓 𐴒𐴡𐴌𐴥𐴞 𐴉𐴝𐴌𐴝 𐴎𐴝𐴘𐴁𐴡𐴓𐴧𐴝 𐴓𐴝𐴒𐴝𐴃𐴝𐴌 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝𐴌𐴊𐴠 𐴘𐴥𐴝𐴀𐴝𐴕 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴕𐴞𐴎𐴡𐴌 𐴒𐴤𐴡𐴌𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠𐴊𐴤𐴠 , 𐴀𐴥𐴠𐴕𐴋𐴞𐴓𐴧𐴝 𐴇𐴧𐴝𐴓𐴡𐴃 𐴁𐴝𐴕𐴝𐴘 𐴁𐴤𐴡𐴓𐴧𐴝 / 𐴀𐴥𐴞𐴁𐴤𐴝 𐴘𐴠 𐴁𐴡𐴌𐴔𐴥𐴝𐴌𐴠 𐴈𐴡𐴘𐴧𐴠 𐴱𐴱

Sources : RFA