𐴔𐴠𐴓𐴠𐴄𐴌𐴞 𐴑𐴡𐴗𐴕𐴏𐴞 𐴘𐴠 𐴓𐴟𐴄𐴉𐴝𐴄 𐴀𐴝𐴌 𐴁𐴡𐴓𐴝𐴎𐴟𐴌𐴞 𐴄𐴞𐴛𐴝 𐴈𐴝𐴌𐴥𐴞 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌𐴥𐴠 𐴉𐴥𐴞𐴃𐴞𐴕 𐴎𐴝𐴓 𐴊𐴠𐴀𐴠𐴌 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴀𐴞𐴕𐴋𐴤𐴞𐴘𐴝 𐴓𐴡𐴘 𐴁𐴡𐴖𐴋𐴝𐴌 𐴀𐴝𐴏𐴥𐴠𐴊𐴠 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴒𐴟𐴓𐴝𐴔 , ( 𐴁𐴞 𐴅𐴞 𐴂𐴞 ) 𐴀𐴝𐴌 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴓𐴟𐴄𐴉𐴝𐴄 𐴒𐴡𐴌𐴥𐴞 𐴀𐴝𐴌 𐴒𐴤𐴡𐴌𐴡𐴌 𐴁𐴝𐴀𐴝𐴌𐴠 𐴉𐴟𐴃 𐴎𐴤𐴞𐴀𐴞 𐴀𐴥𐴡𐴑𐴧𐴡𐴓𐴡𐴌𐴓𐴝 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴌𐴟𐴎𐴞 𐴈𐴝𐴔𐴝𐴘𐴃𐴤𐴡 𐴒𐴞𐴘𐴠𐴊𐴠 𐴀𐴥𐴞𐴃𐴝𐴌𐴝𐴌𐴃𐴟 𐴁𐴡𐴓𐴝𐴎𐴟𐴌𐴞 𐴄𐴞𐴛𐴝 𐴈𐴝𐴌𐴥𐴞 𐴓𐴡𐴘 , 𐴁𐴠𐴐𐴤𐴞 𐴏𐴥𐴡𐴑𐴃𐴞𐴌 𐴏𐴥𐴝𐴣𐴃𐴠 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌𐴥𐴠 𐴉𐴥𐴞𐴃𐴞𐴕 𐴎𐴝𐴓 𐴊𐴠𐴀𐴠𐴌 𐴁𐴡𐴓𐴞 𐴊𐴟𐴑𐴧𐴤𐴞𐴃𐴤𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴓𐴥𐴝 𐴉𐴟 𐴈𐴥𐴡𐴚 𐴌𐴞𐴉𐴟𐴎𐴞 𐴒𐴡𐴏𐴥𐴞𐴁𐴤𐴝𐴌 𐴑𐴠𐴀𐴠𐴔𐴡𐴌 𐴈𐴝𐴣𐴏𐴠 𐴈𐴝𐴙𐴣𐴏𐴧𐴥𐴝 𐴀𐴝𐴏𐴥𐴠𐴊𐴠 𐴁𐴞 𐴅𐴞 𐴂𐴞𐴌 𐴒𐴤𐴝𐴣𐴄𐴞𐴌𐴠,𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴥𐴝𐴣𐴍𐴞 𐴁𐴤𐴝𐴌𐴝𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴉𐴡𐴙𐴃𐴧𐴡 𐴊𐴞𐴕 𐴄𐴤𐴡𐴑𐴧𐴠𐴕𐴎𐴝 𐴊𐴠𐴈𐴥𐴝 𐴈𐴡𐴀𐴡𐴘 𐴁𐴠𐴌𐴟𐴑𐴃𐴡 𐴒𐴡𐴌𐴥𐴠 𐴱𐴱

𐴄𐴤𐴑𐴧𐴠𐴕𐴎𐴝 𐴊𐴠𐴈𐴥𐴝𐴘𐴓𐴠 𐴈𐴡𐴀𐴡𐴊𐴠 𐴒𐴤𐴡𐴌 𐴏𐴠𐴌𐴥𐴝𐴚 𐴊𐴠𐴈𐴥𐴝 , 𐴘𐴥𐴝𐴕 𐴊𐴠𐴈𐴥𐴝𐴘𐴓𐴠 𐴈𐴡𐴀𐴡𐴊𐴠 𐴀𐴠𐴕 𐴁𐴞 𐴏𐴞 𐴊𐴠𐴈𐴥𐴝 , 𐴘𐴥𐴝𐴕 𐴊𐴠𐴈𐴥𐴝𐴘𐴓𐴠 𐴈𐴡𐴀𐴡𐴊𐴠 𐴊𐴠𐴐𐴤𐴡𐴙𐴃𐴧𐴝𐴃𐴝 𐴑𐴦𐴝𐴋 𐴊𐴠𐴈𐴥𐴝 , 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴀𐴡𐴐𐴤𐴝𐴕𐴃𐴞 𐴒𐴡𐴌𐴥𐴝𐴃 𐴃𐴤𐴝𐴑𐴠 , 𐴎𐴡𐴊𐴞 𐴀𐴥𐴠𐴃𐴧𐴟 𐴈𐴡𐴕𐴥𐴡 𐴀𐴠𐴑𐴧𐴤𐴝𐴕 𐴊𐴠𐴈𐴥𐴝𐴘 𐴕𐴡 𐴉𐴝𐴌𐴥𐴠 , 𐴃𐴡𐴀𐴡𐴘 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴁𐴡𐴓𐴝𐴎𐴟𐴌𐴞 , 𐴎𐴝𐴃𐴧𐴟 𐴎𐴠𐴊𐴦𐴟𐴕 𐴉𐴝𐴀𐴝 𐴀𐴥𐴠𐴊𐴦𐴟𐴕 𐴄𐴞𐴛𐴝 𐴓𐴡𐴘 𐴉𐴥𐴠𐴓𐴝 𐴱𐴱

𐴏𐴥𐴠𐴃𐴡𐴔𐴁𐴡𐴌𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 𐴑𐴞𐴀𐴞 𐴑𐴝𐴕 𐴉𐴝𐴌𐴝𐴌 / 𐴕𐴟𐴌 𐴀𐴝𐴔𐴞𐴕 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌𐴠 , 𐴕𐴞𐴓𐴝 𐴀𐴦𐴝𐴘𐴕𐴝 𐴀𐴡𐴓𐴝 𐴒𐴝𐴌𐴥𐴞 𐴓𐴡𐴘 , 𐴄𐴤𐴠𐴙𐴄 𐴀𐴥𐴟𐴀𐴟 ( 𐴔𐴞𐴚𐴓𐴝 𐴉𐴝𐴌𐴝)𐴃𐴧𐴟 𐴉𐴝𐴐𐴤𐴞𐴕𐴊𐴤𐴝𐴌 𐴁𐴤𐴡𐴌𐴞 𐴔𐴡𐴚𐴋𐴤𐴟 𐴎𐴝𐴀𐴝𐴌 𐴊𐴠 𐴀𐴥𐴠𐴍𐴠 , 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴠 𐴃𐴤𐴞𐴘𐴝 𐴒𐴡𐴌𐴥𐴝𐴘 , 𐴎𐴟𐴓𐴟𐴔 𐴒𐴡𐴌𐴥𐴞 𐴁𐴡𐴓𐴝𐴎𐴟𐴌𐴞 𐴋𐴠𐴌𐴠𐴁𐴤𐴝𐴌𐴡𐴃𐴧𐴟 𐴰 𐴰 𐴰 𐴰 𐴳 𐴇𐴥𐴝𐴎𐴝𐴌 𐴄𐴞𐴛𐴝 𐴓𐴡𐴘𐴧𐴠 𐴱𐴱

𐴏𐴥𐴠𐴃𐴡𐴔𐴁𐴡𐴌𐴡𐴌 𐴰 𐴱 𐴃𐴝𐴌𐴥𐴡𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴇𐴟 𐴁𐴡𐴇𐴥𐴟 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 , 𐴄𐴤𐴠𐴙𐴄 𐴀𐴥𐴟𐴀𐴟 𐴉𐴝𐴌𐴝𐴌 𐴵 𐴲 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴋𐴠𐴌𐴠𐴁𐴤𐴝𐴌 𐴀𐴠𐴑 𐴎𐴡𐴕𐴡𐴃𐴧𐴟 𐴰 𐴰 𐴰 𐴰 𐴱 𐴇𐴥𐴝𐴎𐴝𐴌 𐴄𐴞𐴛𐴝 𐴓𐴡𐴘𐴧𐴠 𐴁𐴡𐴓𐴞 𐴉𐴝𐴌𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴄𐴡𐴌 𐴏𐴝𐴙𐴌𐴑𐴤𐴠𐴓 , 𐴃𐴞𐴕𐴏𐴝𐴑𐴧𐴝 , 𐴔𐴡𐴄𐴡𐴌 𐴁𐴤𐴝𐴙𐴑 𐴀𐴝𐴌 𐴑𐴦𐴝𐴌 𐴒𐴝𐴌𐴞 , 𐴓𐴥𐴝𐴉𐴟 𐴈𐴡𐴚 𐴆𐴤𐴡𐴚𐴡𐴌 𐴁𐴞 𐴅𐴞 𐴂𐴞𐴌 𐴆𐴠𐴑 𐴉𐴝𐴌𐴥𐴝𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴏𐴥𐴠𐴃𐴡𐴔𐴁𐴡𐴌𐴡𐴌 𐴰 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴉𐴡𐴃𐴧𐴞 𐴘𐴥𐴝𐴕𐴡𐴃𐴧𐴟 𐴰 𐴰 𐴰 𐴱 𐴄𐴞𐴛𐴝𐴌 𐴊𐴡𐴌𐴠 𐴊𐴞𐴘𐴝 𐴉𐴡𐴌𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

Sources : Rvision