𐴌𐴟𐴇𐴝𐴙𐴚𐴒𐴙𐴝𐴌 𐴁𐴠𐴌𐴟𐴊𐴧𐴤𐴞 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴕𐴠𐴀𐴠𐴓𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 , 𐴀𐴝𐴔𐴠𐴌𐴞𐴑𐴝𐴌 𐴑𐴟𐴀𐴟𐴍𐴠 𐴉𐴦𐴠𐴏𐴁𐴤𐴟𐴑 𐴑𐴟𐴔𐴂𐴝𐴕𐴞𐴌𐴥𐴠 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 𐴱𐴱

𐴰 𐴰 𐴰 𐴰 𐴳 𐴷 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 , 𐴔𐴠𐴓𐴠𐴄𐴠𐴌𐴞𐴌 𐴑𐴝𐴌𐴖𐴝𐴘𐴃 𐴎𐴤𐴝𐴑𐴧𐴤𐴗𐴝 𐴈𐴝𐴍𐴝 𐴀𐴝𐴌 𐴎𐴤𐴝𐴑𐴧𐴤𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴃 𐴀𐴝𐴌𐴑𐴝𐴕𐴡𐴌𐴃𐴟 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴌𐴞𐴉𐴟𐴎𐴞 𐴁𐴡𐴙𐴕𐴧𐴙𐴠 , 𐴀𐴝𐴔𐴠𐴌𐴞𐴑𐴝𐴌 𐴖𐴞𐴉𐴝𐴑𐴞 𐴅𐴡𐴐𐴢 𐴀𐴠𐴑𐴎𐴡𐴕𐴠 𐴱𐴱

𐴁𐴡𐴌𐴔𐴥𐴝𐴃 𐴌𐴟𐴇𐴝𐴙𐴚𐴒𐴙𐴝𐴌𐴠 𐴎𐴟𐴓𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴀𐴞𐴕𐴡𐴌 𐴏𐴥𐴝𐴁𐴟𐴃 𐴏𐴟𐴐𐴠𐴓 𐴔𐴞𐴋𐴞𐴘𐴝𐴃 𐴃𐴟𐴓𐴥𐴞 𐴊𐴞𐴀𐴞𐴁𐴡𐴓𐴧𐴥𐴝,𐴉𐴦𐴠𐴏𐴁𐴤𐴟𐴑 𐴑𐴟𐴔𐴂𐴝𐴕𐴞𐴌𐴠 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 , 𐴎𐴠 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓𐴡𐴌𐴠 𐴏𐴟𐴐𐴠𐴓 𐴔𐴞𐴋𐴞𐴘𐴝𐴌 𐴈𐴝𐴓𐴝 𐴋𐴞𐴘𐴡 𐴀𐴥𐴡𐴑𐴧𐴡𐴓𐴠 , 𐴏𐴥𐴝𐴁𐴟𐴃 𐴀𐴥𐴞𐴀𐴞𐴕𐴡𐴌 𐴁𐴝𐴁𐴡𐴃𐴠 𐴓𐴟𐴑𐴝𐴘𐴧𐴝 𐴁𐴤𐴠𐴊𐴡𐴌 𐴇𐴥𐴠𐴉𐴝𐴎𐴡𐴃𐴡𐴌 𐴎𐴟𐴑𐴃𐴞 𐴀𐴝𐴌 𐴃𐴡𐴌𐴑𐴡𐴌𐴥𐴠 𐴀𐴞𐴕𐴑𐴝𐴌 𐴒𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴧𐴤𐴞𐴀𐴞𐴓,𐴖𐴝𐴐𐴞𐴕𐴄𐴡𐴕 𐴋𐴞 𐴏𐴞𐴌 𐴅𐴡𐴐𐴢 𐴀𐴥𐴞𐴁𐴝 𐴘𐴠 𐴁𐴟𐴙𐴃 𐴁𐴝𐴌𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌 𐴁𐴠𐴌𐴟𐴊𐴧𐴤𐴠 , 𐴁𐴡𐴌𐴔𐴥𐴝 𐴘𐴠 𐴊𐴠𐴐𐴁𐴞𐴃𐴠𐴐𐴤𐴞 𐴀𐴡𐴉𐴥𐴡𐴌𐴝𐴊 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴕𐴡𐴌 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴤𐴡𐴓𐴧𐴝 , 𐴃𐴡𐴊𐴡𐴕𐴃𐴡𐴑𐴝𐴌𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴅𐴝𐴕𐴑𐴝𐴌𐴞 𐴊𐴞𐴀𐴞𐴃𐴡 𐴈𐴡𐴀𐴘 𐴁𐴦𐴝𐴊𐴠 , 𐴊𐴞𐴀𐴞 𐴕𐴥𐴡 𐴉𐴝𐴌𐴠𐴊𐴠 𐴘𐴥𐴝𐴕𐴡𐴌𐴓𐴝 𐴉𐴦𐴠𐴏𐴁𐴤𐴟𐴑 𐴑𐴟𐴔𐴂𐴝𐴕𐴞𐴌𐴥𐴠 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 , 𐴀𐴠𐴕𐴋𐴞𐴓𐴧𐴝 𐴋𐴝𐴄𐴝 𐴔𐴞𐴋𐴞𐴘𐴝𐴃 𐴃𐴟𐴓𐴥𐴞 𐴊𐴡𐴀𐴡𐴕 , 𐴀𐴝𐴔𐴠𐴌𐴞𐴑𐴤𐴝𐴌 𐴀𐴝𐴙𐴕𐴡𐴌 𐴀𐴟𐴓𐴋𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴉𐴦𐴠𐴏𐴁𐴤𐴟𐴑 𐴑𐴟𐴔𐴂𐴝𐴕𐴞 𐴘𐴠 𐴀𐴞𐴕𐴑𐴝𐴌 𐴒𐴡𐴌𐴥𐴞 𐴊𐴞𐴘𐴠 𐴱𐴱

𐴔𐴡𐴕𐴃𐴡𐴌 𐴅𐴡𐴐𐴢 𐴏𐴥𐴝𐴁𐴠 , 𐴁𐴤𐴟𐴎𐴝𐴘 𐴉𐴥𐴠𐴓𐴝𐴘𐴧𐴠𐴊𐴠 𐴋𐴝𐴄𐴝 𐴀𐴥𐴞𐴀𐴞𐴕 𐴀𐴝𐴙𐴕𐴡𐴌 𐴁𐴤𐴟𐴃𐴡𐴌𐴠 𐴕𐴡 𐴒𐴇𐴡𐴓𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 , 𐴀𐴝𐴌 𐴎𐴡𐴊𐴞 𐴀𐴥𐴞𐴀𐴞𐴕𐴡𐴌𐴠 𐴔𐴞𐴋𐴞𐴘𐴝𐴃 𐴃𐴟𐴓𐴥𐴝 𐴕𐴡 𐴒𐴞𐴓𐴥𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴊𐴟𐴑𐴧𐴤𐴡 𐴒𐴤𐴡𐴄𐴡𐴕𐴝 𐴁𐴝𐴌𐴥𐴞 𐴎𐴝𐴘𐴁𐴡 𐴒𐴤𐴡𐴘 , 𐴉𐴦𐴠𐴏𐴁𐴤𐴟𐴑 𐴑𐴟𐴔𐴂𐴝𐴕𐴞𐴌 𐴃𐴡𐴌𐴉𐴥𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 𐴀𐴠𐴑𐴎𐴡𐴕𐴠 𐴈𐴡𐴘𐴧𐴠𐴊𐴠 , 𐴑𐴟𐴔𐴂𐴝𐴕𐴞 𐴘𐴠 𐴉𐴥𐴝𐴘𐴏𐴠𐴓𐴝 𐴘𐴦𐴝𐴕𐴡𐴌𐴥𐴠 𐴊𐴟𐴀𐴝𐴌𐴝 𐴁𐴤𐴝𐴉𐴞𐴁𐴤𐴡 , 𐴀𐴝𐴌 𐴑𐴟𐴔𐴂𐴝𐴕𐴞 𐴘𐴠 𐴁𐴡𐴌𐴔𐴥𐴝𐴌 𐴁𐴝𐴁𐴡𐴃𐴠 𐴀𐴝𐴏𐴥𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴝𐴕𐴋𐴝𐴌𐴠 , 𐴀𐴝𐴎𐴝𐴊𐴝𐴕𐴝 𐴃𐴡𐴊𐴡𐴕𐴃𐴡𐴑𐴝𐴌 𐴋𐴞𐴂𐴝𐴌𐴔𐴥𐴠𐴕𐴡𐴌𐴠 𐴀𐴝𐴒𐴠 𐴓𐴡𐴃𐴞 𐴊𐴞𐴀𐴞𐴉𐴥𐴠𐴓𐴝𐴘𐴧𐴠 𐴱𐴱

Sources : Dhakatribune