𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴀𐴝𐴌𐴑𐴝𐴕 𐴀𐴝𐴌𐴔𐴞𐴌 𐴔𐴝𐴎𐴤𐴠 𐴋𐴡𐴓𐴝 𐴋𐴡𐴓𐴞𐴃 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴈𐴡𐴀𐴡𐴊𐴠 𐴀𐴥𐴟𐴀𐴟𐴕 ,𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴌 𐴀𐴝𐴏𐴥𐴡𐴓𐴞 𐴁𐴤𐴝𐴐𐴞𐴕𐴊𐴝 ,𐴀𐴟𐴃𐴧𐴡𐴌 𐴀𐴝𐴌𐴑𐴝𐴕 𐴎𐴞𐴘𐴥𐴝𐴕 𐴑𐴟𐴓𐴝𐴋𐴝𐴕 𐴊𐴡𐴙𐴅𐴧𐴙𐴝 𐴀𐴝𐴌 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴔𐴝𐴎𐴤𐴠 𐴀𐴝𐴏𐴥𐴠𐴊𐴠 𐴎𐴝𐴒𐴝 , 𐴘𐴦𐴝𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴟𐴓𐴥𐴝 𐴁𐴟𐴕𐴘𐴝𐴊𐴞 𐴎𐴡𐴌𐴔𐴡𐴏𐴃𐴤𐴝𐴕 , 𐴎𐴝𐴒𐴝 𐴘𐴥𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴣𐴐𐴄𐴡 𐴏𐴥𐴡𐴊𐴞 𐴓𐴡𐴃𐴞 𐴃𐴤𐴝𐴑𐴞 𐴀𐴝𐴘𐴧𐴠𐴌𐴊𐴠 𐴁𐴦𐴝𐴊𐴠 𐴘𐴥𐴡 𐴱𐴱

𐴀𐴥𐴞𐴃𐴝𐴌𐴝𐴌 𐴁𐴟𐴕𐴘𐴝𐴊𐴞 𐴎𐴝𐴃𐴞𐴘𐴡𐴃𐴝 𐴀𐴝𐴌 𐴁𐴞𐴘𐴡𐴑𐴃𐴞 𐴒𐴡𐴃𐴝 𐴇𐴥𐴡𐴑𐴧𐴡𐴌 𐴀𐴞𐴕𐴑𐴝𐴌 𐴒𐴡𐴌𐴥𐴞 , 𐴀𐴥𐴞𐴃𐴝𐴌𐴝𐴌 𐴊𐴠𐴐𐴤𐴡𐴌𐴠 𐴁𐴡𐴌𐴔𐴥𐴝𐴌 𐴓𐴡𐴘 𐴔𐴞𐴓𐴝𐴘 𐴉𐴥𐴠𐴓𐴝𐴘𐴧𐴠 𐴱𐴱

𐴒𐴡𐴃𐴡 𐴉𐴥𐴠𐴌𐴖𐴝𐴌𐴞 𐴀𐴠𐴑 𐴃𐴝𐴌𐴥𐴞𐴑 𐴱 𐴲 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴌𐴔𐴥𐴝𐴌 𐴂𐴝𐴂𐴓𐴥𐴞𐴑 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴔𐴡𐴒𐴢 𐴁𐴝𐴒𐴞 ( 𐴀𐴠 𐴀𐴠 ) 𐴀𐴝𐴌 ( 𐴘𐴟 𐴀𐴠𐴓 𐴀𐴠 ) 𐴓𐴡𐴘 𐴏𐴟𐴑𐴃𐴞 𐴒𐴡𐴌𐴥𐴞 , 𐴀𐴥𐴞𐴃𐴝𐴌𐴝𐴌𐴠 𐴁𐴠𐴐𐴤𐴞 𐴑𐴤𐴠𐴔𐴡𐴃𐴝 𐴀𐴝𐴌 𐴀𐴡𐴊𐴤𐴞𐴑𐴝𐴌 𐴊𐴞𐴘𐴠 𐴱𐴱

𐴀𐴠𐴈𐴥𐴡𐴕 𐴀𐴝𐴌𐴑𐴝𐴕 𐴀𐴝𐴌𐴔𐴞 𐴀𐴝𐴌 (𐴘𐴟 𐴀𐴠𐴓 𐴀𐴠) 𐴘𐴠 𐴀𐴝𐴌𐴑𐴝𐴕𐴡𐴃 𐴀𐴠𐴕𐴃𐴠𐴎𐴝𐴔 , 𐴏𐴝𐴀𐴝 𐴏𐴞𐴃𐴝 𐴀𐴝𐴌 𐴀𐴞𐴕𐴏𐴝𐴉𐴢 𐴐𐴤𐴝𐴓𐴞𐴐𐴢 𐴒𐴡𐴌𐴥𐴠𐴌 , 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴄𐴠𐴑𐴏𐴥𐴡 𐴃𐴟𐴓𐴥𐴠𐴌 , 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴝𐴓𐴝 𐴉𐴟𐴌𐴝 𐴀𐴝𐴌 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴱𐴱

𐴀𐴠𐴑 𐴋𐴤𐴝𐴑𐴡𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴑𐴧𐴡𐴓𐴡𐴌𐴠 𐴈𐴡𐴀𐴡𐴌 𐴊𐴠 , 𐴀𐴝𐴣𐴀𐴝𐴌𐴝 𐴎𐴠𐴀𐴠𐴕 𐴈𐴡𐴀𐴡𐴘 𐴀𐴥𐴠𐴀𐴠𐴕 𐴏𐴡𐴓𐴝 𐴉𐴡𐴌𐴞𐴁𐴤𐴡 , 𐴀𐴝𐴌 𐴀𐴠𐴑 𐴋𐴤𐴝𐴑𐴡𐴃𐴧𐴟 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴡𐴀𐴡𐴌𐴊𐴠 , 𐴔𐴡𐴒𐴢 𐴁𐴝𐴒𐴞𐴌 𐴈𐴡𐴕𐴥𐴡 𐴈𐴡𐴃𐴤𐴝 𐴕𐴡 𐴔𐴝𐴕𐴞𐴁𐴤𐴝 𐴱𐴱

𐴁𐴤𐴟𐴏𐴞𐴊𐴡𐴚𐴡𐴌𐴃𐴟 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴘𐴠 𐴈𐴡𐴘𐴧𐴠𐴊𐴠 , 𐴀𐴝𐴣𐴀𐴝𐴌𐴝𐴌 𐴉𐴝𐴌𐴝𐴃 𐴴 𐴲 𐴒𐴤𐴡𐴕𐴄𐴝 𐴔𐴡𐴒𐴢 𐴁𐴝𐴒𐴞 𐴑𐴤𐴟𐴓𐴝 𐴔𐴠𐴓𐴥𐴝 𐴏𐴡𐴓𐴠𐴌 , 𐴔𐴠𐴓𐴠𐴄𐴠𐴌𐴞 𐴘𐴠 𐴑𐴠𐴙𐴏𐴧𐴥𐴟 𐴕𐴡 𐴒𐴡𐴌𐴥𐴠𐴌 , 𐴒𐴟𐴣𐴍𐴝 𐴀𐴝𐴌𐴑𐴝𐴕𐴡𐴃 𐴀𐴝𐴌𐴑𐴝𐴕 𐴀𐴝𐴌𐴔𐴞𐴌 𐴈𐴝𐴔 𐴁𐴤𐴝𐴓𐴝 𐴒𐴡𐴌𐴥𐴞 𐴏𐴡𐴓𐴠𐴌 , 𐴈𐴥𐴝𐴏𐴢 𐴒𐴡𐴌𐴞 𐴌𐴟𐴇𐴝𐴙𐴚𐴒𐴙𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 , 𐴀𐴝𐴣𐴀𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴟𐴖𐴧𐴝 𐴎𐴝𐴓𐴠𐴔 𐴁𐴠𐴍𐴝𐴌 𐴁𐴠𐴍𐴞 𐴀𐴥𐴡𐴘 𐴒𐴞𐴓𐴥𐴝𐴔 𐴁𐴤𐴡𐴘𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 , 𐴀𐴝𐴌𐴑𐴝𐴕 𐴀𐴝𐴌𐴔𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞 𐴋𐴦𐴝𐴘𐴌 𐴔𐴞𐴓𐴝𐴘𐴧𐴝 𐴁𐴠𐴐𐴤𐴞 𐴈𐴥𐴡𐴌𐴝𐴁 𐴉𐴡𐴓𐴡𐴏𐴞 , 𐴔𐴡𐴕𐴃𐴡𐴌 𐴊𐴟𐴕𐴞𐴘𐴝𐴘 𐴌𐴠 𐴊𐴠𐴈𐴥𐴝𐴘 𐴁𐴤𐴡𐴓𐴧𐴝 𐴃𐴝𐴌𐴥𐴝 𐴀𐴝𐴉𐴡𐴏𐴡𐴃 𐴓𐴝𐴌𐴥𐴝𐴘 𐴘𐴥𐴡 𐴒𐴡𐴌𐴥𐴠 , 𐴁𐴤𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴁𐴠𐴌𐴟𐴊𐴧𐴤𐴠 𐴀𐴠𐴑𐴧𐴤𐴟𐴘 𐴉𐴡𐴓𐴡𐴏𐴥𐴞 𐴓𐴡𐴘 𐴏𐴡𐴓𐴠𐴌 𐴁𐴡𐴓𐴞 , 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 𐴔𐴟𐴇𐴝𐴔𐴧𐴡𐴊 𐴁𐴡𐴐𐴢 𐴶 𐴲 𐴁𐴡𐴏𐴥𐴡𐴌𐴠 𐴈𐴡𐴘𐴧𐴠 𐴱𐴱

Sources : Rohingya Khobor