𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴠 𐴈𐴥𐴝𐴔𐴝𐴈𐴥𐴝 𐴀𐴥𐴞𐴃𐴝𐴌𐴝𐴌 𐴕𐴞𐴎𐴡𐴌 𐴎𐴟𐴁𐴝𐴕𐴡𐴃 𐴃𐴦𐴝𐴓𐴞𐴔 𐴊𐴡𐴀𐴡𐴕 𐴏𐴝𐴀𐴝 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴕𐴞𐴎𐴡𐴌 𐴇𐴥𐴡𐴑 𐴉𐴝𐴘𐴃𐴡 𐴔𐴡𐴕𐴠 𐴈𐴡𐴘𐴓𐴠 , 𐴀𐴥𐴞𐴃𐴝𐴌𐴝𐴃𐴧𐴟 𐴀𐴠𐴓𐴥𐴡𐴔𐴊𐴤𐴝𐴌 𐴁𐴡𐴕𐴞 𐴀𐴠𐴓𐴥𐴡𐴔 𐴊𐴞𐴀𐴞 𐴓𐴝𐴌𐴥𐴝𐴘 𐴒𐴡𐴌𐴥𐴝 𐴉𐴡𐴌𐴥𐴞𐴁𐴤𐴡 ,𐴀𐴥𐴝𐴣𐴃𐴞𐴘𐴝𐴌 𐴊𐴞𐴀𐴞 𐴕𐴡𐴀𐴡 ,𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴠 𐴈𐴥𐴝𐴔𐴝𐴈𐴥𐴝 𐴀𐴥𐴞𐴃𐴝𐴌𐴝𐴌 𐴕𐴞𐴎𐴡𐴌 𐴎𐴟𐴁𐴝𐴕𐴡𐴃 𐴀𐴠𐴓𐴥𐴡𐴔 𐴐𐴤𐴞𐴑𐴧𐴤𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴱𐴱

𐴀𐴥𐴞𐴃𐴝𐴌𐴝 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴡𐴀𐴡𐴕𐴡𐴌 𐴁𐴦𐴝𐴊𐴠 ,𐴃𐴝𐴌𐴥𐴝𐴌 𐴓𐴦𐴝𐴙𐴉𐴢 𐴃𐴝𐴌𐴥𐴝𐴌𐴃𐴟 𐴏𐴥𐴡𐴣𐴀𐴡𐴓𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞,𐴀𐴠𐴏𐴂𐴥𐴞𐴑𐴝𐴌 𐴀𐴥𐴡𐴑𐴧𐴡𐴓𐴠 𐴀𐴟𐴒𐴧𐴤𐴗𐴝 𐴀𐴡𐴕𐴓𐴥𐴝𐴙𐴕 𐴔𐴞𐴄𐴤𐴞𐴚𐴡𐴃 𐴈𐴡𐴘𐴧𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴌 ( 𐴂𐴞 𐴀𐴞 𐴀𐴠𐴕 ) 𐴃𐴡𐴕𐴎𐴞𐴔𐴡𐴌 𐴊𐴟𐴖𐴝𐴌𐴝 , 𐴁𐴟𐴙𐴃 𐴁𐴝𐴌𐴠 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴝 𐴒𐴞𐴘𐴠𐴊𐴠 , 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴕𐴉𐴡𐴌𐴥𐴝 𐴐𐴤𐴠𐴐𐴢 𐴊𐴞𐴕𐴡𐴃 , ” 𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴠 𐴐𐴤𐴞𐴑𐴧𐴤𐴝 𐴊𐴡𐴀𐴡𐴕 ” 𐴕𐴝𐴔 𐴊𐴞𐴀𐴞 𐴒𐴡𐴙𐴅𐴧𐴤𐴙𐴠𐴊𐴠 𐴀𐴡𐴕𐴓𐴥𐴝𐴙𐴕 𐴔𐴞𐴄𐴤𐴞𐴚𐴡𐴃 𐴈𐴟𐴀𐴝 𐴈𐴡𐴀𐴡𐴘 𐴀𐴥𐴡𐴘𐴧𐴠𐴊𐴠 𐴱𐴱

𐴁𐴝𐴌𐴝𐴑 𐴃𐴡𐴕𐴎𐴞𐴔𐴡𐴌 𐴃𐴦𐴝𐴓𐴞𐴔𐴞 𐴂𐴡𐴌𐴟𐴒𐴠𐴌𐴝𐴔𐴡𐴌 𐴁𐴝𐴀𐴝𐴌𐴡𐴌 𐴀𐴞𐴐𐴑𐴟𐴓𐴡𐴌 , 𐴔𐴦𐴝𐴏𐴟𐴔 𐴁𐴞𐴓𐴧𐴝𐴇𐴢 𐴘𐴠 𐴈𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴠 𐴀𐴥𐴞𐴃𐴝𐴌𐴝𐴌 𐴀𐴥𐴠𐴏𐴃𐴝𐴕𐴞𐴘𐴡 𐴎𐴟𐴁𐴝𐴕𐴡𐴃 𐴘𐴝𐴃𐴡 𐴀𐴞𐴚𐴌𐴝𐴎𐴞 𐴎𐴟𐴁𐴝𐴕𐴡𐴃 𐴐𐴤𐴞𐴑𐴧𐴤𐴝 𐴊𐴞𐴀𐴞 𐴀𐴠𐴓𐴥𐴡𐴔𐴊𐴝𐴌 𐴁𐴝𐴕𐴝𐴀𐴡𐴕 𐴎𐴡𐴌𐴟𐴌𐴞 𐴱𐴱

𐴀𐴥𐴞𐴃𐴝𐴌𐴝 𐴁𐴝𐴚𐴓𐴝 𐴊𐴠𐴐𐴤𐴡𐴃 𐴀𐴝𐴏𐴥𐴠 𐴎𐴠𐴈𐴥𐴡𐴕 𐴐𐴤𐴡𐴎𐴡𐴃 𐴁𐴝𐴚𐴓𐴝 𐴎𐴝𐴕𐴞 𐴎𐴝𐴘𐴁𐴡 𐴒𐴤𐴡𐴘 , 𐴀𐴥𐴠𐴃𐴡𐴓𐴧𐴝 𐴀𐴥𐴞𐴃𐴝𐴌𐴝𐴌𐴃𐴟 𐴁𐴝𐴚𐴓𐴝 𐴉𐴡𐴌𐴥𐴝 𐴕𐴡 𐴉𐴡𐴌𐴞𐴁𐴤𐴡 𐴱𐴱

𐴀𐴥𐴞𐴃𐴝𐴌𐴝𐴌𐴠 𐴀𐴞𐴐𐴑𐴟𐴓𐴡𐴃 𐴀𐴞𐴚𐴓𐴥𐴞𐴐𐴢 𐴘𐴝𐴃𐴡 𐴀𐴥𐴞𐴃𐴝𐴌𐴝𐴌 𐴀𐴥𐴠𐴏𐴃𐴝𐴕𐴞𐴘𐴡 𐴎𐴟𐴁𐴝𐴕𐴡𐴃 𐴃𐴦𐴝𐴓𐴞𐴔 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴀𐴥𐴠 𐴐𐴤𐴞𐴑𐴧𐴤𐴝 𐴘𐴠 𐴀𐴥𐴞𐴃𐴝𐴌𐴝𐴌𐴠 𐴏𐴥𐴝𐴔𐴧𐴠 𐴎𐴝𐴘 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 , 𐴔𐴦𐴝𐴏𐴟𐴔 𐴁𐴠𐴓𐴧𐴝𐴇𐴢 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴁𐴝𐴌𐴝𐴑 𐴃𐴡𐴕𐴎𐴞𐴔𐴠 𐴑𐴠𐴀𐴠𐴔𐴡𐴃 𐴰 𐴰 𐴷 𐴓𐴡𐴃𐴞 𐴐𐴤𐴞𐴑𐴧𐴇𐴝 𐴏𐴠𐴕𐴄𐴝𐴌 𐴏𐴝𐴓𐴝𐴀𐴝𐴌 𐴱𐴱

𐴎𐴝𐴣𐴀𐴝 𐴇𐴥𐴡𐴑 𐴐𐴤𐴡𐴣𐴍𐴡 𐴀𐴝𐴌 𐴋𐴡𐴣𐴀𐴡𐴌 𐴔𐴝𐴙𐴕𐴐𐴤𐴡𐴃𐴧𐴟 , 𐴃𐴦𐴝𐴓𐴞𐴔 𐴇𐴥𐴝𐴏𐴠𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴥𐴠𐴃𐴡 𐴁𐴠𐴐𐴤𐴞 𐴐𐴤𐴟𐴎𐴟𐴑 𐴐𐴤𐴟𐴁𐴞𐴊𐴝 𐴑𐴠𐴀𐴠𐴔𐴡𐴃 𐴕𐴥𐴝𐴘 , 𐴐𐴤𐴟𐴊𐴠 𐴊𐴟𐴘𐴧𐴝𐴕 𐴔𐴝𐴎𐴤𐴡𐴌 𐴐𐴤𐴞𐴑𐴧𐴤𐴝𐴌 𐴀𐴞𐴐𐴑𐴟𐴓 𐴀𐴝𐴏𐴥𐴠𐴊𐴠 , 𐴎𐴝𐴣𐴀𐴝 𐴇𐴥𐴡𐴑 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴊𐴤𐴡𐴌𐴔𐴞𐴘𐴡 𐴀𐴞𐴐𐴑𐴟𐴓 ( 𐴔𐴡𐴊𐴡𐴌𐴡𐴏𐴥𐴝 ) 𐴀𐴥𐴡𐴑𐴧𐴡𐴓𐴡𐴃 𐴑𐴠𐴙𐴏𐴧𐴥𐴟 𐴉𐴟𐴖𐴝𐴙𐴕 𐴎𐴝𐴘𐴃𐴡 𐴕𐴡 𐴏𐴝𐴀𐴝 𐴁𐴡𐴓𐴞 𐴁𐴝𐴌𐴝𐴑 𐴃𐴡𐴕𐴎𐴞𐴔𐴡𐴌 𐴎𐴖𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

Sources : Dhakatribune