𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕 𐴕𐴡 𐴔𐴝𐴕𐴞𐴁𐴤𐴡𐴌𐴓𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴑𐴠𐴙𐴏𐴧𐴥𐴟 𐴌𐴠 𐴔𐴝𐴃𐴝𐴘 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴀𐴥𐴟𐴣𐴐𐴞𐴘𐴝𐴌𐴞 𐴊𐴞𐴘𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴑𐴙𐴡𐴑𐴄𐴡 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 , 𐴔𐴟𐴏𐴥𐴡𐴓𐴔𐴝𐴕 𐴀𐴥𐴟𐴑𐴆𐴤𐴙𐴑 𐴌𐴥𐴠𐴔𐴥𐴟 𐴀𐴥𐴞𐴏𐴝𐴉𐴠 , ( 𐴀𐴠 𐴀𐴠 ) 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕 𐴀𐴝𐴌 𐴁𐴞𐴏𐴝𐴌 𐴒𐴡𐴌𐴥𐴝 𐴌𐴠 𐴕𐴡 𐴔𐴝𐴕𐴞𐴁𐴤𐴡𐴓𐴧𐴝 , 𐴑𐴙𐴡𐴑𐴄𐴡𐴌 𐴑𐴤𐴝 𐴔𐴥𐴝 𐴌𐴥𐴝 (𐴷 𐴵 𐴳) 𐴔𐴠𐴓𐴠𐴄𐴠𐴌𐴞 𐴁𐴠𐴄𐴝𐴓𐴞𐴘𐴠𐴕𐴠 , 𐴏𐴥𐴠𐴃𐴡𐴔𐴁𐴡𐴌 𐴔𐴥𐴝𐴐𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴔𐴞𐴄𐴤𐴞𐴚 𐴔𐴝𐴃𐴝𐴘 𐴀𐴥𐴟𐴣𐴐𐴞𐴘𐴝𐴌𐴞 𐴊𐴞𐴘𐴠 𐴁𐴡𐴓𐴞 , 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 𐴱𐴱

𐴂𐴥𐴡𐴑𐴄𐴤𐴡 𐴂𐴡𐴓𐴡𐴚 , 𐴐𐴗𐴠 𐴓𐴝𐴙𐴚 , 𐴂𐴥𐴝𐴙𐴑 𐴏𐴞 𐴌𐴥𐴠 , 𐴒𐴤𐴟𐴂𐴢 𐴂𐴞 𐴄𐴤𐴡𐴗𐴚 , 𐴓𐴥𐴝 𐴏𐴝𐴚 𐴑𐴤𐴡𐴗𐴑 𐴀𐴠𐴕𐴋𐴞𐴓𐴧𐴝 𐴔𐴟𐴏𐴥𐴡𐴓𐴔𐴝𐴕 𐴉𐴝𐴌𐴝 ( 𐴶 ) 𐴖𐴥𐴝𐴕𐴡𐴌 𐴀𐴥𐴟𐴑 𐴆𐴤𐴙𐴑 𐴌𐴥𐴠𐴔𐴥𐴟 𐴐𐴤𐴡𐴣𐴀𐴡 𐴸 𐴱 𐴎𐴡𐴕 𐴔𐴟𐴏𐴥𐴡𐴓𐴔𐴝𐴕 𐴔𐴝𐴃𐴝𐴘 𐴕𐴞𐴎𐴝𐴘 𐴄𐴤𐴠 𐴌𐴥𐴝𐴚𐴠 𐴀𐴞𐴚𐴒𐴞𐴃 𐴊𐴞𐴘𐴠𐴊𐴠 , 𐴔𐴟𐴏𐴥𐴡𐴓𐴔𐴝𐴕 𐴀𐴥𐴞𐴏𐴝𐴉𐴠 𐴀𐴠 𐴀𐴠 𐴀𐴦𐴝𐴙𐴕𐴞 𐴐𐴤𐴝𐴐𐴡𐴕𐴑𐴝𐴌 𐴕𐴡 𐴀𐴡𐴀𐴡𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴥𐴞𐴃𐴝𐴌𐴝𐴌 𐴁𐴞𐴏𐴝𐴌 𐴒𐴤𐴡𐴌𐴡𐴃 𐴁𐴞𐴏𐴝𐴌 𐴕𐴡 𐴊𐴞𐴀𐴞𐴁𐴤𐴡𐴓𐴧𐴝 𐴱𐴱

𐴀𐴥𐴞𐴃𐴝𐴌𐴝 𐴁𐴝𐴕𐴝𐴘 𐴊𐴞𐴀𐴞𐴁𐴡𐴊𐴠 𐴐𐴤𐴝𐴐𐴡𐴕 𐴉𐴝𐴄𐴞𐴃 𐴀𐴝𐴌 𐴉𐴟𐴓𐴞𐴐𐴢 𐴄𐴠𐴕𐴧𐴞𐴕𐴡𐴃 𐴕𐴡 𐴒𐴤𐴡𐴓𐴞𐴁𐴤𐴡𐴓𐴧𐴝 , 𐴔𐴞𐴄𐴤𐴞𐴚𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 ,𐴉𐴝𐴌𐴝𐴃 𐴈𐴡𐴕𐴥𐴡 𐴔𐴝𐴀𐴝𐴔𐴠𐴓𐴝 𐴀𐴥𐴡𐴘𐴓𐴠 𐴐𐴤𐴟𐴊𐴠 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴀𐴝𐴕𐴋𐴤𐴝𐴌𐴠 𐴀𐴝𐴏𐴥𐴠𐴊𐴠 𐴐𐴤𐴝𐴐𐴡𐴕 𐴈𐴝𐴣𐴏𐴝𐴌𐴞𐴃 𐴀𐴝𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴎𐴝𐴘 𐴁𐴞𐴏𐴝𐴌 𐴊𐴞𐴀𐴞𐴁𐴝𐴊𐴠 , 𐴈𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴀𐴥𐴟𐴑𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕𐴡𐴌 𐴇𐴥𐴝𐴓𐴡𐴃𐴡𐴃 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴁𐴞𐴏𐴝𐴌 𐴒𐴤𐴡𐴌 𐴕𐴡 𐴃𐴤𐴝𐴑𐴡𐴕𐴡𐴌 𐴎𐴡𐴌𐴞𐴘𐴝 𐴔𐴝𐴀𐴝𐴔𐴠𐴓𐴝 𐴑𐴠𐴙𐴏𐴧𐴥𐴟 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴉𐴝𐴌𐴝𐴙𐴓𐴧𐴝 𐴋𐴝𐴘 𐴋𐴡𐴣𐴀𐴡𐴌 𐴔𐴝𐴕𐴥𐴟𐴙𐴐𐴢 𐴔𐴞𐴓𐴞 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴠𐴌𐴊𐴠 𐴁𐴡𐴓𐴞 𐴈𐴡𐴘𐴧𐴠 , 𐴒𐴡𐴃𐴡 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 , 𐴀𐴝𐴌𐴑𐴝𐴕𐴡𐴃 𐴃𐴤𐴝𐴑𐴠𐴊𐴠 𐴔𐴝𐴙𐴕𐴐𐴤𐴡𐴌 𐴀𐴝𐴉𐴡𐴏𐴡𐴌 , 𐴀𐴡𐴙𐴕𐴧𐴞𐴘𐴝𐴘 𐴀𐴡𐴁𐴞𐴏𐴝𐴌 , 𐴏𐴟𐴌𐴝𐴏𐴟𐴌𐴞 𐴀𐴝𐴌 𐴎𐴝𐴒𐴝 𐴎𐴡𐴁𐴞𐴕𐴡𐴌 𐴔𐴝𐴀𐴝𐴔𐴠𐴓𐴝 𐴁𐴦𐴝𐴊𐴠 𐴀𐴦𐴝𐴙𐴕𐴡𐴌 𐴏𐴥𐴝𐴀𐴝𐴌𐴝 𐴓𐴟𐴖𐴝 𐴉𐴡𐴌𐴠𐴊𐴠 𐴔𐴦𐴡𐴊𐴧𐴞𐴔𐴝 𐴀𐴥𐴡𐴑𐴧𐴡𐴓𐴡𐴌 𐴁𐴞𐴏𐴝𐴌 𐴀𐴥𐴟𐴊𐴧𐴝 ( 𐴀𐴠 𐴀𐴠 ) 𐴔𐴡𐴒𐴢 𐴁𐴝𐴒𐴞𐴌 𐴏𐴥𐴞𐴘𐴝𐴏𐴞 𐴉𐴝𐴄𐴞 ( 𐴘𐴟 𐴀𐴠𐴓 𐴀𐴠 ) 𐴔𐴡𐴒𐴢 𐴎𐴝𐴃𐴞𐴘𐴡𐴃𐴝 𐴉𐴝𐴄𐴞 𐴘𐴠 𐴒𐴡𐴌𐴥𐴠𐴌 𐴁𐴡𐴓𐴞 𐴀𐴠𐴓𐴝𐴕 𐴕𐴝𐴔𐴝 𐴕𐴠𐴀𐴠𐴓𐴝𐴘 𐴊𐴞𐴘𐴠 𐴱𐴱

𐴀𐴠 𐴀𐴠 𐴔𐴡𐴒𐴢 𐴁𐴝𐴒𐴞𐴌 𐴁𐴡𐴌𐴡 𐴁𐴟 𐴆𐴤𐴙𐴟𐴑/ 𐴄𐴤𐴗𐴥𐴠𐴕 𐴔𐴠𐴌𐴥𐴠 𐴕𐴝𐴙𐴚𐴠 , 𐴀𐴝𐴌𐴑𐴝𐴕𐴡𐴌 𐴑𐴡𐴗𐴔𐴡𐴌 𐴊𐴟𐴘𐴀𐴔 𐴁𐴦𐴠𐴐𐴢 𐴐𐴤𐴡𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 ( 𐴀𐴠 𐴀𐴠 / 𐴘𐴟 𐴀𐴠𐴓 𐴀𐴠 ) 𐴉𐴝𐴄𐴞𐴌 𐴐𐴤𐴝𐴐𐴡𐴕𐴡𐴌 𐴀𐴝𐴕𐴋𐴤𐴝𐴌𐴠 𐴒𐴤𐴡𐴓𐴝𐴘 𐴉𐴥𐴠𐴓𐴥𐴝𐴘 𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 , 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴠 𐴱𐴱

Sources : RFA