𐴒𐴡𐴃𐴡 𐴏𐴝𐴙𐴌 𐴁𐴡𐴏𐴥𐴡𐴌 𐴀𐴝𐴒𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴟𐴓𐴟𐴔 𐴒𐴡𐴙𐴅𐴧𐴤𐴞𐴀𐴞𐴓 𐴊𐴠 𐴀𐴥𐴞𐴃𐴝𐴌𐴝 𐴓𐴝𐴒𐴝𐴃𐴝𐴌 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴠 𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴟𐴓𐴟𐴔 𐴒𐴡𐴙𐴅𐴧𐴤𐴞𐴀𐴞𐴓 𐴊𐴠 , 𐴇𐴥𐴝𐴓𐴑𐴝 𐴀𐴥𐴝𐴣𐴍𐴝 𐴔𐴠𐴓𐴠𐴄𐴠𐴌𐴞𐴌 𐴀𐴠𐴑𐴝𐴘 𐴘𐴠 𐴃𐴤𐴡 , 𐴇𐴥𐴡𐴑𐴟𐴔𐴡𐴃 𐴈𐴝𐴌𐴥𐴞 𐴓𐴡𐴘𐴧𐴠𐴊𐴠 𐴘𐴥𐴝𐴕𐴃𐴟 𐴓𐴡𐴃𐴞 , 𐴋𐴞𐴔𐴟𐴑𐴠𐴌𐴠𐴏𐴞 𐴏𐴡𐴀𐴡𐴙𐴕𐴧𐴝 𐴇𐴥𐴡𐴌𐴃𐴝𐴓𐴞 𐴀𐴥𐴡𐴑𐴧𐴡𐴓𐴡 𐴌𐴠 , 𐴀𐴡𐴔𐴝𐴕𐴡𐴁𐴡𐴃𐴝 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴠 𐴀𐴝𐴌 𐴊𐴟𐴑 𐴊𐴠𐴀𐴠𐴌𐴊𐴠 𐴁𐴡𐴓𐴞 , 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴌 𐴈𐴡𐴃𐴤𐴝 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 / 𐴕𐴠𐴂𐴢 𐴄𐴙𐴟𐴕𐴠 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴝𐴃 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴏𐴝𐴙𐴌 𐴁𐴡𐴏𐴥𐴡𐴌 𐴉𐴟𐴌𐴝𐴌𐴊𐴠 𐴀𐴡𐴑𐴃𐴤𐴡𐴃 , 𐴁𐴡𐴌𐴔𐴥𐴝 𐴀𐴝𐴌𐴀𐴥𐴡 𐴋𐴡𐴣𐴀𐴡𐴌 𐴀𐴦𐴡𐴣𐴏𐴥𐴝 𐴏𐴥𐴝𐴌𐴝 𐴈𐴥𐴡𐴃𐴡𐴌𐴝𐴃 𐴒𐴤𐴡𐴙𐴓𐴧𐴙𐴠 𐴒𐴤𐴡𐴘 𐴁𐴡𐴓𐴞 , 𐴀𐴝𐴔𐴠𐴌𐴞𐴑𐴝𐴌 𐴊𐴠𐴐𐴁𐴞𐴊𐴠𐴐𐴢 𐴊𐴤𐴡𐴌𐴔𐴡𐴌 𐴀𐴝𐴎𐴝𐴊𐴞 𐴓𐴡𐴘 𐴃𐴝𐴓𐴧𐴟𐴑 𐴌𐴝𐴑𐴤𐴠𐴊𐴠 𐴑𐴡𐴔𐴞𐴐𐴠𐴕𐴠 ( 𐴘𐴟 𐴀𐴠𐴏𐴢 𐴏𐴞 𐴀𐴝𐴘 𐴀𐴝𐴌 𐴀𐴠𐴉𐴢 ) 𐴒𐴡𐴃𐴡 𐴈𐴝𐴙𐴓𐴧𐴝 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴏𐴝𐴙𐴌 𐴁𐴡𐴏𐴥𐴡𐴌 𐴉𐴟𐴌𐴝𐴘 𐴁𐴦𐴝𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴎𐴠 𐴎𐴠𐴍𐴥𐴠 𐴀𐴝𐴏𐴥𐴠 𐴒𐴡𐴃𐴡 𐴈𐴝𐴙𐴓𐴧𐴝 𐴀𐴡𐴕𐴓𐴥𐴝𐴙𐴕𐴡𐴌 𐴃𐴟𐴌𐴥𐴟 𐴏𐴝𐴙𐴌𐴀𐴡𐴔 𐴘𐴝𐴊𐴒𐴝𐴌𐴞 𐴊𐴞𐴕 𐴔𐴝𐴕𐴝𐴘𐴧𐴠 , 𐴘𐴝𐴊𐴒𐴝𐴌𐴞 𐴊𐴞𐴕 𐴔𐴝𐴕𐴝𐴘𐴧𐴠𐴊𐴠 𐴀𐴡𐴕𐴟𐴐𐴄𐴤𐴝𐴕𐴡𐴃 , 𐴁𐴡𐴌𐴔𐴥𐴝 𐴑𐴡𐴗𐴕𐴏𐴥𐴞𐴓𐴡𐴌 𐴈𐴥𐴝𐴏𐴢 𐴔𐴡𐴐𐴖𐴝𐴌𐴝𐴊𐴝𐴃𐴝 / 𐴔𐴞𐴏𐴢 𐴘𐴝𐴚𐴇𐴞𐴓𐴞 , 𐴔𐴝𐴐𐴄𐴡𐴌 / 𐴔𐴝𐴉𐴟𐴑𐴞𐴌𐴝 𐴌𐴟𐴏𐴔𐴝𐴕 , 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴁𐴡𐴌𐴔𐴥𐴝 𐴀𐴥𐴡𐴑𐴧𐴡𐴓 𐴇𐴥𐴝𐴎𐴞𐴌 𐴀𐴥𐴡𐴘𐴧𐴠𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠 𐴊𐴠 𐴘𐴥𐴝𐴕 𐴀𐴝𐴃𐴤𐴞𐴑𐴧𐴤𐴙𐴝 𐴀𐴥𐴡𐴘𐴧𐴠𐴊𐴠 𐴕𐴡𐴀𐴡 , 𐴲 𐴱 𐴰 𐴲 𐴐𐴤𐴡𐴕𐴡𐴃 𐴀𐴝𐴌𐴑𐴝𐴕𐴡𐴃 𐴎𐴝𐴃 𐴉𐴡𐴌𐴥𐴡𐴑 𐴒𐴡𐴌𐴥𐴝 , 𐴀𐴝𐴉𐴡𐴏𐴥𐴡𐴌 𐴕𐴞𐴉𐴡𐴌𐴥𐴡𐴃 𐴀𐴝𐴌 𐴈𐴡𐴙𐴅𐴧𐴙𐴝 𐴀𐴥𐴡𐴘 𐴁𐴦𐴝𐴊𐴠 , 𐴇𐴥𐴡𐴑𐴟𐴔𐴡𐴃𐴠 𐴁𐴡𐴌𐴝𐴁𐴡𐴌 𐴀𐴞𐴕𐴏𐴝𐴉𐴢 𐴕𐴡 𐴒𐴡𐴌𐴥𐴡𐴕𐴠 𐴀𐴝𐴌 𐴈𐴡𐴏𐴟𐴌𐴁𐴡𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴝𐴎𐴝 𐴕𐴡 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴁𐴝𐴌𐴥𐴞 𐴘𐴡𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 / 𐴔𐴥𐴞𐴏𐴢 𐴘𐴝𐴚𐴇𐴞𐴓𐴞 𐴘𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕𐴀𐴥𐴡 𐴑𐴦𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴓𐴝𐴒𐴝𐴃𐴝𐴌 𐴎𐴟𐴓𐴟𐴔 𐴒𐴡𐴌𐴥𐴝𐴃 𐴀𐴝𐴏𐴥𐴠 , 𐴀𐴝𐴌 𐴑𐴡𐴁𐴤𐴞𐴋 𐴹 𐴱 𐴁𐴞𐴘𐴝𐴌𐴝𐴔𐴡𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 , 𐴔𐴥𐴞𐴏𐴢 𐴘𐴝𐴚𐴇𐴞𐴓𐴞 𐴘𐴠 𐴈𐴡𐴘𐴧𐴠 𐴱𐴱

Sources : RFA