𐴑𐴠𐴕𐴠𐴋𐴝𐴌 𐴀𐴟𐴎𐴞𐴌 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴘𐴧𐴠𐴌 𐴱𐴱

𐴈𐴡𐴃𐴤𐴝 𐴈𐴟𐴖𐴝 𐴈𐴡𐴀𐴡𐴘 𐴒𐴡𐴌𐴥𐴡𐴕𐴡𐴃٬ 𐴊𐴟𐴘 𐴃𐴡𐴌𐴉𐴥𐴝 𐴐𐴤𐴡𐴎𐴟𐴒𐴞𐴃𐴝 𐴃𐴤𐴝𐴑𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴀𐴞𐴐𐴤𐴟 𐴀𐴝𐴒𐴠 𐴃𐴤𐴝𐴑𐴤𐴞𐴁𐴡 ٬ 𐴑𐴠𐴕𐴠𐴋𐴝𐴌 𐴊𐴠𐴐𐴁𐴞𐴊𐴠𐴐𐴢 𐴀𐴟𐴃𐴉𐴡𐴕𐴧𐴡 𐴀𐴟𐴎𐴞𐴌 / 𐴑𐴝𐴌𐴞𐴕𐴝 𐴒𐴦𐴟𐴓𐴋 ٬ 𐴃𐴞𐴕 𐴊𐴞𐴕𐴧𐴙𐴝 𐴁𐴠𐴌𐴝𐴌 𐴄𐴝𐴙𐴔 𐴓𐴡𐴘 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴌𐴡𐴖𐴝𐴕𐴝 𐴀𐴥𐴡𐴘𐴧𐴠 ٬ 𐴀𐴟𐴎𐴞𐴌/ 𐴒𐴦𐴟𐴓𐴋𐴤𐴡𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴡𐴌 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓 𐴀𐴝𐴌 𐴔𐴟𐴓 𐴀𐴡𐴚𐴐𐴤𐴡𐴊𐴝𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞𐴁𐴤𐴝𐴌 𐴆𐴦𐴝𐴣𐴏𐴢 𐴀𐴥𐴡𐴘𐴁𐴤𐴡 𐴱𐴱

𐴎𐴠𐴍𐴥𐴠 𐴀𐴥𐴞𐴃𐴝𐴌𐴝 𐴁𐴝𐴚𐴓𐴝𐴊𐴠𐴐𐴢- 𐴑𐴠𐴕𐴠𐴋𐴝 𐴐𐴤𐴡𐴎𐴟𐴒𐴞𐴃𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴁𐴝𐴁𐴡𐴃𐴠 𐴈𐴟𐴖𐴝 𐴈𐴡𐴀𐴡𐴘 𐴒𐴡𐴌𐴥𐴞𐴁𐴡 ٬ 𐴀𐴝𐴌 𐴀𐴥𐴞𐴁𐴤𐴝𐴃𐴧𐴟 𐴆𐴦𐴝𐴣𐴏𐴢 𐴘𐴥𐴝𐴕𐴀𐴥𐴡 𐴀𐴥𐴡𐴘𐴁𐴡𐴊𐴠 ٬ 𐴎𐴠𐴍𐴥𐴠 𐴑𐴠𐴕𐴠𐴋𐴝𐴌 𐴀𐴟𐴃𐴉𐴡𐴕𐴧𐴡 𐴔𐴡𐴕𐴏𐴟𐴁𐴝 𐴀𐴥𐴡𐴑𐴧𐴡𐴓 𐴑𐴞𐴀𐴠𐴕 𐴒𐴡𐴌𐴥𐴠 𐴋𐴠𐴓𐴞𐴁𐴤𐴝𐴌𐴞 𐴊𐴞𐴘𐴝 𐴎𐴝𐴀𐴝𐴌𐴊𐴠 𐴘𐴥𐴝𐴕𐴀𐴥𐴡 𐴋𐴦𐴝𐴌𐴥𐴞𐴑 𐴏𐴝𐴀𐴝𐴘 𐴉𐴝𐴌𐴥𐴞𐴁𐴤𐴡 ٬ 𐴀𐴝𐴉𐴡𐴃𐴠 𐴔𐴝𐴙𐴅𐴧𐴤𐴙𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴓𐴡𐴘 𐴘𐴥𐴡 𐴔𐴞𐴓𐴞𐴁𐴤𐴡𐴓𐴧𐴝 𐴆𐴦𐴝𐴣𐴏𐴢 𐴀𐴥𐴡𐴘𐴁𐴡 𐴱𐴱

𐴀𐴝𐴌 𐴊𐴟𐴘 𐴃𐴡𐴌𐴉𐴥𐴝 𐴈𐴡𐴃𐴤𐴝 𐴈𐴟𐴖𐴝 𐴈𐴡𐴀𐴡𐴘 𐴀𐴥𐴡𐴘𐴁𐴡 𐴁𐴡𐴓𐴞 ٬ 𐴋𐴤𐴝𐴑𐴝𐴃 𐴀𐴝𐴏𐴥𐴠𐴊𐴠 𐴑𐴠𐴕𐴠𐴋𐴝𐴌 𐴇𐴥𐴝𐴘 𐴑𐴡𐴔𐴞𐴐𐴕𐴠 𐴈𐴡𐴘𐴧𐴠 ٬ 𐴀𐴠 𐴔𐴥𐴝𐴐𐴡𐴌 𐴑𐴠𐴙𐴏𐴧𐴥𐴟 𐴊𐴞𐴕 𐴁𐴦𐴝𐴊𐴠 ٬ 𐴌𐴞𐴉𐴟𐴎𐴞𐴌 𐴏𐴥𐴡𐴚𐴑𐴡𐴄𐴡𐴌 𐴏𐴝𐴙𐴌 𐴁𐴡𐴏𐴥𐴡𐴌 𐴉𐴟𐴌𐴝𐴘𐴁𐴤𐴡 ٬ 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴠 𐴓𐴝𐴒𐴝𐴃𐴝𐴌 𐴇𐴥𐴝𐴔𐴊𐴡𐴌𐴡𐴊𐴞 𐴊𐴠𐴈𐴥𐴝𐴘 𐴰 𐴰 𐴰 𐴹 𐴸 𐴸 𐴎𐴡𐴕 𐴌𐴞𐴉𐴟𐴎𐴞𐴌𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴏𐴥𐴝𐴀𐴝𐴌𐴝 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠𐴊𐴠 𐴘𐴥𐴝𐴕 ٬ 𐴔𐴝𐴕𐴞 𐴓𐴡𐴀𐴡𐴕 𐴀𐴠 𐴔𐴡𐴖𐴑𐴝𐴃 𐴎𐴡𐴌𐴟𐴌𐴞 𐴁𐴡𐴓𐴞 𐴘𐴥𐴡 ٬ 𐴇𐴥𐴝𐴘 𐴑𐴡𐴔𐴞𐴐𐴕𐴠 𐴈𐴡𐴘𐴧𐴠 𐴱𐴱

𐴌𐴞𐴉𐴟𐴎𐴞 𐴀𐴝𐴌 𐴌𐴞𐴉𐴟𐴎𐴞𐴌 𐴏𐴥𐴡𐴚𐴑𐴡𐴄𐴡𐴌 𐴀𐴝𐴉𐴡𐴃𐴠 𐴔𐴝𐴙𐴅𐴧𐴤𐴙𐴝 𐴁𐴝𐴚𐴓𐴝𐴊𐴠𐴐𐴢 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴡𐴌𐴠 𐴇𐴥𐴠𐴔𐴝𐴘𐴡𐴃 𐴒𐴡𐴌𐴥𐴝𐴃 𐴃𐴤𐴝𐴑𐴞𐴁𐴡 𐴁𐴡𐴓𐴞 𐴑𐴠𐴕𐴠𐴋𐴝 𐴘𐴠 𐴈𐴡𐴘𐴧𐴠 ٬ 𐴅𐴤𐴡𐴁𐴑𐴤𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴁𐴝𐴚𐴓𐴝𐴊𐴠𐴐𐴤𐴡𐴃 𐴇𐴥𐴠𐴉𐴝𐴎𐴡𐴃𐴡𐴃 𐴃𐴤𐴝𐴑𐴡𐴕 𐴎𐴡𐴌𐴟𐴌𐴞 ٬ 𐴌𐴞𐴉𐴟𐴎𐴞 𐴀𐴥𐴡𐴀𐴡𐴕 𐴀𐴝𐴌 𐴕𐴞𐴎𐴡𐴌 𐴊𐴠𐴐𐴤𐴡𐴃𐴧𐴟 𐴁𐴡𐴓𐴝𐴎𐴟𐴌𐴞 𐴕𐴠𐴀𐴠𐴓𐴝𐴘 𐴊𐴞𐴘𐴝 𐴎𐴡𐴀𐴡𐴕 ٬ 𐴈𐴡𐴕𐴥𐴑𐴞𐴘𐴥𐴠 𐴕𐴡 𐴏𐴝𐴀𐴝 𐴁𐴡𐴓𐴞 𐴘𐴥𐴡 𐴇𐴥𐴝𐴘 𐴑𐴡𐴔𐴞𐴐𐴠𐴕𐴠 𐴈𐴡𐴘𐴧𐴠 𐴱𐴱

𐴎𐴠𐴃𐴤𐴡𐴑𐴧𐴡𐴕 𐴀𐴥𐴞𐴃𐴝𐴌𐴝𐴌 𐴊𐴠𐴐𐴢 𐴁𐴡𐴌𐴔𐴥𐴝𐴃 𐴇𐴥𐴝𐴓𐴡𐴃 𐴄𐴤𐴞𐴑 𐴕𐴡 𐴀𐴥𐴡𐴀𐴡 ٬ 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴇𐴥𐴠𐴉𐴝𐴎𐴡𐴃𐴡𐴌 𐴀𐴝𐴌 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 ٬ 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴎𐴝𐴘 𐴕𐴥𐴡𐴀𐴡 𐴉𐴝𐴌𐴠 ٬ 𐴑𐴠𐴕𐴠𐴋𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴏𐴥𐴝𐴣𐴀𐴝𐴃𐴠 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴇𐴥𐴝𐴘 𐴑𐴡𐴔𐴞𐴐𐴠𐴕𐴠 𐴈𐴡𐴘𐴧𐴠 𐴱𐴱

Sources : Dhkatribune