𐴀𐴝𐴏𐴞𐴘𐴠𐴕𐴠 𐴁𐴡𐴌𐴟𐴕𐴥𐴝𐴘𐴌 𐴊𐴟𐴘𐴀𐴡𐴔 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴡 𐴌𐴥𐴠 𐴁𐴡𐴌𐴔𐴥𐴝𐴌 𐴓𐴝 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 𐴃𐴝𐴌𐴒𐴤𐴠𐴄 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴏𐴞𐴘𐴠𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴠 ٬ 𐴀𐴡𐴕 𐴓𐴥𐴝𐴙𐴕𐴡𐴌 𐴃𐴟𐴌𐴥𐴟 𐴁𐴡𐴏𐴥𐴡𐴌 𐴈𐴝𐴁𐴝𐴌𐴞 𐴒𐴡𐴙𐴅𐴧𐴤𐴤𐴙𐴠𐴊𐴠 𐴔𐴞𐴄𐴤𐴞𐴚𐴡𐴃 ٬ 𐴁𐴡𐴌𐴟𐴕𐴥𐴝𐴘𐴌 𐴊𐴟𐴘𐴀𐴡𐴔 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴠𐴌𐴞𐴖𐴝𐴕 𐴘𐴟𐴏𐴟𐴉𐴥𐴡𐴌𐴠 𐴁𐴡𐴌𐴔𐴥𐴝𐴌𐴓𐴝 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 𐴃𐴝𐴌𐴒𐴤𐴠𐴄 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ٬ 𐴕𐴝𐴔 𐴕𐴡 𐴈𐴡𐴀𐴡𐴕𐴡𐴌 𐴐𐴡𐴌𐴥𐴡𐴃 𐴓𐴡𐴘 ٬ 𐴀𐴝𐴏𐴞𐴘𐴠𐴕𐴡𐴌 𐴏𐴥𐴡𐴉𐴞𐴌 𐴊𐴟𐴘 𐴎𐴡𐴕𐴠 ( 𐴀𐴠 𐴂𐴞 ) 𐴈𐴥𐴡𐴁𐴡𐴌 𐴀𐴦𐴡𐴓𐴝 𐴌𐴠 𐴈𐴡𐴘𐴧𐴠 𐴱𐴱

𐴀𐴝𐴏𐴞𐴘𐴠𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴈𐴝𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴠𐴑 𐴔𐴡𐴃 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 ٬ 𐴀𐴠𐴈𐴥𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 𐴑𐴠𐴙𐴏𐴧𐴥𐴟 𐴒𐴡𐴌𐴥𐴞 𐴕𐴥𐴡 𐴉𐴝𐴌𐴠𐴊𐴠 𐴘𐴥𐴝𐴕𐴡𐴓𐴧𐴝 ٬ 𐴊𐴠𐴐𐴁𐴞𐴃𐴠𐴐𐴤𐴡𐴌 𐴏𐴝𐴁 𐴐𐴤𐴟𐴖𐴝 𐴉𐴡𐴌𐴠𐴌 𐴁𐴡𐴓𐴞 𐴈𐴡𐴘𐴧𐴡 ٬ 𐴀𐴝𐴏𐴞𐴘𐴠𐴕𐴠 𐴁𐴡𐴌𐴔𐴥𐴝𐴌𐴓𐴝 𐴕𐴡𐴔𐴝𐴙𐴕𐴊𐴝 𐴁𐴝𐴙𐴏𐴧𐴥𐴙𐴠𐴊𐴠 𐴕𐴡𐴔𐴝𐴙𐴕𐴊𐴝 𐴀𐴥𐴞𐴁𐴤𐴝𐴌𐴠 ٬ 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴕𐴡 𐴔𐴝𐴕𐴞𐴓𐴥𐴠 ٬ 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 𐴎𐴞𐴔𐴧𐴝𐴊𐴝𐴌𐴞 𐴊𐴞𐴀𐴞𐴃𐴠 𐴔𐴡𐴐𐴑𐴞𐴓 𐴀𐴥𐴡𐴘𐴁𐴡 𐴁𐴡𐴓𐴞 ٬ 𐴀𐴝𐴏𐴞𐴘𐴠𐴕𐴡𐴌 𐴏𐴥𐴡𐴉𐴞𐴌 𐴀𐴠𐴑 𐴎𐴡𐴕𐴠 𐴀𐴠 𐴂𐴞 𐴈𐴥𐴡𐴁𐴡𐴌 𐴀𐴦𐴡𐴓𐴝 𐴌𐴥𐴠 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 𐴁𐴡𐴌𐴔𐴥𐴝𐴌 𐴃𐴡𐴌𐴉𐴡𐴌𐴃𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴅𐴟𐴖𐴝𐴁 𐴉𐴝𐴀𐴝 𐴕𐴥𐴡 𐴎𐴝𐴀𐴝 ٬ 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴁𐴟 𐴆𐴤𐴙𐴟𐴑 𐴔𐴥𐴟𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴁𐴤𐴝𐴐𐴡𐴕 𐴊𐴞𐴘𐴠𐴊𐴠 𐴀𐴥𐴠𐴍𐴠 𐴈𐴡𐴘𐴧𐴠𐴊𐴠 ٬ 𐴀𐴝𐴏𐴞𐴘𐴠𐴕𐴡𐴌 𐴃𐴡𐴌𐴉𐴡𐴌𐴃𐴟 𐴁𐴡𐴌𐴔𐴥𐴝 𐴘𐴠 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 ٬ 𐴄𐴤𐴝𐴘𐴓𐴠𐴕𐴡𐴌 𐴉𐴟𐴌𐴝𐴕 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴖𐴞𐴌𐴝 𐴏𐴥𐴝𐴃 𐴂𐴟𐴃𐴝𐴌𐴝𐴑𐴟𐴓𐴡 𐴌𐴠 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴥𐴞𐴓𐴠 𐴑𐴡𐴁𐴟𐴓 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝 𐴘𐴠 𐴀𐴝𐴏𐴞𐴘𐴠𐴕𐴡 𐴌𐴥𐴠 𐴈𐴡𐴕𐴥𐴡 𐴅𐴟𐴖𐴝𐴁 𐴕𐴡 𐴊𐴞𐴀𐴞 𐴓𐴥𐴠 ٬ 𐴁𐴡𐴌𐴔𐴥𐴝𐴌 𐴊𐴠𐴐𐴤𐴙𐴃𐴧𐴝 𐴘𐴠 𐴊𐴟𐴑 𐴉𐴝𐴀𐴝𐴌 𐴊𐴠 𐴀𐴥𐴞𐴕𐴡𐴌 𐴁𐴝𐴁𐴡𐴃𐴠 𐴀𐴞𐴕𐴋𐴟 𐴕𐴥𐴞𐴆𐴤𐴙𐴝 𐴕𐴞𐴎𐴤𐴝𐴔 𐴕𐴡 𐴃𐴤𐴝𐴑𐴤𐴞𐴁𐴡 ٬ 𐴀𐴡𐴐𐴤𐴝𐴕𐴃𐴞𐴌 𐴇𐴥𐴝𐴓𐴡𐴃𐴡𐴌 𐴁𐴝𐴁𐴡𐴃𐴠 𐴓𐴝𐴒𐴝𐴃𐴝𐴌 𐴔𐴝𐴃𐴝𐴃 𐴃𐴤𐴝𐴑𐴞𐴁𐴤𐴡 𐴁𐴡𐴓𐴞 ٬ 𐴁𐴞𐴋𐴞𐴘𐴟 𐴔𐴞𐴄𐴤𐴞𐴚𐴡𐴌 𐴃𐴟𐴌𐴥𐴟 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡 𐴌𐴠 𐴀𐴞𐴕𐴋𐴟𐴕𐴥𐴞 𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴐𐴤𐴡𐴔 𐴁𐴝𐴌𐴠 𐴈𐴡𐴘𐴧𐴠 𐴱𐴱

𐴀𐴠 𐴇𐴥𐴝𐴉𐴃𐴝𐴃 𐴀𐴥𐴡𐴘𐴁𐴡𐴊𐴠 𐴀𐴝𐴏𐴞𐴘𐴠𐴕𐴡𐴌 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴀𐴡𐴕 𐴓𐴥𐴝𐴙𐴕 𐴔𐴞𐴄𐴤𐴞𐴚𐴡𐴃 ٬ 𐴀𐴝𐴔𐴠𐴌𐴞𐴑𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴠𐴕 𐴄𐴡𐴕𐴞 𐴁𐴡𐴓𐴝𐴚𐴑𐴝𐴚 𐴀𐴥𐴡 𐴐𐴤𐴝𐴔𐴠𐴓 𐴀𐴥𐴡𐴘𐴁𐴝𐴌 𐴀𐴝𐴏𐴥𐴠 ٬ 𐴀𐴠 𐴔𐴞𐴄𐴤𐴞𐴚𐴡𐴃 𐴁𐴡𐴌𐴔𐴥𐴝𐴃 𐴊𐴟𐴖𐴝𐴌𐴝 𐴋𐴞𐴔𐴟𐴑𐴠𐴌𐴠𐴏𐴞 𐴀𐴝𐴀𐴝𐴘 𐴉𐴝𐴌𐴞 𐴁𐴤𐴡𐴓𐴧𐴝 ٬ 𐴀𐴠𐴕 𐴄𐴡𐴕𐴞 𐴘𐴠 𐴀𐴝𐴏𐴞𐴘𐴠𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴄𐴤𐴠𐴓𐴞𐴁𐴤𐴡 𐴁𐴡𐴓𐴞 𐴀𐴠 𐴂𐴞 𐴈𐴥𐴡𐴁𐴡𐴌𐴡𐴃 𐴈𐴡𐴘𐴧𐴠 𐴱Sou

Sources : RFA