𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃𐴧𐴟 𐴊𐴟𐴁𐴡𐴏𐴥𐴡𐴌𐴡𐴃 𐴰 𐴰 𐴲 𐴲 𐴎𐴡𐴕 𐴀𐴡𐴉𐴥𐴡𐴌𐴥𐴝𐴊𐴤𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 ٬ 𐴀𐴝𐴘 𐴅𐴞 𐴂𐴞 𐴱𐴱

𐴒𐴡𐴃𐴡 𐴊𐴟𐴘 𐴁𐴡𐴏𐴥𐴡𐴌𐴡𐴃 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴃𐴟 𐴁𐴞𐴁𐴤𐴞𐴕𐴧𐴡 𐴊𐴟𐴐𐴢 𐴓𐴡𐴘 𐴰 𐴰 𐴲 𐴲 𐴎𐴡𐴕 𐴊𐴟𐴐𐴤𐴞 ( 𐴀𐴡𐴉𐴥𐴡𐴌𐴥𐴝𐴊𐴤𐴞 ) 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ٬ 𐴉𐴟𐴓𐴞𐴐𐴡𐴌 𐴀𐴥𐴞𐴕𐴏𐴂𐴝𐴑𐴄𐴡𐴌 𐴅𐴡𐴕𐴡𐴌𐴡𐴓 ( 𐴀𐴝𐴘 𐴅𐴞 𐴂𐴞 ) / 𐴁𐴠𐴕𐴡𐴎𐴞𐴌 𐴀𐴥𐴝𐴇𐴔𐴡𐴊𐴠 𐴈𐴡𐴘𐴧𐴠 ٬ 𐴁𐴝𐴚𐴓𐴝𐴊𐴠𐴐𐴢 – 𐴁𐴡𐴌𐴔𐴥𐴝 𐴁𐴡𐴖𐴋𐴝𐴌𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴃𐴟 𐴔𐴟𐴑𐴤𐴝 𐴔𐴟𐴑𐴤𐴞 𐴒𐴡𐴌𐴥𐴝 𐴉𐴡𐴌𐴠𐴌 𐴊𐴠 𐴆𐴠𐴓𐴥𐴠𐴙𐴣𐴅 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 𐴱𐴱

𐴀𐴠𐴑𐴤𐴟𐴀𐴞 𐴄𐴝𐴙𐴔𐴡𐴃 𐴒𐴤𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴢 ٬ 𐴉𐴟𐴓𐴞𐴐𐴢 𐴇𐴥𐴠𐴋 𐴑𐴗𐴝𐴄𐴝𐴌 𐴀𐴝𐴌 𐴒𐴟𐴌𐴞𐴕𐴊𐴝 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕𐴠 𐴀𐴠𐴑𐴧𐴟 𐴉𐴥𐴟𐴣𐴖𐴝𐴣𐴃𐴞 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠 ٬ 𐴁𐴡𐴓𐴞 𐴁𐴠𐴕𐴡𐴎𐴞𐴌 𐴀𐴥𐴝𐴇𐴔𐴡𐴊𐴠 𐴈𐴡𐴘𐴧𐴠 ٬𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 ٬𐴒𐴤𐴡𐴌 𐴀𐴟𐴎𐴞𐴌/𐴀𐴝𐴏𐴥𐴡𐴊𐴤𐴟 𐴎𐴧𐴡𐴔𐴝𐴕 𐴈𐴥𐴝𐴕 𐴑𐴡𐴔𐴝𐴓𐴡𐴌 𐴐𐴤𐴡𐴁𐴝𐴉𐴡𐴃𐴞𐴃 ٬ 𐴁𐴠𐴕𐴡𐴎𐴞𐴌𐴠 𐴈𐴡𐴃𐴤𐴝 𐴘𐴦𐴝𐴕 ٬ 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴀𐴡𐴉𐴥𐴞𐴏𐴡𐴃 𐴀𐴥𐴡𐴘𐴧𐴠𐴊𐴠 𐴑𐴡𐴗𐴔𐴞 𐴏𐴦𐴟𐴒𐴢 𐴉𐴝𐴓𐴡𐴕 𐴒𐴡𐴌𐴥𐴝 𐴔𐴞𐴄𐴤𐴞𐴚𐴡𐴌 𐴔𐴡𐴖𐴑𐴝𐴃 𐴈𐴡𐴘𐴧𐴠𐴊𐴠 𐴱𐴱

𐴔𐴞𐴄𐴤𐴞𐴚 𐴀𐴥𐴞𐴁𐴤𐴝𐴃 𐴀𐴥𐴡𐴑𐴧𐴡𐴓 𐴋𐴞𐴂𐴝𐴌𐴔𐴥𐴠𐴕𐴡𐴌 𐴁𐴡𐴌𐴡 𐴁𐴠𐴒𐴧𐴤𐴟𐴕 𐴇𐴥𐴝𐴎𐴞𐴌 𐴀𐴝𐴐𐴧𐴤𐴞𐴓 ٬ 𐴀𐴝𐴒𐴠 𐴎𐴞𐴀𐴞𐴕 𐴀𐴥𐴡𐴘𐴧𐴠 𐴀𐴥𐴡𐴘𐴧𐴠 ٬ 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴋𐴤𐴝𐴑𐴝𐴌𐴃𐴟 𐴃𐴞𐴕 𐴁𐴠𐴄𐴤𐴠𐴓𐴞𐴘𐴠𐴕 𐴉𐴥𐴡𐴖𐴏𐴢𐴀𐴝𐴕𐴥𐴞𐴘𐴥𐴡𐴌𐴠 𐴴 𐴳 𐴐𐴤𐴝𐴕 𐴑𐴠𐴀𐴠𐴔𐴡𐴃 𐴇𐴥𐴠𐴉𐴝𐴎𐴡𐴃𐴞 𐴒𐴦𐴝𐴋 𐴀𐴥𐴞𐴏𐴝𐴉𐴠 𐴒𐴟𐴌𐴥𐴟𐴂𐴢 𐴁𐴝𐴕𐴝𐴘 𐴊𐴞𐴘𐴧𐴞 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴴 𐴳 𐴐𐴤𐴝𐴕 𐴑𐴠𐴀𐴠𐴔𐴡𐴌𐴠 𐴘𐴥𐴡 𐴒𐴟𐴌𐴥𐴟𐴂𐴢 𐴁𐴝𐴕𐴝𐴘 𐴉𐴥𐴞𐴄 𐴒𐴡𐴌𐴥𐴞 𐴊𐴞𐴘𐴧𐴞 ٬ 𐴇𐴥𐴠𐴉𐴝𐴎𐴡𐴃𐴞 𐴒𐴦𐴝𐴋 𐴀𐴥𐴟𐴀𐴟𐴕𐴡𐴌𐴠 𐴒𐴝𐴌𐴥𐴞 𐴀𐴝𐴌 𐴔𐴡𐴄𐴡𐴌 𐴏𐴝𐴙𐴌𐴑𐴤𐴠𐴓 𐴊𐴞𐴘𐴧𐴞 ٬ 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴀𐴞𐴐𐴤𐴝𐴌𐴝 𐴓𐴡𐴘 𐴀𐴥𐴞𐴃𐴝𐴌𐴝 𐴌𐴝𐴙𐴃𐴡𐴃 𐴔𐴝𐴎𐴤𐴠 𐴘𐴥𐴡 𐴒𐴤𐴟𐴌𐴝 𐴉𐴞𐴌𐴝 𐴒𐴡𐴌𐴥𐴠 ٬ 𐴁𐴠𐴕𐴡𐴎𐴞𐴌 𐴀𐴥𐴝𐴇𐴔𐴡𐴊𐴠 𐴈𐴡𐴘𐴧𐴠𐴊𐴠 𐴱𐴱

𐴀𐴝𐴣𐴀𐴝𐴌𐴝 𐴒𐴡𐴃𐴡 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴡𐴌𐴠 𐴰 𐴰 𐴲 𐴲 𐴎𐴡𐴕 𐴀𐴡𐴉𐴥𐴡𐴌𐴝𐴊𐴤𐴞 𐴁𐴡𐴕 𐴒𐴡𐴙𐴅𐴧𐴤𐴞 ٬ 𐴑𐴠𐴀𐴠𐴔 𐴁𐴠𐴒𐴧𐴤𐴗𐴝𐴃 𐴁𐴡𐴀𐴡𐴃 𐴋𐴦𐴡𐴙𐴓𐴧𐴝 𐴀𐴡𐴉𐴥𐴡𐴌𐴥𐴝𐴊 𐴀𐴥𐴡𐴘𐴧𐴠 ٬ 𐴀𐴠𐴈𐴥𐴡𐴕 𐴀𐴝𐴒𐴡𐴌𐴃𐴟 𐴁𐴤𐴝𐴌𐴠 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴀𐴠𐴑𐴧𐴠𐴕𐴥𐴝 𐴁𐴤𐴝𐴓𐴝 𐴀𐴥𐴡𐴘𐴧𐴠 ٬ 𐴀𐴝𐴌𐴔𐴥𐴞𐴌 𐴔𐴡𐴊𐴡𐴊 𐴓𐴡𐴘 𐴀𐴝𐴣𐴀𐴝𐴌𐴝 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴒𐴤𐴞𐴌𐴝 𐴊𐴞𐴘𐴧𐴞 𐴱𐴱

𐴀𐴝𐴌 𐴒𐴤𐴞𐴌𐴝 𐴓𐴡𐴘 𐴁𐴝𐴎𐴤𐴝𐴘 𐴌𐴝𐴏𐴧𐴝 𐴁𐴝𐴕𐴝𐴘𐴧𐴞 ٬ 𐴎𐴞𐴁𐴤𐴝𐴌 𐴎𐴡𐴌𐴞𐴘𐴝 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴂𐴥𐴠𐴄𐴌𐴟𐴓 𐴒𐴡𐴌𐴥𐴝 𐴎𐴝𐴀𐴝 ٬ 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃 𐴏𐴡𐴑𐴞 𐴒𐴤𐴡𐴌 𐴁𐴝𐴕𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴞 ٬ 𐴎𐴤𐴡𐴌 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 𐴈𐴝𐴔 𐴁𐴤𐴝𐴍𐴞 𐴔𐴝𐴙𐴅𐴧𐴤𐴙𐴠 ٬ 𐴁𐴠𐴒𐴧𐴤𐴞𐴕 𐴐𐴤𐴠𐴐𐴢 𐴀𐴥𐴡𐴘𐴓𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴕𐴞𐴘𐴡𐴔 𐴑𐴝𐴕𐴟𐴕 𐴄𐴤𐴞𐴑 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘 𐴱𐴱

Sources : Ukhiyanews. com