𐴁𐴤𐴝𐴌𐴡𐴃𐴡 ( 𐴀𐴞𐴕𐴋𐴞𐴘𐴝 ) 𐴃𐴧𐴟 𐴀𐴝𐴘𐴧𐴠𐴌𐴊𐴠 𐴱 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴤𐴝𐴌𐴡𐴃𐴡𐴃𐴧𐴟 𐴀𐴝𐴘𐴧𐴠𐴌𐴊𐴠 𐴁𐴠𐴍𐴞𐴘𐴝𐴙𐴕 ٬ 𐴁𐴠𐴍𐴝𐴀𐴝𐴙𐴕 𐴀𐴝𐴌 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴱 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 ٬ 𐴷 𐴱 / 𐴃𐴝𐴌𐴥𐴞𐴑 𐴎𐴟𐴓𐴝𐴘 𐴐𐴤𐴡𐴕𐴞 𐴁𐴝𐴌𐴠 ٬ 𐴁𐴠𐴀𐴞𐴕𐴧𐴝 𐴰 𐴱 𐴁𐴝𐴎𐴠 𐴔𐴡𐴓𐴡𐴘 𐴁𐴝𐴎𐴝𐴌𐴡𐴌 ٬𐴏𐴞𐴌𐴞𐴔𐴡𐴚𐴒𐴡𐴓 𐴌𐴦𐴟𐴋𐴡𐴌 𐴁𐴦𐴝𐴏𐴢 𐴀𐴠𐴏𐴄𐴞𐴐𐴤𐴞𐴕𐴡𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴞 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 ٬ 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴏𐴥𐴡 𐴎𐴡𐴕 𐴁𐴠𐴍𐴝 𐴀𐴝𐴣𐴐𐴄𐴡 𐴎𐴡𐴕 𐴁𐴠𐴍𐴞 𐴀𐴝𐴌 𐴇𐴥𐴝𐴣𐴃 𐴎𐴡𐴕 𐴉𐴟𐴖𐴝𐴙𐴕 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴀𐴠𐴒𐴝𐴕𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴠𐴍𐴠 𐴎𐴝𐴘𐴁𐴡𐴓𐴧𐴝 ٬ 𐴀𐴞𐴕𐴋𐴞𐴘𐴝𐴌 𐴃𐴞𐴌𐴞𐴉𐴟𐴌𐴝 𐴌𐴝𐴙𐴅𐴧𐴡𐴌 𐴀𐴝𐴓𐴞𐴇𐴥𐴝𐴄𐴡𐴌𐴃𐴟 ٬ 𐴋𐴝𐴓𐴝𐴓𐴡𐴌 𐴃𐴟𐴌𐴥𐴟 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴡𐴓𐴡𐴘 𐴁𐴝𐴎𐴝𐴌 𐴀𐴟𐴉𐴡𐴎𐴞𐴓𐴥𐴝𐴌 𐴐𐴞𐴑𐴍𐴞𐴘𐴝 𐴒𐴠𐴌𐴝𐴔𐴡𐴃 𐴉𐴝𐴌𐴝𐴘𐴧𐴠𐴊𐴠 ٬ 𐴀𐴡𐴑𐴃𐴤𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 ٬ 𐴔𐴡𐴓𐴡𐴘 𐴁𐴝𐴎𐴝𐴌 𐴎𐴞𐴓𐴥𐴝𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴔𐴟𐴇𐴝𐴔𐴧𐴡𐴊 𐴎𐴡𐴑𐴡𐴌𐴞𐴘𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴒𐴠 𐴃𐴤𐴝𐴑𐴤𐴞 𐴁𐴦𐴝𐴊𐴠 𐴐𐴝𐴃𐴡𐴑𐴧𐴞𐴌𐴝 𐴁𐴡𐴖𐴋𐴝𐴌 𐴁𐴦𐴝𐴘 𐴀𐴞𐴕𐴋𐴞𐴘𐴝𐴃 𐴎𐴝𐴀𐴝𐴘 𐴃𐴤𐴝𐴙𐴑𐴧𐴙𐴠𐴊𐴠 𐴀𐴝𐴏𐴠 ٬ 𐴀𐴝𐴌 𐴑𐴠𐴙𐴏𐴧𐴥𐴟 𐴐𐴤𐴡𐴌𐴝 𐴐𐴤𐴡𐴌𐴞 𐴁𐴡𐴌𐴔𐴥𐴝𐴃𐴧𐴟 𐴉𐴝𐴌𐴝𐴘 𐴀𐴞𐴕𐴋𐴞𐴘𐴝𐴃 𐴃𐴤𐴝𐴙𐴑𐴧𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 ٬ 𐴀𐴞𐴕𐴋𐴞𐴘𐴝𐴌 𐴋𐴝𐴓𐴝𐴓 / 𐴏𐴝𐴘𐴉𐴟𐴓 𐴀𐴝𐴌 𐴁𐴝𐴚𐴓𐴝𐴃𐴠𐴐𐴤𐴡𐴌 𐴋𐴝𐴓𐴝𐴓 / 𐴉𐴥𐴡𐴌𐴞𐴊 𐴀𐴝𐴌 𐴎𐴡𐴐𐴤𐴞𐴔𐴡𐴌 𐴃𐴟𐴌𐴥𐴟 𐴘𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴝𐴘𐴧𐴠𐴊𐴠 𐴁𐴡𐴓𐴞 𐴘𐴥𐴡 ٬ 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴘𐴠 𐴈𐴡𐴘𐴧𐴠 𐴱𐴱

𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴑𐴤𐴟𐴂𐴢 𐴁𐴠𐴐𐴤𐴞 𐴎𐴟𐴌𐴠 𐴏𐴡𐴓𐴠𐴌𐴊𐴠 𐴀𐴡𐴑𐴃𐴤𐴡𐴃 ٬ 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴝𐴓𐴝 𐴏𐴠𐴑𐴀𐴥𐴝𐴂𐴢 𐴒𐴡𐴌𐴥𐴝 𐴒𐴞𐴘𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 ٬ 𐴁𐴤𐴝𐴌𐴡𐴃𐴡𐴃 𐴃𐴤𐴝𐴙𐴑𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 ٬ 𐴔𐴡𐴓𐴡𐴘 𐴁𐴝𐴎𐴝𐴌𐴡𐴌 𐴑𐴟𐴓𐴝𐴀𐴟𐴍𐴝 𐴀𐴟𐴉𐴡𐴎𐴞𐴓𐴥𐴝𐴌 𐴀𐴝𐴓𐴞𐴕𐴡𐴒𐴡𐴌𐴡𐴌 𐴐𐴤𐴞𐴔𐴝𐴌𐴠 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝 𐴀𐴥𐴞𐴏𐴝𐴉𐴠 𐴁𐴟𐴎𐴤𐴠 ٬ 𐴀𐴝𐴌 𐴀𐴥𐴞𐴃𐴝𐴌𐴝 𐴁𐴝𐴚𐴓𐴝𐴊𐴠𐴐𐴤𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴝 𐴱𐴱

𐴀𐴞𐴕𐴋𐴞𐴘𐴝𐴃 𐴃𐴤𐴝𐴑𐴤𐴝𐴃𐴧𐴟 𐴁𐴤𐴝𐴌𐴡 𐴁𐴤𐴝𐴓𐴝 𐴀𐴝𐴌 𐴐𐴤𐴟𐴁𐴞𐴊𐴝 𐴀𐴥𐴡𐴘𐴁𐴡 𐴁𐴡𐴓𐴞 𐴁𐴟𐴎𐴤𐴞 ٬ 𐴁𐴤𐴝𐴌𐴡𐴃𐴡𐴃𐴧𐴟 𐴀𐴝𐴘𐴧𐴠𐴌𐴊𐴠 𐴁𐴡𐴓𐴞 𐴈𐴡𐴘𐴧𐴠 ٬ 𐴘𐴦𐴝𐴌 𐴀𐴝𐴒𐴠 𐴅𐴟𐴓𐴝𐴘𐴌 𐴲 𐴃𐴝𐴌𐴥𐴞𐴑𐴡𐴃 𐴀𐴥𐴡 𐴀𐴠𐴑𐴤𐴟𐴘 𐴎𐴝𐴒𐴝𐴃𐴧𐴟 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴞𐴓 ٬ 𐴁𐴦𐴝𐴊𐴠 𐴀𐴥𐴞𐴃𐴝𐴌𐴝𐴌𐴠 𐴑𐴝𐴑𐴏𐴢 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴀𐴞𐴓 𐴱𐴱

Sources : ukhiyanews.com