𐴀𐴝𐴌𐴑𐴝𐴕𐴡𐴃 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴳 𐴱 𐴎𐴡𐴕 𐴓𐴡𐴃𐴞 𐴔𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴅𐴧𐴙𐴝 𐴁𐴠𐴀𐴞𐴕𐴧𐴙𐴝 𐴉𐴡𐴙𐴅𐴧𐴙𐴡𐴕𐴃𐴡 𐴉𐴝𐴀𐴝 𐴒𐴞𐴘𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 ٬ 𐴒𐴡𐴃𐴡 𐴈𐴝𐴙𐴓𐴧𐴙𐴝 𐴏𐴝𐴣𐴊𐴝 𐴐𐴤𐴡𐴀𐴡𐴌𐴡𐴃 𐴊𐴟𐴘 𐴎𐴡𐴕 𐴑𐴠𐴂𐴧𐴟𐴌𐴟𐴃 𐴀𐴠𐴑 𐴎𐴡𐴕 ٬ 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴀𐴝𐴌𐴑𐴝𐴕𐴡𐴃 𐴂𐴠𐴌𐴠𐴕𐴠 𐴏𐴥𐴟𐴐𐴃𐴡 𐴀𐴡𐴉𐴞𐴏𐴥𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴳 𐴱 𐴎𐴡𐴕 𐴔𐴡𐴙𐴅𐴧𐴙𐴠 𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 ٬ 𐴀𐴥𐴠𐴕𐴋𐴞𐴓𐴧𐴝 𐴒𐴡𐴃𐴡 𐴈𐴝𐴙𐴓𐴧𐴙𐴝 𐴀𐴝𐴙𐴑𐴧𐴙𐴝𐴁𐴡𐴃 𐴏𐴝𐴙𐴌 𐴎𐴡𐴕 ٬ 𐴂𐴟𐴕𐴧𐴥𐴝𐴆𐴤𐴗𐴠𐴚𐴡𐴃 𐴊𐴟𐴘 𐴎𐴡𐴕 ٬ 𐴆𐴙𐴡𐴑𐴄𐴡𐴃 𐴀𐴠𐴑 𐴎𐴡𐴕 𐴱𐴱

𐴔𐴠𐴌𐴠𐴁𐴟𐴚𐴡𐴃 𐴀𐴠𐴑 𐴎𐴡𐴕 ٬ 𐴆𐴙𐴡𐴑 𐴂𐴟𐴌𐴟𐴃 𐴳 𐴱 𐴎𐴡𐴕 ٬ 𐴀𐴥𐴠𐴣𐴔𐴡𐴃 𐴶 𐴱 𐴎𐴡𐴕 ٬ 𐴏𐴝𐴣𐴊𐴝𐴃 𐴵 𐴎𐴡𐴕 ٬ 𐴃𐴡𐴚 𐴒𐴤𐴟𐴃 𐴶 𐴎𐴡𐴕 ٬ 𐴒𐴗𐴥𐴝𐴃 𐴹 𐴎𐴡𐴕 ٬ 𐴔𐴡𐴚𐴋𐴤𐴟𐴃 𐴴 𐴎𐴡𐴕 𐴀𐴝𐴌 𐴁𐴤𐴟𐴏𐴞𐴊𐴡𐴚𐴡𐴃 𐴲 𐴎𐴡𐴕 ٬ 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴳 𐴶 𐴎𐴡𐴕 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴙𐴔𐴧𐴙𐴝 𐴉𐴝𐴀𐴝 𐴒𐴞𐴘𐴠 ٬ 𐴀𐴟𐴀𐴟𐴕 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴉𐴟𐴌𐴝 𐴀𐴝𐴌𐴑𐴝𐴕𐴡𐴃 𐴀𐴠𐴈𐴥𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 𐴶 𐴵 𐴸 𐴎𐴡𐴕 𐴓𐴡𐴃𐴞 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴙𐴔𐴧𐴙𐴝 𐴉𐴝𐴀𐴝 𐴒𐴞𐴘𐴠𐴱𐴱

𐴀𐴥𐴠𐴍𐴠 𐴁𐴤𐴟𐴃𐴡𐴌𐴃𐴟 𐴹 𐴴 𐴱 𐴎𐴡𐴕 𐴁𐴞𐴘𐴝𐴌𐴡𐴔 𐴒𐴡𐴔 𐴀𐴥𐴡𐴀𐴡𐴕𐴠 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃𐴧𐴟 𐴕𐴠𐴓𐴝𐴘 𐴊𐴞𐴘𐴠 ٬ 𐴁𐴝𐴑𐴞 𐴹 𐴴 𐴶 𐴎𐴡𐴕 𐴁𐴞𐴘𐴝𐴌𐴝𐴙𐴔𐴧𐴙𐴝 𐴀𐴠𐴈𐴥𐴡𐴕 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴊𐴝𐴁𐴝𐴘 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 ٬ 𐴀𐴝𐴌𐴑𐴝𐴕𐴡𐴃 𐴒𐴡𐴃𐴡 𐴔𐴝𐴌𐴠𐴆𐴡𐴌 𐴵 𐴲 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 ٬ 𐴁𐴝𐴚𐴓𐴝𐴊𐴠𐴐𐴢 𐴀𐴝𐴀𐴝 𐴎𐴝𐴀𐴝 𐴒𐴡𐴙𐴅𐴧𐴤𐴙𐴠𐴊𐴠 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 ٬ 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴉𐴝𐴀𐴝 𐴐𐴤𐴟𐴌𐴟 𐴀𐴥𐴡𐴘𐴧𐴠𐴊𐴠 𐴱𐴱

𐴀𐴥𐴠𐴃𐴡𐴓𐴧𐴝 𐴀𐴝𐴑𐴧𐴙𐴝𐴁 𐴀𐴝𐴌 𐴔𐴡𐴚𐴋𐴤𐴟 𐴊𐴟𐴕𐴥𐴞 𐴐𐴤𐴡𐴀𐴡𐴌𐴡𐴌 ٬ 𐴁𐴡𐴌𐴔𐴥𐴝 – 𐴁𐴝𐴚𐴓𐴝𐴊𐴠𐴐𐴢 𐴁𐴡𐴖𐴋𐴝𐴌𐴡𐴌 𐴐𐴤𐴡𐴊𐴡𐴌𐴞𐴌 𐴔𐴝𐴓 𐴀𐴝𐴕𐴝 𐴕𐴞𐴎𐴝𐴌 𐴏𐴠𐴑𐴧𐴤𐴠𐴚 𐴊𐴟𐴕𐴥𐴟𐴖𐴝𐴕 ٬ 𐴅𐴟𐴓𐴝𐴘𐴌 𐴵 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴔𐴝𐴐𐴤𐴡𐴌 𐴀𐴝𐴈𐴠𐴌𐴥𐴞 𐴉𐴡𐴙𐴅𐴧𐴙𐴡𐴕𐴃𐴡 𐴃𐴡𐴀𐴡𐴙𐴃𐴧𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞𐴁𐴤𐴡 𐴁𐴡𐴓𐴞 𐴂𐴠𐴌𐴠𐴕𐴠 𐴇𐴥𐴡𐴑𐴟𐴔𐴡𐴃𐴠 𐴀𐴞𐴐𐴤𐴝𐴌𐴝 𐴒𐴡𐴙𐴅𐴧𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴊𐴤𐴞𐴌𐴠 𐴊𐴤𐴞𐴌𐴠 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴀𐴝𐴒𐴡𐴌𐴞 𐴇𐴥𐴠𐴉𐴝𐴎𐴡𐴃𐴞 𐴏𐴠𐴐𐴃𐴝 𐴒𐴡𐴌𐴥𐴡𐴕𐴡𐴌 𐴕𐴞𐴘𐴡𐴔 𐴑𐴝𐴕𐴟𐴕 𐴔𐴡𐴎𐴞𐴕 𐴏𐴡𐴓𐴞 𐴁𐴤𐴡𐴓𐴧𐴝 ٬ 𐴇𐴥𐴡𐴑𐴟𐴔𐴡𐴃𐴞 𐴎𐴠𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴐𐴤𐴡𐴀𐴡𐴌𐴠 𐴐𐴤𐴡𐴀𐴡𐴌𐴠 ٬ 𐴉𐴝𐴌𐴝 𐴉𐴝𐴌𐴝 𐴎𐴝𐴕𐴝𐴘 𐴊𐴞𐴘𐴠 𐴱𐴱

Sources : RFA