𐴔𐴡𐴚𐴋𐴤𐴟𐴃 𐴀𐴝𐴙𐴅𐴧𐴙𐴝 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴓𐴡𐴘 ٬ 𐴉𐴟𐴓𐴞𐴐𐴡𐴌 𐴁𐴡𐴖 𐴐𐴤𐴡𐴣𐴀𐴡 𐴊𐴟𐴘 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴃 ٬ 𐴀𐴝𐴙𐴅𐴧𐴙𐴝 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴰 𐴱 𐴃𐴝𐴌𐴥𐴞𐴑𐴡𐴃 ٬ 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴓𐴡𐴘 𐴀𐴠𐴑𐴧𐴟 𐴊𐴞𐴕𐴠 𐴊𐴟𐴘 𐴎𐴡𐴕 𐴔𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴠 ٬ 𐴔𐴝𐴘𐴧𐴝 𐴀𐴥𐴞𐴁𐴝 𐴉𐴟𐴓𐴞𐴐𐴡𐴌 𐴁𐴠𐴍𐴞 ٬ 𐴀𐴝𐴙𐴅𐴧𐴙𐴝 𐴁𐴠𐴀𐴞𐴕𐴧𐴝 𐴳 𐴕𐴗𐴝 𐴁𐴝𐴎𐴠 ٬ 𐴀𐴠𐴑𐴀𐴡𐴔 𐴐𐴤𐴟𐴌𐴟𐴃 𐴏𐴡𐴌𐴥𐴝 𐴀𐴥𐴟𐴑 𐴉𐴝𐴌𐴝𐴌 ٬ 𐴰 𐴵 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴔𐴟𐴏𐴡𐴓𐴔𐴝𐴕 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴡𐴘 ٬ 𐴀𐴝𐴙𐴅𐴧𐴙𐴝 𐴀𐴥𐴝𐴣𐴎𐴡𐴙𐴕𐴧𐴝 𐴵 𐴏𐴗𐴝 𐴁𐴝𐴎𐴠 𐴱𐴱

𐴔𐴡𐴌𐴝 𐴓𐴝𐴐𐴢 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠𐴊𐴠 ٬ 𐴁𐴠𐴍𐴞 𐴀𐴥𐴞𐴁𐴝 𐴓𐴥𐴝 𐴂𐴥𐴟 𐴒𐴡𐴚 𐴌𐴞𐴓𐴥𐴞𐴉𐴢 𐴑𐴠𐴀𐴠𐴔𐴡𐴃 ( 𐴑𐴠 𐴏𐴠 𐴌𐴥𐴠 𐴏𐴠𐴑𐴧𐴤𐴠𐴚𐴡𐴃 ) 𐴑𐴗𐴝 𐴌𐴠𐴕 𐴄𐴤𐴠𐴙𐴕𐴡𐴃 𐴌𐴝𐴑𐴧𐴤𐴞𐴓𐴊𐴠 𐴉𐴟𐴓𐴞𐴐𐴡𐴌 𐴁𐴠𐴍𐴞 𐴁𐴡𐴓𐴞 ٬ 𐴔𐴡𐴚 𐴋𐴤𐴟𐴌 𐴊𐴝𐴌𐴠𐴒𐴝 𐴘𐴠 𐴈𐴡𐴘𐴧𐴠 ٬ 𐴀𐴝𐴙𐴅𐴧𐴙𐴝 𐴀𐴠𐴑𐴧𐴟 𐴊𐴞𐴕𐴠 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴓𐴡𐴘 𐴊𐴟𐴘 𐴎𐴡𐴕 𐴔𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴕 ٬ 𐴔𐴡𐴚 𐴋𐴤𐴟𐴌 𐴇𐴥𐴝𐴐𐴉𐴝𐴃𐴝𐴓𐴡𐴌 𐴁𐴡𐴌𐴡 𐴋𐴝𐴑𐴄𐴡𐴌 / 𐴕𐴥𐴟 𐴑𐴠 𐴏𐴞 𐴎𐴠𐴕𐴠 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴠𐴀𐴞𐴕𐴧𐴝 𐴔𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴁𐴝 𐴄𐴞𐴁𐴞 𐴁𐴞𐴘𐴝𐴌𐴝𐴔 𐴓𐴡𐴘 ٬ 𐴀𐴝𐴣𐴐𐴄𐴡 𐴊𐴞𐴕 𐴀𐴥𐴡𐴘𐴃𐴠 𐴇𐴥𐴝𐴐𐴉𐴝𐴃𐴝𐴓𐴡𐴃 𐴊𐴝𐴁𐴝𐴘 𐴒𐴡𐴌𐴥𐴝𐴃 𐴀𐴝𐴏𐴠 ٬ 𐴇𐴥𐴝𐴐𐴉𐴝𐴃𐴝𐴓𐴡𐴃 𐴀𐴝𐴘𐴧𐴠𐴌 𐴊𐴠 𐴘𐴥𐴝 𐴓𐴡𐴃𐴞 𐴓𐴝𐴏𐴝𐴌 𐴁𐴞𐴘𐴝𐴌𐴝𐴙𐴔𐴧𐴙𐴝 ٬ 𐴀𐴥𐴞𐴁𐴝 𐴔𐴟𐴏𐴥𐴡𐴓𐴔𐴝𐴕 ٬ 𐴀𐴥𐴝𐴣𐴎𐴡𐴙𐴕𐴧𐴝 𐴵 𐴏𐴗𐴝 𐴁𐴝𐴎𐴠 𐴔𐴡𐴙𐴅𐴧𐴤𐴙𐴠𐴊𐴠 𐴁𐴠𐴍𐴞 𐴀𐴥𐴞𐴁𐴝 𐴔𐴡𐴌𐴞 𐴎𐴝𐴘 𐴒𐴤𐴡𐴘 𐴁𐴦𐴝𐴊𐴠 𐴋𐴝𐴑𐴄𐴡 𐴈𐴥𐴝𐴕𐴝𐴃 𐴀𐴝𐴙𐴕𐴧𐴙𐴠𐴊𐴠 ٬ 𐴀𐴥𐴞𐴁𐴝𐴌 𐴒𐴦𐴝 𐴓𐴡𐴘 𐴁𐴝𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴃𐴤𐴝𐴑𐴞𐴁𐴤𐴡 ٬𐴀𐴥𐴞𐴁𐴝 𐴄𐴤𐴝𐴙𐴚 𐴌𐴥𐴝𐴚 𐴏𐴥𐴝 ٬ 𐴈𐴡𐴕 𐴎𐴝𐴃 𐴈𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴱𐴱

𐴔𐴡𐴕𐴃𐴡𐴌 𐴔𐴟𐴏𐴥𐴡𐴓𐴔𐴝𐴕 𐴕𐴡𐴀𐴡 ٬ 𐴀𐴝𐴙𐴅𐴧𐴙𐴝𐴌 𐴔𐴡𐴌𐴝 𐴊𐴟𐴕𐴥𐴟𐴖𐴥𐴝 𐴐𐴤𐴡𐴣𐴀𐴡 ٬ 𐴔𐴡𐴚𐴋𐴤𐴟𐴃 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴓𐴡𐴘 𐴔𐴡𐴙𐴅𐴧𐴤𐴙𐴠𐴊𐴠 𐴵 𐴎𐴡𐴕 𐴀𐴥𐴡𐴘𐴧𐴠 ٬ 𐴔𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴳 𐴎𐴡𐴕 𐴔𐴟𐴏𐴥𐴡𐴓𐴔𐴝𐴕 𐴲 𐴎𐴡𐴕 𐴑𐴝𐴉𐴠𐴌 ( 𐴀𐴡 𐴔𐴟𐴏𐴥𐴡𐴓𐴔𐴝𐴕 ) 𐴔𐴞𐴓𐴝𐴘 𐴵 𐴎𐴡𐴕 𐴒𐴟𐴣𐴍𐴝 𐴀𐴝𐴌𐴑𐴝𐴕𐴡𐴃 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔𐴡𐴌 𐴈𐴥𐴝𐴄𐴞 𐴁𐴞𐴘𐴝𐴌𐴝𐴙𐴔𐴧𐴙𐴝 𐴰 𐴰 𐴷 𐴎𐴡𐴕𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠 ٬ 𐴰 𐴱 𐴎𐴡𐴕 𐴓𐴡𐴃𐴞 𐴔𐴡𐴙𐴅𐴧𐴤𐴙𐴠 𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 𐴱𐴱

Sources : Narinjara