𐴏𐴥𐴝𐴁𐴟𐴃 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 𐴰 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴞𐴘𐴡𐴓𐴡𐴃 𐴊𐴞𐴘𐴠 𐴱𐴱

𐴀𐴥𐴠𐴌𐴝 𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴁𐴟𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴃 ٬ 𐴒𐴠𐴓𐴊𐴠 𐴅𐴟𐴕 𐴔𐴥𐴝𐴐𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 ٬ 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴀𐴝𐴙𐴐𐴧𐴤𐴙𐴠 𐴊𐴠 𐴁𐴡𐴓𐴞 𐴈𐴡𐴀𐴡𐴘 ٬ 𐴁𐴟𐴒𐴠𐴓𐴥𐴠𐴌 𐴒𐴝𐴏𐴢 𐴒𐴟𐴏𐴥𐴝𐴓𐴝 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴡 𐴓𐴠𐴑𐴤𐴞 𐴒𐴝𐴣𐴌𐴞 𐴊𐴞𐴘𐴊𐴠 𐴏𐴥𐴝𐴀𐴝𐴙𐴕 𐴁𐴦𐴟𐴋𐴡𐴌 ٬ 𐴀𐴝𐴃𐴡𐴌 𐴈𐴝𐴣𐴏𐴥𐴡𐴃𐴧𐴟 𐴊𐴤𐴡𐴙𐴅𐴧𐴤𐴞𐴀𐴞𐴓 𐴊𐴠 ٬ 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴰 𐴲 𐴎𐴡𐴕𐴡𐴌𐴠 ٬ 𐴅𐴟𐴓𐴝𐴘 𐴔𐴥𐴝𐴐𐴡𐴌 ( 𐴱 ) 𐴃𐴝𐴌𐴥𐴞𐴑𐴡𐴃 𐴁𐴟 𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴌 𐴀𐴝𐴊𐴝𐴓𐴡𐴃𐴠 𐴱𐴱

𐴀𐴠𐴑 𐴁𐴡𐴏𐴥𐴡𐴌𐴥𐴡𐴊𐴧𐴡𐴌𐴠 𐴎𐴞𐴘𐴡𐴓𐴡𐴌 𐴀𐴡𐴋𐴝𐴌 𐴉𐴥𐴟𐴕𐴝𐴘 𐴊𐴞𐴘𐴠 𐴁𐴡𐴓𐴥𐴞 ٬ 𐴀𐴥𐴞𐴃𐴝𐴌𐴝 𐴌𐴠 𐴔𐴡𐴊𐴡𐴊 𐴒𐴡𐴙𐴅𐴧𐴤𐴞𐴀𐴞𐴓 𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴀𐴝𐴙𐴅𐴧𐴙𐴝 ( 𐴀𐴝𐴌 𐴀𐴠𐴉𐴢 𐴀𐴠 ) 𐴌𐴥𐴠 𐴈𐴡𐴘𐴧𐴠 ٬ 𐴔𐴡𐴓𐴠𐴆𐴤𐴙𐴝𐴃 𐴎𐴝𐴘𐴁𐴡𐴓𐴧𐴝 𐴀𐴠𐴑 𐴎𐴡𐴕𐴠 𐴀𐴥𐴡𐴙𐴃𐴧𐴡𐴌 𐴓𐴝𐴑 𐴄𐴞𐴛𐴝 𐴊𐴧𐴡𐴌𐴠 𐴊𐴞𐴀𐴞 𐴀𐴝𐴌𐴑𐴝𐴕𐴡𐴃𐴧𐴟 𐴕𐴡𐴀𐴡 𐴓𐴡𐴘 𐴕𐴠𐴓𐴞 𐴀𐴝𐴀𐴝𐴘 ٬ 𐴁𐴟 𐴒𐴠𐴓𐴥𐴠 𐴐𐴤𐴡𐴀𐴡𐴌𐴡𐴃 𐴉𐴡𐴣𐴀𐴡𐴏𐴞 𐴁𐴦𐴝𐴊𐴠 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴁𐴡𐴓𐴞 ٬ 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 ٬ 𐴁𐴟 𐴒𐴠𐴓𐴥𐴠 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴑𐴝𐴕𐴟𐴕 𐴔𐴡𐴎𐴞𐴕 𐴒𐴟𐴌𐴝 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴌𐴡𐴊 𐴉𐴟𐴖𐴝𐴙𐴕𐴊𐴤𐴡𐴌𐴠 ٬ 𐴚𐴥𐴝 𐴀𐴦𐴡 𐴎𐴤𐴠𐴔 𐴒𐴟𐴌𐴝 𐴉𐴟𐴖𐴝𐴙𐴕 𐴌𐴝𐴑𐴤𐴠𐴊𐴠 𐴏𐴠𐴕𐴄𐴝𐴌𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠 ٬ 𐴔𐴝𐴘𐴧𐴝 𐴉𐴟𐴖𐴝𐴙𐴕𐴊𐴤𐴡𐴌𐴠 𐴄𐴗𐴥𐴠𐴕 𐴋𐴤𐴠𐴃 𐴀𐴝𐴏𐴥𐴠𐴊𐴠 ٬ 𐴔𐴝𐴘𐴧𐴝 𐴉𐴟𐴖𐴝𐴙𐴕𐴊𐴤𐴡𐴌𐴠 𐴏𐴝𐴀𐴝 𐴏𐴞𐴃𐴝 𐴒𐴡𐴌𐴥𐴠𐴊𐴠 𐴏𐴠𐴕𐴄𐴝𐴌𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠 ٬ 𐴔𐴡𐴓𐴠𐴆𐴤𐴙𐴝𐴃 𐴃𐴤𐴝𐴑𐴠𐴊𐴠 𐴔𐴡𐴌𐴡𐴊 𐴉𐴟𐴖𐴝𐴙𐴕 𐴓𐴡𐴘 𐴈𐴡𐴃𐴤𐴝 𐴁𐴝𐴃𐴧𐴝𐴌𐴝 𐴕𐴝𐴓 𐴒𐴡𐴌𐴥𐴞 ٬ 𐴁𐴞𐴘𐴝 𐴀𐴥𐴡𐴘𐴁𐴝𐴌 𐴔𐴡𐴑𐴏𐴟𐴊 𐴓𐴡𐴘 𐴀𐴝𐴙𐴐𐴧𐴤𐴙𐴠𐴊𐴠 ٬ 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴉𐴥𐴡𐴌𐴘𐴝𐴊𐴞 𐴁𐴡𐴕𐴞 𐴏𐴥𐴝𐴁𐴟𐴃 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠𐴊𐴠 𐴱𐴱

𐴁𐴡𐴐𐴢 𐴉𐴟𐴌𐴝𐴘𐴧𐴠𐴊𐴠 𐴀𐴠𐴑 𐴎𐴡𐴕 𐴔𐴡𐴌𐴡𐴊 𐴉𐴟𐴖𐴝 ٬ 𐴀𐴥𐴞𐴁𐴝 𐴌𐴥𐴠 𐴎𐴞𐴘𐴡𐴓𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠 ٬ 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴇𐴥𐴝𐴣𐴃 ( 𐴷 ) 𐴎𐴡𐴕 𐴔𐴡𐴌𐴡𐴊 𐴉𐴟𐴖𐴝 ٬ 𐴃𐴠𐴌𐴥𐴡 ( 𐴳 𐴱 ) 𐴎𐴡𐴕 𐴔𐴝𐴘𐴧𐴝 ٬ 𐴐𐴤𐴟𐴊𐴠 𐴀𐴟𐴒𐴧𐴤𐴗𐴝 𐴔𐴡𐴌𐴡𐴊 𐴉𐴟𐴖𐴝 𐴁𐴦𐴝𐴊𐴠 ٬ 𐴀𐴝𐴌 𐴁𐴠𐴒𐴧𐴤𐴟𐴕 ( 𐴸 𐴱 ) 𐴁𐴡𐴏𐴥𐴡𐴌𐴡𐴌 𐴕𐴠𐴏𐴠 𐴁𐴡𐴓𐴞 𐴈𐴡𐴘𐴧𐴠 ٬ 𐴀𐴥𐴞𐴃𐴝𐴌𐴝 𐴔𐴡𐴚𐴋𐴤𐴟 / 𐴁𐴤𐴟𐴏𐴞𐴊𐴡𐴚 / 𐴌𐴝𐴏𐴞𐴊𐴡𐴚 𐴀𐴝𐴌 𐴀𐴝𐴙𐴑𐴧𐴙𐴝𐴁𐴡𐴃𐴧𐴟 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 ٬ 𐴀𐴠 𐴁𐴡𐴏𐴥𐴡𐴌 𐴉𐴥𐴠𐴌 𐴖𐴝𐴌𐴞 𐴔𐴥𐴝𐴐𐴡𐴃 𐴀𐴥𐴡 𐴵 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 ٬ 𐴀𐴠 𐴁𐴟 𐴒𐴠𐴓𐴥𐴠𐴃 𐴊𐴤𐴡𐴌𐴝 𐴉𐴡𐴌𐴞 𐴀𐴠𐴑 𐴁𐴡𐴏𐴥𐴡𐴌𐴡𐴌 𐴊𐴡𐴌𐴠 𐴎𐴞𐴘𐴡𐴓𐴡𐴌 𐴀𐴡𐴋𐴝𐴌 𐴀𐴥𐴡𐴘𐴧𐴠 𐴁𐴡𐴓𐴞 ٬ 𐴔𐴡𐴊𐴡𐴊 𐴒𐴡𐴙𐴅𐴧𐴤𐴞𐴀𐴞𐴓𐴊𐴠 𐴔𐴝𐴙𐴕𐴐𐴤𐴠 𐴈𐴡𐴘𐴧𐴠 𐴱𐴱

Sources : RFA