𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴃 𐴊𐴠𐴐𐴁𐴞𐴊𐴠𐴐𐴢 ٬ 𐴔𐴝𐴎𐴤𐴠 𐴒𐴤𐴡𐴓𐴞 𐴕𐴡 𐴉𐴝𐴌𐴥𐴞𐴁𐴡 𐴁𐴡𐴓𐴞 𐴈𐴡𐴘𐴧𐴠 : 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴱𐴱

𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 ٬ 𐴊𐴟𐴕𐴞𐴘𐴝𐴘 ٬ 𐴔𐴝𐴎𐴤𐴠 𐴒𐴤𐴡𐴓𐴞 𐴉𐴝𐴌𐴠𐴊𐴠 ٬ 𐴀𐴥𐴠𐴊𐴧𐴟𐴌 𐴇𐴥𐴝𐴓𐴡𐴃 𐴕𐴡 𐴀𐴥𐴡𐴘𐴁𐴡 𐴁𐴡𐴓𐴞 ٬ 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴁𐴟 𐴆𐴤𐴙𐴟𐴑 𐴔𐴥𐴟𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 ٬ 𐴅𐴟𐴕 𐴔𐴥𐴝𐴐𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 ( 𐴀𐴝𐴌 𐴀𐴝𐴘 𐴀𐴠 )𐴌 𐴈𐴥𐴡𐴁𐴡𐴌𐴡𐴌 𐴀𐴥𐴞𐴕𐴄𐴝𐴌𐴁𐴙𐴟𐴃 𐴈𐴡𐴘𐴧𐴠 ٬ 𐴁𐴡𐴌𐴔𐴥𐴝𐴃 𐴁𐴟𐴔 𐴉𐴥𐴟𐴍𐴝 𐴉𐴥𐴟𐴍𐴞 𐴀𐴝𐴌 𐴆𐴤𐴙𐴡𐴚 𐴔𐴡𐴌𐴥𐴡𐴚𐴡𐴌 𐴓𐴝𐴌𐴥𐴝𐴘 𐴀𐴠𐴑𐴧𐴠𐴕𐴝 𐴀𐴠𐴑𐴧𐴠𐴕𐴝 𐴃𐴤𐴝𐴑𐴞𐴓𐴠 𐴘𐴥𐴡 ٬ 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴈𐴡𐴔𐴞 𐴒𐴞𐴘𐴡𐴘 𐴁𐴡𐴓𐴞 𐴘𐴥𐴡 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴈𐴡𐴘𐴧𐴠 𐴱𐴱

𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴡𐴃𐴧𐴟 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴁𐴝𐴌𐴥𐴞𐴌 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴥𐴝 𐴎𐴝𐴀𐴝𐴌 ٬ 𐴎𐴡𐴊𐴞 𐴁𐴝𐴌𐴥𐴠𐴌𐴊𐴠 𐴀𐴥𐴡𐴘𐴓𐴠 ٬ 𐴀𐴝𐴣𐴀𐴝𐴌𐴝𐴃𐴧𐴟 𐴘𐴥𐴡 𐴁𐴝𐴌𐴥𐴝𐴘𐴧𐴡𐴌𐴠 𐴅𐴟𐴖𐴝𐴁 𐴊𐴞𐴘𐴝 𐴉𐴡𐴌𐴞𐴁𐴤𐴡 ٬ 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴓𐴠 𐴊𐴟𐴕𐴞𐴘𐴝𐴘 𐴊𐴠𐴐𐴁𐴞𐴊𐴠𐴐𐴢 𐴔𐴝𐴎𐴤𐴡𐴃𐴧𐴟 𐴒𐴤𐴡𐴓𐴞𐴁𐴤𐴡 ٬ 𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴘𐴥𐴝𐴕𐴡𐴌 𐴀𐴝𐴐𐴤𐴝 𐴒𐴡𐴌𐴠𐴌 ٬ 𐴀𐴥𐴠𐴃𐴡𐴓𐴧𐴝 𐴇𐴥𐴝𐴓𐴡𐴃 𐴎𐴠𐴕𐴋𐴞𐴓𐴧𐴝 𐴀𐴥𐴡𐴘𐴁𐴡 𐴀𐴥𐴡𐴀𐴡𐴑 ٬ 𐴊𐴠𐴐𐴁𐴞𐴊𐴠𐴐𐴢 ٬ 𐴔𐴝𐴎𐴤𐴠 𐴒𐴤𐴡𐴓𐴞 𐴉𐴝𐴌𐴥𐴞𐴁𐴤𐴡𐴊𐴠 𐴘𐴥𐴝𐴕 𐴈𐴡𐴕𐴥𐴡 𐴊𐴞𐴕 𐴀𐴥𐴡𐴘 𐴕𐴡 𐴉𐴝𐴌𐴥𐴞𐴁𐴡 𐴱𐴱

𐴔𐴝𐴎𐴤𐴠 𐴔𐴝𐴎𐴤𐴠 𐴁𐴟𐴔 𐴉𐴥𐴟𐴍𐴝 𐴀𐴝𐴌 𐴓𐴝𐴌𐴥𐴝𐴘 𐴀𐴝𐴌 𐴆𐴤𐴙𐴡𐴚 𐴔𐴡𐴌𐴥𐴡𐴚𐴡𐴃 𐴏𐴡𐴓𐴠𐴌𐴊𐴠 𐴓𐴝𐴌𐴥𐴝𐴘 ٬ 𐴀𐴞𐴀𐴞𐴕𐴠 𐴂𐴝𐴂𐴓𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 𐴋𐴡𐴌 𐴒𐴤𐴡𐴓𐴝𐴘 𐴊𐴞𐴀𐴞𐴁𐴤𐴡𐴓𐴧𐴝 𐴀𐴝𐴌 𐴇𐴥𐴡𐴑𐴟𐴔𐴡𐴃𐴠 𐴊𐴠𐴐𐴤𐴡𐴌 𐴇𐴥𐴝𐴓𐴡𐴃𐴡𐴌𐴠 𐴏𐴥𐴡𐴣𐴀𐴡𐴓𐴞 𐴑𐴡𐴕𐴄𐴟𐴌𐴟𐴓 𐴒𐴡𐴌𐴥𐴞 𐴕𐴡𐴉𐴝𐴌𐴥𐴠𐴌 ٬𐴈𐴡𐴀𐴡𐴘 𐴊𐴟𐴕𐴞𐴘𐴝𐴘𐴌 𐴐𐴤𐴝𐴙𐴑𐴧𐴙𐴝𐴃 𐴇𐴥𐴡𐴑𐴟𐴔𐴡𐴃𐴡𐴌 𐴀𐴞𐴔𐴠𐴙𐴅 𐴈𐴥𐴡𐴌𐴝𐴁 𐴒𐴡𐴌𐴥𐴞 ٬ 𐴕𐴝𐴔 𐴈𐴥𐴡𐴌𐴝𐴁 𐴒𐴡𐴌𐴥𐴞 𐴊𐴠𐴈𐴥𐴝𐴘𐴁𐴤𐴡𐴓𐴧𐴝 𐴒𐴡𐴌𐴥𐴠𐴌𐴊𐴠 𐴁𐴡𐴓𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴈𐴡𐴘𐴧𐴠 𐴱𐴱

𐴀𐴠 𐴇𐴥𐴝𐴓𐴡𐴃𐴡𐴃 𐴉𐴡𐴏𐴥𐴞𐴔𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴠 ٬ 𐴀𐴠𐴑 𐴃𐴡𐴌𐴉𐴥𐴝 𐴈𐴡𐴃𐴤𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴟𐴓 𐴁𐴝𐴕𐴝𐴘 ٬ 𐴃𐴝𐴌𐴥𐴝𐴌 𐴔𐴡𐴑𐴏𐴟𐴊 𐴇𐴥𐴝𐴏𐴞𐴓 𐴒𐴡𐴌𐴥𐴞𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴠 𐴁𐴡𐴓𐴞 𐴘𐴥𐴡 ٬ 𐴁𐴟 𐴆𐴤𐴙𐴟𐴑 𐴔𐴥𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴀𐴝𐴓𐴟𐴏𐴝𐴕𐴝 𐴒𐴡𐴌𐴥𐴠𐴌 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴞𐴏𐴝𐴉𐴠 𐴊𐴟𐴕𐴞𐴘𐴝𐴘𐴃 𐴊𐴠𐴐𐴁𐴞𐴊𐴠𐴐𐴤𐴡𐴃𐴧𐴟 ٬ 𐴀𐴠𐴑𐴒𐴤𐴟𐴙𐴓𐴧𐴝 𐴖𐴥𐴝 𐴕𐴡 𐴉𐴡𐴌𐴠 𐴉𐴥𐴝𐴀𐴝𐴕 ٬ 𐴌𐴝𐴐𐴤𐴞𐴘𐴝 𐴀𐴝𐴌 𐴆𐴞𐴕𐴝 𐴐𐴤𐴡𐴣𐴀𐴡 𐴒𐴤𐴡𐴌𐴈𐴝𐴛𐴏𐴧𐴝 𐴊𐴠𐴐𐴢 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 𐴃𐴤𐴝𐴑𐴞𐴁𐴡𐴓𐴧𐴝 𐴁𐴡𐴕𐴊𐴡𐴁𐴡𐴏𐴢 𐴒𐴡𐴌𐴥𐴞 𐴎𐴝𐴘𐴧𐴟𐴔 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

Sources : RFA