𐴀𐴝𐴌𐴑𐴝𐴕 𐴀𐴝𐴌𐴔𐴞 𐴘𐴠 𐴇𐴥𐴡𐴑𐴟𐴔𐴡𐴃𐴡𐴌 𐴉𐴟𐴓𐴞𐴐𐴡𐴌𐴃𐴟 𐴀𐴥𐴝𐴣𐴃𐴞𐴘𐴝𐴌 𐴈𐴝𐴌𐴥𐴞 𐴓𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴑𐴙𐴡𐴑𐴄𐴡 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 ٬ 𐴔𐴡𐴇𐴝𐴔𐴟𐴕𐴞 𐴎𐴝𐴊𐴞𐴌 𐴁𐴤𐴟𐴃𐴡𐴌𐴠 ٬ 𐴇𐴥𐴡𐴑𐴟𐴔𐴡𐴃𐴡𐴌 𐴉𐴟𐴓𐴞𐴐𐴠 𐴄𐴝𐴓𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 ٬𐴀𐴥𐴝𐴣𐴃𐴞𐴘𐴝𐴌 𐴈𐴡𐴊𐴦𐴟𐴕 𐴁𐴝𐴒𐴞 𐴒𐴟𐴌𐴥𐴟𐴂𐴢 𐴀𐴝𐴌𐴑𐴝𐴕 𐴀𐴝𐴌𐴔𐴞 ( 𐴀𐴠 𐴀𐴠 )𐴘𐴠 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘𐴧𐴠 ٬ 𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴁𐴠𐴄𐴠𐴓𐴞𐴘𐴠𐴕𐴠 ٬ 𐴔𐴡𐴇𐴝𐴔𐴟𐴕𐴞 𐴎𐴝𐴊𐴞𐴃 𐴃𐴡𐴀𐴡𐴙𐴃𐴧𐴝 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴑𐴞𐴁𐴡𐴓𐴧𐴝 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠𐴊𐴠 𐴰 𐴲 𐴎𐴡𐴕𐴡𐴌𐴃𐴟 𐴁𐴤𐴝𐴌𐴡 𐴁𐴦𐴠𐴐𐴢 𐴉𐴟𐴓𐴞𐴐𐴢 𐴀𐴡𐴉𐴞𐴏𐴥𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 ٬ 𐴀𐴝𐴌𐴑𐴝𐴕 𐴀𐴝𐴌𐴔𐴞 𐴘𐴠 𐴌𐴦𐴡𐴘 𐴁𐴝𐴌𐴠 𐴌𐴝𐴙𐴃𐴧𐴝 𐴀𐴠𐴑 𐴁𐴝𐴎𐴠 𐴀𐴥𐴝𐴣𐴃𐴞𐴘𐴝𐴌 𐴏𐴥𐴝𐴌𐴝 ( 𐴕𐴞𐴌𐴀𐴡𐴏𐴃𐴡𐴌𐴡 ) 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 𐴱𐴱

𐴎𐴝𐴊𐴞𐴌 𐴋𐴤𐴝𐴑𐴠 𐴃𐴤𐴝𐴑𐴠𐴊𐴠 𐴀𐴥𐴠𐴏𐴃𐴝𐴕𐴞 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 ٬ 𐴇𐴥𐴡𐴑𐴟𐴔𐴡𐴃𐴡𐴌 𐴉𐴥𐴡𐴗𐴏𐴢 𐴎𐴝𐴊𐴞𐴃 𐴔𐴝𐴎𐴤𐴠 𐴋𐴠𐴌𐴥𐴝 𐴔𐴝𐴌𐴞 𐴃𐴤𐴝𐴑𐴠𐴌𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴉𐴟𐴎𐴝 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 𐴎𐴝𐴘𐴃𐴠 𐴋𐴡𐴌𐴝𐴌𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴎𐴝𐴊𐴞𐴌 𐴀𐴝𐴃𐴠 𐴈𐴝𐴣𐴏𐴠 𐴋𐴠𐴌𐴥𐴝 𐴔𐴝𐴌𐴞 𐴕𐴡 𐴃𐴤𐴝𐴑𐴤𐴞𐴁𐴡𐴓𐴧𐴝 ٬ 𐴀𐴠 𐴀𐴠 𐴘𐴠 𐴁𐴝𐴌 𐴁𐴝𐴌 𐴒𐴡𐴌𐴥𐴞 𐴔𐴝𐴕𐴥𐴝 𐴒𐴡𐴙𐴅𐴧𐴤𐴙𐴠 ٬ 𐴔𐴝𐴕𐴥𐴝 𐴕𐴡𐴀𐴡 𐴔𐴝𐴕𐴠𐴊𐴠 𐴀𐴥𐴠𐴃𐴡𐴓𐴧𐴝 𐴌𐴦𐴡𐴘 𐴁𐴝𐴌𐴠 𐴌𐴝𐴙𐴃𐴧𐴝 𐴀𐴟𐴒𐴧𐴤𐴗𐴝 𐴁𐴝𐴎𐴠 ٬ 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴟𐴓𐴞𐴐𐴢 𐴀𐴥𐴟𐴀𐴟𐴕𐴡𐴌𐴠 𐴒𐴤𐴞𐴌𐴞 𐴊𐴤𐴡𐴌𐴞 𐴀𐴥𐴝𐴣𐴃𐴞𐴘𐴝𐴌 𐴒𐴤𐴟𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘𐴧𐴠 𐴱𐴱

𐴔𐴡𐴕𐴃𐴡𐴌 𐴈𐴡𐴕𐴥𐴡 𐴀𐴠𐴑 𐴎𐴡𐴕 𐴉𐴟𐴓𐴞𐴐𐴢 𐴓𐴟𐴏𐴧𐴝𐴕 𐴕𐴡 𐴀𐴥𐴡𐴀𐴡 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 ٬ 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴌𐴉𐴥𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 / 𐴑𐴝𐴙𐴚 𐴏𐴥𐴟𐴑𐴤𐴝 𐴘𐴠 𐴈𐴡𐴘𐴧𐴠𐴊𐴠 ٬ 𐴔𐴡𐴇𐴡𐴔𐴟𐴕𐴞 𐴎𐴝𐴊𐴞𐴌 𐴋𐴤𐴝𐴑𐴠 𐴑𐴠𐴙𐴏𐴧𐴥𐴟 𐴔𐴡𐴏𐴥𐴡𐴓𐴝 ( 𐴏𐴥𐴡𐴔𐴡𐴙𐴐𐴧𐴤𐴝 ) 𐴀𐴝𐴏𐴥𐴠 ٬ 𐴔𐴡𐴕𐴃𐴡𐴌 𐴊𐴟𐴕𐴥𐴞 𐴋𐴦𐴝𐴘𐴧𐴠 𐴔𐴞𐴓𐴞 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴞 𐴄𐴤𐴞𐴑 𐴒𐴡𐴙𐴅𐴧𐴤𐴞 ٬ 𐴀𐴝𐴉𐴝𐴃𐴡𐴃𐴠 𐴀𐴠𐴈𐴥𐴡𐴕 𐴈𐴡𐴕𐴥𐴡 𐴁𐴠𐴃𐴝𐴓 𐴕𐴥𐴝𐴘 𐴱𐴱

𐴀𐴥𐴞𐴃𐴠 𐴃𐴡𐴉𐴏𐴞𐴓 ( 𐴁𐴞𐴏𐴃𐴝𐴌𐴞𐴃𐴡 ) 𐴈𐴡𐴀𐴡𐴕 𐴀𐴞𐴕𐴑𐴝𐴌 𐴒𐴡𐴙𐴅𐴧𐴤𐴙𐴠 ٬ 𐴀𐴝𐴌 𐴎𐴝𐴊𐴞𐴌 𐴋𐴤𐴝𐴑𐴡𐴌 𐴉𐴟𐴓𐴞𐴐𐴡𐴌𐴃𐴟 𐴀𐴥𐴝𐴣𐴃𐴞𐴘𐴝𐴌 𐴈𐴝𐴌𐴥𐴞 𐴓𐴡𐴘𐴧𐴠𐴊𐴠 𐴘𐴥𐴝𐴕𐴡𐴃 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴔𐴡𐴕𐴃𐴡𐴙𐴁𐴧𐴡 𐴘𐴥𐴡 𐴕𐴥𐴡 𐴒𐴡𐴌𐴥𐴠 ٬ 𐴉𐴟𐴎𐴝 𐴒𐴡𐴌𐴥𐴡𐴙𐴕𐴧𐴝 𐴀𐴝𐴌 𐴎𐴝𐴊𐴞𐴌 𐴀𐴝𐴃𐴠 𐴈𐴝𐴣𐴏𐴠 𐴀𐴝𐴐𐴧𐴤𐴞𐴓 𐴊𐴠 𐴊𐴟𐴖𐴝𐴕𐴊𐴝𐴌 𐴀𐴥𐴡𐴑𐴧𐴡𐴓 ٬ 𐴃𐴝𐴌𐴥𐴝𐴃𐴧𐴟 𐴇𐴥𐴡𐴑𐴟𐴔𐴡𐴃𐴠 𐴑𐴠𐴙𐴏𐴧𐴥𐴟 𐴉𐴟𐴏𐴥𐴝𐴌 𐴒𐴡𐴌𐴥𐴞𐴁𐴡 𐴁𐴡𐴓𐴞 𐴋𐴡𐴌𐴠 𐴊𐴤𐴝𐴘𐴒𐴞𐴘𐴡𐴘 𐴱𐴱

Sources : the Irrawaddy