𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌𐴓𐴝 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴡𐴓𐴧𐴝 𐴏𐴝𐴙𐴌 𐴓𐴥𐴝𐴑𐴤𐴡𐴌 𐴖𐴡𐴌𐴠 𐴒𐴡𐴁𐴤𐴝 𐴉𐴝𐴘𐴧𐴠 𐴁𐴡𐴓𐴞 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌𐴓𐴝 ٬ 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴏𐴞 ) 𐴃 𐴔𐴝𐴎𐴤𐴠 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴡𐴓𐴧𐴝 ٬ 𐴏𐴝𐴙𐴌 𐴓𐴥𐴝𐴑𐴤𐴡𐴌 𐴖𐴡𐴌𐴠 𐴒𐴡𐴁𐴤𐴝 𐴉𐴝𐴘𐴧𐴠 𐴁𐴡𐴓𐴞 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴌 𐴃𐴡𐴌𐴉𐴥𐴡𐴃𐴧𐴟 𐴈𐴡𐴃𐴤𐴝 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 ٬ 𐴋𐴝𐴑𐴄𐴡𐴌 / 𐴏𐴝𐴏𐴝 𐴘𐴠 𐴀𐴝𐴙𐴅𐴧𐴙𐴝 𐴈𐴡𐴘𐴧𐴠 𐴱𐴱

( 𐴀𐴠𐴕 𐴘𐴟 𐴅𐴞 ) 𐴘𐴠 𐴅𐴟𐴕 𐴔𐴥𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 𐴀𐴥𐴝𐴣𐴎𐴡𐴙𐴕𐴧𐴝 𐴒𐴡𐴙𐴅𐴧𐴤𐴙𐴠𐴊𐴠 𐴂𐴠𐴌𐴠𐴏𐴢 𐴑𐴝𐴕𐴉𐴠𐴌𐴥𐴠𐴣𐴏𐴡𐴃 ٬ 𐴋𐴝𐴑𐴄𐴡𐴌 / 𐴏𐴝 𐴏𐴝 𐴘𐴠 𐴀𐴠𐴕𐴋𐴞𐴓𐴧𐴝 𐴈𐴡𐴘𐴧𐴠 𐴘𐴝 𐴱𐴱

𐴀𐴠𐴕 𐴘𐴟 𐴅𐴞 ٬ 𐴘𐴠 𐴏𐴝𐴙𐴌 𐴓𐴥𐴝𐴑𐴤𐴡𐴌 𐴖𐴡𐴌𐴠 𐴒𐴡𐴁𐴤𐴝 ( 𐴏𐴥𐴝𐴁𐴟𐴃 ) 𐴉𐴝𐴘𐴧𐴠𐴊𐴠 𐴈𐴡𐴀𐴡𐴘 𐴁𐴦𐴝𐴊𐴠 𐴘𐴥𐴡 ٬ 𐴀𐴥𐴞𐴀𐴞𐴕𐴡𐴌𐴠 𐴁𐴠𐴐𐴤𐴞 𐴒𐴡𐴌𐴥𐴞 𐴃𐴡𐴊𐴝𐴌𐴟𐴑 𐴃𐴤𐴝𐴑𐴞𐴑 𐴒𐴡𐴌𐴥𐴞 ٬ 𐴀𐴝𐴌 𐴏𐴝𐴓𐴞 𐴎𐴤𐴝𐴌𐴞 𐴁𐴦𐴝𐴊𐴠 ٬ 𐴊𐴠𐴐𐴁𐴞𐴊𐴠𐴐𐴤𐴞 𐴀𐴠𐴏𐴄𐴤𐴠𐴕𐴋𐴤𐴝𐴋 𐴓𐴡𐴘 𐴉𐴥𐴞𐴄 𐴀𐴥𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 ٬ 𐴔𐴡𐴎𐴁𐴟𐴃 𐴒𐴡𐴁𐴤𐴝 𐴏𐴥𐴝𐴁𐴟𐴃 𐴰 𐴰 𐴲 𐴉𐴡𐴙𐴅𐴧𐴙𐴡𐴕𐴃𐴡 ( 𐴀𐴝𐴘 𐴏𐴞 𐴏𐴞 ) 𐴀𐴞𐴕𐴏𐴝𐴉𐴢 𐴑𐴦𐴟𐴍𐴡𐴃 𐴊𐴝𐴈𐴥𐴞𐴓 𐴒𐴡𐴌𐴥𐴝𐴘𐴧𐴟𐴔 𐴁𐴡𐴓𐴞 𐴋𐴝𐴑𐴄𐴡𐴄 / 𐴏𐴝 𐴏𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴃 𐴏𐴡𐴓𐴠𐴌𐴊𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴔𐴟𐴓 𐴎𐴞𐴔𐴧𐴝𐴊𐴝𐴌 ٬ 𐴁𐴟 𐴆𐴤𐴙𐴟𐴑 𐴔𐴥𐴟𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴡𐴌 𐴃𐴟 𐴀𐴠𐴈𐴥𐴡𐴕 𐴎𐴞𐴘𐴡𐴓𐴡𐴌 𐴁𐴤𐴟𐴃𐴡𐴌𐴠 𐴖𐴝 𐴉𐴡𐴙𐴃𐴧𐴡 𐴊𐴠 𐴀𐴡𐴑𐴃𐴤𐴡𐴃 ٬ 𐴊𐴠𐴐𐴤𐴠 𐴊𐴠𐴐𐴤𐴠 𐴁𐴠𐴌𐴝𐴌 ٬ 𐴀𐴥𐴠𐴃𐴡𐴓𐴧𐴝 𐴃𐴡𐴌𐴝𐴃𐴡𐴌𐴞 𐴁𐴟 𐴆𐴤𐴙𐴑 𐴔𐴥𐴟𐴅𐴤𐴞 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴡𐴌𐴠 𐴀𐴡𐴉𐴥𐴡𐴌𐴝𐴊𐴞 𐴁𐴝𐴕𐴝𐴘 𐴀𐴠𐴑𐴐𐴠𐴕 𐴓𐴡𐴘𐴁𐴡𐴓𐴧𐴝 ٬ 𐴀𐴝𐴘 𐴏𐴞 𐴏𐴞 𐴀𐴝𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴞𐴓 𐴐𐴤𐴡𐴣𐴀𐴡 𐴊𐴠𐴐𐴁𐴞𐴊𐴠𐴐𐴤𐴠 𐴀𐴠𐴑𐴐𐴠𐴕 𐴓𐴡𐴘 𐴉𐴝𐴌𐴠𐴊𐴤𐴠 𐴃𐴡𐴌𐴞𐴑𐴝 𐴃𐴞𐴕𐴥𐴟𐴖𐴝𐴕 𐴓𐴡𐴘 𐴁𐴤𐴝𐴉𐴞 𐴎𐴝𐴘𐴁𐴡𐴓𐴧𐴝 ٬ 𐴀𐴠𐴕 𐴘𐴟 𐴅𐴞𐴌 𐴃𐴡𐴌𐴉𐴥𐴡𐴃𐴧𐴟 𐴋𐴝𐴑𐴄𐴡𐴌 / 𐴏𐴝 𐴏𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴀𐴞𐴕 𐴁𐴦𐴝𐴊𐴠 ٬ 𐴁𐴟 𐴆𐴤𐴙𐴟𐴑 𐴔𐴥𐴟𐴅𐴤𐴞 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴐𐴤𐴡𐴣𐴀𐴡 ٬ 𐴀𐴝𐴃𐴡𐴚𐴁𐴝𐴊𐴞𐴒𐴞𐴌𐴞 𐴀𐴝𐴌 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴟𐴔 𐴀𐴥𐴡𐴑𐴧𐴡𐴓𐴡𐴌 𐴄𐴤𐴞𐴄𐴝𐴌 𐴁𐴝𐴕𐴝𐴘 𐴀𐴠𐴈𐴥𐴡𐴕 𐴃𐴡𐴀𐴡𐴙𐴃𐴧𐴝 𐴀𐴡𐴕 𐴓𐴥𐴝𐴙𐴕𐴡𐴃 𐴊𐴠𐴈𐴥𐴝𐴘 𐴁𐴡𐴓𐴧𐴝 𐴁𐴡𐴕𐴊𐴡𐴁𐴡𐴏𐴢 𐴀𐴥𐴡𐴘𐴧𐴠 ٬ 𐴉𐴡𐴌𐴠 𐴎𐴝𐴘 𐴇𐴥𐴡𐴀𐴡𐴓 𐴁𐴝𐴕𐴝𐴘 𐴊𐴠𐴈𐴥𐴝𐴘𐴁𐴝𐴌 𐴔𐴡𐴕𐴐𐴤𐴝 𐴀𐴝𐴏𐴠 𐴁𐴡𐴓𐴞 𐴘𐴥𐴡 ٬ 𐴋𐴝𐴑𐴄𐴡𐴌 𐴏𐴝 𐴏𐴝 𐴘𐴠 𐴈𐴡𐴘𐴧𐴠 𐴱𐴱

Sources : RFA