𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴌𐴟𐴇𐴝𐴙𐴚𐴒𐴙𐴝 𐴱𐴱

𐴕𐴟𐴖𐴝𐴈𐴥𐴝𐴓𐴞 𐴇𐴥𐴝𐴃𐴞𐴘𐴝 𐴀𐴟𐴉𐴡𐴎𐴞𐴓𐴥𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴑𐴠𐴀𐴠𐴔𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴄𐴞𐴛𐴝 𐴊𐴞𐴀𐴞 𐴋𐴝𐴓𐴝𐴓 𐴊𐴤𐴡𐴌𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘 ٬ 𐴀𐴝𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 ٬ 𐴔𐴝𐴏𐴢 𐴏𐴝𐴀𐴝𐴊𐴠 𐴄𐴡𐴓𐴥𐴝𐴌 (𐴔𐴝𐴏𐴢 𐴔𐴝𐴌𐴠𐴊𐴠 𐴁𐴟𐴄) 𐴓𐴡𐴘 𐴕𐴟𐴖𐴝𐴈𐴥𐴝𐴓𐴞- 𐴏𐴞𐴄𐴝𐴚𐴡𐴌 𐴃𐴟𐴌𐴥𐴟 ٬ 𐴀𐴝𐴁𐴤𐴝𐴌 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴀𐴟𐴑𐴤𐴞𐴘𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴘𐴁𐴝𐴌 𐴏𐴠𐴐𐴃𐴝 𐴒𐴡𐴌𐴥𐴠𐴌 ٬ 𐴀𐴥𐴠 𐴏𐴥𐴞𐴓𐴏𐴞𐴓𐴥𐴝𐴃 𐴲 𐴲 𐴅𐴟𐴕𐴡𐴃 ٬ 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 ٬ 𐴁𐴠𐴍𐴝𐴀𐴝𐴙𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴔𐴞𐴓𐴝𐴘 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱𐴱

𐴏𐴞𐴄𐴝𐴚𐴡𐴌 𐴔𐴞𐴌𐴏𐴥𐴡𐴌𐴥𐴝𐴃 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 ٬ 𐴔𐴞𐴌𐴏𐴥𐴡𐴌𐴥𐴝 𐴀𐴟𐴉𐴡𐴎𐴞𐴓𐴥𐴝𐴌 𐴎𐴟𐴌𐴝𐴌 𐴒𐴡𐴕𐴎𐴡 𐴃𐴤𐴝𐴕𐴝𐴌 𐴀𐴡𐴉𐴞𐴏𐴥𐴝𐴌 ( 𐴀𐴡𐴏𐴞 ) 𐴕𐴟𐴌 𐴇𐴟𐴏𐴝𐴙𐴕 𐴔𐴝𐴔𐴟𐴕𐴠 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 ٬ 𐴒𐴡𐴃𐴡 𐴈𐴝𐴙𐴓𐴧𐴙𐴝 𐴅𐴟𐴕 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴴 𐴱 𐴎𐴡𐴕 ٬ 𐴘𐴝𐴌 𐴀𐴝𐴒𐴠 𐴒𐴡𐴃𐴡 𐴔𐴠 𐴔𐴥𐴝𐴐𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃 𐴴 𐴱 𐴎𐴡𐴕 ٬ 𐴀𐴝𐴌 𐴔𐴠 𐴔𐴥𐴝𐴐𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 𐴰 𐴱 𐴎𐴡𐴕 ٬ 𐴔𐴝𐴏𐴢 𐴏𐴝𐴀𐴝𐴊𐴠 𐴄𐴡𐴓𐴥𐴝𐴌𐴡𐴌 (𐴁𐴟𐴍𐴡𐴌) 𐴔𐴝𐴙𐴊𐴧𐴤𐴡𐴔𐴠 ٬𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴱𐴱

𐴀𐴥𐴠𐴏𐴃𐴝𐴕𐴞𐴘𐴡 𐴁𐴤𐴝𐴘𐴧𐴝𐴙𐴕𐴊𐴤𐴡𐴌 𐴐𐴤𐴡𐴇𐴡 𐴎𐴟𐴒𐴞𐴃𐴝 𐴓𐴡𐴘 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ٬ 𐴎𐴟𐴌𐴝𐴌 𐴒𐴡𐴕𐴎𐴡 𐴃𐴤𐴝𐴕𐴝𐴌 𐴀𐴡𐴏𐴞 𐴘𐴠 𐴈𐴡𐴘𐴧𐴠 ٬ 𐴉𐴟𐴓𐴞𐴐𐴠 𐴈𐴡𐴘𐴧𐴠𐴊𐴠 ٬ 𐴄𐴡𐴓𐴥𐴝𐴌𐴡𐴌 𐴔𐴝𐴓𐴞𐴑𐴡 𐴌𐴥𐴠 𐴘𐴝𐴃𐴡 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴄𐴞𐴛𐴝 𐴊𐴞𐴀𐴞 𐴊𐴤𐴝𐴀𐴝 𐴒𐴤𐴡𐴘𐴊𐴠 ٬ 𐴔𐴡𐴚𐴒𐴡𐴓 𐴁𐴝𐴌𐴠 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴋𐴝𐴓𐴝𐴓𐴡𐴌 𐴔𐴝𐴙𐴊𐴧𐴤𐴡𐴔𐴠 ٬ 𐴔𐴝𐴏𐴢 𐴔𐴝𐴌𐴠𐴊𐴠 𐴄𐴡𐴓𐴥𐴝𐴌 𐴀𐴠𐴑𐴧𐴤𐴝𐴕 𐴓𐴡𐴘 ٬ 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴔𐴞𐴌𐴏𐴡𐴌𐴝𐴌 𐴁𐴡𐴚𐴒𐴡 𐴁𐴡𐴕𐴊𐴟 𐴀𐴞𐴑𐴟𐴕𐴡𐴔𐴥𐴞𐴑 𐴎𐴟𐴕𐴡𐴃 𐴉𐴡𐴣𐴀𐴡𐴙𐴏𐴧𐴙𐴠 ٬𐴘𐴥𐴝𐴕𐴡𐴌 𐴀𐴡𐴉𐴥𐴞𐴐𐴤𐴠𐴓 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 ٬𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴊𐴠𐴑𐴤𐴞 𐴃𐴤𐴝𐴕𐴝𐴃 𐴎𐴝𐴘 𐴈𐴡𐴀𐴡𐴘 𐴊𐴞𐴘𐴠 𐴱𐴱

𐴃𐴡𐴀𐴡𐴘 𐴇𐴥𐴡𐴄𐴝𐴃 𐴉𐴟𐴓𐴞𐴐𐴢 𐴀𐴝𐴀𐴝𐴘𐴧𐴡𐴌𐴠 𐴀𐴥𐴞𐴃𐴝𐴌𐴝𐴌𐴠 𐴁𐴡𐴕 𐴒𐴡𐴌𐴥𐴞 𐴃𐴤𐴝𐴕𐴝𐴃 𐴓𐴡𐴘 𐴒𐴞𐴘𐴡𐴘 ٬ 𐴀𐴠𐴍𐴥𐴠 𐴔𐴝𐴎𐴤𐴠 𐴀𐴠 𐴔𐴥𐴝𐴐𐴡𐴌 𐴐𐴤𐴟𐴌𐴟𐴃 𐴲 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 ٬ 𐴋𐴝𐴓𐴝𐴓𐴡 𐴌𐴥𐴠 𐴁𐴠𐴐𐴤𐴞 𐴄𐴞𐴛𐴝 𐴊𐴞𐴀𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴀𐴝𐴘𐴧𐴠𐴌 𐴊𐴠 ٬ 𐴑𐴟𐴔𐴂𐴝𐴕𐴞 𐴒𐴡𐴕𐴎𐴡𐴌 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴌𐴥𐴞 𐴎𐴞𐴘𐴡𐴓𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠 𐴁𐴡𐴓𐴞 ٬ 𐴉𐴟𐴓𐴞𐴐𐴡𐴌 𐴏𐴟𐴂𐴝𐴌𐴞𐴀𐴠𐴕𐴄𐴤𐴠𐴕 𐴋𐴤𐴠𐴕𐴄 / 𐴀𐴝𐴓𐴡𐴔𐴒𐴞𐴌 𐴇𐴟𐴏𐴝𐴙𐴕𐴠 𐴈𐴡𐴘𐴧𐴠 ٬ 𐴀𐴥𐴟𐴀𐴟𐴕 𐴁𐴦𐴝𐴊𐴠 𐴋𐴝𐴓𐴝𐴓𐴡𐴌 𐴔𐴝𐴙𐴊𐴧𐴤𐴡𐴔𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴀𐴝𐴘𐴧𐴠𐴌 𐴊𐴠 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝٬ 𐴔𐴠 𐴔𐴥𐴝𐴐𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃 𐴏𐴞𐴄𐴝𐴚𐴡𐴌 𐴐𐴤𐴡𐴕𐴋𐴞𐴂𐴡𐴃𐴧𐴟 𐴊𐴤𐴡𐴌𐴞 𐴎𐴞𐴘𐴡𐴓𐴡𐴃 𐴊𐴞𐴘𐴠 𐴱𐴱

Sources : Ukhiyanews.com