𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴓𐴝𐴒𐴝𐴃𐴝𐴌 𐴑𐴠𐴌𐴥𐴝𐴙𐴔 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 ٬ 𐴁𐴞𐴃𐴤𐴞𐴐𐴤𐴡𐴌 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 ٬ 𐴁𐴤𐴡𐴘𐴡𐴚𐴑𐴝𐴌 𐴎𐴟𐴓𐴟𐴔 ( 𐴑𐴠𐴌𐴥𐴝𐴙𐴔 ) 𐴀𐴥𐴡𐴑𐴧𐴡𐴓 𐴓𐴝𐴒𐴝𐴃𐴝𐴌 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 ٬ 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴁𐴞𐴃𐴤𐴞𐴐𐴤𐴡𐴌 𐴀𐴟𐴎𐴞𐴌 𐴔𐴝𐴐𐴄𐴡𐴌 / 𐴋𐴠𐴕 𐴆𐴤𐴙𐴝 𐴘𐴠 𐴀𐴝𐴙𐴅𐴧𐴙𐴝 𐴈𐴡𐴘𐴧𐴠 ٬ 𐴅𐴟𐴕 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴀𐴥𐴝𐴣𐴎𐴡𐴙𐴕𐴧𐴙𐴝 ٬ 𐴔𐴡𐴒𐴧𐴤𐴤𐴗𐴠 𐴋𐴞𐴐𐴄𐴤𐴞𐴑𐴡𐴌 𐴂𐴥𐴡𐴑 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 ٬ 𐴑𐴤𐴝𐴚 𐴔𐴥𐴝 𐴉𐴝𐴌𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 ٬ 𐴀𐴝𐴎𐴧𐴗𐴝 𐴃𐴝𐴎𐴧𐴗𐴝 𐴎𐴝𐴌𐴥𐴠 𐴎𐴠𐴕𐴋𐴞𐴓𐴧𐴝 𐴉𐴝𐴀𐴝 𐴔𐴝𐴙𐴅𐴧𐴤𐴙𐴠𐴊𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴱𐴱

𐴒𐴟𐴣𐴍𐴝 𐴉𐴝𐴌𐴝 𐴀𐴡𐴀𐴡𐴙𐴕 𐴓𐴝𐴒𐴝𐴘 𐴊𐴞𐴀𐴞 𐴉𐴟𐴌𐴝 𐴊𐴞𐴀𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠𐴊𐴠 𐴘𐴥𐴝𐴕𐴡𐴌𐴠 𐴊𐴠𐴈𐴥𐴝𐴘 ٬ 𐴔𐴝𐴐𐴄𐴡𐴌 / 𐴋𐴠𐴕 𐴆𐴤𐴙𐴝 𐴘𐴠 𐴈𐴡𐴘𐴧𐴠𐴊𐴠 𐴁𐴡𐴓𐴞 ٬ 𐴁𐴡𐴌𐴔𐴥𐴝𐴃 𐴀𐴝𐴏𐴥𐴠𐴊𐴠 𐴁𐴞𐴃𐴤𐴞𐴐𐴤𐴡𐴌 𐴏𐴥𐴡𐴉𐴝𐴌𐴡𐴃𐴡𐴌 𐴉𐴦𐴠𐴏𐴁𐴤𐴟𐴑 𐴏𐴥𐴡𐴁𐴧𐴝𐴃 𐴔𐴝𐴎𐴤𐴠 𐴓𐴠𐴙𐴑𐴧𐴤𐴙𐴠 ٬ 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴓𐴝𐴒𐴝𐴃𐴝𐴌 𐴎𐴟𐴓𐴟𐴔 𐴒𐴡𐴌𐴥𐴝𐴃 𐴀𐴝𐴏𐴥𐴠𐴊𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 ٬ 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴂𐴝𐴂𐴓𐴥𐴞𐴑 𐴀𐴥𐴡𐴑𐴧𐴡𐴓𐴡𐴌 ٬ 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴀𐴞𐴎𐴧𐴡𐴃 𐴑𐴡𐴊𐴡𐴌 𐴱𐴱

𐴔𐴠𐴓𐴠𐴄𐴠𐴌𐴞𐴃𐴧𐴟 𐴕𐴥𐴝𐴘 𐴁𐴡𐴓𐴞 𐴘𐴥𐴡 𐴔𐴝𐴐𐴄𐴡𐴌 / 𐴋𐴠𐴕 𐴆𐴤𐴙𐴝 𐴘𐴠 𐴈𐴡𐴘𐴧𐴠 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴤𐴚 𐴔𐴥𐴝 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴝𐴘𐴧𐴠𐴊𐴠 𐴀𐴥𐴠𐴍𐴠 ٬ 𐴑𐴠𐴙𐴏𐴧𐴥𐴟 𐴁𐴡𐴘𐴡𐴐𐴑𐴤𐴡 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴡𐴀𐴡𐴙𐴕𐴡𐴃 𐴉𐴟𐴌𐴞 𐴔𐴡𐴌𐴞 𐴒𐴞𐴘𐴡𐴘𐴊𐴠 ٬ 𐴈𐴥𐴡𐴁𐴡𐴌 𐴘𐴥𐴝𐴕𐴀𐴥𐴡 𐴏𐴥𐴡𐴉𐴝𐴌𐴡𐴃𐴠 𐴕𐴠𐴓𐴝𐴘𐴧𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴀𐴝𐴏𐴠 ٬ 𐴑𐴤𐴝𐴚 𐴔𐴥𐴝 𐴉𐴝𐴌𐴝 𐴒𐴟𐴣𐴍𐴝 𐴉𐴟𐴌𐴞 𐴎𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 ٬ 𐴊𐴤𐴝𐴘 𐴎𐴝𐴘 𐴒𐴤𐴡𐴘 𐴕𐴥𐴡 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 ٬ 𐴁𐴟𐴌𐴥𐴝 𐴁𐴡𐴘𐴡𐴐𐴑𐴤𐴡 𐴔𐴝𐴕𐴥𐴟𐴙𐴐𐴢 𐴏𐴝𐴙𐴌 𐴎𐴡𐴕 𐴉𐴟𐴌𐴞 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 ٬ 𐴀𐴝𐴌 𐴀𐴠𐴉 𐴀𐴠𐴌 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱