𐴔𐴠𐴓𐴄𐴠𐴌𐴞𐴌 𐴕𐴠𐴃𐴝 𐴌𐴥𐴠 𐴆𐴞𐴕𐴝 𐴘𐴠 𐴔𐴝𐴕𐴞 𐴓𐴡𐴘𐴧𐴠𐴊𐴠 𐴘𐴥𐴝𐴕𐴡 𐴌𐴥𐴠 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴐𐴤𐴡𐴚𐴑𐴡𐴄𐴡𐴌 𐴀𐴟𐴉𐴥𐴝𐴘 𐴕𐴠𐴓𐴝𐴘 𐴁𐴤𐴡𐴓𐴧𐴝 ٬ 𐴆𐴞𐴕𐴝 𐴀𐴝𐴌 𐴊𐴡𐴀𐴡𐴙𐴕 𐴉𐴟𐴑 𐴀𐴞𐴐𐴤𐴞𐴘𐴝 𐴊𐴠𐴐𐴤𐴡𐴌 𐴃𐴡𐴕𐴎𐴞𐴔 𐴀𐴝𐴏𐴞𐴀𐴠𐴕 𐴔𐴞𐴓𐴞 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴠 𐴀𐴥𐴠𐴍𐴠 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴓𐴡𐴘 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴙𐴝 𐴃𐴦𐴝𐴓𐴧𐴟𐴑 ٬ 𐴁𐴝𐴎𐴤𐴝 𐴕𐴥𐴡 𐴌𐴝𐴑𐴤𐴠𐴊𐴠 𐴘𐴥𐴝𐴕𐴡𐴃 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴤𐴞 𐴊𐴠 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 ٬ ( 𐴀𐴠𐴕 𐴘𐴟 𐴅𐴞 ) 𐴇𐴥𐴡𐴑𐴟𐴔𐴡𐴃𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴋𐴦𐴡 𐴎𐴝𐴚 𐴔𐴝 𐴀𐴡𐴚𐴠 ٬ 𐴆𐴞𐴕𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴖𐴠𐴔 𐴘𐴥𐴞 𐴏𐴞𐴌 𐴈𐴝𐴣𐴏𐴠 𐴑𐴤𐴟𐴓𐴝 𐴆𐴞𐴣𐴍𐴞 𐴀𐴠𐴑𐴧𐴤𐴝𐴕 𐴊𐴞𐴉𐴠𐴍𐴥𐴝𐴘𐴧𐴠 𐴱𐴱

𐴑𐴟𐴀𐴟𐴂𐴢 𐴓𐴦𐴞𐴋𐴝𐴌 𐴁𐴟 𐴆𐴤𐴙𐴟𐴑 𐴔𐴥𐴟 𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴚𐴡 𐴌𐴥𐴠 ٬ 𐴆𐴞𐴕𐴝𐴌 𐴏𐴥𐴡𐴉𐴝𐴌𐴡𐴃𐴠 ٬ 𐴁𐴡𐴌𐴔𐴥𐴝𐴌 𐴕𐴠𐴃𐴝 𐴀𐴥𐴞𐴏𐴝𐴉𐴠 𐴀𐴞𐴐𐴤𐴝𐴌𐴝 𐴊𐴞𐴘𐴠𐴊𐴠 𐴘𐴥𐴝𐴕𐴡 𐴌𐴠 ٬ ( 𐴀𐴠𐴕 𐴘𐴟 𐴅𐴞 ) 𐴇𐴥𐴡𐴑𐴟𐴔𐴡𐴃𐴠 𐴒𐴡𐴔𐴁𐴤𐴞𐴌𐴃𐴝 𐴁𐴤𐴝𐴉𐴠 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴡 𐴈𐴡𐴘𐴧𐴠 ٬ 𐴆𐴞𐴕𐴝𐴌 𐴆𐴟𐴚 𐴆𐴝𐴚 𐴐𐴤𐴡𐴀𐴡𐴌𐴡𐴃 ٬ 𐴆𐴞𐴕𐴝 𐴀𐴝𐴌 𐴀𐴝𐴏𐴞𐴀𐴠𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴰 𐴳 𐴁𐴡𐴏𐴥𐴡𐴌 𐴉𐴟𐴌𐴝𐴘𐴧𐴡𐴌𐴥𐴠 𐴒𐴡𐴌𐴥𐴠𐴌 𐴊𐴠 𐴔𐴞𐴄𐴤𐴞𐴚𐴡𐴃 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡 𐴌𐴠 𐴔𐴞𐴄𐴤𐴞𐴚𐴡𐴃 𐴐𐴤𐴝𐴔𐴠𐴓 𐴀𐴥𐴡𐴘𐴁𐴡𐴓𐴧𐴝 ٬ 𐴕𐴥𐴡 𐴆𐴞𐴕𐴝 𐴘𐴠 𐴊𐴝𐴖𐴡𐴃 𐴊𐴞𐴘𐴠 𐴕𐴥𐴡 𐴀𐴝𐴏𐴞𐴀𐴠𐴕𐴠 𐴊𐴝𐴖𐴡𐴃 𐴊𐴞𐴘𐴠 𐴱𐴱

𐴊𐴝𐴖𐴡𐴃 𐴕𐴥𐴡 𐴊𐴠𐴀𐴠 𐴊𐴠 𐴘𐴥𐴝𐴕 𐴀𐴠𐴑𐴧𐴤𐴝𐴕 𐴕𐴝𐴑𐴝𐴔𐴞𐴘𐴝𐴁𐴞 𐴁𐴡𐴓𐴞 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴠 𐴀𐴞𐴚𐴒𐴞𐴃 𐴒𐴡𐴙𐴅𐴧𐴤𐴙𐴠 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴔𐴝𐴙𐴕𐴧𐴙𐴝 𐴕𐴡𐴔𐴝𐴙𐴕𐴊𐴝 𐴇𐴥𐴡𐴑𐴟𐴔𐴡𐴃 𐴕𐴡𐴀𐴡𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴇𐴥𐴡𐴑𐴟𐴔𐴡𐴃 𐴀𐴥𐴞𐴁𐴤𐴝𐴌𐴠 𐴑𐴝𐴕𐴟𐴕𐴞 𐴁𐴝𐴕𐴝𐴘 𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴡𐴕𐴧𐴝𐴕 ٬ 𐴊𐴟𐴘 𐴊𐴠𐴐𐴤𐴡𐴌 𐴂𐴝𐴂𐴓𐴥𐴞𐴑𐴡𐴌 𐴔𐴝𐴎𐴤𐴠 𐴃𐴦𐴝𐴓𐴧𐴟𐴑 𐴈𐴥𐴡𐴌𐴝𐴁 𐴀𐴥𐴡𐴙𐴃 𐴉𐴝𐴌𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 ٬ 𐴁𐴡𐴌𐴔𐴥𐴝𐴃 𐴐𐴤𐴝𐴕𐴃𐴞 𐴀𐴝𐴘𐴁𐴤𐴡𐴓𐴧𐴝 𐴑𐴝𐴕𐴟𐴕𐴞 𐴇𐴥𐴡𐴑𐴟𐴔𐴡𐴃𐴡 𐴌𐴠 𐴂𐴝𐴖𐴝𐴌 𐴒𐴡𐴏𐴥𐴝𐴘 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴕𐴡 𐴀𐴥𐴡𐴘𐴓𐴠 ! 𐴊𐴡𐴀𐴡𐴙𐴕 𐴉𐴟𐴑 𐴀𐴞𐴐𐴤𐴞𐴘𐴝𐴃 𐴇𐴥𐴠𐴉𐴝𐴎𐴡𐴃𐴞 𐴏𐴥𐴡𐴚𐴑𐴡𐴄 𐴀𐴥𐴡𐴘 𐴀𐴝𐴀𐴝𐴘𐴃 𐴉𐴝𐴌𐴠 ٬ 𐴀𐴝𐴌 𐴁𐴡𐴌𐴔𐴥𐴝𐴌 𐴇𐴥𐴝𐴓𐴡𐴃𐴡𐴌 𐴁𐴝𐴁𐴡𐴃𐴠 ٬ 𐴁𐴡𐴌𐴔𐴥𐴝𐴃 𐴀𐴝𐴏𐴥𐴠𐴊𐴠 𐴆𐴞𐴕𐴝𐴌 𐴏𐴥𐴡𐴉𐴞𐴌 / 𐴆𐴝𐴕 𐴇𐴥𐴝𐴙𐴚 𐴓𐴡𐴘 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴟 𐴔𐴡𐴐𐴖𐴝𐴌𐴝 𐴒𐴡𐴙𐴃𐴧𐴤𐴡 𐴔𐴡𐴕𐴠 𐴈𐴡𐴀𐴡𐴌 𐴁𐴡𐴓𐴞 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴋𐴦𐴡 𐴎𐴝𐴚 𐴔𐴝 𐴀𐴡𐴚𐴠 ٬ 𐴆𐴞𐴕𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴖𐴠𐴔 𐴘𐴥𐴞 𐴏𐴞𐴌 𐴈𐴝𐴣𐴏𐴥𐴠 𐴉𐴝𐴄𐴇𐴝𐴘𐴧𐴠𐴊𐴠 𐴑𐴤𐴟𐴓𐴝 𐴆𐴞𐴣𐴍𐴞𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴀𐴝𐴏𐴞𐴀𐴠𐴕𐴡𐴌 𐴕𐴠𐴃𐴝 𐴊𐴟𐴘 𐴎𐴡𐴕 𐴒𐴡𐴃𐴡 𐴇𐴥𐴝𐴉𐴃𐴝𐴃 ٬ 𐴁𐴡𐴌𐴔𐴥𐴝𐴃 𐴀𐴝𐴀𐴝𐴘 𐴑𐴟𐴀𐴟𐴂𐴢 𐴓𐴦𐴞𐴋𐴝𐴌 𐴁𐴟 𐴆𐴤𐴙𐴟𐴑 𐴔𐴥𐴟 𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴘𐴥𐴝𐴕𐴡𐴃 ٬ 𐴀𐴝𐴏𐴞𐴀𐴠𐴕𐴡𐴌 𐴀𐴟𐴎𐴞𐴌 𐴑𐴠𐴙𐴏𐴧𐴥𐴟 𐴘𐴠 𐴃𐴡𐴕𐴑𐴞𐴊 𐴒𐴡𐴙𐴅𐴧𐴤𐴙𐴠 𐴱𐴱

Sources : RFA