𐴌𐴟𐴇𐴝𐴙𐴚𐴒𐴙𐴝𐴌 𐴂𐴡𐴓𐴡𐴏𐴞𐴌 𐴁𐴝𐴁𐴡𐴃𐴠 ( 𐴀𐴠𐴕 𐴘𐴟 𐴅𐴞 ) 𐴌 𐴏𐴥𐴝𐴉𐴢 𐴁𐴡𐴘𐴧𐴝𐴕 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 ٬ ( 𐴀𐴠𐴕 𐴘𐴟 𐴅𐴞 ) 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃𐴡𐴌 𐴂𐴡𐴓𐴡𐴏𐴞 𐴈𐴡𐴕𐴋𐴞𐴓𐴧𐴝 𐴊𐴠 ٬ 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴒𐴡𐴃𐴡 𐴈𐴝𐴙𐴓𐴧𐴙𐴝 𐴅𐴟𐴕 𐴔𐴥𐴝𐴐𐴡𐴌 𐴳 𐴃𐴝𐴌𐴥𐴞𐴑𐴡𐴃 ٬ 𐴒𐴡𐴙𐴅𐴧𐴤𐴙𐴠𐴊𐴠 𐴂𐴠𐴌𐴠𐴏𐴢 𐴑𐴝𐴕𐴉𐴠𐴌𐴥𐴠𐴣𐴏𐴡𐴃 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴔𐴝𐴀𐴝𐴔𐴠𐴓𐴝𐴌 𐴀𐴟𐴎𐴞𐴌 / 𐴀𐴥𐴟 𐴀𐴡𐴚 𐴔𐴙𐴥𐴟 𐴔𐴥𐴝𐴚𐴠 ٬ 𐴈𐴥𐴡𐴁𐴡𐴌𐴞 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌𐴠 𐴏𐴥𐴝𐴉𐴢 𐴏𐴥𐴝𐴉𐴢 𐴒𐴡𐴌𐴥𐴞 𐴁𐴟𐴎𐴤𐴝𐴘 𐴊𐴞𐴘𐴠 ٬ ( 𐴀𐴠𐴕 𐴘𐴟 𐴅𐴞 ) 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃𐴠 𐴅𐴟𐴕 𐴔𐴥𐴝𐴐𐴡𐴌 𐴃𐴞𐴕 𐴃𐴝𐴌𐴥𐴞𐴑𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴂𐴡𐴓𐴡𐴏𐴞𐴌 𐴁𐴝𐴁𐴡𐴃𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴠 𐴈𐴡𐴘𐴧𐴠𐴊𐴠 𐴱𐴱

𐴀𐴝𐴒𐴡𐴌 𐴇𐴥𐴡𐴑𐴟𐴔𐴡𐴃 𐴀𐴥𐴡𐴑𐴧𐴡𐴓𐴠 𐴈𐴡𐴀𐴠𐴑 𐴕𐴡𐴏𐴥𐴡𐴓 𐴀𐴥𐴡𐴘𐴃𐴠 ” 𐴌𐴟𐴇𐴝𐴙𐴚𐴒𐴙𐴝 ” 𐴓𐴡𐴉𐴎𐴤𐴡 𐴀𐴞𐴁𐴤𐴝 𐴀𐴠𐴏𐴃𐴠𐴔𐴝𐴓 𐴕𐴡 𐴒𐴡𐴌𐴥𐴠𐴌 ٬ 𐴲 𐴸 𐴹 𐴱 𐴐𐴤𐴡𐴕𐴡𐴌 𐴑𐴝𐴕𐴟𐴕𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴈𐴥𐴡𐴃𐴡𐴔 𐴒𐴡𐴌𐴥𐴞 𐴊𐴞𐴘𐴠 ٬ 𐴀𐴥𐴠𐴃𐴡𐴓𐴧𐴝 𐴑𐴝𐴕𐴟𐴕 𐴀𐴥𐴞𐴁𐴝 𐴁𐴤𐴝𐴚𐴞 𐴄𐴤𐴞𐴑 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴠 𐴅𐴟𐴓𐴟𐴔 𐴈𐴥𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴕𐴐𐴤𐴝𐴌 𐴑𐴡𐴊𐴡𐴌 𐴒𐴡𐴌𐴥𐴞𐴱𐴱

𐴌𐴟𐴇𐴝𐴙𐴚𐴒𐴙𐴝 𐴓𐴡𐴉𐴎𐴤𐴡 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴊𐴠 𐴁𐴡𐴓𐴞 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴀𐴟𐴎𐴞𐴌 / 𐴀𐴥𐴟 𐴀𐴡𐴚 𐴔𐴙𐴥𐴟 𐴔𐴥𐴝𐴚𐴠 𐴈𐴡𐴘𐴧𐴠 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃𐴡𐴃𐴧𐴟 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴞 𐴓𐴡𐴘𐴁𐴝 𐴊𐴠 𐴕𐴥𐴠 ؟ 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 𐴀𐴡𐴑𐴃𐴤𐴡𐴃 ٬ 𐴊𐴠𐴐𐴤𐴡𐴙𐴃𐴧𐴝 ( 𐴕𐴝𐴘𐴚𐴠𐴕 𐴏𐴥𐴝 ) 𐴉𐴝𐴘𐴁𐴡𐴊𐴠 𐴀𐴥𐴞𐴃𐴝𐴌𐴝𐴌𐴠 ( 𐴕𐴝𐴘𐴚𐴠𐴕 𐴏𐴥𐴝 ) 𐴔𐴝𐴕𐴞 𐴓𐴟𐴖𐴝 𐴎𐴝𐴘𐴁𐴡 ٬ ( 𐴄𐴤𐴝𐴙𐴚 𐴌𐴥𐴝𐴚𐴏𐴥𐴝 ) 𐴊𐴠𐴐𐴤𐴡𐴙𐴃𐴧𐴝 𐴁𐴝𐴕𐴝𐴘𐴁𐴤𐴡𐴓𐴧𐴝 ٬ 𐴏𐴥𐴝𐴔𐴧𐴠 𐴓𐴝𐴒𐴝𐴃𐴝𐴌 𐴔𐴡𐴐𐴟𐴖𐴝𐴌𐴝 𐴒𐴡𐴌𐴥𐴞 𐴎𐴝𐴘𐴧𐴟𐴔 𐴁𐴡𐴓𐴞 / 𐴀𐴥𐴟 𐴀𐴡𐴚 𐴔𐴙𐴥𐴟 𐴔𐴥𐴝𐴚𐴠 𐴈𐴡𐴘𐴧𐴠 𐴱𐴱

𐴑𐴡𐴔𐴎𐴟𐴌𐴞 𐴀𐴝𐴏𐴥𐴠𐴊𐴠 𐴲 𐴸 𐴹 𐴱 𐴐𐴤𐴡𐴕𐴡𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴑𐴝𐴕𐴟𐴕 ٬ 𐴁𐴤𐴝𐴚𐴞 𐴉𐴥𐴠𐴓𐴝𐴘 𐴋𐴞𐴔𐴟𐴑𐴠𐴌𐴠𐴏𐴞 𐴃𐴡𐴌𐴞𐴑𐴝𐴓𐴡𐴘 𐴊𐴠𐴐𐴤𐴡𐴙𐴃𐴧𐴝𐴃𐴝 𐴑𐴝𐴕𐴟𐴕 𐴁𐴝𐴕𐴝𐴘 ٬ 𐴕𐴡𐴘𐴧𐴝 𐴑𐴝𐴕𐴟𐴕 𐴀𐴥𐴞𐴁𐴝𐴌𐴠 𐴈𐴥𐴝𐴄𐴞 𐴁𐴝𐴕𐴝𐴘𐴁𐴤𐴡𐴓𐴧𐴝 ( 𐴏𐴞 𐴀𐴝𐴌 𐴂𐴞 𐴀𐴠𐴆 ) 𐴡𐴌 𐴃𐴟𐴌𐴥𐴟 𐴂𐴝𐴓𐴞𐴔𐴠𐴕𐴡𐴃 𐴃𐴟𐴓𐴥𐴞 𐴊𐴞𐴀𐴞 ٬ 𐴔𐴡𐴕𐴎𐴟𐴌𐴞 𐴓𐴡𐴘 𐴁𐴦𐴝𐴊𐴠 ٬ 𐴀𐴥𐴠 𐴔𐴡𐴎𐴞𐴕 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 / 𐴀𐴡𐴚 𐴔𐴙𐴥𐴟 𐴔𐴥𐴝𐴚𐴠 𐴈𐴡𐴘𐴧𐴠 ٬ 𐴀𐴠𐴕 𐴘𐴟 𐴅𐴞 𐴇𐴥𐴡𐴑𐴟𐴔𐴡𐴃 𐴀𐴥𐴞𐴏𐴝𐴉𐴠 𐴈𐴡𐴕𐴥𐴡 𐴉𐴡𐴌𐴥𐴡𐴑 𐴕𐴡 𐴃𐴤𐴝𐴑𐴠 𐴉𐴥𐴝𐴀𐴝𐴕 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴇𐴥𐴡𐴑𐴟𐴔𐴡𐴃 𐴉𐴝𐴄𐴞𐴃 𐴐𐴤𐴝𐴔𐴠𐴓 𐴒𐴡𐴌𐴥𐴞 𐴓𐴡𐴘𐴁𐴡𐴓𐴧𐴝 ٬ 𐴀𐴝𐴌 𐴀𐴠𐴉𐴢 𐴀𐴠 𐴘𐴠 𐴏𐴟𐴖𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 ٬ 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴌 𐴃𐴡𐴌𐴉𐴥𐴡𐴃𐴧𐴟 𐴈𐴡𐴘𐴧𐴠𐴊𐴠 ٬ 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴏𐴥𐴡𐴀𐴞 𐴒𐴡𐴌𐴥𐴝 𐴎𐴝𐴀𐴝𐴌 ٬ 𐴁𐴟𐴊𐴧𐴤𐴞 𐴔𐴡𐴐𐴟𐴖𐴝𐴌𐴝 𐴊𐴞𐴀𐴞 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴠𐴑 𐴎𐴡𐴕𐴡𐴌𐴥𐴠 ٬ 𐴀𐴠𐴋𐴁𐴤𐴝𐴘𐴎𐴝𐴌𐴞 𐴒𐴟𐴌𐴥𐴟𐴂𐴡𐴃 𐴒𐴤𐴡𐴓𐴝𐴘𐴁𐴡𐴓𐴧𐴝 𐴔𐴡𐴐𐴟𐴖𐴝𐴌𐴝 𐴏𐴡𐴓𐴠𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴕𐴡𐴘𐴧𐴝 𐴁𐴡𐴕𐴞𐴁𐴤𐴡𐴊𐴠 𐴑𐴝𐴕𐴟𐴕𐴡𐴃 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴘𐴃𐴠 ٬ 𐴁𐴡𐴌𐴔𐴥𐴝𐴃 𐴉𐴡𐴘𐴊𐴝 𐴖𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴊𐴤𐴡𐴙𐴅𐴧𐴙𐴝 𐴕𐴡𐴀𐴡 ٬ 𐴎𐴠 𐴎𐴝𐴒𐴝𐴃 𐴀𐴥𐴡𐴘𐴁𐴡 𐴀𐴥𐴡𐴒𐴧𐴤𐴡𐴘 𐴁𐴡𐴌𐴔𐴥𐴝𐴌 𐴔𐴝𐴣 𐴁𐴝𐴉𐴡𐴃𐴧𐴟 𐴀𐴥𐴡𐴀𐴡𐴕𐴧𐴝𐴕 𐴔𐴟𐴓 𐴁𐴝𐴕𐴝 𐴎𐴝𐴘𐴁𐴡 𐴱𐴱

Sources : RFA