𐴌𐴟𐴇𐴝𐴙𐴚𐴒𐴙𐴝 𐴀𐴝𐴌𐴀𐴥𐴡 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘𐴁𐴤𐴝𐴌 𐴀𐴝𐴒𐴠 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴝 𐴉𐴡𐴌𐴥𐴞𐴁𐴤𐴡 : 𐴘𐴟 𐴀𐴠𐴕 𐴱𐴱

𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴊𐴟𐴘 𐴎𐴡𐴕 𐴋𐴡𐴣𐴀𐴡𐴌 𐴐𐴤𐴝𐴐𐴡𐴕𐴥𐴞𐴑 𐴎𐴞𐴔𐴧𐴝𐴊𐴝𐴌 ٬ 𐴌𐴦𐴡𐴘 𐴁𐴝𐴌𐴠 𐴌𐴝𐴎𐴊𐴤𐴝𐴕𐴞𐴃 𐴉𐴡𐴣𐴀𐴡𐴙𐴏𐴧𐴙𐴠 ٬ 𐴀𐴝𐴌 𐴐𐴤𐴡𐴔 𐴁𐴝𐴌𐴠 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘𐴁𐴡 ٬ 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴑𐴠𐴀𐴠𐴔𐴡𐴌𐴃𐴟 ٬𐴀𐴝𐴒𐴠 𐴓𐴡𐴃𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴰 𐴰 𐴰 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴝𐴘𐴧𐴝 𐴀𐴝𐴏𐴥𐴠 ٬ 𐴀𐴝𐴌𐴀𐴥𐴡 𐴕𐴞𐴎𐴝𐴀𐴝 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴝𐴌 𐴀𐴝𐴒𐴠 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 ٬ 𐴘𐴟 𐴀𐴠𐴕𐴠 𐴉𐴡𐴌𐴡𐴏𐴃𐴝𐴁 𐴊𐴞𐴘𐴠 ٬ 𐴘𐴟 𐴀𐴠𐴕𐴡𐴌 𐴁𐴟𐴎𐴤𐴝 𐴁𐴟𐴎𐴤𐴞𐴌 𐴉𐴡𐴌𐴡𐴏𐴃𐴝𐴁𐴡𐴌 𐴉𐴟𐴑𐴤𐴝𐴏𐴠 𐴱𐴱

𐴕𐴟𐴖𐴝𐴈𐴥𐴝𐴓𐴞 𐴀𐴠𐴓𐴝𐴑𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴋𐴞𐴘𐴝𐴃 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴎𐴞𐴕𐴊𐴞𐴒𐴞 𐴌𐴠 𐴁𐴤𐴝𐴓𐴝 𐴒𐴡𐴌𐴥𐴞𐴁𐴡 ٬ 𐴁𐴝𐴚𐴓𐴝 𐴈𐴥𐴝𐴌𐴞𐴃 𐴀𐴝𐴏𐴥𐴠𐴊𐴠 𐴁𐴤𐴝𐴐𐴡𐴕 𐴏𐴡𐴌 𐴋𐴞𐴘𐴝 𐴀𐴥𐴞𐴁𐴤𐴝𐴌𐴠 ٬ 𐴁𐴝𐴚𐴓𐴝𐴊𐴠𐴐𐴤𐴡𐴌 𐴕𐴠𐴁𐴤𐴞𐴌 𐴉𐴥𐴡𐴗𐴏𐴠 ٬ 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴑𐴠𐴀𐴠𐴔𐴡𐴌𐴃𐴟 𐴎𐴝𐴔 𐴀𐴝𐴌 𐴒𐴤𐴞𐴐𐴢 𐴈𐴡𐴔𐴝𐴘 𐴁𐴤𐴡𐴓𐴧𐴝 ٬ 𐴰 𐴰 𐴱 𐴳 𐴃𐴞𐴕 𐴇𐴥𐴝𐴎𐴝𐴌 𐴀𐴠𐴑𐴐𐴤𐴡𐴃 𐴑𐴟𐴌𐴟𐴓 𐴄𐴞𐴛𐴝 𐴈𐴥𐴡𐴏𐴧𐴝 𐴒𐴡𐴌𐴥𐴞 ٬ 𐴀𐴠𐴑 𐴓𐴥𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴃𐴤𐴝𐴑𐴞 𐴉𐴝𐴌𐴞𐴁𐴤𐴝𐴌 𐴀𐴟𐴉𐴡𐴎𐴟𐴑𐴃𐴡 𐴁𐴝𐴕𐴝𐴘𐴧𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴀𐴠𐴈𐴥𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 ٬ 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴡𐴀𐴡𐴕𐴡𐴌 𐴏𐴥𐴞𐴓𐴏𐴞𐴓𐴝𐴃 𐴐𐴤𐴡𐴌𐴞𐴑 𐴕𐴥𐴡 𐴀𐴥𐴡𐴀𐴡 ٬ 𐴔𐴡𐴕𐴃𐴡𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴀𐴠𐴑𐴀𐴡𐴔 𐴁𐴝𐴌 𐴔𐴟𐴀𐴝𐴘𐴕𐴝 𐴒𐴡𐴙𐴃𐴧𐴤𐴡 𐴒𐴞𐴀𐴞𐴓𐴊𐴠 ٬ 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴄𐴞𐴀𐴞𐴔𐴠 𐴉𐴡𐴑𐴧𐴤𐴠 𐴌𐴠𐴂𐴟𐴄 𐴊𐴞𐴀𐴞𐴓 ٬ 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 ٬ 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴈𐴝𐴔 𐴘𐴝𐴕𐴡𐴃 𐴐𐴤𐴡𐴌𐴞𐴑 𐴀𐴥𐴡𐴘𐴁𐴤𐴡 𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴤𐴠 𐴀𐴝𐴐𐴤𐴝 𐴒𐴡𐴙𐴅𐴧𐴤𐴙𐴠 ٬ 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴃𐴝𐴕𐴥𐴝 𐴓𐴡𐴘 𐴎𐴡𐴍𐴞𐴃𐴡 𐴏𐴟𐴃𐴧𐴡𐴌𐴡 𐴀𐴡𐴕𐴟𐴏𐴥𐴝𐴌𐴠 𐴎𐴝𐴕𐴝 𐴒𐴞𐴘𐴠𐴊𐴠 ٬ 𐴏𐴥𐴝𐴔𐴧𐴠 𐴊𐴟𐴘 𐴔𐴥𐴝𐴐𐴡𐴌 𐴁𐴤𐴟𐴃𐴡𐴌𐴠 ٬ 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴔𐴝𐴀𐴝𐴔𐴠𐴓𐴝𐴃 𐴐𐴤𐴡𐴌𐴞𐴑 𐴀𐴥𐴡𐴘𐴁𐴡 𐴱𐴱

Sources : Dhakatribune