𐴋𐴝𐴖𐴠𐴃 𐴔𐴝𐴎𐴤𐴠 𐴇𐴥𐴡𐴌𐴃𐴝𐴓𐴡𐴌 𐴕𐴠𐴃𐴝 𐴐𐴤𐴡𐴣𐴀𐴡 𐴴 𐴱 𐴎𐴡𐴕 𐴉𐴟𐴖𐴝𐴙𐴕 𐴁𐴡𐴕 𐴀𐴥𐴡𐴘𐴧𐴠 𐴱𐴱

𐴃𐴡𐴕𐴝𐴚𐴏𐴝𐴌𐴞 𐴋𐴞𐴐𐴄𐴤𐴞𐴑𐴡𐴌 𐴋𐴝𐴖𐴠 𐴐𐴤𐴡𐴀𐴡𐴌𐴡𐴃 ٬ 𐴇𐴥𐴡𐴌𐴃𐴝𐴓 𐴀𐴥𐴡𐴑𐴧𐴡𐴓𐴡𐴌 𐴔𐴟𐴌𐴡𐴁𐴧𐴞𐴘𐴝𐴕𐴝 𐴒𐴡𐴌𐴥𐴠𐴌𐴊𐴠 ٬ 𐴇𐴥𐴡𐴌𐴃𐴝𐴓𐴞 𐴕𐴠𐴃𐴝 𐴐𐴤𐴡𐴣𐴀𐴡 𐴑𐴡𐴀𐴡𐴓𐴠𐴅𐴡𐴌 𐴉𐴟𐴖𐴝𐴙𐴕 𐴴 𐴱 𐴎𐴡𐴕𐴡𐴌𐴠 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴝𐴙𐴅𐴧𐴙𐴝 𐴁𐴡𐴕 𐴒𐴡𐴙𐴅𐴧𐴙𐴠 ٬ 𐴋𐴝𐴖𐴠 𐴐𐴤𐴡𐴀𐴡𐴌𐴡𐴃 𐴈𐴥𐴝𐴘𐴁𐴝𐴌 𐴔𐴝𐴓𐴡𐴌 𐴊𐴟𐴖𐴝𐴕 𐴀𐴠𐴑𐴧𐴤𐴝𐴕𐴡𐴃 ٬ 𐴀𐴞𐴐𐴑𐴟𐴙𐴓𐴧𐴙𐴝 𐴉𐴟𐴖𐴝𐴙𐴕 𐴰 𐴱 𐴎𐴡𐴕𐴠 ٬ 𐴀𐴝𐴙𐴅𐴧𐴙𐴝 𐴊𐴟𐴣𐴀𐴞𐴅𐴧𐴙𐴝 𐴔𐴝𐴕𐴥𐴟𐴙𐴐𐴢 𐴊𐴡𐴓𐴝 𐴒𐴡𐴌𐴥𐴠𐴌𐴊𐴠 𐴀𐴡𐴑𐴃𐴡𐴃 ٬ 𐴔𐴠𐴓𐴠𐴄𐴠𐴌𐴞 𐴰 𐴲 𐴎𐴡𐴕𐴠 𐴒𐴤𐴞𐴌𐴞 𐴊𐴤𐴡𐴌𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ٬ 𐴀𐴞𐴐𐴑𐴟𐴙𐴓𐴧𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴥𐴝𐴄𐴞 𐴒𐴡𐴌𐴥𐴞 𐴈𐴡𐴘𐴧𐴠 ٬ 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴀𐴝𐴙𐴅𐴧𐴙𐴝 𐴀𐴥𐴝𐴣𐴎𐴡𐴙𐴕𐴧𐴙𐴝 𐴘𐴥𐴡 𐴱𐴱

𐴋𐴝𐴖𐴠 𐴐𐴤𐴡𐴀𐴡𐴌𐴡𐴌 𐴇𐴥𐴡𐴌𐴃𐴝𐴓𐴡𐴌 𐴔𐴝𐴘𐴧𐴝 𐴉𐴟𐴖𐴝 𐴕𐴠𐴃𐴝/ 𐴔𐴥𐴝 𐴛𐴟𐴔𐴝 𐴀𐴥𐴟𐴀𐴟 𐴐𐴤𐴡𐴣𐴀𐴡 𐴏𐴝𐴙𐴌 𐴎𐴡𐴕𐴡𐴌𐴠٬𐴆𐴙𐴡 𐴔𐴡 𐴌𐴥𐴠𐴑𐴧𐴤𐴗𐴝𐴃 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴡𐴘 ٬ 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴴 𐴱 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴈𐴡𐴍𐴥𐴠 𐴕𐴠𐴘𐴠𐴊𐴠 𐴀𐴝𐴘𐴅𐴤𐴡 𐴕𐴡 𐴎𐴝𐴕𐴥𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 ٬ 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 ٬ 𐴋𐴝𐴖𐴠 𐴑𐴡𐴀𐴡𐴓𐴠𐴅 𐴀𐴝𐴌 𐴄𐴠𐴑𐴕𐴡𐴓𐴡𐴅𐴞 𐴑𐴡𐴀𐴡𐴓𐴠𐴅𐴡𐴌 𐴉𐴟𐴖𐴝𐴙𐴕 ٬ 𐴁𐴠𐴒𐴧𐴤𐴟𐴕 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴁𐴠𐴌𐴟𐴊𐴧𐴤𐴠 𐴇𐴥𐴡𐴌𐴃𐴝𐴓𐴡𐴃 𐴐𐴤𐴝𐴔𐴠𐴓 𐴀𐴥𐴡𐴘 𐴔𐴟𐴌𐴡𐴁𐴧𐴞𐴘𐴝𐴕𐴝 𐴒𐴡𐴌𐴥𐴠𐴌𐴊𐴠 𐴱𐴱

𐴉𐴥𐴠𐴌𐴖𐴝𐴌𐴞𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴟𐴔𐴡𐴃 𐴈𐴝𐴌𐴥𐴞 𐴓𐴡𐴘𐴧𐴠𐴊𐴠 ٬ 𐴘𐴥𐴝𐴓𐴡𐴃𐴞 𐴀𐴡𐴙𐴕𐴧𐴙𐴡 𐴋𐴞𐴐𐴄𐴤𐴞𐴑𐴡𐴌 𐴋𐴡𐴀𐴡𐴙𐴓𐴧𐴙𐴝 ٬ 𐴋𐴝𐴖𐴠 𐴐𐴤𐴡𐴀𐴡𐴌𐴡𐴃 𐴀𐴥𐴡 𐴁𐴠𐴐𐴤𐴝 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴌𐴝𐴏𐴧𐴝𐴃 𐴕𐴦𐴠𐴓𐴞 𐴇𐴥𐴡𐴌𐴃𐴝𐴓 𐴒𐴡𐴌𐴥𐴠𐴌 ٬ 𐴀𐴠𐴈𐴥𐴡𐴕𐴡𐴌 𐴄𐴝𐴙𐴔𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 ٬ 𐴋𐴝𐴖𐴠 𐴐𐴤𐴡𐴀𐴡𐴌𐴡𐴌 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 𐴀𐴥𐴟𐴊𐴧𐴝 ٬ 𐴀𐴝𐴀𐴝 𐴎𐴝𐴀𐴝 𐴓𐴡𐴌𐴝 𐴏𐴡𐴌𐴝 𐴒𐴡𐴌𐴥𐴠𐴌𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴀𐴥𐴠𐴃𐴞 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴀𐴞𐴐𐴑𐴟𐴙𐴓𐴧𐴙𐴝 𐴉𐴟𐴖𐴝𐴙𐴕𐴊𐴠 𐴇𐴥𐴡𐴌𐴃𐴝𐴓𐴡𐴌 𐴔𐴟𐴌𐴡𐴁𐴧𐴞𐴘𐴝𐴕𐴝 𐴒𐴡𐴌𐴥𐴠𐴌𐴊𐴠𐴱𐴱

𐴋𐴝𐴖𐴠 𐴐𐴤𐴡𐴀𐴡𐴌 𐴘𐴥𐴝𐴀𐴝𐴕٬𐴑𐴟𐴀𐴟𐴂𐴑𐴝𐴌 𐴕𐴠𐴃𐴝 𐴁𐴟 𐴆𐴤𐴙𐴟𐴑 𐴔𐴥𐴟 𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴡𐴌 𐴕𐴝𐴒𐴤𐴞 𐴈𐴝𐴍𐴝 𐴎𐴝𐴒𐴝 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 ٬ 𐴋𐴝𐴖𐴠 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴠𐴊𐴠 𐴊𐴠𐴌 𐴓𐴥𐴝𐴑 𐴉𐴡𐴙𐴅𐴧𐴙𐴡𐴕𐴃𐴡 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠𐴊𐴠 ٬ 𐴀𐴥𐴠𐴃𐴧𐴟 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴡 𐴌𐴥𐴠 𐴉𐴡𐴏𐴥𐴡𐴕 𐴒𐴡𐴌𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴐𐴤𐴡𐴃𐴑𐴝𐴌𐴝 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴝 𐴕𐴥𐴝𐴘 𐴁𐴡𐴓𐴞 ٬ 𐴇𐴥𐴡𐴌𐴃𐴝𐴓𐴡𐴌 𐴕𐴠𐴃𐴝 𐴀𐴞𐴐𐴑𐴟𐴙𐴓𐴧𐴙𐴝 𐴉𐴟𐴖𐴝𐴙𐴕𐴊𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 𐴱𐴱

𐴋𐴝𐴖𐴠 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴇𐴥𐴡𐴌𐴃𐴝𐴓𐴞 𐴀𐴞𐴐𐴑𐴟𐴙𐴓𐴧𐴙𐴝 𐴉𐴟𐴖𐴝𐴙𐴕𐴊𐴠 𐴒𐴡𐴙𐴅𐴧𐴤𐴙𐴠𐴊𐴠 𐴓𐴞𐴐𐴄𐴤𐴞 𐴔𐴡𐴎𐴞𐴕 ٬ 𐴉𐴥𐴠𐴌𐴖𐴝𐴌𐴞𐴌 𐴀𐴠𐴑 𐴃𐴝𐴌𐴥𐴞𐴑 𐴑𐴟𐴀𐴟𐴂𐴢 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴊𐴞𐴕 𐴀𐴥𐴡𐴘𐴃𐴠 ٬ 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴙𐴡𐴕𐴃𐴡 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴴 𐴱 𐴎𐴡𐴕 𐴀𐴝𐴌 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴰 𐴰 𐴵 𐴎𐴡𐴕 𐴓𐴡𐴃𐴞 𐴀𐴝𐴏𐴥𐴠 𐴱𐴱

Sources : RFA