𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴣𐴀𐴝𐴌𐴝 𐴕𐴥𐴡 𐴉𐴡𐴀𐴡𐴌𐴥𐴝𐴘 𐴁𐴡𐴓𐴞 ٬ 𐴘𐴟 𐴀𐴠𐴕 𐴅𐴞 𐴀𐴠𐴌 𐴏𐴥𐴡𐴊𐴡𐴌 : 𐴁𐴡𐴎𐴑𐴞𐴌𐴠 𐴈𐴡𐴘𐴧𐴠 𐴱𐴱

𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴁𐴠𐴌𐴝𐴘𐴃𐴤𐴡 𐴀𐴝𐴙𐴐𐴧𐴤𐴙𐴠𐴊𐴠 𐴀𐴥𐴠𐴍𐴠 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴝𐴉𐴠𐴏𐴞𐴌 𐴇𐴥𐴡𐴑 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴇𐴥𐴡𐴑𐴧𐴡𐴌 𐴈𐴥𐴝𐴔𐴝𐴈𐴥𐴝 𐴐𐴤𐴡𐴔𐴧𐴝𐴕 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 ٬ 𐴘𐴟 𐴀𐴠𐴕 𐴅𐴞 𐴀𐴠𐴌 𐴀𐴥𐴟𐴑𐴧𐴝𐴄𐴝 / 𐴁𐴟𐴓𐴑𐴝𐴕 𐴁𐴡𐴎𐴑𐴞𐴌 ٬ 𐴊𐴟𐴘 𐴊𐴞𐴕𐴧𐴙𐴝 𐴏𐴡𐴉𐴥𐴡𐴌𐴡𐴃 ٬ 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴡𐴣𐴀𐴡𐴏𐴞 𐴀𐴠𐴑 𐴊𐴞𐴕 𐴁𐴦𐴝𐴊𐴠 ٬𐴑𐴠𐴀𐴠𐴔𐴡𐴃 𐴒𐴞𐴘𐴠𐴊𐴠 𐴀𐴥𐴠𐴍𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 ٬ 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴠𐴐𐴤𐴡𐴙𐴃𐴧𐴝𐴃𐴝 𐴇𐴥𐴡𐴑 𐴊𐴞𐴀𐴞 𐴀𐴞𐴎𐴧𐴡𐴃 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴓𐴡𐴘 𐴎𐴝𐴘 𐴁𐴡𐴓𐴧𐴝 ٬ 𐴁𐴡𐴌𐴔𐴥𐴝𐴌𐴠 𐴏𐴞𐴂𐴢 𐴊𐴞𐴀𐴞𐴁𐴡𐴓𐴧𐴝 ٬ 𐴁𐴟𐴃 𐴁𐴝𐴌𐴠 ٬ 𐴘𐴟 𐴀𐴠𐴕𐴡𐴌𐴠 𐴈𐴡𐴘𐴧𐴠 𐴱𐴱

𐴘𐴟 𐴀𐴠𐴕 𐴅𐴞 𐴀𐴠𐴌 𐴵 𐴷 𐴀𐴡𐴔 𐴁𐴡𐴘𐴍𐴥𐴡𐴑𐴡𐴌 𐴏𐴥𐴡𐴊𐴡𐴌 ٬ 𐴑𐴝𐴑𐴏𐴢 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴌 𐴊𐴡𐴀𐴡𐴙𐴕𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴁𐴠𐴌𐴝𐴘𐴃𐴤𐴡 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 ٬ 𐴑𐴡𐴔𐴞𐴐𐴕𐴝𐴌 / 𐴔𐴟𐴇𐴝𐴔𐴧𐴡𐴊 𐴐𐴤𐴡𐴔𐴏𐴟𐴊𐴧𐴟𐴇𐴝 𐴘𐴠 ٬ 𐴋𐴤𐴝𐴑𐴝 𐴄𐴠𐴌𐴞𐴁𐴙𐴟𐴕𐴡𐴌𐴠 𐴈𐴡𐴘𐴧𐴠 ٬ 𐴀𐴝𐴌 𐴁𐴡𐴎𐴑𐴞𐴌 𐴊𐴠𐴌 𐴒𐴤𐴡𐴕𐴄𐴝 𐴉𐴡𐴙𐴅𐴧𐴙𐴡𐴕𐴃𐴡 𐴑𐴠𐴀𐴠𐴔𐴡𐴃 𐴐𐴤𐴡𐴔𐴡𐴘 𐴈𐴝𐴍𐴝𐴘 𐴰 𐴳 𐴎𐴡𐴕 𐴉𐴡𐴙𐴅𐴧𐴙𐴡𐴕𐴃𐴡 𐴌𐴞𐴉𐴟𐴎𐴞 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠 𐴱𐴱

𐴃𐴡𐴀𐴡𐴘 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 ٬ 𐴌𐴟𐴇𐴝𐴙𐴚𐴒𐴙𐴝𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴇𐴥𐴡𐴑 𐴊𐴞𐴀𐴞𐴁𐴡𐴓𐴧𐴝 𐴀𐴝𐴌 𐴀𐴞𐴎𐴧𐴡𐴃 ٬ 𐴇𐴥𐴠𐴉𐴝𐴎𐴡𐴃 𐴀𐴝𐴌 𐴕𐴞𐴎 𐴑𐴤𐴟𐴐𐴞 𐴘𐴠 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴡𐴀𐴡𐴕𐴡𐴌𐴥𐴠 𐴈𐴥𐴝𐴄𐴞 𐴁𐴝𐴕𐴝𐴘 𐴁𐴤𐴡𐴓𐴧𐴝 ٬ 𐴁𐴡𐴌𐴔𐴥𐴝𐴌𐴠 𐴏𐴞𐴂𐴢 𐴊𐴞𐴀𐴞𐴁𐴡𐴓𐴧𐴝 𐴈𐴡𐴘𐴧𐴠 ٬ 𐴁𐴝𐴚𐴓𐴝𐴊𐴠𐴐𐴤𐴡𐴃 𐴔𐴟𐴀𐴟𐴏𐴡𐴔 𐴈𐴥𐴡𐴌𐴝𐴁 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 ٬ 𐴐𐴤𐴡𐴔𐴏𐴟𐴊𐴧𐴟𐴇𐴝 𐴑𐴠𐴀𐴠𐴔𐴡𐴃 𐴁𐴡𐴎𐴑𐴠𐴌𐴡𐴌 𐴉𐴥𐴟𐴣𐴖𐴝𐴃𐴞 𐴉𐴥𐴟𐴣𐴖𐴝𐴣𐴃𐴞 𐴀𐴝𐴐𐴧𐴞𐴓 𐴱𐴱

𐴀𐴥𐴠 𐴊𐴞𐴕 𐴑𐴠𐴙𐴏𐴧𐴥𐴟 𐴐𐴤𐴡𐴔𐴡𐴘 𐴁𐴦𐴝𐴊𐴠 / 𐴁𐴡𐴎𐴑𐴞𐴌𐴠 𐴄𐴗𐴠𐴄𐴝𐴌𐴡𐴃 ٬ 𐴀𐴝𐴣𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴥𐴡 𐴉𐴡𐴀𐴡𐴌𐴝𐴘 ٬ 𐴀𐴝𐴌 𐴀𐴦𐴝𐴛 𐴕𐴞𐴘𐴟 𐴘𐴥𐴡𐴌𐴑𐴡𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴞 𐴁𐴦𐴝𐴊𐴠 ٬ 𐴃𐴟𐴣𐴖𐴝𐴣𐴌𐴝𐴌 𐴀𐴥𐴞𐴏𐴄𐴟𐴌𐴞 𐴘𐴟 𐴀𐴠𐴕𐴡𐴃 𐴈𐴡𐴘𐴧𐴟𐴔 𐴁𐴡𐴓𐴞 𐴖𐴝𐴊𐴝 𐴒𐴡𐴙𐴅𐴧𐴤𐴞𐴊𐴠 𐴘𐴥𐴝𐴀𐴝𐴕 𐴁𐴡𐴌𐴝𐴁𐴡𐴌 𐴉𐴝𐴓𐴡𐴕 𐴒𐴡𐴙𐴅𐴧𐴙𐴟𐴔 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴝𐴌 𐴔𐴡𐴚𐴒𐴡𐴓 𐴁𐴝𐴌𐴠 𐴘𐴥𐴡 / 𐴁𐴡𐴑𐴎𐴞𐴌𐴠 𐴈𐴡𐴘𐴧𐴠𐴊𐴠 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴟𐴕𐴘𐴝𐴊𐴞 𐴇𐴥𐴡𐴑 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴙𐴃𐴧𐴝𐴃𐴝 𐴐𐴤𐴡𐴣𐴀𐴡 ٬ 𐴁𐴡𐴌𐴔𐴥𐴝𐴃 𐴈𐴥𐴦𐴝𐴏𐴢 𐴒𐴡𐴌𐴥𐴞 𐴀𐴝𐴌𐴑𐴝𐴕𐴡𐴃 𐴀𐴠𐴕𐴋𐴞𐴓𐴧𐴝 𐴇𐴥𐴝𐴓𐴡𐴃 𐴁𐴝𐴕𐴝 𐴉𐴡𐴌𐴞𐴁𐴤𐴡 ٬ 𐴎𐴠𐴀𐴠𐴕𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎 𐴑𐴤𐴟𐴐𐴞 𐴘𐴠 𐴎𐴝𐴘 𐴀𐴞𐴎𐴧𐴡𐴃 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴉𐴝𐴌𐴠 𐴱𐴱

Sources : Dhakatribune