𐴁𐴡𐴌𐴔𐴥𐴝𐴃 𐴃𐴞𐴕 𐴔𐴥𐴝𐴐𐴡𐴌 𐴁𐴤𐴟𐴃𐴡𐴌𐴠 𐴳 𐴷 𐴎𐴡𐴕 𐴉𐴟𐴖𐴝𐴙𐴕 𐴔𐴡𐴙𐴅𐴧𐴤𐴙𐴠 𐴁𐴡𐴓𐴞 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 ٬ 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴔𐴠 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌 𐴔𐴝𐴙𐴌 𐴀𐴝𐴌 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 ٬ 𐴸 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴉𐴟𐴖𐴝𐴙𐴕 𐴳 𐴷 𐴎𐴡𐴕 𐴀𐴝𐴏𐴥𐴠 𐴁𐴡𐴓𐴞 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴀𐴝𐴙𐴅𐴧𐴙𐴝 𐴌𐴠𐴂𐴟𐴄 𐴉𐴥𐴟𐴕𐴝𐴘 𐴊𐴞𐴘𐴠 ٬ 𐴔𐴡𐴙𐴅𐴧𐴤𐴙𐴠𐴊𐴠 𐴉𐴟𐴖𐴝𐴙𐴕𐴊𐴤𐴡𐴌 𐴁𐴤𐴟𐴃𐴡𐴌𐴠 ٬ 𐴔𐴡𐴌𐴡𐴊 𐴉𐴟𐴖𐴝𐴙𐴕 𐴳 𐴶 𐴎𐴡𐴕 𐴀𐴝𐴌 𐴔𐴝𐴘𐴧𐴝 𐴉𐴟𐴖𐴝𐴙𐴕 𐴕𐴡 𐴎𐴡𐴕 𐴀𐴝𐴌 𐴔𐴝𐴘𐴧𐴝 𐴕𐴠 𐴔𐴡𐴌𐴡𐴊 𐴏𐴞𐴕𐴧𐴡 𐴒𐴡𐴌𐴥𐴞 𐴕𐴥𐴡 𐴉𐴝𐴌𐴠𐴊𐴠 𐴀𐴠𐴑 𐴎𐴡𐴕 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴠 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴑𐴠𐴙𐴏𐴧𐴥𐴟 𐴉𐴟𐴖𐴝𐴙𐴕 𐴇𐴥𐴡𐴌𐴃𐴝𐴓 𐴒𐴡𐴌𐴥𐴠𐴌𐴊𐴠 𐴐𐴤𐴡𐴣𐴀𐴡𐴃 𐴔𐴝𐴙𐴌 𐴈𐴥𐴝𐴘𐴧𐴠 ٬ 𐴀𐴝𐴌 𐴑𐴠𐴙𐴏𐴧𐴟 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 𐴒𐴟𐴓𐴞 𐴏𐴝𐴓𐴝𐴘𐴧𐴠𐴊𐴠 𐴀𐴥𐴠𐴍𐴠 𐴔𐴡𐴙𐴅𐴧𐴤𐴙𐴠 ٬ 𐴀𐴝𐴌 𐴑𐴠𐴙𐴏𐴧𐴟 𐴑𐴤𐴠𐴓𐴝𐴀𐴝𐴌𐴊𐴠 𐴐𐴤𐴡𐴣𐴀𐴡𐴃 𐴒𐴟𐴓𐴞 𐴉𐴡𐴌𐴞 𐴔𐴡𐴙𐴅𐴧𐴤𐴙𐴠 𐴁𐴡𐴓𐴞 𐴌𐴠𐴂𐴟𐴄𐴡𐴃 𐴓𐴠𐴙𐴑𐴧𐴤𐴙𐴠 ٬ 𐴓𐴞𐴐𐴄𐴤𐴞 𐴘𐴝𐴕𐴡𐴃 ٬ 𐴔𐴥𐴝𐴚 𐴄𐴤𐴠 ٬ 𐴑𐴡𐴕𐴧𐴞 ٬ 𐴋𐴤𐴞 𐴔𐴥𐴡 𐴏𐴟 ٬ 𐴀𐴠𐴕𐴋𐴞𐴓𐴧𐴝 𐴉𐴝𐴌𐴝 𐴀𐴝𐴌 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴔𐴡𐴙𐴅𐴧𐴤𐴙𐴠𐴊𐴠 𐴉𐴟𐴖𐴝𐴙𐴕𐴊𐴤𐴡𐴌 𐴒𐴡𐴕𐴝 𐴕𐴥𐴝𐴘𐴱𐴱

𐴀𐴥𐴠𐴍𐴠 𐴈𐴡𐴊𐴦𐴟𐴕 𐴉𐴟𐴖𐴝𐴙𐴕 𐴔𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴕𐴡𐴌 𐴓𐴞𐴐𐴄𐴤𐴞 𐴃𐴡𐴘𐴧𐴝𐴌 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 ٬ 𐴊𐴠𐴐𐴤𐴡𐴌 𐴀𐴠𐴔 𐴂𐴞 𐴕𐴡𐴔𐴝𐴙𐴕𐴊𐴝 𐴑𐴡𐴔𐴞𐴄𐴤𐴞 ( 𐴏𐴞 𐴀𐴝𐴌 𐴂𐴞 𐴀𐴠𐴆 ) 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴉𐴥𐴡𐴗𐴏𐴢 ( 𐴂𐴞 𐴋𐴞 𐴀𐴠𐴉𐴢 ) 𐴁𐴠𐴒𐴧𐴤𐴟𐴕𐴡𐴌𐴠 ٬ 𐴀𐴝𐴌 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴃𐴝𐴀𐴝𐴓𐴧𐴟𐴑 𐴌𐴝𐴑𐴤𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴠 𐴘𐴥𐴡 ٬ 𐴀𐴝𐴃𐴡𐴚𐴁𐴝𐴊𐴞 𐴉𐴝𐴄𐴞 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴝𐴕 𐴒𐴡𐴌𐴥𐴞 ٬ 𐴀𐴝𐴙𐴅𐴧𐴙𐴝 𐴕𐴠𐴓𐴝𐴘𐴧𐴠𐴊𐴠 𐴀𐴠𐴓𐴝𐴕𐴡𐴌 𐴁𐴝𐴁𐴡𐴃𐴠 ٬ 𐴔𐴠𐴓𐴠𐴄𐴠𐴌𐴞𐴌𐴃𐴟 𐴉𐴟𐴏𐴥𐴝𐴌 𐴒𐴡𐴌𐴥𐴞𐴁𐴡𐴓𐴧𐴝 ٬ 𐴀𐴝𐴌 𐴀𐴠𐴉𐴢 𐴀𐴠 𐴘𐴠 𐴑𐴟𐴐𐴤𐴞𐴐𐴢 𐴒𐴡𐴙𐴅𐴧𐴤𐴙𐴠 𐴱𐴱

Sources : RFA