𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 ٬ 𐴔𐴠𐴓𐴠𐴄𐴠𐴌𐴞𐴌 𐴓𐴦𐴞𐴋𐴝𐴌 𐴐𐴤𐴡𐴑𐴧𐴡𐴃 𐴉𐴡𐴌𐴞 𐴒𐴞𐴘𐴡𐴘 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 ٬ 𐴆𐴞𐴕𐴝𐴌 𐴔𐴡𐴊𐴡𐴊 𐴓𐴡𐴘 ٬ 𐴁𐴡𐴌𐴔𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴝𐴎𐴤𐴠 ٬ 𐴋𐴞𐴏𐴑𐴤𐴝𐴏𐴢 𐴒𐴡𐴌𐴥𐴞𐴁𐴤𐴝𐴌 𐴑𐴟𐴐𐴤𐴞𐴐𐴢 𐴉𐴥𐴞𐴃𐴞𐴕 𐴐𐴤𐴟𐴌𐴟 𐴀𐴥𐴡𐴘𐴁𐴝𐴌 𐴉𐴡𐴣𐴃𐴤𐴡𐴃 𐴁𐴡𐴓𐴞 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴈𐴡𐴘𐴧𐴠 ٬ 𐴉𐴥𐴠𐴌𐴖𐴝𐴌𐴞𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 ٬ 𐴔𐴠𐴓𐴠𐴄𐴠𐴌𐴞𐴌 𐴓𐴦𐴞𐴋𐴝𐴌 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴓𐴡𐴘 𐴒𐴡𐴙𐴅𐴧𐴤𐴙𐴠𐴊𐴠 𐴀𐴠𐴑𐴀𐴡𐴔 𐴀𐴥𐴞𐴕𐴄𐴝𐴌𐴁𐴙𐴟𐴃 𐴈𐴡𐴘𐴧𐴠𐴊𐴠 𐴔𐴡𐴎𐴞𐴕 ٬ 𐴁𐴡𐴌𐴔𐴥𐴝𐴌 𐴎𐴟𐴓𐴟𐴔 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 ٬ 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴌𐴠 ٬ 𐴖𐴝𐴉𐴠𐴏𐴢 𐴓𐴡𐴘 𐴎𐴡𐴀𐴡𐴕𐴡𐴃 ٬ 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴐𐴤𐴡𐴑𐴧𐴡𐴃 𐴉𐴡𐴌𐴞 𐴒𐴞𐴘𐴡𐴘 𐴱𐴱

𐴆𐴞𐴕𐴝𐴌 𐴄𐴠𐴓𐴞𐴁𐴤𐴞𐴐𐴤𐴠𐴕 𐴀𐴞𐴏𐴄𐴏𐴤𐴠𐴕 ( 𐴉𐴥𐴠𐴕𐴥𐴞𐴑𐴏𐴢 ) 𐴀𐴞𐴏𐴄𐴞𐴐𐴤𐴠𐴕𐴠 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴡𐴌 𐴃𐴟 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 ٬ 𐴔𐴟𐴏𐴥𐴡𐴓𐴔𐴝𐴕 𐴀𐴟𐴀𐴟𐴕 𐴀𐴝𐴌𐴑𐴝𐴕𐴡𐴃 ٬ 𐴎𐴠 𐴎𐴠𐴃𐴧𐴟 𐴀𐴝𐴙𐴐𐴧𐴤𐴙𐴠 𐴀𐴥𐴠𐴍𐴠 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴀𐴠𐴅𐴝𐴎𐴡𐴃 𐴉𐴡𐴀𐴡𐴕 𐴏𐴝𐴀𐴝 ٬ 𐴎𐴞𐴃𐴝𐴌𐴥𐴝 𐴷 𐴱 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴊𐴤𐴝𐴘𐴧𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴕𐴥𐴝 𐴓𐴡𐴘𐴧𐴠 ٬ 𐴎𐴠 𐴎𐴟𐴓𐴟𐴔𐴡𐴌𐴠 𐴘𐴟 𐴀𐴠𐴕𐴡𐴌 𐴃𐴡𐴊𐴝𐴌𐴟𐴑𐴞 𐴄𐴞𐴀𐴞𐴔𐴠 𐴅𐴠𐴕𐴟𐴏𐴥𐴝𐴙𐴋 𐴁𐴡𐴓𐴞 𐴈𐴡𐴘𐴧𐴠 ٬ 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴀𐴥𐴞𐴕𐴄𐴝𐴌𐴁𐴙𐴟𐴃 𐴊𐴞𐴘𐴠𐴊𐴠 𐴅𐴟𐴖𐴝𐴁𐴡𐴌 𐴕𐴡𐴑𐴤𐴡𐴓 𐴀𐴥𐴡𐴙𐴓𐴊𐴠 𐴱𐴱

𐴎𐴡𐴊𐴞 𐴁𐴡𐴌𐴔𐴥𐴝𐴌 𐴑𐴝𐴕𐴟𐴕𐴠 𐴔𐴝𐴕𐴞 𐴕𐴡 𐴓𐴡𐴘𐴓𐴠 ٬ 𐴀𐴥𐴠𐴎𐴝𐴒𐴝𐴃 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴞𐴁𐴤𐴝𐴌 𐴑𐴞 𐴀𐴝𐴏𐴥𐴠 ؟ 𐴌𐴞𐴉𐴟𐴎𐴞 𐴑𐴡𐴁𐴟𐴓 𐴒𐴡𐴌𐴥𐴞 𐴁𐴤𐴡𐴓𐴧𐴝 ٬ 𐴊𐴟𐴕𐴞𐴘𐴝𐴘 𐴘𐴝𐴕𐴥𐴡𐴃 ٬ 𐴈𐴡𐴕𐴥𐴡 𐴊𐴠𐴐𐴢 𐴕𐴞𐴎𐴡𐴌 𐴊𐴠𐴐𐴤𐴡𐴌 𐴑𐴝𐴕𐴟𐴕𐴡𐴌 𐴁𐴝𐴀𐴝𐴌𐴠 𐴎𐴝𐴘𐴁𐴡𐴊𐴠 𐴘𐴥𐴝𐴀𐴝𐴕 𐴀𐴦𐴝𐴛 𐴁𐴟𐴎𐴤𐴞 𐴕𐴡 𐴉𐴝𐴌𐴥𐴞 𐴁𐴡𐴓𐴞 𐴈𐴡𐴘𐴧𐴠 ٬ 𐴃𐴡𐴀𐴡𐴘𐴓𐴠 𐴉𐴟𐴌𐴝 𐴊𐴟𐴕𐴞𐴘𐴝𐴘𐴧𐴠 𐴌𐴟𐴇𐴝𐴙𐴚𐴒𐴙𐴝𐴌 𐴃𐴡𐴌𐴉𐴡𐴌𐴃𐴟 𐴀𐴝𐴁𐴝𐴏𐴢 𐴃𐴟𐴙𐴓𐴧𐴙𐴠𐴊𐴠 𐴀𐴝𐴌 𐴀𐴝𐴂𐴞𐴓 𐴒𐴡𐴙𐴅𐴧𐴤𐴙𐴠𐴊𐴠 ٬ 𐴀𐴥𐴞𐴀𐴞𐴕 𐴈𐴡𐴕𐴥𐴡 𐴈𐴝𐴔𐴡𐴃 𐴕𐴡 𐴀𐴝𐴘𐴁𐴤𐴡 ؟ 𐴀𐴥𐴞𐴃𐴠 𐴔𐴝𐴃𐴤𐴝 𐴓𐴝𐴌𐴞 𐴕𐴥𐴝 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴟𐴋𐴧𐴤𐴞𐴏𐴢 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 ٬ 𐴰 𐴰 𐴰 𐴰 𐴰 𐴷 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴞𐴉𐴟𐴎𐴞 𐴁𐴡𐴙𐴕𐴧𐴙𐴠𐴊𐴠 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴟𐴀𐴟𐴕𐴡 𐴕𐴠𐴃𐴝 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴈𐴡𐴘𐴧𐴠𐴊𐴠 ٬ 𐴌𐴟𐴇𐴝𐴙𐴚𐴒𐴙𐴝 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴕𐴡𐴀𐴡 ٬ 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴡𐴌𐴔𐴥𐴝 𐴁𐴞𐴄𐴤𐴞𐴐𐴡𐴃𐴧𐴟 𐴀𐴝𐴎𐴝𐴊 𐴀𐴥𐴡𐴘 𐴁𐴦𐴝𐴊𐴠 𐴁𐴡𐴌𐴔𐴥𐴝𐴃 𐴀𐴝𐴙𐴐𐴧𐴤𐴙𐴠𐴊𐴠 ٬ 𐴀𐴝𐴣𐴀𐴝𐴌𐴝 𐴀𐴝𐴎𐴝𐴊𐴞 𐴉𐴝𐴘 𐴁𐴦𐴝𐴊𐴠 ٬ 𐴀𐴥𐴞𐴃𐴝𐴌𐴝 𐴁𐴝𐴚𐴒𐴝𐴓𐴞 ٬ 𐴂𐴝𐴑𐴞𐴏𐴃𐴝𐴕𐴞 𐴀𐴝𐴌 𐴆𐴞𐴄𐴝𐴙𐴚𐴒𐴙𐴝 𐴀𐴥𐴞𐴏𐴝𐴉𐴠 𐴌𐴠𐴅𐴞𐴏𐴄𐴝𐴌 𐴀𐴥𐴡𐴘𐴧𐴠 𐴏𐴠𐴕𐴏𐴝𐴌 𐴁𐴡𐴙𐴕𐴧𐴙𐴠 ٬ 𐴌𐴟𐴇𐴝𐴙𐴚𐴒𐴙𐴝 𐴕𐴝𐴔 𐴘𐴝𐴀𐴝𐴕 𐴕𐴡 𐴀𐴝𐴐𐴧𐴤𐴞𐴓 ٬ 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴝𐴌𐴝 𐴕𐴝𐴔 𐴘𐴥𐴝𐴀𐴝𐴕 𐴑𐴡𐴁𐴟𐴓 𐴒𐴡𐴌𐴥𐴞 𐴕𐴡 𐴉𐴝𐴙𐴅𐴧𐴤𐴙𐴟𐴔 𐴁𐴡𐴓𐴞 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴈𐴡𐴘𐴧𐴠 𐴱𐴱

Sources : Dhakatribune