𐴋𐴦𐴡 𐴀𐴡𐴚 𐴏𐴥𐴝𐴕 𐴏𐴥𐴟𐴆𐴞 𐴌𐴠 𐴈𐴝𐴙𐴓𐴧𐴙𐴝 𐴈𐴥𐴦𐴝𐴏𐴢 𐴀𐴝𐴊𐴝𐴓𐴡𐴃𐴡𐴃 𐴃𐴟𐴓𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞𐴁𐴤𐴡 𐴱𐴱

𐴁𐴡𐴕 𐴒𐴡𐴌𐴥𐴞 𐴈𐴡𐴊𐴞 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 ٬ 𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴋𐴦𐴡 𐴀𐴡𐴚 𐴏𐴥𐴝𐴕 𐴏𐴥𐴟𐴆𐴞 𐴌𐴠 𐴔𐴠 𐴔𐴥𐴝𐴐𐴡𐴌 𐴴 𐴲 𐴃𐴝𐴌𐴥𐴞𐴑 𐴈𐴝𐴙𐴓𐴧𐴙𐴝 𐴀𐴠𐴑𐴀𐴡𐴔 𐴁𐴝𐴌 𐴀𐴥𐴞𐴏𐴝𐴉𐴠 𐴈𐴥𐴦𐴝𐴏𐴢 𐴀𐴝𐴊𐴝𐴓𐴡𐴃𐴡𐴃 𐴃𐴟𐴓𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞𐴁𐴤𐴡 ٬ 𐴊𐴠𐴐𐴤𐴡𐴌 𐴁𐴡𐴌𐴡 𐴀𐴝𐴊𐴝𐴓𐴡𐴃𐴡𐴌 𐴁𐴡𐴌𐴡𐴌 𐴀𐴞𐴐𐴤𐴝𐴌𐴝 𐴔𐴡𐴎𐴞𐴕 ٬ 𐴈𐴥𐴦𐴝𐴏𐴢 𐴀𐴠𐴑𐴧𐴤𐴝𐴕 𐴀𐴝𐴊𐴝𐴓𐴡𐴃 𐴁𐴝𐴕𐴝𐴘 ٬ 𐴋𐴦𐴡 𐴀𐴡𐴚 𐴏𐴥𐴝𐴕 𐴏𐴥𐴟𐴆𐴞 𐴌𐴠 ٬ 𐴘𐴥𐴝𐴕𐴡𐴃 𐴃𐴟𐴓𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞𐴁𐴤𐴝𐴌 𐴉𐴥𐴝𐴘𐴏𐴠𐴓𐴝 𐴀𐴥𐴡𐴘𐴧𐴠 𐴁𐴡𐴓𐴞 ٬ 𐴔𐴡𐴀𐴡𐴊𐴧𐴞𐴔𐴝 𐴁𐴝𐴀𐴝𐴊𐴧𐴠 𐴀𐴟𐴑𐴞𐴓/ 𐴀𐴥𐴟𐴀𐴟 𐴑𐴞𐴚 𐴔𐴡𐴚 𐴎𐴦𐴡 𐴘𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 𐴱𐴱

𐴈𐴥𐴦𐴝𐴏𐴢 𐴀𐴝𐴊𐴝𐴓𐴡𐴃 𐴘𐴥𐴝𐴀𐴝𐴕 ٬ 𐴕𐴠 𐴂𐴞𐴘𐴠 𐴋𐴦𐴡 𐴎𐴡𐴁𐴧𐴙𐴟 𐴏𐴞𐴌𐴥𐴞 𐴐𐴤𐴡𐴀𐴡𐴌𐴡𐴌 ٬ 𐴎𐴠𐴘𐴝 𐴏𐴞𐴋𐴧𐴤 𐴞 𐴌𐴥𐴠𐴑𐴧𐴤𐴗𐴝𐴌 𐴔𐴝𐴌𐴥𐴝 𐴕𐴥𐴠𐴕 𐴁𐴟𐴕 𐴏𐴝 ٬ 𐴌𐴝𐴏𐴧𐴝𐴌 𐴈𐴝𐴣𐴏𐴝 𐴓𐴡𐴘 / 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴒𐴤𐴡𐴌𐴡𐴌 𐴈𐴝𐴣𐴏𐴥𐴠 𐴁𐴡𐴓𐴞 𐴀𐴟𐴑𐴞𐴓𐴠 𐴈𐴡𐴘𐴧𐴠 ٬ 𐴀𐴥𐴠𐴕𐴋𐴞𐴓𐴧𐴝 𐴏𐴥𐴞𐴌𐴝 𐴈𐴥𐴦𐴝𐴏𐴢 𐴀𐴝𐴊𐴝𐴓𐴡𐴃𐴡𐴃 𐴃𐴟𐴓𐴥𐴞 𐴏𐴥𐴝𐴙𐴑 𐴒𐴡𐴌𐴥𐴞𐴁𐴤𐴝𐴌 𐴀𐴡𐴑𐴃𐴡𐴃 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓 𐴓𐴡𐴘 ٬ 𐴔𐴞𐴓𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴔𐴝𐴒𐴞 𐴌𐴝𐴑𐴤𐴞𐴓𐴠 𐴘𐴥𐴡 ٬ 𐴊𐴡𐴓𐴝 𐴀𐴥𐴡𐴘𐴃𐴡 𐴊𐴞𐴀𐴞𐴁𐴡𐴕𐴥𐴠 𐴕𐴥𐴝 𐴕𐴡 𐴊𐴞𐴀𐴞𐴁𐴤𐴡 ٬ 𐴕𐴡 𐴎𐴝𐴕𐴥𐴠 𐴁𐴡𐴓𐴞 𐴀𐴟𐴑𐴞𐴓 / 𐴀𐴥𐴟𐴀𐴟 𐴑𐴞𐴚 𐴔𐴡𐴚 𐴎𐴦𐴡 𐴘𐴠 𐴈𐴡𐴘𐴧𐴠 𐴱𐴱

𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞 ٬ 𐴒𐴤𐴡𐴌𐴡𐴃 𐴀𐴝𐴌𐴝𐴔𐴠 𐴏𐴠𐴇𐴠𐴃𐴠 𐴀𐴝𐴏𐴥𐴠 ٬ 𐴀𐴡𐴓𐴉𐴡 𐴄𐴝𐴙𐴔𐴡𐴃 𐴈𐴥𐴦𐴝𐴏𐴢 𐴀𐴝𐴊𐴝𐴓𐴡𐴃𐴡𐴃 𐴀𐴝𐴀𐴝𐴘 𐴔𐴟𐴑𐴎𐴟𐴁𐴝𐴕𐴞 𐴊𐴞𐴀𐴞𐴁𐴡 𐴁𐴡𐴓𐴞 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴕𐴠𐴃𐴝 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴓𐴡𐴘 ٬ 𐴆𐴞𐴕𐴝𐴌 𐴇𐴥𐴡𐴑𐴟𐴔𐴡𐴃𐴞 𐴄𐴠𐴓𐴞𐴁𐴤𐴞𐴐𐴤𐴠𐴕 ( 𐴉𐴥𐴞𐴕𐴞𐴑𐴏𐴢 ) 𐴀𐴞𐴏𐴄𐴞𐴐𐴤𐴠𐴕𐴠 ٬ 𐴏𐴟𐴖𐴝𐴓 𐴅𐴟𐴖𐴝𐴁 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴠 ٬ 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 ٬ 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞𐴌𐴓𐴝 ٬ 𐴋𐴦𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴀𐴠𐴑𐴧𐴤𐴝𐴕 𐴁𐴦𐴝𐴊𐴠 𐴀𐴠𐴑𐴧𐴤𐴝𐴕 ٬ 𐴕𐴠 𐴂𐴞𐴘𐴠 𐴋𐴦𐴡𐴃 ( 𐴵 ) 𐴉𐴝𐴣𐴏𐴧𐴥𐴝𐴕 𐴔𐴡𐴀𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 ٬ 𐴌𐴠𐴚𐴒𐴟𐴕𐴡𐴃 𐴀𐴥𐴡 𐴀𐴠𐴑𐴧𐴤𐴝𐴕 𐴑𐴤𐴟𐴙𐴓𐴧𐴙𐴠 𐴁𐴡𐴓𐴞 𐴀𐴟𐴑𐴞𐴓 / 𐴑𐴞𐴚 𐴔𐴡𐴚 𐴎𐴦𐴡 𐴘𐴠 𐴈𐴡𐴘𐴧𐴠 ٬ 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞𐴌𐴓𐴝 𐴑𐴤𐴟𐴙𐴓𐴧𐴙𐴠𐴊𐴠 𐴔𐴡𐴀𐴡𐴊𐴧𐴞𐴔𐴝 𐴀𐴥𐴡𐴙𐴓𐴊𐴠 ٬ 𐴓𐴝𐴘𐴏𐴠𐴕 𐴏𐴥𐴝𐴌𐴝 𐴖𐴝𐴑𐴞 𐴄𐴡𐴑𐴞 𐴔𐴞𐴐𐴤𐴞𐴕 𐴌𐴝𐴑𐴤𐴝 ٬ 𐴑𐴡𐴌𐴟𐴕𐴝 𐴁𐴝𐴘𐴌𐴥𐴠𐴏𐴌𐴓𐴝 𐴓𐴝𐴒𐴝𐴘𐴧𐴠𐴊𐴠 𐴑𐴝𐴕𐴟𐴕 𐴁𐴤𐴝𐴚𐴝 ٬ 𐴎𐴟𐴒𐴝𐴎𐴟𐴑𐴡𐴌 𐴑𐴝𐴕𐴟𐴕 𐴁𐴤𐴝𐴚𐴝 ٬ 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴡𐴐𐴤𐴝𐴕𐴃𐴞 𐴉𐴡𐴘𐴊𐴝 𐴒𐴡𐴌𐴥𐴝 ٬ 𐴇𐴥𐴡𐴑𐴟𐴔𐴡𐴃𐴡𐴌 𐴒𐴟𐴂𐴃𐴡 𐴑𐴝𐴕𐴟𐴕 ٬ 𐴇𐴥𐴡𐴑𐴟𐴔𐴡𐴃𐴡𐴌 𐴒𐴟𐴂𐴃𐴡 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴔𐴡𐴎𐴞𐴕 𐴏𐴡𐴙𐴊𐴧𐴤𐴡 𐴁𐴡𐴏𐴥𐴡𐴌 𐴎𐴞𐴘𐴡𐴓𐴡𐴌 𐴐𐴤𐴝𐴎𐴝 𐴊𐴞𐴀𐴞 𐴉𐴝𐴌𐴠

Sources : RFA