𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓٬ 𐴂𐴦𐴝𐴖𐴝𐴌 𐴄𐴞𐴑𐴝𐴘 𐴌𐴝𐴑𐴤𐴞𐴁𐴤𐴡𐴓𐴧𐴝 ٬ 𐴀𐴝𐴕𐴊𐴤𐴝𐴌𐴡𐴃 𐴉𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 ٬ 𐴀𐴝𐴔𐴠𐴌𐴞𐴑𐴝 𐴘𐴠 𐴈𐴡𐴘𐴧𐴠 𐴱𐴱

𐴆𐴤𐴙𐴝𐴚 𐴋𐴞𐴐𐴄𐴤𐴞𐴑𐴡𐴌 𐴔𐴥𐴝𐴚 𐴄𐴤𐴠 𐴐𐴤𐴡𐴀𐴡𐴌𐴡𐴃 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴂𐴦𐴝𐴖𐴝𐴌 𐴄𐴞𐴑𐴝𐴘 𐴌𐴝𐴑𐴤𐴞𐴁𐴤𐴡𐴓𐴧𐴝 ٬ 𐴊𐴠𐴐𐴤𐴡𐴙𐴃𐴧𐴤𐴝𐴌 𐴁𐴠𐴌𐴟𐴊𐴧𐴤𐴠 𐴔𐴠𐴓𐴠𐴄𐴠𐴌𐴞𐴌 𐴀𐴠𐴏𐴂𐴞𐴐𐴤𐴠𐴓 𐴀𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 ٬ 𐴁𐴡𐴌𐴔𐴥𐴝𐴃 𐴀𐴝𐴏𐴥𐴠𐴊𐴠 𐴀𐴝𐴔𐴠𐴌𐴞𐴑𐴝𐴌 𐴏𐴥𐴡𐴉𐴝𐴌𐴡𐴃𐴠 ٬ 𐴀𐴝𐴙𐴅𐴧𐴙𐴝 𐴀𐴠𐴓𐴝𐴕 𐴕𐴝𐴔𐴝 𐴁𐴦𐴝𐴙𐴌 𐴒𐴡𐴙𐴅𐴧𐴤𐴙𐴠 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 ٬ 𐴓𐴝𐴌𐴥𐴝𐴘𐴌 𐴀𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴡𐴕𐴧𐴝𐴕 ٬ 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴀𐴝𐴕𐴊𐴤𐴝𐴌𐴡𐴃 𐴉𐴡𐴌𐴞 𐴎𐴡𐴀𐴡𐴕𐴡𐴌 𐴃𐴡𐴌𐴞𐴑𐴝 𐴀𐴥𐴞𐴏𐴝𐴉𐴠 𐴱𐴱

𐴓𐴝𐴒𐴝𐴃𐴝𐴌 𐴀𐴠𐴑𐴧𐴝𐴕 𐴏𐴥𐴝𐴁𐴟𐴃 𐴁𐴡𐴓𐴞 𐴘𐴥𐴡 ٬ 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴏𐴥𐴝𐴉𐴢 𐴏𐴥𐴝𐴉𐴢 𐴒𐴡𐴌𐴥𐴞 𐴈𐴡𐴘𐴧𐴠 ٬ 𐴇𐴥𐴡𐴑𐴟𐴔𐴡𐴃 𐴄𐴞𐴑𐴝𐴘 𐴌𐴝𐴑𐴤𐴞𐴁𐴤𐴡𐴓𐴧𐴝 ٬ 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴓𐴝𐴌𐴥𐴝𐴘 𐴒𐴡𐴌𐴥𐴡𐴕𐴡𐴌𐴥𐴠 ٬ 𐴀𐴝𐴔𐴠𐴌𐴞𐴑𐴝 𐴘𐴠 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴒𐴡𐴌𐴥𐴠𐴌𐴊𐴠 ٬ 𐴀𐴥𐴞𐴀𐴞𐴕 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴘𐴥𐴡 𐴈𐴡𐴘𐴧𐴠 ٬ 𐴔𐴥𐴝𐴚 𐴄𐴤𐴠 𐴐𐴤𐴡𐴀𐴡𐴌𐴡𐴃 𐴔𐴠 𐴔𐴥𐴝𐴐𐴡𐴌 𐴲 𐴱 𐴃𐴝𐴌𐴥𐴞𐴑 𐴓𐴡𐴃𐴞 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴝𐴌 𐴆𐴤𐴙𐴚 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴉𐴥𐴡𐴗𐴏𐴡𐴌 ( 𐴏𐴞 𐴋𐴞 𐴀𐴠𐴉𐴢 ) 𐴔𐴝𐴎𐴤𐴠 ٬ 𐴓𐴝𐴌𐴥𐴝𐴘 𐴑𐴤𐴦𐴟𐴂𐴢 𐴊𐴡𐴌𐴥𐴡 𐴔𐴡𐴌𐴥𐴡 𐴏𐴡𐴓𐴠𐴌𐴊𐴠 𐴓𐴝𐴒𐴝𐴃𐴝𐴌 𐴏𐴝𐴙𐴌𐴊𐴞𐴕 𐴀𐴥𐴡𐴘𐴧𐴠 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴓𐴝𐴌𐴥𐴝𐴘𐴌 𐴋𐴡𐴣𐴀𐴡𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞 ٬ 𐴉𐴟𐴌𐴝 𐴃𐴝𐴑𐴡𐴃 𐴓𐴡𐴘 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌𐴊𐴠 𐴎𐴝𐴒𐴝𐴃 ٬ ( 𐴏𐴞 𐴋𐴞 𐴀𐴠𐴉𐴢 ) 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 ٬ 𐴆𐴤𐴙𐴝𐴚𐴡𐴌 𐴌𐴠𐴖𐴝𐴘𐴡𐴃𐴞 𐴀𐴡𐴀𐴡𐴙𐴕𐴞 𐴀𐴥𐴝𐴣𐴃𐴞𐴘𐴝𐴌 𐴓𐴡𐴘 𐴐𐴤𐴡𐴀𐴡𐴌𐴡𐴌 𐴇𐴥𐴠𐴉𐴝𐴎𐴡𐴃𐴞 𐴔𐴟𐴑𐴝𐴁𐴠𐴓𐴝 𐴒𐴡𐴌𐴥𐴠𐴌𐴊𐴠 𐴱𐴱

𐴀𐴝𐴙𐴅𐴧𐴙𐴝 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴓𐴝𐴌𐴥𐴝𐴘𐴌 𐴀𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴓𐴡𐴘 𐴉𐴟𐴌𐴝 𐴃𐴝𐴑𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴉𐴥𐴞𐴃𐴞𐴕 𐴓𐴝𐴌𐴥𐴝𐴘 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴀𐴝𐴌 𐴆𐴤𐴙𐴝𐴚 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴉𐴥𐴡𐴗𐴏𐴡𐴌 𐴔𐴞𐴔𐴁𐴤𐴡𐴌 𐴀𐴥𐴡𐴑𐴧𐴡𐴓𐴠 ( 𐴀𐴝𐴌 𐴀𐴠𐴉𐴢 𐴀𐴠 ) 𐴌𐴥𐴠 𐴈𐴡𐴘𐴧𐴠 ٬ 𐴆𐴤𐴙𐴝𐴚 𐴋𐴞𐴐𐴄𐴤𐴞𐴑𐴡𐴌 𐴉𐴡𐴃𐴧𐴞 𐴐𐴤𐴡𐴀𐴡𐴌𐴡𐴃 ٬ 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 ٬ 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘 𐴔𐴟𐴑𐴝𐴁𐴠𐴓𐴝 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴱𐴱

Sources : RFA