𐴔𐴠𐴓𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴇𐴥𐴡𐴌𐴃𐴝𐴓𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧 𐴝 𐴆𐴞𐴕𐴝 𐴁𐴝𐴕𐴝 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 ٬ 𐴋𐴞𐴔𐴟𐴑𐴠𐴌𐴠𐴏𐴞𐴌 𐴓𐴝 𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 ٬ 𐴌𐴝𐴇𐴝𐴔 𐴏𐴥𐴝𐴌𐴝 𐴎𐴝𐴓𐴠𐴔𐴝𐴕𐴝 𐴃𐴡𐴗𐴌𐴠 𐴋𐴡𐴓𐴞 𐴈𐴥𐴡𐴃𐴡𐴔 𐴒𐴡𐴌𐴥𐴞 𐴊𐴞𐴀𐴞𐴁𐴡𐴌𐴓𐴝٬𐴌𐴝𐴇𐴁𐴝𐴌 𐴀𐴥𐴞𐴏𐴝𐴉𐴠 𐴆𐴞𐴕𐴝𐴌 𐴁𐴝𐴕𐴝𐴘𐴧𐴝 ( 𐴏𐴞 𐴀𐴠𐴆-𐴳 𐴀𐴠 ) 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 ٬ 𐴒𐴡𐴃𐴡 𐴈𐴡𐴙𐴓𐴧𐴙𐴝 𐴀𐴞𐴐𐴤𐴞𐴘𐴝 𐴄𐴝𐴙𐴔𐴡𐴃 𐴓𐴠𐴙𐴑𐴧𐴤𐴙𐴠 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴓𐴡𐴘 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌𐴊𐴠 𐴀𐴥𐴠𐴍𐴠 𐴀𐴥𐴡𐴘𐴓𐴠 𐴀𐴥𐴡𐴀𐴡𐴑 ٬ 𐴋𐴞𐴔𐴟𐴑𐴠𐴌𐴠𐴏𐴞𐴌 𐴓𐴝 𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴈𐴥𐴡𐴃𐴡𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴥𐴡𐴘𐴓𐴠 𐴀𐴥𐴡𐴀𐴡𐴑 ٬ 𐴑𐴟𐴆𐴤𐴡𐴓 𐴒𐴡𐴌𐴥𐴞 𐴕𐴞𐴎 𐴉𐴥𐴝𐴘𐴊𐴝 𐴇𐴥𐴝𐴏𐴠𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴆𐴞𐴕𐴝𐴌 𐴁𐴝𐴕𐴝 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴇𐴥𐴝𐴓𐴡𐴃 𐴈𐴡𐴕𐴋𐴞𐴓𐴧𐴝 𐴀𐴝𐴏𐴥𐴠𐴊𐴠 𐴘𐴥𐴝𐴕𐴡𐴌𐴥𐴠 𐴖𐴡𐴌𐴃𐴟 𐴃𐴤𐴝𐴘 𐴊𐴠𐴑𐴤𐴠 𐴉𐴥𐴝𐴀𐴝𐴕 ٬ 𐴀𐴝𐴌 𐴈𐴝𐴌𐴥𐴠 ٬ 𐴑𐴞𐴘𐴥𐴡𐴌𐴥𐴠 𐴔𐴝𐴌𐴝 𐴉𐴡𐴌𐴠𐴌𐴊𐴠 ٬ 𐴀𐴥𐴞𐴀𐴞𐴕𐴡𐴌𐴥𐴠 𐴎𐴝𐴕𐴞 𐴉𐴝𐴌𐴞 𐴁𐴤𐴡𐴓𐴧𐴝 𐴆𐴞𐴕𐴝 𐴁𐴝𐴕𐴝 𐴋𐴡𐴌𐴟𐴕 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴠 ٬ 𐴑𐴠𐴙𐴏𐴧𐴥𐴟 𐴀𐴝𐴒𐴠 𐴔𐴥𐴝𐴕𐴋𐴠𐴓𐴠𐴃 ٬ 𐴏𐴞 𐴋𐴞 𐴀𐴠𐴔 𐴇𐴥𐴡𐴌𐴃𐴝𐴓𐴞 𐴀𐴥𐴡𐴑𐴧𐴡𐴓𐴡𐴌𐴠 ٬ 𐴒𐴟𐴌𐴞𐴓𐴝 𐴀𐴥𐴣𐴃𐴞𐴘𐴝𐴌𐴞 𐴀𐴥𐴡𐴑𐴧𐴡𐴓 𐴌𐴥𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞 ٬ 𐴔𐴝𐴌𐴠𐴌𐴊𐴠 𐴐𐴤𐴡𐴣𐴀𐴡𐴃 𐴋𐴡𐴌𐴟𐴕 𐴀𐴟𐴌𐴠𐴌𐴊𐴠 𐴊𐴠𐴈𐴥𐴝 𐴒𐴞𐴘𐴠 𐴁𐴡𐴓𐴞 ٬ 𐴀𐴞𐴐𐴤𐴞𐴘𐴝 𐴄𐴝𐴙𐴔𐴡𐴌 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 ٬ 𐴁𐴞𐴄𐴤𐴞𐴐𐴢 𐴌𐴝𐴙𐴅𐴧𐴙𐴡𐴃 𐴃𐴤𐴝𐴑𐴠𐴊𐴠 ٬ 𐴐𐴤𐴡𐴁𐴊𐴠𐴐𐴤𐴞 𐴌𐴡𐴑𐴧𐴤𐴝 𐴀𐴠𐴏𐴄𐴤𐴝𐴋𐴞 𐴒𐴟𐴌𐴥𐴟𐴂𐴢 ( 𐴅𐴝𐴕𐴠𐴏𐴢 ) 𐴱𐴱

𐴀𐴝𐴌 𐴀𐴝𐴔𐴠𐴌𐴞𐴑𐴝𐴃 𐴃𐴤𐴝𐴑𐴠𐴊𐴠 𐴐𐴤𐴡𐴁𐴊𐴠𐴐𐴤𐴞 𐴑𐴟𐴆𐴤𐴡𐴓 𐴀𐴠𐴏𐴄𐴤𐴝𐴋𐴞 𐴒𐴟𐴌𐴥𐴟𐴂𐴢 ( 𐴏𐴞 𐴀𐴠𐴏𐴢 𐴀𐴝𐴘 𐴀𐴠𐴏𐴢 ) ٬ 𐴊𐴟𐴕𐴥𐴞 𐴒𐴟𐴌𐴥𐴟𐴂𐴠 ٬ 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴠𐴈𐴥𐴡𐴕 ٬ 𐴆𐴞𐴕𐴝𐴌 𐴁𐴝𐴕𐴝 𐴋𐴡𐴌𐴟𐴕 ( 𐴏𐴞 𐴀𐴠𐴆-𐴳 𐴀𐴠 ) 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌𐴊𐴠 𐴘𐴥𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 ٬ 𐴔𐴥𐴞𐴄𐴧𐴤𐴞𐴓𐴝𐴌 𐴐𐴤𐴠𐴔 𐴄𐴠𐴓𐴥𐴠𐴌 𐴔𐴠𐴓𐴠𐴄𐴠𐴌𐴞𐴌 𐴒𐴤𐴝𐴣𐴄𐴞𐴃 ٬ 𐴆𐴞𐴕𐴝𐴌 𐴁𐴝𐴕𐴝 𐴋𐴡𐴌𐴟𐴕 𐴃𐴤𐴞𐴘𐴝 𐴒𐴡𐴌𐴥𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 ٬ 𐴉𐴡𐴄𐴤𐴟 𐴐𐴤𐴡𐴣𐴀𐴡 𐴀𐴞𐴐𐴤𐴞𐴘𐴝 𐴄𐴝𐴙𐴔𐴡𐴌 𐴈𐴥𐴡𐴁𐴡𐴌𐴡𐴃 𐴊𐴞𐴘𐴠 ٬ 𐴁𐴡𐴌𐴔𐴥𐴝𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴠 𐴀𐴝𐴌 𐴂𐴝𐴂𐴓𐴥𐴞𐴑 𐴔𐴝𐴌𐴞 𐴉𐴥𐴠𐴓𐴝𐴌𐴊𐴠 ٬ 𐴀𐴥𐴞𐴀𐴞𐴕 𐴁𐴡𐴕 𐴀𐴥𐴡𐴀𐴡 𐴉𐴥𐴝𐴀𐴝𐴕 ٬ 𐴁𐴡𐴌𐴔𐴥𐴝𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴁𐴠𐴏𐴡𐴀𐴡𐴕𐴡𐴃 𐴂𐴝𐴁𐴡𐴕𐴊𐴞 𐴊𐴞𐴀𐴞𐴁𐴡𐴓𐴧𐴝 ٬ 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴋𐴦𐴝𐴘𐴧𐴠 𐴊𐴟𐴕𐴞𐴘𐴝𐴘𐴌𐴥𐴠 𐴈𐴡𐴘𐴧𐴠 𐴱𐴱

Sources : RFA

𐴌𐴡𐴔𐴎𐴝𐴕 𐴔𐴥𐴝𐴐𐴡𐴌 𐴐𐴤𐴟𐴌𐴟𐴃 𐴉𐴥𐴞𐴃𐴌𐴝 𐴊𐴞𐴀𐴞𐴓𐴠 ٬ 𐴉𐴥𐴞𐴃𐴌𐴝 𐴀𐴝𐴊𐴝𐴘 𐴕𐴡 𐴀𐴥𐴡𐴘𐴁𐴡 ٬ 𐴀𐴝𐴓𐴧𐴝𐴇𐴌 𐴕𐴡𐴁𐴞 ( 𐴏𐴥𐴡𐴓𐴧𐴡𐴓𐴧𐴝𐴇𐴟 𐴀𐴝𐴓𐴝𐴘𐴇𐴠 𐴖𐴡 𐴏𐴥𐴡𐴓𐴧𐴡𐴔𐴠 ) 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴀𐴞𐴊𐴤𐴡𐴌 𐴕𐴟𐴖𐴝𐴏𐴢 𐴉𐴡𐴌𐴥𐴞𐴁𐴤𐴡𐴓𐴧𐴝 𐴎𐴝𐴘𐴁𐴝𐴌 𐴀𐴝𐴒𐴠 𐴉𐴥𐴞𐴃𐴌𐴝 𐴀𐴝𐴊𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 ٬ 𐴏𐴝𐴇𐴝𐴁𐴝 𐴀𐴥𐴡𐴑𐴧𐴡𐴓𐴠 𐴀𐴞𐴊𐴤𐴡𐴌 𐴀𐴠𐴑𐴊𐴞𐴕 𐴘𐴝𐴃𐴡 𐴊𐴟𐴘 𐴊𐴞𐴕 𐴀𐴝𐴒𐴠 𐴉𐴥𐴞𐴃𐴌𐴝 𐴀𐴝𐴊𐴝𐴘 𐴒𐴡𐴙𐴃𐴧𐴤𐴡 𐴱𐴱