𐴁𐴡𐴌𐴔𐴥𐴝𐴌 𐴌𐴝𐴏𐴧𐴝 𐴘𐴠 𐴓𐴝𐴓 𐴌𐴡𐴚 𐴓𐴡𐴘 𐴉𐴥𐴡𐴌𐴘𐴝𐴊 𐴒𐴡𐴌𐴥𐴠𐴌 𐴀𐴝𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌𐴠 𐴊𐴡𐴈𐴥𐴡𐴓 𐴊𐴞𐴀𐴞 𐴁𐴡𐴓𐴧𐴥𐴝 𐴈𐴡𐴀𐴡𐴌 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞 ٬ 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴂𐴥𐴠𐴒𐴤𐴟 𐴐𐴤𐴡𐴀𐴡𐴌𐴡𐴃 𐴆𐴝𐴓𐴞𐴐𐴢 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴘𐴥𐴝𐴕𐴡𐴌𐴥𐴠 𐴕𐴞𐴕𐴊𐴝 𐴒𐴡𐴌𐴥𐴞 ٬ 𐴔𐴠𐴓𐴠𐴄𐴠𐴌𐴞𐴌 𐴁𐴠𐴌𐴟𐴊𐴧𐴤𐴠 𐴇𐴥𐴡𐴌𐴃𐴝𐴓 𐴒𐴡𐴌𐴥𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴠 ٬ 𐴐𐴤𐴡𐴕𐴞 𐴁𐴝𐴌𐴠 𐴌𐴠𐴚𐴒𐴟𐴕𐴡𐴌 𐴌𐴝𐴏𐴧𐴝 𐴀𐴥𐴡𐴑𐴧𐴡𐴓𐴡 𐴌𐴥𐴠 𐴓𐴝𐴓 𐴌𐴡𐴚 𐴓𐴡𐴘 𐴌𐴡𐴚𐴝𐴘 𐴉𐴥𐴠𐴓𐴝𐴘𐴧𐴠 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴃 𐴀𐴝𐴏𐴥𐴠𐴊𐴠 𐴁𐴡𐴌𐴔𐴥𐴌 𐴕𐴡𐴔𐴝𐴙𐴕𐴊𐴝 / 𐴑𐴙𐴡 𐴔𐴡 𐴄𐴟𐴕𐴡 𐴌𐴥𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴱𐴱

𐴎𐴞𐴔𐴧𐴝𐴊𐴝𐴌𐴞𐴃𐴧𐴟 𐴉𐴥𐴠𐴓𐴝𐴘 𐴊𐴞𐴀𐴞 𐴁𐴝𐴊𐴠 𐴘𐴥𐴡 ٬ 𐴀𐴥𐴠 𐴑𐴙𐴡 𐴔𐴡 𐴄𐴟𐴕 𐴀𐴝𐴌 𐴁𐴡𐴌𐴔𐴥𐴝𐴌 𐴂𐴝𐴂𐴓𐴥𐴞𐴑 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴁𐴡𐴌𐴔𐴥𐴝𐴌 𐴔𐴝𐴀𐴝𐴔𐴠𐴓𐴝𐴃 𐴊𐴡𐴈𐴥𐴡𐴓 𐴊𐴞𐴀𐴞 𐴁𐴡𐴓𐴧𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴌𐴥𐴠 𐴀𐴝𐴂𐴞𐴓 𐴒𐴡𐴙𐴅𐴧𐴤𐴙𐴠 𐴱 𐴔𐴠𐴀𐴥𐴠𐴌𐴁𐴝𐴕𐴞 𐴒𐴡𐴌𐴥𐴞 𐴃𐴟𐴣𐴖𐴝𐴣𐴌𐴥𐴝 𐴁𐴡𐴀𐴡𐴘 𐴕𐴡 𐴃𐴤𐴝𐴙𐴑𐴧𐴙𐴡 ٬ 𐴀𐴝𐴌 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴗𐴔𐴡𐴌 𐴖𐴡𐴌𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴇𐴥𐴝𐴔𐴓𐴝 𐴒𐴡𐴌𐴥𐴠𐴌 𐴊𐴠 𐴀𐴥𐴞𐴀𐴞𐴕𐴡 𐴌𐴥𐴠 𐴁𐴡𐴕 𐴒𐴡𐴌𐴥𐴝𐴁𐴡 ٬ 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴊𐴡𐴀𐴡 𐴁𐴡𐴓𐴞 / 𐴑𐴙𐴡 𐴔𐴡 𐴄𐴟𐴕𐴥𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴌𐴠 𐴈𐴡𐴘𐴧𐴠 𐴱𐴱

𐴉𐴥𐴠𐴌𐴖𐴝𐴌 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴓𐴡𐴃𐴞 𐴂𐴝𐴂𐴓𐴥𐴞𐴑 𐴇𐴥𐴡𐴑𐴟𐴔𐴡𐴃 𐴉𐴥𐴠𐴓𐴝𐴘 𐴊𐴞𐴀𐴞 ٬ 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 ٬ 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴙𐴡𐴕𐴃𐴡 𐴉𐴡𐴙𐴃𐴧𐴡 𐴊𐴞𐴕 𐴇𐴥𐴡𐴌𐴃𐴝𐴓 ٬ 𐴏𐴥𐴞𐴘𐴝𐴏𐴞 𐴈𐴡𐴊𐴞 𐴀𐴥𐴡𐴑𐴧𐴡𐴓𐴌𐴠 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴙𐴝 𐴃𐴡𐴕𐴎𐴞𐴔𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 ٬ 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴙𐴡𐴕𐴃𐴡 𐴈𐴡𐴔𐴡𐴃 𐴸 𐴱 𐴶 𐴎𐴡𐴕 𐴇𐴥𐴡𐴌𐴃𐴝𐴓𐴞 𐴔𐴡𐴙𐴅𐴧𐴤𐴙𐴠 𐴱 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴙𐴝 𐴘𐴠 𐴈𐴡𐴘𐴧𐴠𐴊𐴠 ٫ 𐴉𐴥𐴠𐴌𐴖𐴝𐴌𐴞𐴌 𐴀𐴠𐴑 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴀𐴝𐴙𐴅𐴧𐴙𐴝 𐴓𐴡𐴃 𐴸 𐴴 𐴲 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴙𐴅𐴧𐴤𐴙𐴠 𐴱𐴱

𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴀𐴝𐴃𐴡𐴚𐴁𐴝𐴊𐴞 𐴱 𐴀𐴠 𐴊𐴤𐴞𐴒𐴧𐴤𐴞𐴕 𐴑𐴤𐴟𐴕 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴝𐴔𐴝𐴘 𐴉𐴥𐴠𐴓𐴝𐴘 𐴁𐴤𐴡𐴓𐴧𐴝 ٬ 𐴓𐴝𐴒𐴝𐴃𐴝𐴌 𐴇𐴥𐴡𐴌𐴃𐴝𐴓 𐴏𐴡𐴓𐴝𐴃 𐴀𐴝𐴏𐴥𐴠 𐴱 𐴌𐴠𐴚𐴒𐴟𐴕𐴡𐴌 𐴉𐴥𐴟𐴖𐴝𐴕 𐴔𐴝𐴎𐴤𐴠 𐴐𐴗𐴠𐴋𐴞𐴒𐴟𐴕 𐴎𐴝𐴊𐴞𐴌 𐴀𐴝𐴃𐴠 𐴈𐴝𐴣𐴏𐴥𐴠 ٬ ” 𐴓𐴝𐴓 𐴇𐴥𐴡𐴌𐴃𐴝𐴓 ” 𐴂𐴠𐴓𐴝𐴕 𐴁𐴝𐴕𐴝𐴘 𐴌𐴝𐴏𐴧𐴝 𐴁𐴠𐴒𐴧𐴤𐴟𐴓𐴧𐴥𐴝 𐴓𐴝𐴓 𐴌𐴡𐴚 𐴋𐴤𐴝𐴓𐴞 𐴓𐴝𐴓 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴱 ” 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴣𐴀𐴝𐴌𐴝 𐴌𐴠 𐴇𐴥𐴡𐴑𐴟𐴔𐴡𐴃 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞𐴁𐴡 ” 𐴁𐴡𐴓𐴞 𐴈𐴡𐴀𐴡𐴘 𐴂𐴟𐴏𐴄𐴝𐴌 𐴀𐴥𐴡𐴑𐴧𐴡𐴓 𐴓𐴠𐴑𐴤𐴞 ٬ 𐴌𐴠𐴚𐴒𐴟𐴕 𐴐𐴤𐴡𐴀𐴡𐴌𐴃 𐴁𐴠𐴒𐴧𐴤𐴟𐴓𐴧𐴥𐴝 𐴓𐴝𐴒𐴝𐴘 𐴊𐴞𐴘𐴧𐴠 ٬ 𐴀𐴝𐴌 𐴔𐴥𐴝𐴕𐴋𐴠𐴓𐴠𐴌 𐴉𐴥𐴟𐴖𐴝𐴕 𐴔𐴝𐴎𐴤𐴠 𐴀𐴝𐴏𐴥𐴠𐴊𐴠 / 𐴀𐴡𐴚𐴏𐴥𐴠𐴚𐴡𐴌 𐴐𐴡𐴑𐴤𐴡𐴓𐴡𐴌 𐴔𐴟𐴃𐴧𐴞𐴃 𐴀𐴥𐴡 𐴓𐴝𐴒𐴝𐴘 𐴊𐴞𐴘𐴧𐴠 𐴱𐴱

Sources : alhurra.com