𐴌𐴥𐴠𐴑𐴧𐴤𐴗𐴥𐴝 𐴀𐴥𐴡𐴑𐴧𐴡𐴓𐴡𐴃 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴕𐴡 𐴎𐴝𐴕𐴝𐴘 𐴓𐴥𐴠 𐴃𐴞𐴕 𐴁𐴡𐴏𐴥𐴡𐴌 𐴎𐴞𐴘𐴡𐴓𐴡𐴌 𐴊𐴤𐴡𐴔𐴑𐴞 𐴱𐴱

𐴌𐴠𐴚𐴒𐴟𐴕 𐴐𐴤𐴡𐴀𐴡𐴌𐴡𐴌 𐴁𐴤𐴟𐴃𐴡𐴌𐴡𐴌 𐴌𐴥𐴠𐴑𐴧𐴤𐴗𐴥𐴝 𐴀𐴥𐴡𐴑𐴧𐴡𐴓𐴡𐴃 ٬ 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴝𐴕𐴝𐴘𐴧𐴠𐴊𐴠 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴠 ٬ 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴕𐴡 𐴎𐴝𐴕𐴝𐴘 𐴓𐴥𐴠 𐴃𐴞𐴕 𐴁𐴡𐴏𐴥𐴡𐴌 𐴎𐴞𐴘𐴡𐴓 𐴊𐴞𐴀𐴞𐴁𐴡 𐴁𐴡𐴓𐴞 𐴈𐴡𐴘 𐴊𐴤𐴡𐴔𐴑𐴞 𐴊𐴞𐴘𐴝𐴃 𐴀𐴝𐴏𐴥𐴠 𐴁𐴡𐴓𐴞 ٬ 𐴌𐴠𐴚𐴒𐴟𐴕 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴒𐴡𐴌𐴁𐴝 𐴏𐴠𐴌𐴥𐴝𐴚 𐴈𐴥𐴝𐴔𐴝𐴈𐴥𐴝 𐴎𐴝𐴕𐴝𐴘 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴊𐴠 𐴘𐴥𐴝𐴕𐴡𐴌 𐴐𐴤𐴠𐴐𐴢 𐴀𐴥𐴟𐴣𐴐𐴞𐴘𐴝𐴌𐴞 𐴁𐴡𐴓𐴞 𐴔𐴝𐴙𐴑 𐴓𐴡𐴘 𐴈𐴡𐴀𐴡𐴌 ٬ 𐴀𐴝𐴌 𐴕𐴠𐴓𐴝 𐴒𐴤𐴡𐴓𐴝𐴌 𐴌𐴝𐴏𐴧𐴝 𐴘𐴥𐴡 𐴀𐴟𐴒𐴧𐴤𐴗𐴝 𐴁𐴡𐴓𐴞 𐴔𐴝𐴙𐴑𐴡𐴃 𐴈𐴡𐴀𐴡𐴌 𐴱 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴎𐴝𐴕𐴝𐴀𐴡𐴕𐴡𐴌 𐴑𐴝𐴕𐴟𐴕 / 𐴀𐴥𐴟 𐴏𐴥𐴠𐴕 𐴐𐴗𐴠𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴑𐴃𐴡𐴃 𐴓𐴡𐴃𐴞 𐴐𐴤𐴟𐴌𐴟 𐴀𐴥𐴡𐴘𐴧𐴠𐴊𐴠 ٬ 𐴔𐴡𐴕𐴃𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴓𐴡𐴘 𐴉𐴥𐴞𐴄 𐴀𐴝𐴌 𐴈𐴥𐴝𐴑 𐴕𐴡 𐴈𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱𐴱

𐴋𐴞𐴔𐴟𐴑𐴠𐴌𐴠𐴏𐴞 𐴉𐴝𐴄𐴞 ( 𐴀𐴠𐴕 𐴀𐴠𐴓 𐴋𐴞 ) 𐴇𐴥𐴡𐴑𐴟𐴔𐴡𐴃𐴠 𐴶 𐴱 𐴰 𐴲 𐴐𐴤𐴡𐴕𐴡𐴃 𐴑𐴝𐴕𐴟𐴕 𐴘𐴥𐴝𐴕 𐴁𐴝𐴃𐴞𐴓 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱 𐴁𐴦𐴝𐴊𐴠 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴦𐴟𐴂𐴢 𐴒𐴡𐴌𐴥𐴞 𐴘𐴡𐴌𐴠 ٬ 𐴑𐴝𐴕𐴟𐴕 𐴀𐴥𐴞𐴁𐴝 𐴉𐴥𐴞𐴃𐴞𐴕 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 ٬ 𐴕𐴡 𐴔𐴝𐴕𐴞𐴓𐴥𐴠 𐴊𐴡𐴐𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴎𐴡𐴌𐴞𐴁𐴝𐴕𐴝 𐴀𐴝𐴌 𐴇𐴥𐴝𐴣𐴃 𐴊𐴞𐴕 𐴎𐴞𐴘𐴡𐴓 𐴀𐴥𐴡𐴙𐴃 𐴉𐴝𐴌𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴉𐴟𐴌𐴝𐴕 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴡 𐴌𐴥𐴠 𐴉𐴥𐴠𐴓𐴝𐴘 𐴊𐴞𐴀𐴞 ٬ 𐴔𐴠𐴓𐴠𐴄𐴠𐴌𐴞 𐴌𐴥𐴠 𐴏𐴝𐴂𐴥𐴟𐴄 𐴒𐴡𐴌𐴥𐴠𐴊𐴠 𐴏𐴝𐴀𐴝𐴘 𐴏𐴝𐴀𐴝𐴘 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴁𐴝𐴕𐴝𐴘 𐴁𐴦𐴝𐴊𐴠 𐴱𐴱

𐴎𐴞𐴔𐴧𐴝𐴊𐴝𐴌𐴞 𐴁𐴡𐴌𐴝𐴁𐴡𐴌 𐴀𐴝𐴊𐴝𐴘 𐴒𐴡𐴌𐴥𐴠𐴊𐴠 𐴀𐴥𐴞𐴃𐴝𐴌𐴝𐴌𐴓𐴝 𐴁𐴡𐴐𐴧𐴤𐴞𐴐𐴢 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘 ٬ 𐴒𐴡𐴌𐴁𐴝 𐴏𐴠𐴌𐴥𐴝𐴚𐴡𐴌 𐴑𐴝𐴕𐴟𐴕𐴡𐴃 𐴒𐴤𐴡𐴓𐴝𐴘 𐴊𐴞𐴘𐴧𐴠 𐴱 𐴕𐴡 𐴔𐴝𐴕𐴞 𐴓𐴥𐴠 𐴇𐴥𐴝𐴣𐴃 𐴊𐴞𐴕 𐴎𐴞𐴘𐴡𐴓 𐴀𐴝𐴏𐴥𐴠 𐴈𐴡𐴀𐴡𐴙𐴓 𐴊𐴠 𐴎𐴝𐴒𐴝𐴃 ٬ 𐴀𐴝𐴙𐴅𐴧𐴙𐴝 𐴀𐴥𐴝𐴣𐴎𐴡𐴙𐴕𐴧𐴙𐴝 𐴃𐴞𐴕 𐴁𐴡𐴏𐴥𐴡𐴌 𐴎𐴞𐴘𐴡𐴓 𐴁𐴡𐴓𐴞 ٬ 𐴌𐴞𐴘𐴥𐴡𐴓𐴧𐴝 𐴈𐴡𐴀𐴡𐴌 𐴊𐴠 𐴘𐴥𐴝𐴕 𐴏𐴥𐴝𐴉𐴢 𐴒𐴡𐴌𐴞 𐴕𐴡 𐴎𐴝𐴕𐴥𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴒𐴡𐴌𐴁𐴝 𐴏𐴠𐴌𐴥𐴝𐴚 𐴎𐴝𐴕𐴝𐴘 𐴁𐴤𐴡𐴓𐴧𐴝 𐴊𐴤𐴡𐴔𐴑𐴞 𐴊𐴠𐴀𐴠𐴌 𐴊𐴠 ٬ 𐴘𐴥𐴝𐴕 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴟𐴓𐴋𐴝 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴊𐴤𐴡𐴌𐴞𐴁𐴤𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴠𐴌 𐴊𐴠 𐴁𐴡𐴓𐴞 𐴀𐴡𐴕𐴓𐴥𐴝𐴙𐴕𐴃 𐴀𐴝𐴕𐴃𐴝𐴎 𐴒𐴡𐴌𐴥𐴠𐴌 𐴱 𐴑𐴝𐴕𐴟𐴕 𐴔𐴡𐴎𐴞𐴕 𐴒𐴤𐴡𐴌 𐴏𐴠𐴌𐴥𐴝𐴚𐴡𐴃 𐴕𐴥𐴝𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴔𐴝𐴕𐴥𐴟𐴙𐴐𐴢 𐴌𐴝𐴙𐴃𐴧𐴙𐴝 𐴁𐴠𐴌𐴥𐴝𐴘𐴃𐴡 𐴒𐴞𐴀𐴞𐴓𐴥𐴠 ٬ 𐴈𐴥𐴝𐴔𐴝𐴈𐴥𐴝 𐴒𐴡𐴌𐴁𐴝 𐴏𐴠𐴌𐴥𐴝𐴚 𐴎𐴝𐴕𐴝𐴘 𐴊𐴞𐴘𐴝 𐴉𐴡𐴌𐴞𐴁𐴤𐴡 ٬ 𐴀𐴠𐴈𐴥𐴡𐴕𐴡𐴌 𐴇𐴥𐴝𐴓𐴡𐴃𐴡𐴃 𐴔𐴠𐴓𐴠𐴄𐴠𐴌𐴞𐴌 𐴀𐴟𐴓𐴋𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴡 𐴌𐴥𐴠 ٬ 𐴌𐴝𐴙𐴃𐴧𐴙𐴝 𐴓𐴡𐴌𐴝 𐴏𐴡𐴌𐴝 𐴒𐴡𐴙𐴓𐴧𐴙𐴠 𐴊𐴤𐴡𐴌𐴞 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠 𐴊𐴠 𐴀𐴝𐴏𐴥𐴠 𐴱𐴱

Sources : RFABurmese

S