𐴀𐴠𐴂𐴌𐴞𐴓𐴡𐴌 𐴳 𐴃𐴝𐴌𐴥𐴞𐴑𐴡𐴃 𐴁𐴞𐴊𐴠𐴐𐴤𐴞 𐴏𐴥𐴡𐴉𐴝𐴌𐴡𐴃𐴞 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴇𐴥𐴝𐴓𐴡𐴃 𐴏𐴝𐴘𐴃𐴡 𐴎𐴝𐴘𐴁𐴡 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴏𐴥𐴠𐴊𐴠 𐴏𐴥𐴡𐴉𐴝𐴌𐴡𐴃𐴞 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓 ٬ 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴒𐴝 𐴓𐴝𐴌𐴞 𐴌𐴝𐴙𐴑𐴧𐴤𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 ٬ 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴝𐴌 𐴀𐴥𐴠𐴍𐴠 𐴃𐴤𐴝𐴑𐴠𐴊𐴠 𐴀𐴝𐴌 𐴈𐴝𐴔 𐴒𐴡𐴌𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴁𐴡 𐴱 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 ٬ 𐴀𐴡𐴏𐴄𐴡𐴌𐴡𐴓𐴞𐴘𐴝𐴌 ٬ 𐴑𐴠𐴕𐴠𐴋𐴝𐴌 ٬ 𐴉𐴠𐴌𐴝𐴣𐴏𐴡𐴌 ٬ 𐴕𐴠𐴊𐴝𐴌𐴓𐴥𐴠𐴕𐴡𐴌 ٬ 𐴁𐴞𐴌𐴞𐴄𐴤𐴞𐴐𐴢 ٬ 𐴀𐴝𐴔𐴠𐴌𐴞𐴑𐴝 𐴀𐴝𐴌 𐴘𐴟𐴌𐴟𐴉𐴡𐴌 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓 𐴀𐴠𐴂𐴌𐴞𐴓𐴡𐴌 𐴳 𐴃𐴝𐴌𐴥𐴞𐴑𐴡𐴃 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃 𐴏𐴝𐴀𐴝 𐴏𐴞𐴃𐴤𐴝 𐴒𐴡𐴌𐴥𐴞𐴁𐴡 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴏𐴥𐴡𐴊𐴧𐴝𐴌𐴞 𐴒𐴡𐴌𐴥𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴀𐴝𐴌 𐴊𐴠 𐴄𐴞𐴀𐴞𐴔𐴡𐴌 𐴉𐴥𐴟𐴣𐴖𐴝𐴣𐴃𐴞 𐴐𐴤𐴡𐴌𐴞𐴑 𐴀𐴥𐴡𐴘𐴁𐴡𐴓𐴧𐴝 ٬𐴇𐴥𐴡𐴑𐴟𐴔𐴡𐴃𐴠 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴡𐴌𐴠 𐴊𐴝𐴖𐴡𐴃 𐴊𐴞𐴘𐴠𐴊𐴠 𐴱 𐴘𐴟 𐴀𐴠𐴕𐴡𐴌 𐴄𐴞𐴀𐴞𐴔 𐴔𐴝𐴌𐴠𐴆 𐴔𐴥𐴝𐴐𐴡𐴌 𐴷 𐴱-𐴰 𐴲 𐴔𐴝𐴎𐴤𐴠 𐴁𐴤𐴝𐴐𐴡𐴕 𐴏𐴡𐴌𐴡𐴌 𐴇𐴥𐴝𐴓𐴡𐴃 𐴏𐴝𐴘𐴃𐴡 𐴒𐴞𐴀𐴞𐴓 ٬ 𐴀𐴠𐴈𐴥𐴡𐴕 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓𐴡𐴌 𐴎𐴝𐴀𐴝𐴌 𐴱 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴎𐴝𐴀𐴝𐴌 𐴊𐴠 𐴔𐴞𐴐𐴤𐴞𐴕 𐴀𐴥𐴞𐴁𐴤𐴝𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴔𐴡𐴊𐴡𐴊 𐴒𐴡𐴌𐴥𐴠𐴊𐴠 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴑𐴠𐴙𐴏𐴧𐴟 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴝𐴕𐴥𐴟𐴙𐴐𐴢 𐴀𐴝𐴐𐴧𐴤𐴞𐴀𐴞𐴓 ٬ 𐴎𐴠 𐴃𐴝𐴌𐴥𐴝𐴃𐴧𐴟 ٬ 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 𐴊𐴞𐴘𐴠𐴊𐴠 𐴐𐴤𐴟𐴎𐴟𐴑 𐴐𐴤𐴟𐴁𐴞𐴊𐴤𐴝 𐴀𐴝𐴌 𐴈𐴝𐴔 𐴀𐴥𐴡𐴑𐴧𐴡𐴓 𐴏𐴝𐴘𐴁𐴝𐴌 𐴔𐴡𐴖𐴑𐴝 𐴀𐴥𐴡𐴘𐴁𐴡 𐴱𐴱

𐴑𐴡𐴁𐴤𐴞𐴋 𐴹 𐴱 𐴐𐴤𐴡𐴌 𐴂𐴡𐴌𐴡𐴄𐴟𐴑𐴟𐴓 ( 𐴌𐴟𐴊𐴝𐴊 ) 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴇𐴥𐴠𐴊𐴝𐴘𐴡𐴃 𐴀𐴝𐴌 𐴌𐴟𐴓 𐴔𐴡𐴎𐴞𐴕 𐴀𐴥𐴡𐴘𐴁𐴡 𐴁𐴡𐴓𐴞 𐴔𐴞𐴋𐴞𐴘𐴝 𐴘𐴠 𐴁𐴞𐴐𐴤𐴞𐴃 𐴁𐴝𐴌𐴠 𐴈𐴡𐴘𐴧𐴠 𐴱 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓 ٬ 𐴁𐴤𐴝𐴐𐴡𐴕 𐴏𐴡𐴌 𐴂𐴡𐴌𐴡𐴅𐴤𐴠𐴑𐴄𐴡𐴌 𐴁𐴝𐴁𐴡𐴃𐴠 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴋𐴝𐴘𐴓𐴡𐴑 𐴓𐴝𐴒𐴝𐴃𐴝𐴌 𐴌𐴝𐴑𐴤𐴞𐴁𐴤𐴝𐴌 𐴐𐴤𐴡𐴗𐴑 𐴀𐴝𐴌 𐴀𐴝𐴎𐴧𐴟 𐴌𐴝𐴑𐴤𐴠𐴌 ٬𐴀𐴥𐴠𐴕𐴋𐴞𐴓𐴧𐴝 𐴘𐴟 𐴀𐴠𐴕 𐴀𐴝𐴌 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠𐴊𐴠 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴘𐴥𐴡 ٬ 𐴏𐴝𐴘𐴃𐴤𐴡 𐴎𐴝𐴀𐴝𐴌 𐴏𐴡𐴉𐴥𐴡𐴌 𐴀𐴞𐴁𐴤𐴝𐴃 𐴈𐴡𐴃𐴤𐴝 𐴈𐴟𐴖𐴝 𐴈𐴡𐴘 𐴒𐴡𐴌𐴥𐴞𐴁𐴡 𐴱𐴱

𐴀𐴠 𐴉𐴡𐴓𐴥𐴡𐴏𐴞 𐴀𐴝𐴌 𐴄𐴠𐴑𐴕𐴞𐴑𐴠𐴓 𐴀𐴞𐴐𐴤𐴟𐴌 𐴁𐴝𐴁𐴡𐴃𐴠 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴘𐴟 𐴀𐴠𐴕 𐴓𐴡𐴘 𐴘𐴥𐴡 ٬ 𐴃𐴡𐴉𐴏𐴞𐴓𐴡𐴌 𐴏𐴥𐴝𐴣𐴀𐴝𐴃𐴠 𐴈𐴟𐴖𐴝 𐴈𐴡𐴘 𐴒𐴡𐴌𐴥𐴞𐴁𐴡 𐴱 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴊𐴞𐴀𐴞 𐴌𐴝𐴙𐴑𐴧𐴤𐴙𐴠𐴊𐴠 𐴀𐴠𐴑 𐴔𐴡𐴓𐴞𐴘𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 ٬ 𐴎𐴠𐴍𐴥𐴠 𐴑𐴤𐴟𐴀𐴟𐴂𐴢 𐴁𐴠𐴐𐴤𐴞 𐴁𐴝𐴌𐴥𐴝𐴃𐴀𐴥𐴡 𐴀𐴝𐴏𐴥𐴠 ٬ 𐴀𐴥𐴠𐴍𐴠 𐴒𐴤𐴞𐴐𐴢 𐴀𐴝𐴌 𐴎𐴝𐴔 𐴀𐴥𐴡𐴘𐴧𐴠𐴊𐴠 ٬ 𐴀𐴥𐴞𐴀𐴞𐴕𐴡𐴌𐴠 𐴉𐴝𐴃𐴡𐴓 𐴒𐴡𐴌𐴥𐴞𐴁𐴡𐴓𐴧𐴝 ٬ 𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴠 𐴀𐴠𐴑 𐴓𐴥𐴝𐴑 𐴓𐴡𐴃𐴞 𐴌𐴞𐴉𐴟𐴎𐴞 ٬ 𐴎𐴝𐴒𐴝 𐴓𐴝𐴌𐴞 𐴁𐴤𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴝𐴘 𐴌𐴝𐴑𐴤𐴞𐴁𐴡𐴓𐴧𐴝 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴠𐴊𐴠 𐴱𐴱

Sources : Dhakatribune