𐴸 𐴰 𐴰 𐴲 𐴐𐴤𐴡𐴕𐴡𐴌 𐴑𐴝𐴕𐴟𐴕 𐴁𐴝𐴃𐴞𐴓 𐴒𐴡𐴙𐴅𐴧𐴙𐴠 𐴁𐴡𐴓𐴞 ( 𐴏𐴞 𐴀𐴝𐴌 𐴂𐴞 𐴀𐴠𐴐𐴢 ) 𐴡𐴌 𐴀𐴠𐴓𐴝𐴕 𐴱𐴱

𐴊𐴠𐴐𐴤𐴡𐴌 𐴂𐴝𐴓𐴞𐴔𐴠𐴕𐴡𐴌 𐴕𐴡𐴔𐴝𐴙𐴕𐴊𐴝 𐴑𐴡𐴔𐴞𐴄𐴞 ( 𐴏𐴞 𐴀𐴝𐴌 𐴂𐴞 𐴀𐴠𐴐𐴢 ) 𐴀𐴞𐴁𐴤𐴝 𐴘𐴠 𐴸 𐴰 𐴰 𐴲 𐴐𐴤𐴡𐴕𐴡𐴌 𐴁𐴟𐴕𐴘𐴝𐴊𐴞 𐴑𐴝𐴕𐴟𐴕 𐴁𐴝𐴃𐴞𐴓 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱 𐴀𐴠 𐴸 𐴰 𐴰 𐴲 𐴐𐴤𐴡𐴕𐴡𐴌 𐴑𐴝𐴕𐴟𐴕𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌 𐴁𐴤𐴝𐴑 ٬ 𐴀𐴥𐴞𐴏𐴧𐴝 𐴇𐴥𐴡𐴑𐴟𐴔𐴡𐴃𐴡𐴃 𐴓𐴝𐴔𐴁𐴝 𐴀𐴡𐴑𐴃𐴡 𐴉𐴡𐴙𐴅𐴧𐴡𐴕𐴃𐴡 𐴃𐴤𐴝𐴑𐴞𐴁𐴤𐴝𐴌 𐴔𐴡𐴑𐴏𐴟𐴊 𐴓𐴡𐴘 𐴁𐴝𐴕𐴝𐴘𐴧𐴠𐴊𐴠 𐴘𐴥𐴝𐴕 𐴁𐴦𐴝𐴊𐴠 ٬ 𐴉𐴥𐴠𐴋𐴠𐴌𐴥𐴠𐴓 𐴋𐴞𐴔𐴟𐴑𐴠𐴌𐴠𐴏𐴞 𐴀𐴡𐴓𐴝 𐴊𐴠𐴐𐴢 𐴁𐴡𐴕𐴡𐴀𐴡𐴕𐴡𐴌 𐴌𐴝𐴏𐴧𐴝 ٬ 𐴏𐴥𐴝𐴉𐴢 𐴒𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴊𐴞𐴀𐴞 𐴉𐴥𐴠𐴓𐴝𐴘𐴧𐴠𐴊𐴠 𐴑𐴝𐴕𐴟𐴕 𐴁𐴡𐴓𐴞 𐴈𐴡𐴘 ( 𐴏𐴞 𐴀𐴝𐴌 𐴂𐴞 𐴀𐴠𐴐𐴠 ) 𐴀𐴠𐴓𐴝𐴕 𐴕𐴝𐴔𐴝𐴃 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴇𐴥𐴡𐴑𐴟𐴔𐴡𐴃 𐴈𐴝𐴌𐴥𐴞 𐴓𐴡𐴘𐴧𐴠𐴊𐴠 𐴘𐴥𐴝𐴕 ٬ 𐴸 𐴰 𐴰 𐴲 𐴐𐴤𐴡𐴕𐴡𐴌 𐴑𐴝𐴕𐴟𐴕 𐴁𐴤𐴝𐴚𐴞 𐴉𐴥𐴠𐴓𐴝𐴘 𐴒𐴡𐴙𐴅𐴧𐴙𐴠𐴊𐴠 𐴈𐴝𐴔 𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴀𐴝𐴙𐴅𐴧𐴙𐴝 𐴑𐴝𐴕𐴟𐴕 𐴀𐴥𐴞𐴁𐴝 𐴀𐴠𐴑𐴧𐴟𐴁𐴝𐴌𐴠 𐴁𐴤𐴝𐴚𐴞 𐴁𐴝𐴃𐴞𐴓 𐴒𐴡𐴌𐴥𐴞 𐴉𐴥𐴠𐴓𐴝 𐴒𐴞𐴘𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴀𐴠𐴑𐴀𐴥𐴞 𐴀𐴡𐴑𐴃𐴡𐴃 𐴀𐴠𐴑𐴧𐴟 𐴁𐴡𐴌𐴝𐴁𐴡𐴌 𐴀𐴝𐴎𐴝𐴊𐴝𐴕𐴝 𐴇𐴥𐴡𐴑𐴧𐴡𐴌 𐴒𐴠𐴌𐴥𐴝𐴕𐴄𐴤𐴞𐴌 𐴎𐴞𐴔𐴧𐴝𐴊𐴝𐴌 𐴁𐴡𐴕𐴠𐴊𐴠(𐴉𐴥𐴠𐴋𐴠𐴌𐴥𐴠𐴓 𐴋𐴞𐴔𐴟𐴑𐴠𐴌𐴠𐴏𐴞𐴌 𐴉𐴝𐴄𐴧𐴝 ) 𐴀𐴠𐴑𐴧𐴝𐴕 ٬ 𐴊𐴠𐴐𐴤𐴡𐴌 𐴕𐴡𐴔𐴝𐴙𐴕𐴊𐴝 𐴑𐴡𐴔𐴞𐴄𐴤𐴞 ( 𐴏𐴞 𐴀𐴝𐴌 𐴂𐴞 𐴀𐴠𐴐𐴠 ) 𐴀𐴝𐴙𐴅𐴧𐴙𐴝 𐴔𐴠 𐴔𐴥𐴝𐴐𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 𐴕𐴠𐴓𐴝𐴘 𐴊𐴞𐴘𐴠 𐴱𐴱

𐴑𐴟𐴌𐴞 𐴏𐴥𐴡𐴁𐴧𐴝 𐴀𐴡𐴓𐴝 𐴉𐴝𐴄𐴧𐴝 𐴘𐴥𐴝𐴕𐴡𐴃 ٬ 𐴁𐴤𐴟𐴍𐴥𐴠 𐴎𐴞𐴃𐴤𐴞 𐴁𐴡𐴙𐴕𐴧𐴙𐴠 𐴊𐴠 𐴂𐴝𐴓𐴞𐴔𐴠𐴕 𐴔𐴞𐴔𐴁𐴤𐴡𐴌 𐴀𐴥𐴡𐴑𐴧𐴡𐴓 ٬ 𐴏𐴞 𐴋𐴞 𐴀𐴠𐴔 𐴒𐴡𐴌𐴥𐴡𐴙𐴕𐴧𐴙𐴝 𐴂𐴝𐴂𐴓𐴥𐴞𐴑 𐴀𐴥𐴡𐴑𐴧𐴡𐴓 ٬ 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕 𐴔𐴞𐴓𐴝𐴘𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴏𐴥𐴝𐴉𐴢 𐴏𐴥𐴝𐴉𐴢 𐴒𐴡𐴌𐴥𐴞 𐴁𐴡𐴘𐴝𐴕 𐴒𐴡𐴌𐴥𐴞 𐴊𐴞𐴘𐴠 𐴱 𐴊𐴠𐴐𐴤𐴡𐴙𐴃𐴧𐴝 𐴁𐴠𐴒𐴧𐴤𐴟𐴕 𐴔𐴞𐴓𐴞 𐴇𐴥𐴡𐴑𐴟𐴔𐴡𐴃 𐴁𐴝𐴕𐴝 𐴉𐴡𐴙𐴅𐴧𐴙𐴡𐴕𐴃𐴡 ٬ 𐴃𐴦𐴡𐴙𐴃𐴧𐴝 𐴁𐴤𐴝𐴉𐴠 𐴊𐴟𐴘𐴀𐴡𐴔 𐴌𐴝𐴎𐴝 / 𐴔𐴥𐴠𐴣 𐴖𐴥𐴝𐴚 𐴑𐴝𐴙𐴚 𐴏𐴥𐴠𐴣 𐴘𐴠 𐴔𐴟𐴌𐴡𐴁𐴧𐴞𐴘𐴝𐴕𐴝 𐴒𐴡𐴌𐴠𐴌𐴊𐴤𐴠 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃 𐴉𐴝𐴄𐴞 𐴘𐴠 𐴊𐴠𐴐𐴤𐴡𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌𐴞 𐴓𐴝𐴒𐴝𐴃𐴝𐴌 𐴀𐴝𐴊𐴝𐴘 𐴒𐴡𐴌𐴥𐴞 𐴎𐴝𐴘𐴁𐴡 𐴁𐴡𐴓𐴞 𐴘𐴥𐴡 𐴏𐴞 𐴀𐴝𐴌 𐴂𐴞 𐴀𐴠𐴐𐴠 𐴈𐴡𐴘𐴧𐴠 𐴱 𐴐𐴤𐴡𐴕 𐴵 𐴱 𐴰 𐴲 𐴌𐴥𐴡𐴌 𐴁𐴤𐴟𐴍𐴡𐴃 𐴎𐴞𐴃𐴞𐴘𐴥𐴡𐴌𐴠 𐴇𐴥𐴡𐴑𐴟𐴔𐴡𐴃 𐴒𐴡𐴙𐴅𐴧𐴤𐴞𐴓𐴊𐴠 ٬ 𐴀𐴠𐴕 𐴀𐴠𐴓 𐴋𐴞𐴌 𐴔𐴟𐴊𐴧𐴡𐴃 𐴉𐴥𐴟𐴌𐴝𐴘𐴧𐴠𐴊𐴠 𐴀𐴝𐴙𐴅𐴧𐴙𐴝 𐴔𐴠 𐴔𐴥𐴝𐴐𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 ٬ 𐴊𐴠𐴐𐴤𐴡𐴌 𐴂𐴝𐴓𐴞𐴔𐴠𐴕𐴡𐴌 𐴕𐴡𐴔𐴝𐴙𐴕𐴊𐴝 𐴑𐴡𐴔𐴞𐴄𐴤𐴞 ( 𐴏𐴞 𐴀𐴝𐴌 𐴂𐴞 𐴀𐴠𐴐𐴠 ) 𐴐𐴤𐴡𐴕 𐴸 𐴰 𐴰 𐴲 𐴄𐴡𐴌 𐴑𐴝𐴕𐴟𐴕𐴡𐴌𐴥𐴠 𐴁𐴝𐴃𐴞𐴓 𐴒𐴡𐴌𐴥𐴞 𐴉𐴥𐴠𐴋𐴠𐴌𐴥𐴠𐴓 𐴋𐴞𐴔𐴟𐴑𐴠𐴌𐴠𐴏𐴞𐴌 𐴉𐴝𐴄𐴧𐴝𐴌 𐴀𐴠𐴓𐴝𐴕 𐴒𐴡𐴙𐴅𐴧𐴙𐴠𐴊𐴠 𐴱𐴱

Sources : RFABurmese