𐴊𐴟𐴕𐴞𐴘𐴝𐴘𐴌 𐴀𐴥𐴡𐴑𐴧𐴡𐴓𐴡𐴌 𐴋𐴡𐴣𐴀𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴡𐴀𐴡𐴙𐴕𐴡𐴌 𐴉𐴟𐴌𐴝 ٬ 𐴔𐴡𐴌𐴝 𐴁𐴝𐴌𐴥𐴞𐴁𐴡 𐴁𐴡𐴓𐴞 𐴋𐴡𐴌𐴝𐴌٬ 𐴌𐴟𐴝𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴷 𐴰 / 𐴱 𐴰 / 𐴳 𐴳 𐴲 𐴱 𐴌𐴟 𐴲 𐴲 / 𐴳 𐴰 / 𐴱 𐴲 𐴰 𐴲 𐴀𐴞𐴚 𐴐𐴤𐴡𐴔 𐴁𐴝𐴌𐴠 ٬ 𐴀𐴡𐴀𐴡𐴙𐴕 𐴊𐴤𐴡𐴌𐴞 𐴑𐴠𐴀𐴠𐴔𐴡𐴌 𐴒𐴤𐴡𐴌𐴡𐴌 𐴉𐴟𐴣𐴖𐴝𐴣𐴃𐴞 𐴉𐴟𐴌𐴞 𐴔𐴡𐴌𐴞 𐴒𐴞𐴘𐴡𐴘𐴊𐴠 ٬ 𐴔𐴟𐴌𐴊𐴝𐴌 𐴒𐴡𐴕𐴝 𐴁𐴝𐴌𐴥𐴞𐴁𐴤𐴡 𐴁𐴡𐴓𐴞 ٬ 𐴏𐴝𐴀𐴝𐴏𐴞𐴃𐴝 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴋𐴡𐴌𐴝𐴌 𐴱 𐴔𐴡𐴚𐴒𐴡𐴓𐴢 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴉𐴡𐴙𐴅𐴧𐴙𐴡𐴕𐴃𐴡 𐴇𐴥𐴝𐴣𐴃 𐴎𐴡𐴕 𐴓𐴡𐴃𐴞 ٬ 𐴔𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴀𐴝𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴉𐴟𐴌𐴞 𐴔𐴡𐴌𐴞𐴁𐴤𐴡 𐴁𐴡𐴓𐴞 𐴋𐴡𐴌𐴠 ٬ 𐴏𐴟𐴒𐴠 𐴎𐴞𐴀𐴞𐴑𐴧𐴙𐴝 𐴊𐴠𐴙𐴑𐴧𐴤𐴙𐴠 𐴒𐴞𐴘𐴠𐴒𐴤𐴡𐴘 𐴱 𐴏𐴟𐴒𐴢 𐴊𐴠𐴈𐴥𐴝 𐴒𐴡𐴁𐴤𐴝 𐴔𐴡𐴎𐴞𐴕 ٬ 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴌 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴘𐴠 𐴔𐴝𐴙𐴕𐴐𐴤𐴡𐴌𐴠 𐴓𐴟𐴏𐴧𐴝𐴕 𐴒𐴡𐴙𐴅𐴧𐴤𐴙𐴠 ٬ 𐴈𐴥𐴝𐴏𐴢 𐴒𐴡𐴌𐴞 𐴉𐴟𐴖𐴝𐴙𐴕𐴊𐴤𐴡𐴌𐴠 𐴱𐴱

𐴁𐴡𐴌𐴔𐴥𐴝𐴌 𐴎𐴟𐴓𐴟𐴔 𐴐𐴤𐴡𐴘 𐴕𐴡 𐴉𐴝𐴌𐴥𐴞 𐴷 𐴱 𐴰 𐴲 𐴐𐴤𐴡𐴕𐴡𐴃 ٬ 𐴑𐴠𐴀𐴠𐴔 𐴀𐴥𐴞𐴀𐴞𐴕𐴡𐴃 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴙𐴠 𐴱 𐴀𐴡𐴀𐴡𐴙𐴕𐴡𐴌 𐴎𐴡𐴌𐴞𐴘𐴝 𐴰 𐴴 – 𐴰 𐴵 𐴇𐴥𐴝𐴎𐴝𐴌 𐴔𐴝𐴙𐴕𐴐𐴤𐴡𐴌 𐴒𐴤𐴡𐴌 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠 𐴁𐴡𐴓𐴞 ٬ 𐴌𐴠𐴉𐴥𐴝𐴀𐴞 𐴈𐴝𐴔 𐴒𐴡𐴌𐴥𐴡𐴙𐴕𐴧𐴙𐴝 𐴀𐴥𐴡𐴑𐴧𐴡𐴓𐴠 𐴀𐴝𐴕𐴊𐴝𐴎 𐴒𐴡𐴌𐴠𐴌 𐴱 𐴒𐴤𐴡𐴌 𐴉𐴟𐴌𐴞 𐴎𐴝𐴘 𐴃𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 ٬ 𐴋𐴤𐴝𐴑𐴡𐴌 𐴑𐴠𐴀𐴠𐴔 ٬ 𐴀𐴠𐴒𐴠𐴕𐴝 𐴒𐴟𐴐𐴧𐴞 ٬ 𐴏𐴞𐴕𐴉𐴡𐴌𐴞𐴏𐴡 𐴉𐴥𐴟𐴣𐴖𐴝𐴣𐴙𐴅𐴧𐴙𐴝 𐴀𐴝𐴌 𐴀𐴞𐴐𐴑𐴟𐴓 𐴔𐴡𐴊𐴡𐴌𐴡𐴏𐴥𐴝𐴃 ٬ 𐴃𐴡𐴙𐴃𐴧𐴝 𐴃𐴤𐴝𐴙𐴑𐴧𐴙𐴠 𐴱 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴈𐴡𐴃𐴤𐴝 𐴔𐴡𐴎𐴞𐴕 ٬ 𐴎𐴠𐴃𐴡 𐴕𐴞𐴉𐴥𐴝𐴘𐴃𐴡 𐴏𐴝𐴀𐴝 𐴃𐴡𐴃𐴡 𐴀𐴡𐴀𐴡𐴙𐴕 𐴏𐴥𐴡𐴌𐴝𐴘 𐴎𐴝𐴒𐴤𐴡𐴘 ٬ 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴒𐴤𐴡𐴌 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴡 𐴱𐴱

𐴔𐴡𐴙𐴕𐴝 𐴈𐴝𐴃𐴟 𐴘𐴠 𐴁𐴞 𐴁𐴞 𐴏𐴞𐴌 𐴕𐴡𐴔𐴝𐴙𐴕𐴊𐴝 𐴌𐴥𐴠 𐴈𐴡𐴘𐴧𐴠𐴊𐴠 ٬ 𐴀𐴡𐴀𐴡𐴙𐴕 𐴀𐴝𐴃𐴤𐴞𐴑𐴧𐴙𐴝 𐴊𐴡𐴀𐴡𐴙𐴕 𐴋𐴤𐴝𐴑𐴡𐴃𐴧𐴟 𐴎𐴡𐴓𐴞 𐴀𐴟𐴙𐴄𐴧𐴤𐴙𐴠 ٬ 𐴐𐴤𐴟𐴌𐴟 𐴐𐴤𐴟𐴌𐴟𐴃 𐴕𐴞𐴉𐴥𐴝𐴘 𐴉𐴝𐴌𐴞𐴁𐴤𐴡 𐴁𐴡𐴓𐴞 ٬ 𐴒𐴤𐴡𐴌𐴡𐴃𐴧𐴟 𐴀𐴝𐴣𐴀𐴝𐴌𐴝 𐴑𐴠𐴙𐴏𐴧𐴥𐴟 𐴕𐴥𐴡 𐴓𐴡𐴘 ٬ 𐴇𐴥𐴡𐴄𐴝𐴃 𐴒𐴡𐴌𐴞 𐴀𐴝𐴃𐴤𐴞𐴑𐴧𐴙𐴝 𐴀𐴡𐴀𐴡𐴙𐴕 𐴏𐴥𐴠𐴌𐴝𐴘 𐴎𐴡𐴀𐴡𐴕𐴠 𐴑𐴠𐴙𐴏𐴧𐴥𐴟 𐴏𐴥𐴝𐴌𐴝 𐴋𐴤𐴝𐴑𐴡𐴌 𐴁𐴝𐴒𐴞𐴎𐴝 𐴀𐴟𐴒𐴧𐴤𐴗𐴝𐴃 𐴎𐴝𐴘 𐴈𐴡𐴕𐴥𐴡𐴁𐴡𐴃𐴠 𐴌𐴡𐴘𐴓𐴥𐴝𐴔٬ 𐴀𐴝𐴣𐴀𐴝𐴌 𐴁𐴡𐴐𐴤𐴡𐴃 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴇𐴥𐴡𐴄𐴝𐴃 𐴀𐴡𐴀𐴡𐴙𐴕 𐴏𐴥𐴡𐴌𐴝𐴘 𐴎𐴝𐴀𐴝 𐴒𐴡𐴘𐴊𐴠 𐴕𐴥𐴡 𐴊𐴠𐴑𐴤𐴞 𐴱 𐴐𐴡𐴁𐴠 𐴔𐴠𐴌𐴝𐴅𐴠 𐴁𐴞 𐴁𐴞 𐴏𐴞𐴌𐴠 𐴈𐴡𐴘𐴧𐴠𐴊𐴠 ٬ 𐴀𐴝𐴣𐴀𐴝𐴌 𐴉𐴟𐴃𐴡𐴌 𐴁𐴡𐴖𐴢 𐴇𐴥𐴝𐴔𐴞𐴓 𐴀𐴝𐴐𐴧𐴞𐴀𐴞𐴓 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴕𐴞𐴁𐴡𐴓𐴧𐴝 𐴀𐴝𐴣𐴀𐴝𐴌 𐴐𐴤𐴟𐴕𐴝 𐴒𐴤𐴞𐴕 𐴁𐴠𐴏𐴞 𐴉𐴥𐴠𐴓𐴝𐴘𐴓𐴝𐴔 ٬ 𐴀𐴠𐴈𐴥𐴡𐴕 𐴐𐴤𐴟𐴕𐴝 𐴘𐴥𐴡 𐴒𐴠𐴓𐴒𐴤𐴡𐴘 𐴁𐴡𐴖𐴧𐴝 𐴘𐴥𐴡 𐴀𐴥𐴝𐴣𐴎𐴝𐴘 𐴉𐴥𐴠𐴓𐴝𐴘𐴧𐴞 𐴱𐴱

Sources : BBCArabic