𐴌𐴟𐴇𐴝𐴙𐴚𐴒𐴙𐴝𐴌𐴢 𐴖𐴝𐴉𐴠𐴏𐴞 : 𐴁𐴝𐴚𐴓𐴐𐴊𐴠𐴐𐴤𐴠 𐴏𐴥𐴞𐴌𐴞 𐴓𐴡𐴚𐴑𐴝𐴌𐴢 𐴇𐴠𐴔𐴝𐴘𐴡𐴃𐴢 𐴏𐴝𐴘𐴧𐴠 𐴱𐴱

𐴔𐴥𐴟𐴔𐴠𐴕𐴠 𐴌𐴝𐴅𐴝𐴂𐴝𐴑𐴏𐴝𐴌𐴢 𐴓𐴡𐴘𐴢 𐴊𐴡𐴓𐴝 𐴀𐴥𐴡𐴘𐴢 ٬ 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌𐴢 𐴑𐴡𐴗𐴕𐴏𐴥𐴞𐴓𐴡𐴃𐴢 𐴁𐴤𐴟𐴄𐴢 𐴊𐴞𐴁𐴝𐴌𐴢 𐴇𐴠𐴔𐴝𐴘𐴡𐴃𐴢 𐴏𐴝𐴘𐴧𐴠 𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴢 𐴕𐴝𐴒𐴤𐴞 𐴈𐴝𐴍𐴥𐴝 𐴊𐴠𐴐𐴢 ٬ 𐴁𐴡𐴌𐴔𐴥𐴝𐴌𐴢 𐴀𐴝𐴌𐴑𐴝𐴕𐴡𐴃𐴢 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴥𐴝𐴘𐴢 𐴊𐴞𐴀𐴞𐴁𐴡𐴓𐴧𐴝 𐴁𐴝𐴚𐴓𐴝𐴊𐴠𐴐𐴤𐴠 𐴏𐴥𐴞𐴌𐴞 𐴓𐴡𐴚𐴑𐴝𐴌𐴢 𐴇𐴠𐴔𐴝𐴘𐴡𐴃𐴢 𐴏𐴝𐴘𐴧𐴠 𐴱 𐴁𐴝𐴚𐴓𐴝𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴋𐴝𐴑𐴄𐴡𐴌 𐴀𐴠 𐴑𐴠 / 𐴀𐴝𐴁𐴊𐴟𐴓 𐴔𐴥𐴟𐴔𐴠𐴕 ٬ 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴏𐴞𐴄𐴤𐴞 𐴇𐴥𐴡𐴄𐴡𐴓𐴡𐴃𐴢 ٬ 𐴏𐴥𐴞𐴌𐴞 𐴓𐴡𐴚𐴑𐴝𐴌 𐴁𐴡𐴌 𐴀𐴟𐴎𐴞𐴌 / 𐴔𐴝𐴇𐴞𐴕𐴋𐴝 𐴌𐴝𐴅𐴝𐴂𐴝𐴑𐴏𐴝 𐴓𐴡𐴘𐴢 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴀𐴥𐴠𐴍𐴠 ٬ 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴔𐴝𐴔𐴠𐴓𐴝 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴙𐴅𐴧𐴙𐴠𐴊𐴠 𐴱𐴱

𐴔𐴞𐴄𐴞𐴚𐴡𐴌 𐴁𐴦𐴝𐴊𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴁𐴝𐴌𐴢 𐴐𐴤𐴡𐴣𐴀𐴡𐴃𐴢 ٬ 𐴔𐴥𐴟𐴔𐴠𐴕𐴠 𐴈𐴡𐴘𐴧𐴠𐴊𐴠 ‘ 𐴘𐴝𐴕 𐴀𐴠𐴑𐴧𐴝𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴀𐴞𐴐𐴤𐴟 𐴀𐴥𐴞𐴏𐴝𐴉𐴠 𐴀𐴝𐴣𐴀𐴝𐴌𐴝 𐴀𐴠𐴑𐴔𐴡𐴃𐴢 𐴀𐴥𐴡𐴘𐴧𐴞 ٬ 𐴀𐴝𐴌 𐴁𐴠𐴐𐴤𐴞 𐴁𐴤𐴝𐴓𐴝 𐴀𐴥𐴡𐴘𐴁𐴡 ٬ 𐴎𐴡𐴊𐴞 𐴏𐴥𐴞𐴌𐴞 𐴓𐴡𐴚𐴑𐴝 𐴘𐴠 𐴊𐴟𐴏𐴃𐴡 𐴀𐴥𐴞𐴏𐴝𐴉𐴠 𐴁𐴡𐴌𐴔𐴥𐴝 𐴓𐴡𐴘𐴢 𐴘𐴝𐴕𐴡𐴌 𐴁𐴝𐴁𐴡𐴃𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴙𐴓𐴧𐴙𐴠 𐴱 𐴁𐴡𐴌𐴔𐴥𐴝𐴌 𐴃𐴡𐴌𐴉𐴡𐴌 𐴃𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴙𐴝 𐴐𐴤𐴝𐴊𐴝 𐴂𐴡𐴕𐴞 𐴀𐴝𐴌 𐴀𐴠𐴈𐴓𐴝𐴏𐴢 𐴉𐴝𐴀𐴝 𐴕𐴡 𐴎𐴝𐴀𐴝𐴌 𐴊𐴠 𐴀𐴥𐴠𐴃𐴡𐴓𐴧𐴝 ٬ 𐴀𐴝𐴙𐴅𐴧𐴙𐴝 𐴏𐴝𐴙𐴌 𐴁𐴡𐴏𐴥𐴡𐴌 𐴉𐴟𐴌𐴝𐴌٬ 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴊𐴧𐴝 𐴖𐴝𐴉𐴠𐴏𐴢 𐴁𐴡𐴌𐴔𐴥𐴝𐴃𐴢 𐴕𐴡 𐴎𐴝𐴀𐴝 𐴊𐴠 𐴘𐴥𐴝𐴕 ٬ 𐴀𐴝𐴁𐴊𐴟𐴓𐴢 𐴔𐴥𐴟𐴔𐴠𐴕𐴠 𐴏𐴥𐴞𐴌𐴞 𐴓𐴡𐴚𐴑𐴝𐴌 𐴁𐴡𐴌 𐴀𐴟𐴎𐴞𐴌𐴡 𐴌𐴥𐴠 𐴎𐴝𐴕𐴝𐴘𐴢 𐴊𐴞𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴠 𐴀𐴠𐴈𐴥𐴡𐴕 𐴑𐴝𐴑𐴏𐴢 𐴁𐴝𐴎𐴝𐴌 𐴀𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴔𐴞𐴓𐴝𐴘𐴢 ٬ 𐴀𐴠𐴑 𐴔𐴡𐴓𐴞𐴘𐴟𐴕 𐴀𐴠𐴑 𐴓𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴠 𐴏𐴥𐴝𐴀𐴝𐴌𐴝 𐴊𐴞𐴀𐴞 𐴌𐴝𐴑𐴧𐴙𐴠 𐴱 𐴁𐴠𐴀𐴠𐴐𐴢 𐴀𐴥𐴞𐴏𐴧𐴝 𐴌𐴟𐴇𐴝𐴙𐴚𐴒𐴙𐴝 ٬ 𐴁𐴡𐴌𐴔𐴥𐴝𐴌 𐴎𐴟𐴓𐴟𐴔 𐴐𐴤𐴡𐴘𐴢 𐴕𐴡 𐴉𐴝𐴌𐴥𐴞 𐴷 𐴱 𐴰 𐴲 𐴀𐴡𐴒𐴤𐴡𐴏𐴄𐴢 𐴔𐴥𐴝𐴐𐴡𐴃𐴢 𐴁𐴝𐴚𐴓𐴝𐴊𐴠𐴐𐴤𐴡𐴃𐴢 𐴉𐴝𐴌𐴥𐴝𐴘𐴧𐴠𐴊𐴠 𐴱 𐴔𐴥𐴟𐴔𐴠𐴕𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ، 𐴁𐴝𐴚𐴓𐴝𐴊𐴠𐴐𐴢 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌 𐴔𐴞𐴔𐴁𐴤𐴡𐴌 𐴀𐴥𐴞𐴏𐴝𐴉𐴠 ٬ 𐴁𐴝𐴚𐴓𐴝𐴊𐴠𐴐𐴤𐴠 𐴏𐴥𐴝𐴔𐴧𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌 𐴔𐴞𐴔𐴁𐴤𐴡𐴌 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴂𐴕𐴝𐴘𐴢 𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞𐴁𐴡𐴊𐴠 𐴏𐴥𐴞𐴓𐴏𐴞𐴓𐴝𐴃𐴢 ٬ 𐴏𐴥𐴞𐴌𐴞 𐴓𐴡𐴚𐴑𐴝 𐴌𐴥𐴠 𐴘𐴥𐴡 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌 𐴇𐴠𐴔𐴝𐴘𐴡𐴃𐴢 𐴒𐴡𐴌𐴥𐴞𐴁𐴡𐴓𐴧𐴝 𐴱 𐴃𐴡𐴀𐴡𐴘 𐴏𐴥𐴞𐴌𐴞 𐴓𐴡𐴚𐴑𐴝𐴌 𐴁𐴡𐴌 𐴀𐴟𐴎𐴞𐴌𐴠 𐴇𐴠𐴔𐴝𐴘𐴡𐴃𐴡𐴃 𐴁𐴤𐴟𐴄𐴢 𐴊𐴞𐴀𐴞 𐴁𐴡 𐴈𐴡𐴀𐴡𐴘 𐴁𐴞𐴐𐴧𐴤𐴝𐴐𐴢 𐴊𐴞𐴘𐴧𐴠 𐴱𐴱

Sources : Dhakatribune